“Siosefa ʻi ʻIsipité,” Ngaahi Talanoa ʻo e Fuakava Motuʻá (2022)
“Siosefa ʻi ʻIsipité,” Ngaahi Talanoa ʻo e Fuakava Motuʻá
Ko Siosefa ʻi ʻIsipité
Ko e hoko ʻa ha pōpula ko ha takí
Naʻe fakatau pōpula ʻa Siosefa ki ha tangata ko Pōtifā. Naʻe ngāue ʻa Pōtifā maʻa Felo, ko e pule ʻo ʻIsipité. Naʻe lava ke tala ʻe Pōtifā naʻe tokoniʻi ʻe he ʻEikí ʻa Siosefa. Naʻá ne falala kia Siosefa pea tuku ia ke ne tokangaʻi hono falé mo e meʻa kotoa pē naʻá ne maʻú.
Naʻe saiʻia e uaifi ʻo Pōtifaá ʻia Siosefa. Naʻá ne fie maʻu ke maumauʻi ʻe Siosefa e ngaahi fekau ʻa e ʻEikí mo ia. Naʻe talaange ʻe Siosefa ʻikai.
Naʻe ʻikai fie fanongo e uaifi ʻo Pōtifaá, ko ia, naʻe hola leva ʻa Siosefa. Naʻá ne ʻita kia Siosefa.
Naʻá ne fakaʻaliʻali ange kia Pōtifā ha konga ʻo e vala ʻo Siosefá. Naʻá ne loi kia Pōtifā ʻo kau kia Siosefa. Naʻe tuku pōpula ʻe Pōtifā ʻa Siosefa.
Naʻe fakamavaheʻi ʻa Siosefa mei hono fāmilí. Kuó ne hoko ko ha pōpula, pea kuó ne nofo fale pōpula ʻeni. Ka naʻe kei tokoniʻi pē ʻe he ʻEikí ʻa Siosefa. Naʻe ʻikai loto-foʻi ʻa Siosefa. Naʻe tāpuakiʻi ʻe he ʻEikí e leʻo ʻo e fale fakapōpulá ke ne fakatokangaʻi e lelei ʻa Siosefá. Naʻe kamata ke falala kiate ia ʻa e tangata leʻó, ko ia naʻá ne tuku ʻa Siosefa ke tokangaʻi e kau pōpula kehé.
Naʻe fetaulaki ʻa Siosefa mo ha ongo pōpula, ko ha tangata taʻo mā mo ha tauhi lahi, ʻa ia naʻe ngāue maʻa Felo. Naʻá na fakatou maʻu ha misi faikehe. Naʻe fakamatalaʻi ʻe Siosefa ʻi he mālohi ʻo e ʻEikí ʻa e ʻuhinga ʻo ʻena ngaahi misí. Naʻe ʻuhinga e misi ʻa e tangata tauhi lahí ʻe fakatauʻatāinaʻi ia. Hili ha ʻaho ʻe tolu mei ai, naʻe fakatauʻatāinaʻi ia ke toe ngāue maʻa Felo.
ʻI ha ʻaho ʻe taha naʻe loto mamahi ʻa Felo ʻi heʻene ngaahi misí. Naʻe ʻikai lava ʻe ha taha ʻo talaange kiate ia ʻa e ʻuhinga ʻo ʻene ngaahi misí.
Naʻe manatuʻi leva ʻe he tangata tauhi lahí ʻa e lava ʻa Siosefa ke fakaʻuhingaʻi e ngaahi misí.
Naʻe ʻomi ʻa Siosefa mei he fale fakapōpulá ke fakamatalaʻi e ngaahi misi ʻa Feló. Naʻe pehē ʻe Siosefa, naʻe ʻuhinga e ngaahi misí ʻe ʻi ai ha taʻu ʻe fitu ʻo ʻIsipite ʻe lahi ʻaupito ai e meʻakaí pea ʻe hoko atu ai ha taʻu ʻe fitu ʻo e honge pea siʻisiʻi ʻaupito ʻa e meʻakaí. Naʻe talaange ʻe Siosefa kia Felo ʻoku totonu ke tānaki ʻe ʻIsipite ha meʻakai lahi ange lolotonga e ngaahi taʻu leleí.
Naʻe ʻiloʻi ʻe Felo naʻe moʻoni ʻa e meʻa ne talaange ʻe Siosefa fekauʻaki mo ʻene ngaahi misí. Naʻá ne fakatauʻatāinaʻi ʻa Siosefa mei he fale fakapōpulá pea fokotuʻu ʻa Siosefa ko ha taki maʻongoʻonga ʻi ʻIsipite. Naʻe tokoni ʻa Siosefa ʻi ha taʻu ʻe fitu ke tānaki ha meʻakai lahi ʻi ʻIsipite.
Pea naʻe hokosia leva ʻa e hongé. Lolotonga e taimi ko ʻení, naʻe ʻikai lava ʻe ha taha ʻo tō ha faʻahinga meʻakai. Naʻe fononga e kakaí ki ʻIsipite ke fakatau e meʻakai naʻe tānaki ʻe Siosefá. Koeʻuhí ko Siosefa, naʻe tānaki ai ʻe he kau ʻIsipité ha meʻakai feʻunga ke tokoniʻi kinautolu mo e niʻihi kehé ke hao mei he hongé.