Cornelius ac Kawuck Lal Eis Nguhn Muhtahl

Wosasuc el ma nuh sin mwet nuhkwewa

Cornelius ac sucu lal ah kahsruh sie mwet enenuh.

Cornelius el mwet kol se ke solse luhn acn Rome. El ac sucu lal ah luhlahlfongi ke God, tuhsruhk eltahl tiac mwet Jew ac tiac etuh ke Jisus Kraist. Cornelius el akacsruhi ke ma oasr yohrohl nuh sin mwet suhkahsruhp ac pruhe nuh sin God inkaiyen pacl uh.

Orekma 10:1–2

Sie tahfuhn lwen tok ah, lipufacn se tuhkuh nuh yohrohl Cornelius ke pacl se el lalo ac pruhe. Lipufacn sac fahk, “Cornelius, God el insewowo ke pre lom.” God El liye kuhlwacng lom. Lipufacn sac fahk nuh sel Cornelius elan sokwack Mwet Sap Peter, suc muhta ke siti se pahngpahng Joppa. Peter el fah fahk ma Cornelius elac oruh.

Orekma 10:3–6, 30–32

Cornelius el sap mwet kuhlwacnsap lal ah in konwaclwack Peter.

Cornelius el fahk nuh sin mwet kuhlwacnsap lal ah ma lipufacn sac fahk ah. El suhpwacltahllah nuh Joppa in siyuck Peter elan tuhkuh muhtwacta.

Orekma 10:7–8

Fin acn Joppa, Peter el muhta fin lohm sac pruhe. El tuh masrinsrwacllah ac ahkolah in mongo, ke kihtin pacl ah el,liye sie aruhruhma.

Orekma 10:9–10

Peter el liye luhman sie kahot luhlahp koeyucklac lucng me, sesseslah ke kain in ma orahkrahk nuhkwewa ac won. Na Peter el lohng sie puhsra fahk elan kang ma orahkrahk ingoh. Tuhsruhk ma orahkrahk inge tiac lwelah mwet Jew in kang. Masap lal Moses fahk muh eltahl tiacna nwacsnwacs. Peter el tuh sruhnga kang.

Orekma 10:11–14

Puhsra sac fahk muh God El fin ahknwacsnwacsyelah sie ma, tiac enenuh in fwack muh tiac nwacsnwacs. Aruhruhma sac kalweniyuck pacl tolu. Peter el motko lah meac kalmac.

Orekma 10:15–17

Puhsra se fahk nuh sel Peter elan som ohsun nuh sin mwet kuhlwacnsap lal Cornelius ah.

Tohkohyang, Nguhn sac fahk nuh sel Peter lah mwet tolu pa sokol ngi. “Welultal som,” Nguhn El fahk, “nga pa supwaltalma uh.”

Orekma 10:16–21

Peter el sramsram yurin mwet kuhlwacnsap lal Cornelius ah.

Mwet tolu ac mwet kuhlwacnsap lal Cornelius. Eltahl sruhmuhn nuh sel Peter ke lipufacn se Cornelius el tuh liye ah ac siyuck lah Peter el kuh in tuhkuh lotwel. In pwacyeiyac uh Mwet Jew tiacna lwelah in utyak nuhhke lohm sin mwet ma tiac mwet Jew, ac Mwet Sap ah tiacna luti nuh selos ke wosasuc. Tuhsruhk esamwack aruhruhma se lal ah, Peter el sulaclah in som.

Orekma 10:22, 28

Peter el ohsun nuh sel Cornelius ac sucu ac kawuck lal ah.

Ke Peter el sun acn we, Cornelius el tuh sanwel wi kawuck puhkantwen ac mwet in sucu lal. El fahk nuh sel Peter lah eltahl ahkolah in lohng oacna sie ma God El sapkihn nuh sel in fahk nuh seltahl.

Orekma 10:26, 33

Ingena Peter el etuh lah meac God El luti nuh sel ke aruhruhma sac. Peter el fahk nuh selos nuhkwewa lah God El tiac luhngse muhtuhnfacl se yohk liki muhtuhnfacl se sahyac ah. God El eis elos nuhkwewa ma fahsr Tohkohl ac oruh ma wo. Peter el lotwel Cornelius ac sucu ac kawuck lal ke Jisus Kraist.

Orekma 10:34–43

Peter el pacptaiselah sucu ac kawuck lal Cornelius ah.

Ke el luti ac, Nguhn Muhtahl tuhkuh nuh yurin mwet nuhkwewa ma lohng ah. Peter el solwacltahl in pacptaislac ke inen Jisus Kraist. Peter el lotwelah lah tuhlihk nuhkwewa nuhtin God sukohsohk in tuhkuh nuhke Alu luhn Jisus Kraist. Wosasuc luhn Jisus Kraist tuh lutiyuck nuh sin mwet nuhkwewa.

Orekma 10:44–48