Tapura ohipa
Te mau pû
Te tahi mau haamaramaramaraa i roto i teie buka, ua ravehia mai ïa mai roto mai i te tahi mau buka e ere i te papa‘iraa mo‘a tei faaitehia i raro nei.
Titionare Bibilia i roto i te nene‘iraa a te feia mo‘a i te mahana hopea nei i te Bibilia papa‘ihia e te Arii Iakobo(1979)
Iakobo E. Talmage, Iesu te Mesia Te toru o te nene‘iraa (1916)
Te mau haapiiraa a te peropheta Iosepha Semita, ma‘itiraa na Joseph Fielding Smith [1976], 365).
Na te taata tai‘o
Ua papa‘i-taa ê-hia te mau aamu no te Faufaa Apî no outou. Ua ravehia mai te mau aamu no roto mai i te hoê buka mo‘a. Ia tai‘o ana‘e outou i te reira mau aamu, a haamana‘o e, e aamu ïa no te mau taata tei ora na e râ ê te tau.
A tai‘o i te mau aamu na ni‘a iho noa e ite maitai roa’tu outou i te reira. E nehenehe atoa ta outou e tai‘o i te reira i roto i te Bibilia. I raro a‘e i te rahiraa o te mau hoho‘a, e ite outou i te mau faahororaa o te faaite mai ia outou e i hea e itehia ai te reira aamu i roto i te Bibilia e aore râ, te tahi atu mau buka. A ani i to outou metua tane, metua vahine, orometua haapii, e aore râ, hoê hoa ia tauturu mai ia outou i te imiraa i te aamu i roto i te mau papa‘iraa mo‘a.
Mai te mea e, aita outou i ite i te auraa o te hoê parau, a imi i roto i te tuhaa ra « Te mau parau e ti‘a ia ite » i muri i te buka. Mai te mea e, e hinaaro outou ia rahi atu to outou ite no ni‘a i te hoê vahi, a hi‘o i roto i te tuhaa « Te mau vahi e ti‘a ia ite ». Mai te mea e, aita outou i ite e o vai tera taata, a imi ia’na i roto i te tuhaa ra « Te mau taata e ti‘a ia ite ». Te vai atoa ra i roto i teie buka te hoê tuhaa no te mau hoho‘a no te tahi mau vahi i roto i te Fenua Mo‘a e te hoê reni tau no te Faufaa Apî.
Na te mau Metua e te mau Orometua Haapii
E nehenehe teie buka e tauturu ia outou ia haapii i te mau papa‘iraa mo‘a. A faaohipa i te tuhaa « Te mau parau e ti‘a ia ite », « Te mau vahi e ti‘a ia ite », e « Te mau taata e ti‘a ia ite » no te tauturu i te mau tamarii ia matau i te reira mau parau, te reira mau taata e te reira mau vahi i roto i teie buka. Te vai ra te tahi atu mau tauturu i roto i teie buka, oia ho‘i, te mau hoho‘a fenua, te mau hoho‘a, e te hoê reni tau.
Ia haapii outou, a faaite i to outou iteraa papû no ni‘a i te Bibilia. A faaitoito i te mau taata ta outou e haapii nei ia titau na roto i te pure i to ratou iteraa papû no ni‘a i te mau papa‘iraa mo‘a e no ni‘a i te Faaora ia Iesu Mesia. E tupu rahi atu te iteraa o te mau taata ta outou e haapii nei mai te mea e, e tai‘o outou i ta ratou mau aamu au roa i roto i te Bibilia.