John 11:1–46

Jisus El Fohlohkohnohlwack Lazarus El Sifilpac Moulyak

“Nga pa moulyak, ac moul”

Mary, Martha, ac Lazarus elos muhta ke siti se pahngpahng Bethany. Eltahl luhlahlfongi kacl Jisus, ac El luhngse eltahl. Mary ac Martha elos tahmtahmel wiyacl Lazarus.

John 11:1, 5

Lazarus el maswack na upac. Jisus el oasr ke siepacna siti sahyac. Mary ac Martha suhpwaclah kahs nuh Sel in etuh lah kawuck se Lal inge arulacna mas.

John 11:1–3

Jisus el tuhpan lwen luo. Tohkoh El fahk nuh sin mwet tuhma lutlut lal lah elos ac som nuh fin acn Bethany. Mwet tuhma lutlut lal ah elyah ke srihpen kuhtuh sin mwet ma muhta oasr sisken acn Bethany ke ahkngalyacl Jisus. Tuhsruhk Jisus el ke kahsrwel Lazarus. Jisus el fahk lah Lazarus el misac tari, ac El ac fohlohkohnohlwack elan sifilpac moulyak.

John 11:6–16

Martha el sonuhl Jisus lihkihn siti sac. El fahk lah fin Jisus el sa na tuhkuh, Lazarus el ac tiac misac. Jisus El olwelah muh Lazarus el ac sifilpac moulyak.

John 11:17–24

Jisus el fahk, “Nga pa moulyak, ac moul.” El siyuck sel Martha lah el luhlahlfongwel. El topuk fahk, “Nga luhlahlfongi lah kom pa Kraist, Wen nuhtin God.”

John 11:25–27

Martha el fohlohk nuhke lohm selos ac fahk nuh sel Mary lah Jisus el tuhkuh. Mary el tuhkuh ac puhtati nuhke niyacl Jisus, ac tuhngi ke tamuhlwel wiyacl. Jisus el tuhng pac. El luhngse Lazarus, Mary, ac Martha.

John 11:28–36

Jisus, Martha, Mary, ac kuhtuh pac sahyac som nuhke luhf se ma Lazarus el puhkpuhki kac ah. Yot na luhlahp se kohsrwaclah acn in utyak sac. Jisus el sap in itucklac yot sac.

John 11:38–39

Tuhsruhk Martha el fahk nuh sel Jisus lah Lazarus el misac lwen ahkosrlac tari. Jisus el ahkacsmakuhnuhl Martha ke olwelah Lal. El siyuck Martha elan luhlahlfongwel.

John 11:39–40

Tohkoh na Jisus el pruhe nuh sin Pahpah tuhmwacl. El kuloh kaksakihn God ke el lohngohl pacl nuhkwewa uh. Jisus el kena tuh mwet uh in luhlahlfongi lah God el Suhpwaclma in ekihn Mwet Lahngo lasr. Na Jisus el fahk, “Lazarus, ilme.”

John 11:41–43

Lazarus el tufoklac liki luhf sac. El srwackna pihnpihnlac ke nuknuk ac kahot ma el tuh puhkpuhki kac ah. Jisus el fahk mwet ah in eslah nuknuk ma puhnuhllah ah. Puhkantwen sin mwet ma liye ke ma sikyak ke lwen se inge luhlahlfongwel Jisus lah el pa Mwet Lahngo, Wen nuhtin God.

John 11:44–45