Talateu ki he 2 Tesalonika
Ko e hā ‘Oku Ako ai e Tohí Ni?
ʻI he Tohi Hono Ua ʻa Paula ki he Kakai Tesaloniká, naʻá ne faleʻi mo fakamahino ki he kāingalotu ʻo e Siasí ne hala ʻenau maʻu ki he ngaahi meʻa ʻe niʻihi kau ki he Hāʻele ʻAngaua Maí ʻa Sīsū Kalaisí. ʻE lava ke tokoniʻi koe ʻi hoʻo ako ʻene ngaahi akonakí ke mahino ʻa e natula ʻo e hē mei he moʻoní ʻa ia naʻe hokó pea mo e founga ke ke mateuteu feʻunga ai ki he hāʻele mai ʻa e ʻEikí.
Ko Hai Naʻá Ne Hiki e Tohí Ni?
Ko e ʻAposetolo ko Paulá naʻá ne hiki ʻa e 2 Tesaloniká (vakai 2 Tesalonika 1:1; vakai foki 2 Tesalonika 2:5; 3:17). ʻOku maʻu foki ʻi he kamataʻanga ʻo e tohí ha pōpoaki meia Sailosi mo Tīmote (2 Tesalonika 1:1).
Naʻe Tohi Ia ‘Anefē pea ‘i Fē?
“Naʻe fai ʻe Paula ʻa e tohi ki he kau Tesaloniká mei Kolinitō lolotonga ʻene fononga fakafaifekau hono uá,” fakafuofua ki he T.S. 50–51 (Fakahinohino ki he Ngaahi Folofolá, “Paulá, Ngaahi Tohi ʻA,” scriptures.lds.org).
Ko Hai Naʻe Fakataumuʻa Ki Ai Hono Hikí Pea Ko e Hā Hono ʻUhingá?
Naʻe hiki ʻe Paula ʻa e 1 Tesaloniká ki he kāingalotu ʻo e Siasí ʻi Tesaloniká. ʻOku faitatau pē ʻa e kaveinga ʻo e 1 Tesaloniká mo e 2 Tesaloniká, ʻo hangē ko ʻene tohi ʻa e 2 Tesaloniká ke fakamahino mo fakalahi ʻa e ʻuluaki tohí. ʻOku hangē naʻe maʻu ʻe he kakai Tesaloniká ha tohi loi naʻe pehē ko e ʻomi meia Paula, pea makatuʻunga ai ha tui ʻa ha niʻihi kuo ʻosi hoko ʻa e Hāʻele ʻAngaua Maí (vakai 2 Tesalonika 2:2).
“Naʻe fekuki ʻa e Siasí mo ha fakatanga ʻi he vahaʻa taimi nounou hono hiki ʻo e ongo tohí [vakai 2 Tesalonika 1:4]; naʻe fakatupu ʻe he fakakaukau ʻoku ofi ʻa e hāʻele mai ʻa e ʻEikí ha hohaʻa naʻe ʻikai lelei [vakai 2 Tesalonika 2:2]” (ʻi he Bible Dictionary, “Pauline Epistles”). Naʻe tohi ʻe Paula ʻa e 2 Tesaloniká ke lava ʻo fakamālohia e tui ʻa e kāingalotu ko ʻení peá ke fakatonutonu ʻa e ngaahi maʻuhala fakatokāteliné.
Ko e Hā Ha Ngaahi Fōtunga Makehe ʻo e Tohí Ni?
ʻOku lahi ʻa e fakaikiiki ʻoku ʻomi ʻi he Tohi Hono Ua ki he Kakai Tesaloniká fekauʻaki mo e Hāʻele ʻAngaua Mai ʻa Sīsū Kalaisí. ʻOku kau ai ʻa e ngaahi fakakaukau ʻe hāʻele mai ʻa e ʻEikí ʻi he “afi uloulo” pea ʻe “tautea [ʻa e angahalá] ʻaki ʻa e fakaʻauha taʻengata mei he ʻao ʻo e ʻEikí” (2 Tesalonika 1:8–9).
ʻOku tau laukonga ʻi he tohí ni ki hono toe kikiteʻi ʻe Paula ʻa e Hē Fakaʻaufuli Mei He Moʻoní, ʻo akoʻi mai ʻe tomuʻa hoko ha “liliu kovi” mei he ongoongoleleí ʻi he Siasí kimuʻa pea hoko ʻa e Hāʻele ʻAngaua Mai ʻa e ʻEikí (vakai 2 Tesalonika 2:2–12). ʻOku fakamanatu ʻe he ngaahi akonaki ʻa Paula fekauʻaki mo e Hē Mei he Moʻoní ki he kāingalotu ʻo e Siasí e ʻuhinga naʻe ʻaonga ai hono Toe Fakafoki Mai ʻa e Ongoongoleleí ʻi he ngaahi ʻaho kimui ní.
Fokotuʻutuʻú
2 Tesalonika 1. ʻOku fakafeʻiloaki mo fakamālōʻia ʻe Paula ʻa e Kāingalotu ʻi Tesaloniká. ʻOkú ne akoʻi ʻe aʻusia ʻe he kakai angahalá ʻa e tautea ʻa e ʻEikí ʻi he Hāʻele ʻAngaua Maí.
2 Tesalonika 2. ʻOku fakatonutonu ʻe Paula ʻa e fakakaukau hala naʻe pehē kuo ʻosi hoko ʻa e Hāʻele ʻAngaua Maí, peá ne kikiteʻi ʻe tomuʻa hoko ha hē mei he moʻoní ki muʻa pea hāʻele mai ʻa e ʻEikí. ʻOkú ne poupouʻi ʻa e Kāingalotu ʻi Tesaloniká ke nau tui mateaki maʻu ai pē.
2 Tesalonika 3. ʻOku faleʻi ʻe Paula ʻa e kāingalotu ʻo e Siasí ke nau ngāue ke feau ʻenau ngaahi fie maʻu fakatuʻasinó pea ʻoua naʻa fiu ʻi he fai leleí.