Pene 24
Ua faati‘ahia mai te tamahine a Iaeiro mai te pohe mai
Ua parau o Iaeiro e, e ma‘i rahi ta ta’na tamahine 12 matahiti te paari. Ua taparu oia ia Iesu ia haere mai e ia haamaitai ia’na. Ua ti‘aturi oia e nehenehe ta Iesu e haamaitai atu â.
Ua haamata a‘e ra Iesu i te pee ia Iaeiro i to’na ra utuafare, tera ra ua faaea a‘e ra Oia no te faaora i te hoê vahine. A paraparau noa ai Oia i taua vahine ra, haere maira te hoê taata e parau ia Iaeiro e, ua taere roa—ua pohe ta’na tamahine.
Ua faaroo râ Iesu i taua parau ra. Ua parau atu ra Oia ia Iaeiro eiaha e mata‘u ia ti‘aturi râ Ia’na.
E i muri iho, haere atu ra Iesu e o Iaeiro i te fare o Iaeiro. Ua î roa te fare i te taata te ta‘i ra i te mea e, ua pohe te tamahine iti.
Ua parau atu ra Iesu ia ratou e, aita te tamahine i pohe te taoto ra râ. Vahavaha maira te taata Ia’na ra. Ua papû ho‘i ia ratou e, ua pohe mau te tamahine.
Ua ani atu ra te Faaora i te mau taata atoa ia haere i rapae i te fare eiaha râ ta’na mau pĭpĭ, o Iaeiro e te vahine a Iaeiro. Tomo atu ra ratou i roto i te piha tei reira te tamahine iti i te taravaraa.
Rave maira Iesu i te rima o te tamahine iti. Parau atu ra ia’na ia ti‘a i ni‘a. Ua ti‘a maira oia i ni‘a e hahaere a‘e ra. Ua maere to’na na metua. Ua parau atu ra Iesu ia ratou eiaha e faaite i te hoê taata i te ohipa i tupu ra. E ua parau atu ra Oia i to’na na metua ia horo‘a te tahi maa amu na te tamahine.