Chʼol 32
Li lajetqil ut li mayej
Xtojbʼal li lajetqil ut li mayej
-
Wi wan qachʼool chixtojbʼal li lajetqil ut li mayej, chanru naxkʼut aʼin chiru li qaChoxahil Yuwaʼ naq naqabʼantioxi chixjunil li nokorosobʼtesi wiʼ?
Kʼeebʼilebʼ qe li taqlahom re qatenqʼankiil chixkawresinkil qibʼ saʼ chixjunil re naq tooruuq chi wank rikʼin li qaChoxahil Yuwaʼ. Aʼan kixkʼe qe jun li naʼlebʼ li naru naqabʼantioxi wiʼ chiru Aʼan li osobʼtesink naqakʼul. Xtojbʼal li lajetqil lut li mayej chi anchal qachʼool, aʼan jun rehebʼ li naʼlebʼ nokobʼantioxin wiʼ chiru. Rikʼin xtojbʼal li mayej aʼin, yooko chixkʼutbʼal chiru li Dios naq naqara Aʼan ut naq tooʼabʼinq chiru li naʼlebʼ naxkʼe.
-
Chan ru naq xtojbʼal li lajetqil ut li mayej nokoxtenqʼa chi bʼantioxink chiru li qaChoxahil Yuwaʼ?
Xpaabʼankil li chaqʼrabʼ re li lajetqil
-
Kʼaʼru jun li lajetqil tiik?
Saʼ najter kutan, laj Abrahan ut laj Jakob keʼxpaabʼ li taqlahom naq teʼxtoj choqʼ lajetqil lix lajetq raqal li kʼaʼru keʼxkʼul (chiʼilmanq Hebreos 7:1–10; Genesis 14:19–20; 28:20–22).
Saʼ li kutan wanko wiʼ, laj Jose Smith kixpatzʼ rikʼin tijok: “At Qaawaʼ kʼut chiru laa moos joʼ nimal re li kʼaʼru rehebʼ laa tenamit nakatenebʼ chi kʼeemank choqʼ lajetqil” (Tz. ut S. 119, xtiklajik li jun tasal). Li Qaawaʼ kixsume: “Aʼinaq xtiklajik lix kʼulbʼal xlajetqilebʼ lin tenamit. Ut chirix aʼan, ebʼ li xeʼkʼuleʼ xlajetqil chi joʼkan teʼxtoj lix lajetq raqal chixjunil lix kʼiijikebʼ rajlal chihabʼ; ut aʼin taawanq choqʼ xaqxookil chaqʼrabʼ chiruhebʼ chi junelik” (Tz. ut S. 119:3–4). Li Xbʼeenil Awaʼbʼejil xeʼxye naq “lix lajetq raqal chixjunil lix kʼiijikebʼ” yoo chi aatinak chirix li qatojbʼal (chiʼilmanq li hu taqlahonbʼil xbʼaan li Xbʼeenil Awaʼbʼejil, 19 Marzo, 1970).
Naq naqatoj li lajetqil, yooko chixkʼutbʼal naq tiiko chixpaabʼankil li Qaawaʼ. Yooko ajwiʼ chixkʼutbʼal chiruhebʼ li qalal qakʼajol chan ru xloqʼalil li chaqʼrabʼ aʼin. Ebʼ aʼan teʼraj xbʼaanunkil joʼ laaʼo ut teʼraj xtojbʼal xlajetqil li tumin nekeʼxkʼul.
-
Chan ru naq li lajetqil mas wiʼchik nawan choqʼ jun li naʼlebʼ chirix li paabʼaal chiru jun naʼlebʼ chirix li tumin?
-
Kʼaʼru naru teʼxbʼaanu li naʼbʼej yuwaʼbʼej re xtzolbʼalebʼ lix kokʼal re teʼxtoj li lajetqil ut teʼxtaw ru lix aajelil ru?
Tento tookʼehoq chi anchal qachʼool
-
Chan ru naq tento taawanq li qachʼool naq naqatoj li lajetqil?
Aajel ru naq tookʼehoq chi anchal li qachʼool. “Naq naxtoj junaq lix lajetqil chi moko sa ta saʼ xchʼool, namaqʼeʼ chaq jun raqal li osobʼtesink chiru. Tento tixtzol kʼehok rikʼin sahil chʼoolejil, chi anchal xchʼool ut chi sa li raam, ut taaʼosobʼtesiiq li maatan naxkʼe” (Stephen L. Richards, The Law of Tithing [chʼina hu, 1983], perel 8).
Li Apostol aj Pablo kixye naq li chan ru nokokʼehok juntaqʼeet xwankil rikʼin li kʼaʼru naqakʼe. Aʼan kixye: “Li junjunq chixkʼehaq joʼ nimal naʼalaak saʼ xchʼool, inkʼaʼ chi kabʼ rix xchʼool chi moko chi minbʼilaq ru, xbʼaan naq li Dios naxra li nasihok chi sa saʼ xchʼool” (2 Korintios 9:7).
-
Kʼaʼru naraj naxye choqʼ aawe li “sihok chi sa saʼ xchʼool”?
Li lajetqil ut xkomon chik li mayej
-
Chan ru naq li Iglees naroksi li lajetqil ut xkomonebʼ chik li mayej?
Joʼ komon saʼ li Iglees, laaʼo naqakʼe li lajetqil ut xkomonebʼ chik li mayej re li Qaawaʼ.
Lajetqil
Kʼiila paay li kʼanjel naʼoksiman wiʼ li lajetqil saʼ li Iglees. Aʼan aʼin junjunq li kʼanjel naʼok wiʼ:
-
Xkabʼlankil, xtusubʼankil, ut xkʼanjelankilebʼ li santil ochoch, li chʼutlebʼaal, ut xkomonebʼ chik li kabʼl.
-
Xkʼeebʼal li tumin li taakʼanjelaq rehebʼ li oqech, li teep, ut xkomonebʼ chik li jar chʼutam re li Iglees. (Ebʼ li chʼutam aʼin nekeʼroksi li tumin re xkʼanjelakilebʼ li jar paay chi kʼanjel kʼeebʼil xbʼaanebʼ laj jolominel re li Iglees, saʼ li wan wiʼ xkʼutbʼal li evangelio ut xkʼuubʼankil li nabʼaanuman saʼ komonil.)
-
Xtenqʼankil lix kʼanjel li jultikank aatin.
-
Xtzolbʼalebʼ li saaj winq ut ixq saʼebʼ li tzolebʼaal, li seminario, ut instituto re li Iglees.
-
Xyiibʼankil ut xjekʼinkil li hu choqʼ re li tzolebʼaal.
-
Xtenqʼankil li kʼanjel re sikʼok xeʼtoonil, ut re li santil ochoch.
Xkomonebʼ chik li mayej
Li mayej re li kuyuk saʼ. Ebʼ li komon saʼ li Iglees nekeʼxkuy xsaʼ rajlal po, rikʼin naq nekeʼxkanabʼ tzakemq ut ukʼaʼ chiru wibʼ sut reeqaj ribʼ. Nekeʼxkubʼsi xtzʼaq li xeʼxtoj raj re xloqʼbʼal li tzakemq aʼan. Naru teʼxkʼe chik li tumin aʼ yaal joʼ xnaabʼalil li naru chiruhebʼ. Li mayej aʼin, aʼan li mayej re li kuyuk saʼ yeebʼil re. Ebʼ li obiisp nekeʼroksi li mayej re li kuyuk saʼ re xkʼeebʼal li tzakemq, li muhebʼaal, li aqʼej, ut li bʼan choqʼ rehebʼ li ani maakʼaʼebʼ re. (Chiʼilmanq li chʼol 25 saʼ li hu aʼin.)
Saʼ li kutan re kuyuk saʼ, ebʼ li komon nekeʼwulak saʼ jun chʼutam, aʼan li chʼutam re kuyuk saʼ ut chʼolobʼank yeebʼil re, bʼar wiʼ nekeʼxchʼolobʼ chiribʼilebʼ ribʼ lix nawomebʼ xchʼool chirix li Kristo ut lix evangelio.
Xkomonebʼ chik li mayej. Ebʼ li komon re li Iglees nekeʼru chixqʼaxtesinkil li tumin choqʼ re jalanebʼ chik li kʼanjel re li Iglees, joʼ li kʼanjel re jultikank aatin, li Fondo de Educacion Perpetua, lix kabʼlankilebʼ li santil ochoch, ut li tumin taqlanbʼil re xtenqʼankilebʼ li nebʼaʼ.
Kʼanjelak chiruhebʼ li qas qiitzʼin. Ebʼ li komon nekeʼxyeechiʼi ajwiʼ lix kutan, lix seebʼalebʼ, ut li kʼaʼru rehebʼ re xtenqʼankilebʼ li ras riitzʼin. Rikʼin li kʼanjel aʼin, li Iglees naru chixtenqʼankilebʼ li komon ut li ani moko komonebʼ ta, saʼ chixjunil li ruchichʼochʼ naq naʼux jun li nimla sachk, ma saʼ junaq kʼalebʼaal, saʼ jun nimla tenamit, malaj saʼ chixjunil li ruchichʼochʼ.
Nokoʼosobʼtesiik naq naqakʼe li lajetqil ut li mayej
Li Qaawaʼ naxyeechiʼi qe li osobʼtesink wi naqatoj li lajetqil ut li mayej chi tiik. Aʼan kixye: “Kʼamomaq chaq li junjunq saʼ xlajetqil chixjunil; kʼamomaq chaq chi tzʼaqal re ru saʼ lix loqʼlaj kʼuulebʼaal, re naq wanq li tzakemq saʼ wochoch. Yalomaq wix chi joʼkan, ut laaʼin tinte li choxa re eerosobʼtesinkil chi yooʼon” (Malakias 3:10).
Jun li naʼlebʼ kʼutbʼesinbʼil saʼ li kutankil aʼin naxye resil jun chik li osobʼtesink choqʼ rehebʼ li ani nekeʼkʼuleʼ xlajetqil: “Chi yaal aʼan jun kutan re mayejak, ut jun kutan re xkʼulbʼal xlajetqilebʼ lin tenamit; xbʼaan naq ani nakʼuleʼ xlajetqil moko taakʼatmanq ta saʼ xkʼulunik” (Tz. ut S. 64:23).
Li osobʼtesink li yeechiʼinbʼil qe nekeʼwan choqʼ re li tzʼejwalej joʼ ajwiʼ choqʼ re li musiqʼej. Wi nokokʼehok chi anchal li qachʼool, li qaChoxahil Yuwaʼ toxtenqʼa chixtawbʼal li kʼaʼru taakʼanjelaq qe wulaj wulaj, joʼ li tzakemq, li aqʼej, ut li muhebʼaal. Naq yoo chiraatinankilebʼ laj Santil Paabʼanel saʼ Rosoʼjikebʼ li Kutan saʼ li Islas Filipinas, li Awaʼbʼej Gordon B. Hinckley kixye naq wi ebʼ li tenamit “teʼxkʼulubʼa li evangelio ut teʼxpaabʼ, wi teʼxtoj lix lajetqil ut lix mayej us ta moko naabʼal ta, li Qaawaʼ tixbʼaanu li kʼaʼru kixyeechiʼi chaq najter choqʼ rehebʼ, ut taawanq arros saʼebʼ lix sekʼ ut aqʼej chirixebʼ, ut li muhebʼaal saʼ xbʼeenebʼ xjolom. Inkʼaʼ nawil jalanaq chik xtenqʼankilebʼ. Ebʼ aʼan teʼraj ru jun li wankilal qʼaxal nim wiʼchik chiru junaq wankilal re ruchichʼochʼ, re xwaklesinkilebʼ ut xtenqʼankilebʼ (“Las palabras del profeta actual,” Liahona, junio 1997, perel 33). Li Qaawaʼ toxtenqʼa ajwiʼ rikʼin xnimobʼresinkil “li qanaʼlebʼ chirix li Dios, ut lix nawom qachʼool chirix li yaal, ut li qawankil chixpaabʼankil li evangelio ut chixwaklesinkilebʼ xchʼool li qajunkabʼal re teʼxbʼaanu ajwiʼ chi joʼkan” (Enseñanzas de los Presidentes de la Iglesia: Heber J. Grant 2003, perel 131 132).
Ebʼ li nekeʼtojok re li lajetqil ut li mayej kʼaʼjoʼ naq nekeʼosobʼtesiik. Nekeʼreekʼa li chaabʼilal rikʼin xnawbʼal naq yookebʼ chi tenqʼank chixwaklesinkil lix awaʼbʼejihom li Dios saʼ li ruchichʼochʼ.
-
Kʼaʼru junjunq li osobʼtesink xakʼul laaʼat, ebʼ laa komon saʼ laa junkabʼal, malaj ebʼ laa was aawiitzʼin rikʼin xtojbʼal li lajetqil ut xkomonebʼ chik li mayej?
Ebʼ li loqʼlaj hu
-
Tz. ut S. 119:1–4 (li chaqʼrabʼ re li lajetqil)
-
Genesis 14:18–20; Alma 13:13–16 (laj Abrahan kixtoj li lajetqil)