“Tēvita mo Kolaiate,” Ngaahi Talanoa ʻo e Fuakava Motuʻá (2022)
“Tēvita mo Kolaiate,” Ngaahi Talanoa ʻo e Fuakava Motuʻá
1 Samuela 17
Tēvita mo Kolaiate
Ko e fetaulaki mo ha fuʻu faingata‘a lahi
Na‘e ʻohofi ‘e he kau Filisitiá e kau ʻIsilelí. Ko e pongipongi kotoa pē naʻe poleʻi ʻe ha saianiti Filisitia ko hono hingoá ko Kolaiate ha faʻahinga taha pē ʻo e kau ʻIsilelí ke tau mo ia. Na‘e lahi mo lōloa ange ʻa Kolaiate ʻi ha toe taha, pea naʻe anga-fītaʻa. Naʻá ne tui ʻa e teunga tau naʻe mamafa mo toʻo ha heletā, tao, mo e fuʻu pā lahi. Naʻe ʻikai ha taha ʻe loto-to‘a ke tau mo ia.
Ko Tēvitá ko ha tauhisipi kei talavou na‘á ne maʻu ha tui ki he ʻEikí. Na‘e sōtia ʻa hono ngaahi taʻoketé ʻi he kau tau ‘a e kau ʻIsilelí. ‘I ha ʻaho ‘e taha, ne ʻave ʻe Tēvita ha meʻakai ki hono ngaahi tokouá. ‘I he taimi naʻá ne a‘u atu ai ki he nofo kemi ʻa e kau taú, na‘á ne fanongo atu ki he pole ʻa Kolaiaté.
Na‘e ʻeke ange ʻe Tēvita ki he kau sōtiá pe ko e hā ʻoku ʻikai maluʻi ai ʻe ha taha ʻa ʻIsilelí. Na‘e ʻita ‘a hono ngaahi tokouá pea nau tala ange kiate ia ke ʻalu ʻo tokangaʻi ‘a e fanga sipí. Ka na‘e ʻilo ‘e Tēvita ʻe maluʻi ʻe he ‘Eikí ʻa ‘Isileli.
Na‘e ʻilo ʻe he Tu‘i ko Saulá kau ki he tui ‘a Tēvitá, ko ia naʻá ne kole ke sio kia Tēvita. Naʻe tala ange ʻe Tēvita kia Saula na‘e ʻikai ke ne ilifia ke tau mo Kolaiate. Na‘e fakamatala ange ʻe Tēvita ‘i he taimi ʻe taha ʻi heʻene tokangaʻi ‘ene fanga sipí, naʻá ne tāmate‘i ha laione mo ha pea. Naʻe malu‘i ia ʻe he ‘Eikí he taimi ko iá, pea naʻe ‘ilo ʻe Tēvita ‘e maluʻi ia ‘e he ʻEikí he taimí ni.
Na‘e ʻoange ʻe Saula hono teunga taú kia Tēvita. Ka na‘e ʻikai ke hao ia, ko ia naʻe toʻo ia ʻe Tēvita. Na‘á ne fili ke tau ʻo ʻikai tui hano teunga tau.
Naʻe tānaki ʻe Tēvita ha ngaahi fo‘i maka hamolemole ʻe nima pea faʻo ia ‘i ha kato. Na‘á ne toʻo ʻene maka-taá pea mo e tokotoko tauhisipí peá ne ‘alu ke fetaulaki mo Kolaiate.
‘I he sio ʻa Kolaiate kia Tēvitá, naʻá ne kaila mo manumanukiʻi ia. Na‘á ne pehē ʻe ʻikai lava ʻe ha kiʻi tamasi‘i tauhisipi ʻo ikunaʻi ia. Na‘e kaila atu ʻa Tēvita na‘á ne falala ki he ʻEikí ke ne malu‘i ia! Na‘e pehē ʻe Tēvita te ne ikunaʻi ʻa Kolaiate ke fakahaaʻi ‘a e mālohi lahi ʻo e ‘Eikí.
Na‘e lele ʻa Tēvita kia Kolaiate. Na‘á ne tolongi fakavave atu ha foʻi maka ʻaki ‘ene maka-taá. Na‘e tau e foʻi maká ʻia Kolaiate ‘i hono foʻi la‘é, pea naʻe tō ki he kelekelé ʻa e tangata lahí. Na‘e tokoniʻi ‘e he ʻEikí ‘a Tēvita ke ne ikuna‘i ʻa Kolaiate ʻo ʻikai ha heletā pe teunga tau.
‘I he sio e kau Filisitiá naʻe mate ʻa Kolaiaté, naʻa nau hola ‘i he manavahē. Na‘e ikuna ‘e he kau ʻIsilelí ʻa e taú. Na‘e falala ʻa Tēvita ki he ‘Eikí, pea naʻe malu‘i ʻe he ‘Eikí ʻa ‘Isileli.