Sramsram Ke Ma Suhmuhslah
Jisus El Utyak nuh Jerusalem—Mwet uh pain Mwet Lahngo lalos

Matthew 21:1–16

Jisus El Utyak nuh Jerusalem

Mwet uh pain Mwet Lahngo lalos

Mwet uh tuhpanuhk Jisus lihkihn acn Jerusalem in ohsun nuh sel.

Apkuhranyang pacl nuhke Passover, sie toeni yohk srihpac sin mwet Jew uh. Puhs mwet som nuh Jerusalem nuhke Passover se inge. Jisus ac mwet tuhma lutlut Lal som pac. Ke mwet uh lohng lah Jisus el ac tuhkuh, elos som in ohsun nuh Sel.

Matthew 21:1; John 12:12–13

Jisus ac mwet tuhma lutlut Lal apkuhran nuh Jerusalem.

Ke Jisus ac mwet tuhma lutlut Lal apkuhran nuh Jerusalem, El siyuck selos in use soko donkey ah nuh Sel. Yac puhs met, mwet pahluh se tuh fahk lah Mwet Lahngo lac fah tuhkuh ke inse puhsisacl, ac muhta fin donkey soko.

Matthew 21:1–7; liye pac Zechariah 9:9

Jisus el utyak nuh Jerusalem.

Jisus el utyak nuh Jerusalem fin soko donkey. Mwet uh arulacna engan in Liyacl. Elos Eisacl oacna tohkohsrah se. Elos sang lwesahk ac laknwelihk nuknuk sang loaclah inkacnek uh donkey soko ah in fahsr kac. Elos kaksakihn God ac wowoyak fahk, “Hosanna: Insewowo El suc pa Tohkohsrah luhn Israel suc tuhkuh ke inen Leum.”

Matthew 21:8–9; Luke 19:36–38; John 12:13

Mwet uh liyacl Jisus.

Puhs mwet Jerusalem nuhnkuh lah meac sikyak. “Suc mwet se inge?” elos asiyucki. Kuhtuh mwet sahyaclos topuk fahk lah el pa Jisus luhn Nazareth.

Matthew 21:10–11

Jisus el liye mwet uh kuhka ac moul lun tempuhl uh.

Tohkoh, Jisus el som nuh in tempuhl ah. Kuhtuh sin mwet uh moul ac kuhka kosro mwe kihsackihnyuck. Jisus el etuh lah elos tiac pwacye.

Matthew 21:12

Jisus el fahk nuh sin mwet moul ah in som liki tempuhl uh.

Jisus el tiacna luhngse lah elos orek mani sin mwet ma kena in oruh ahkfuhlwact lalos lun tempuhl uh. El oruh elos som liki tempuhl uh ac el topyekuhnlah tepuh lalos uh. El fahk, “Tempul luk ac fah pahngpahng iwen pre; a kowos oru nien wikla lun mwet pisrapasr.”

Matthew 21:12–13; liye pac Isaiah 56:7; Jeremiah 7:11

Jisus el onwelah mwet lun tempuhl.

Mwet ma kun kuh tiac kuh in fahsr tuhkuh nuh yohrohl Jisus nuh in tempuhl uh, ac El onweloslac. Tuhlihk srihsrihk elos wowoyak fahk “Hosanna,” ac kaksakuhnuhl Jisus ac fahk lah El pa Mwet Lahngo.

Matthew 21:14–15

Jisus el sramsram nuh sin mwet tol ac mwet sihm.

Kuhtuh sin mwet tol ac mwet sihm ah elos kasrkuhsrak ke elos liye ma Jisus el oruh ac lohng ma tuhlihk srihsrihk ah fahk ah. Jisus el ahkacsmakuhnuhlos ke sie fohs in ma suhmuhslah ma fahk lah God el oruh kaksak suwohs uh tuhkuh liki inwaclun tuhlihk srihsrihk uh.

Matthew 21:15–16; liye pac Psalm 8:2