Talateu kia Filimoné
Ko e hā ‘Oku Ako ai e Tohí Ni?
ʻOku maʻu ʻi he Tohi kia Filimoné ha faleʻi fakafoʻituitui mei he ʻAposetolo ko Paulá kau ki ha meʻa naʻe hoko ki he pōpula ʻa Filimone ko ʻOnesimosi. ʻI hoʻo ako ʻa e tohi ko ʻení, te ke ʻilo ko e taimi ʻoku kau mai ai ʻa e kakaí ki he Siasi ʻo Sīsū Kalaisí, ʻoku nau hoko ko e kāinga ʻi he ongoongoleleí (vakai Filimone 1:16). ʻE lava foki ke ke ongoʻi ai ʻa e mahuʻinga ʻo e ngafa ʻi he kau ākonga ʻa Sīsū Kalaisí ke nau ʻofa mo fakamolemoleʻi ʻa e niʻihi kehé (vakai Filimone 1:16–17).
Ko Hai Naʻá Ne Hiki e Tohí Ni?
Ko Paula naʻá ne hiki ʻa e Tohi kia Filimoné (vakai Filimone 1:1).
Naʻe Tohi Ia ‘Anefē pea ‘i Fē?
Naʻe teuteuʻi ʻe Paula ʻa e Tohi kia Filimoné he lolotonga ʻa e fuofua nofo pōpula ʻa e ʻAposetoló ʻi Lomá, fakafuofua ki he T.S. 60–62 (vakai Filimone 1:1, 9; Fakahinohino ki he Ngaahi Folofolá, “Paulá, Ngaahi Tohi ʻA,” scriptures.lds.org).
Ko Hai Naʻe Fakataumuʻa Ki Ai Hono Hikí Pea Ko e Hā Hono ʻUhingá?
“Ko e tohi kia Filimoné ko ha tohi fakafoʻituitui pē ia ʻo kau kia ʻOnesimosi, ʻa ia ko ha pōpula ʻa ia naʻá ne kaihaʻa mei hono ʻeikí ko Filimone, pea hola ia ki Loma” (Fakahinohino ki he Ngaahi Folofolá, “Paulá, Ngaahi Tohi ʻA,”). Mahalo ko ha tokotaha Kiliki ʻa Filimone ne ului pea naʻe nofo ʻi Kolose (vakai Kolose 4:9). Naʻá ne tali ha kulupu kāingalotu ʻo e Siasí ke nau lotu ʻi hono ʻapí (vakai Filimone 1:2, 5). Hili ʻene holá, ne kau atu ʻa ʻOnesimosi ki he Siasí pea hoko ai “ko e tokoua ʻofeina … [ʻi he] ʻEikí” (Filimone 1:16; vakai Filimone 1:10–12).
Naʻe tohi ʻa Paula kia Filimone ke poupouʻi ia ke tali ke foki atu ʻa ʻOnesimosi ko ha tokoua ʻi he ongoongoleleí ʻo ʻikai toe fai ki ai ʻa e ngaahi tautea mamafa ʻoku faʻa hilifaki ki he kau pōpula holá (vakai Filimone 1:17). Ne aʻu pē ki he kole ʻe Paula ke ne totongi fakafoki ʻa e mole fakapaʻanga ne hoko kia Filimone koeʻuhí ko ʻOnesimosí (vakai Filimone 1:18–19).
Ko e Hā Ha Ngaahi Fakaʻilonga ʻOku Hā Mahino Mai ʻi he Tohí Ni?
Ko Filimone ʻa e tohi nounou taha pea mahalo ko e tohi fakafoʻituitui taha ia ʻi he ngaahi tohi ʻa Paulá. Ko ha tohi ia ki ha fakafoʻituitui; pea ʻi heʻene pehē ʻoku ʻikai lahi ai ngaahi meʻa fakatokāteline. Neongo iá, ʻoku fakahaaʻi mai ʻi he kole ʻa Paula kia Filimone ke fakalelei mo e pōpula ko ʻOnesimosí ʻa e founga ʻoku fakaʻaongaʻi ai ʻa e ongoongoleleí ʻi he moʻui fakaʻahó—pea ʻoku hā mai ʻi he meʻa ne hoko ko ʻení, ʻoku ʻomi kitautolu ʻi hotau vā mo Sīsū Kalaisí ki ha vā fakafāmili mo e kau muimui kotoa ʻo Kalaisí ʻo fakamamafaʻi ai ʻa e mahuʻinga ʻo e ʻofá mo e fakamolemolé.
Fokotuʻutuʻú
Filimone 1. ʻOku fakamālōʻia ʻe Paula ʻa Filimone ki he ʻofa kuó ne fai ki he Kāingalotú. ʻOkú ne fakamatala ki he ului ʻa ʻOnesimosi, ko e pōpula ʻa Filimoné, ki he ongoongoleleí. Ne kole ʻe Paula kia Filimone ke ne tali ke foki ange ʻa ʻOnesimosí ko hono tokoua ʻi he ʻEikí. ʻOkú ne kole ke ne totongi kia Filimone ha mole fakapaʻanga ne hoko koeʻuhí ko e meʻa ne fai ʻe ʻOnesimosí.