“Ko Hono Fakatupu ‘o e Māmaní,” Ngaahi Talanoa ʻo e Fuakava Motuʻá (2022)
“Ko Hono Fakatupu ‘o e Māmaní,” Ngaahi Talanoa ʻo e Fuakava Motu‘á
Sēnesi 1–2; Mōsese 1–3; ʻĒpalahame 3–5
Ko Hono Fakatupu ʻo e Māmaní
Ko ha ‘api fakaʻofo‘ofa maʻá e fānau ‘a e Tamai Hēvaní
Naʻe fakahā ʻe he ʻOtua ko ʻetau Tamai Hēvaní ʻi he langí, ʻa e palani ʻo e fakamoʻuí. Na‘a tau kalanga kotoa ʻi he fiefia! Te tau lava ʻo haʻu ki he māmaní ke ma‘u ha sino fakamatelie. Lolotonga ʻa ʻetau ‘i he māmaní, te tau ako ai ke muimui ki he ‘Alo ʻo e ‘Otuá, ko e ʻEiki ko Sīsū Kalaisí. Na‘e fakatupu ʻe he ‘Eikí ʻa e māmaní ʻo muimui ki he ngaahi fakahinohino ‘a e ʻOtuá.
Sēnesi 1:1; Siope 38:4–7; Mōsese 1:32–33; 2:1; ʻĒpalahame 3:22–27
ʻI he ʻaho ʻuluakí, naʻe fakamavaheʻi ʻe he ʻEikí ʻa e māmá mei he fakapoʻulí. Na‘á Ne ui ʻa e māmá ko e ‘aho pea mo e fakapoʻulí ko e pō.
Sēnesi 1:3–5; Mōsese 2:3–5; ʻĒpalahame 4:1–5
‘I he ʻaho hono uá, na‘á Ne vaheʻi ‘a e ngaahi vaí ʻi he vaha‘a ʻo e ngaahi konga ‘ao ʻi he langí pea mo e ngaahi vai ʻi he māmaní.
Sēnesi 1:6–8; Mōsese 2:6–8; ʻĒpalahame 4:6–8
‘I he ʻaho hono tolú, na‘e faʻu ʻe he ʻEikí e ngaahi fuʻu vai lalahi mo e kelekele mōmoa. Na‘á Ne fakahingoa ʻa e ngaahi vaí ko e tahi mo e kelekele mōmoá ko e fonua. Na‘á Ne ngaohi ke fakaʻofo‘ofa ʻa e fonuá ʻaki ʻa e ngaahi matalaʻi‘akaú, fuaʻi‘akaú, ʻakau īkí, mo e ʻakau lalahí.
Sēnesi 1:9–13; Mōsese 2:9–13; ʻĒpalahame 4:9–13
‘I he ʻaho hono faá, na‘á Ne fakatupu ʻa e la‘aá ke ulo ‘i he lolotonga ʻo e ʻahó. Hili ia na‘á Ne fakatupu ʻa e māhiná mo e ngaahi fetu‘ú ke nau ulo ʻi he poó.
Sēnesi 1:14–19; Mōsese 2:14–19; ʻĒpalahame 4:14–19
ʻI he ʻaho hono nimá, na‘e fakatupu ʻe he ‘Eikí ʻa e ika ‘i he tahí mo e fanga manupuna ʻi he langí. Na‘á Ne tāpuakiʻi ‘a e ngaahi meʻamoʻuí ke nau fakatokolahi pea tāpuakiʻi ‘a e iká ke fakafonu ʻa e ngaahi vaí.
Sēnesi 1:20–23; Mōsese 2:20–23; ʻĒpalahame 4:20–23
‘I he ʻaho hono onó, na‘á Ne fakatupu ʻa e fanga monumanu ‘i he fonuá, ko e niʻihi na‘e lue mo e niʻihi naʻe totolo.
Sēnesi 1:24–25; Mōsese 2:24–25; ʻĒpalahame 4:24–25
Naʻe hāʻele hifo ʻa e Tamai Hēvaní mo e ‘Eikí ki he māmaní ‘i he ʻaho hono onó. Naʻe fakatupu ʻa e tangatá mo e fefiné ʻi he tatau ʻo e ʻOtuá. Na‘e folofola ʻe he Tamai Hēvaní ke na fetauhi‘aki pea ma‘u ha fānau. Naʻe tuku foki ki he tangatá mo e fefiné ke na tokangaʻi ʻa e kelekelé mo e fanga monumanú.
Sēnesi 1:26–27; Mōsese 2:26–27; ʻĒpalahame 4:26–31; 5:7–8
Na‘e hōifua ʻa e Tamai Hēvaní i he me‘a kotoa pē naʻá Na fakatupú. ‘I he ʻaho hono fitú, ne Na mālōlō mei He‘ena ngaahi ngāue kotoa pē. Na‘e fakaʻofo‘ofa ʻa e māmaní mo fonu ʻi he mo‘uí.