Eb’ li hu ut li tzolok
Chʼol 44: Li xkabʼ xkʼulunik li Jesukristo

Chʼol 44

Li xkabʼ xkʼulunik li Jesukristo

Jalam-uuch
The resurrected Jesus Christ (wearing white robes with a magenta sash) standing above a large gathering of clouds. Christ has His arms partially extended. The wounds in the hands of Christ are visible.

Roybʼeninkil li xkabʼ xkʼulunik li Kolonel

Kaʼkʼaal kutan chik chirix lix Waklijik chi Yoʼyo, li Jesus ut ebʼ lix Apostol keʼwan chi chʼutchʼu saʼ li tzuul Olivos. Ak xtaw xqʼehil naq li Jesus taaʼelq chaq saʼ li ruchichʼochʼ. Aʼan ak xbʼaanu chixjunil li kʼanjel li wan saʼ xbʼeen naq tixbʼaanu saʼ li kutan aʼan. Okaq re chi sutqʼiik rikʼin li qaChoxahil Yuwaʼ toj reetal naq tixtaw xqʼehil li xkabʼ xkʼulunik.

Chirix naq kixkʼehebʼ xnaʼlebʼ lix apostol, Li Jesus kitaqeʼ saʼ choxa. Naq yookebʼ li Apostol chi ilok saʼ choxa, wibʼ li anjel keʼxaqli chixkʼatqebʼ ut keʼxye: “Ex aj Galilea, kʼaʼut naq xaqxookex arin chi ilok saʼ choxa? Li Jesus aʼin li xolkʼameʼq cheru ut xkoho taqeʼq aʼan taakʼulunq wiʼchik, jo naq xeril chi xik saʼ choxa” (Hechos 1:11).

Chalen chaq saʼ li kutan aʼan toj anajwan, ebʼ li nekeʼtaaqenk re li Jesukristo yookebʼ chiroybʼeninkil li xkabʼ xkʼulunik.

Kʼaʼru tixbʼaanu li Jesus naq taakʼulunq wiʼchik?

Naq taachalq wiʼchik li Jesukristo saʼ li ruchichʼochʼ, aʼan aʼin li tixbʼaanu:

  1. Tixchʼajobʼresi li ruchichʼochʼ. Naq taachalq wiʼchik li Jesus, taachalq rikʼin wankilal ut nimla loqʼalil. Saʼ li kutan aʼan teʼsacheʼq laj maak. Chixjunil li kʼaʼru poʼjenaq taakʼatmanq, ut taachʼajobʼresimanq li ruchichʼochʼ rikʼin xam (chiʼilmanq Tz. ut S. 101:24–25).

  2. Aʼan tixraq aatin chirix lix tenamit. Naq taakʼulunq wiʼchik li Jesus, tixraq aatin saʼ xbʼeenebʼ li jar tenamit ut tixjachebʼ ru li tiikebʼ xchʼool rikʼinebʼ laj maak (chiʼilmanq Mateo 25:31–46; chiʼlmanq ajwiʼ li chʼol 46 saʼ li hu aʼin). Saʼ li hu Apokalipsis, laj Jwan kixtzʼiiibʼa resil li raqbʼa-aatin aʼin: “Kiwilebʼ li kʼojaribʼaal, bʼarwiʼ keʼkʼojlaak ebʼ li keʼkʼeheʼk xwankil chi raqok aatin. Kiwil li raamebʼ li keʼchʼoteʼk xjolom saʼ xkʼabʼaʼ li Raatin li Dios joʼ wiʼ xbʼaan naq keʼxchʼolobʼ resil li Jesus, … ebʼ aʼin keʼwakliik wiʼchik chi yoʼyo ut keʼawaʼbʼejink rochbʼeen li Kristo chiru jun mil chihabʼ.” Ebʼ laj maak li kiril chaq “inkʼaʼ keʼwakliik chi yoʼyo toj saʼ rosoʼjik li jun mil chihabʼ“ (Apokalipsis 20:4–5; chiʼilmanq ajwiʼ Tz. ut S. 88:95–98).

  3. Aʼan tixtikibʼ li Jun Mil Chihabʼ. Li jun mil chihabʼ aʼan xqʼehil naq taaʼawaʼbʼejinq li Jesus saʼ li ruchichʼochʼ. Ebʼ li tiikebʼ xchʼool teʼxokeʼq chixkʼulbʼal li Jesus saʼ lix kʼulunik (chiʼilmanq Tz. ut S. 88:96). Rikʼin lix kʼulunik tixtikibʼ li jun mil chihabʼ taaʼawaʼbʼejinq wiʼ. (Chiʼilmanq li chʼol 45 saʼ li hu aʼin.)

    Li Awaʼbʼej Brigham Young kixye:

    “Saʼ li Jun Mil Chihabʼ, naq taawanq lix Awaʼbʼejihom li Dios chi xaqabʼanbʼil saʼ li ruchichʼochʼ rikʼin wankilal, loqʼalil, ut tzʼaqalil re ru, ut taasacheʼq xwankil li rawaʼbʼejil li maaʼusilal li ak xnumta chi qʼaxal najt, taakʼeemanq rehebʼ laj Santil Paabʼanel re li Dios xyiibʼankilebʼ lix santil ochoch, ut ok chixsaʼebʼ, re teʼwanq chanchan roqechalebʼ lix santil ochoch li Dios [chiʼilmanq Apokalipsis 3:12], ut ebʼ aʼan teʼkʼanjelaq choqʼ rehebʼ lix kamenaqebʼ. Tojaʼ naq taqil chi chalk ebʼ li ani raaro qabʼaan, ut maare junjunq li kiqanaw ru arin. … Ut taawanq li naʼlebʼ kʼutbʼesinbʼil re taqanawebʼ ru li qayuwaʼ chalen chaq toj reetal li qayuwaʼ aj Adan ut li qanaʼ xEva, ut tooʼok saʼebʼ li santil ochoch re li Dios ut tookʼanjelaq choqʼ rehebʼ. Tojaʼ naq ebʼ li [alal kʼajolbʼej] teʼtzʼapeʼq saʼ junajil rikʼinebʼ li [naʼbʼej yuwaʼbʼej] toj reetal naq taawanq jun kʼaamal chʼiichʼ re tijonelil li tzʼaqalaq re ru chalen chaq laj Adan toj reetal li taaʼilmanq saʼ xraqik chixjunil” (Enseñanzas de los Presidentes de la Iglesia: Brigham Young 1997, perel 339–350).

  4. Aʼan tixchoy li xbʼeen wakliik chi yoʼyo. Ebʼ li xeʼkʼeheʼ re li maatan re wakliik saʼ lix waklijikebʼ li tiikebʼ xchʼool chi yoʼyo teʼwakliiq chaq saʼ xmuqlebʼaalebʼ. Ebʼ aʼan teʼxokeʼq chixkʼulbʼal li Kolonel naq taakubʼeeq chaq Aʼan saʼ choxa. (Chiʼilmanq Tz. ut S. 88:97–98.)

    Chirix naq li Jesukristo kiwakli chaq saʼ xyanqebʼ li kamenaq, wankebʼ chik li tiikebʼ xchʼool ut kamenaqebʼ li keʼwakli ajwiʼ chi yoʼyo. Ebʼ aʼan keʼxkʼut ribʼ aran Jerusalen, joʼ ajwiʼ saʼ li nimla chʼochʼ America. (Chiʼilmanq Mateo 27:52–53; 3 Nefi 23:9–10.) Aʼin xtiklajik li xbʼeen wakliik chi yoʼyo. Wankebʼ li xeʼwakli chi yoʼyo chalen chaq aʼan. Ebʼ li ak xeʼwakli chi yoʼyo ut li toj teʼwakliiq saʼ xkutankil lix kʼulunik teʼreechani chixjunilebʼ li loqʼalil re li choxahil awaʼbʼejilhom (chiʼilmanq Tz. ut S. 76:50–70).

    Chirix lix waklijikebʼ chi yoʼyo li ani teʼreechani li choxahil loqʼalil, jun chʼuut chik teʼwakliiq chi yoʼyo, aʼanebʼ li teʼkʼuluq re li terrestil loqʼalil. Naq akaq xeʼwakli chi yoʼyo chixjunilebʼ aʼin, taaraqeʼq li xbʼeen wakliik chi yoʼyo.

    Ebʼ laj maak li yoʼyookebʼ saʼ xkutankil li xkabʼ xkʼulunik li Qaawaʼ teʼsacheʼq saʼ li tzʼejwalej. Ebʼ aʼan, rochbʼeenebʼ laj maak li akaq xeʼkam, teʼwanq chiroybʼeninkil li wakliik chi yoʼyo li taawanq saʼ rosoʼjik. Chixjunilebʼ li jun chʼol chik rehebʼ li kamenaq teʼwakliiq chixkʼulbʼal li Dios. Ebʼ aʼan teʼreechani li teleestil awaʼbʼejihom, malaj ut teʼtzʼeqeʼq saʼ li najtil aakʼabʼ rochbʼeen laj Satanas (chiʼilmanq Tz. ut S. 76:32–33, 81–112).

  5. Aʼan tixkʼul tzʼaqal lix naʼaj choqʼ Rey saʼ xbʼeen li choxa ut li ruchichʼochʼ. Naq taakʼulunq li Jesus, Aʼan tixkʼojobʼ li jolomink tenamit saʼ li ruchichʼochʼ joʼ li naxbʼaanu Aʼan. Li Iglees taaʼok choqʼ jun raqal li awaʼbʼejihom aʼan. Aʼan taataqlanq saʼ xbʼeenebʼ chixjunil li tenamit saʼ li ruchichʼochʼ saʼ tuqtuukilal chiru jun mil chihabʼ.

    Naq kichal li Jesukristo saʼ li ruchichʼochʼ xbʼeen wa, inkʼaʼ kichal rikʼin lix loqʼalil. Aʼan kiyoʼla saʼ tuulanil saʼ xnaʼajebʼ li xul, ut kiyokobʼaak saʼ pachʼayaʼ saʼ jun li waʼlebʼaal xul. Inkʼaʼ kichal rikʼin xninqal ru teep chi aj pleet joʼ keʼxkʼoxla laj Judio naq taachalq laj Kolol rehebʼ. Kichal bʼan rikʼin xyeebʼalʼ: “Cherahaqebʼ li xikʼ nekeʼilok eere ut chextijoq chirixebʼ li nekeʼrahobʼtesink eere” (Mateo 5:44). Aʼan kitzʼeqtaanaak ut kikʼeheʼ chiru krus. Aʼbʼanan inkʼaʼ taatzʼeqtaanaaq saʼ li xkabʼ xkʼulunik, “xbʼaan naq li junjunq xikej taaʼabʼinq re, ut li junjunq xbʼeen aqej taabʼasmanq, ut li junjunq ruʼuj aqʼej tixchʼolobʼ xyaalal” naq li Jesus aʼan li Kristo (Tz. ut S. 88:104). Aʼan taakʼuleʼq joʼ “Qaawaʼ saʼ xbʼeenebʼ chixjunil li qaawaʼ ut Awaʼbʼej saʼ xbʼeenebʼ chixjunil li awaʼbʼej” (Apokalipsis 17:14). Taayemanq re Aʼan “Aj sachol chʼoolej, Aj kʼehol naʼlebʼ, Li Dios Kaw Xmetzʼew, Li Yuwaʼbʼej li junelik taawanq, Li Awaʼbʼej re Tuqtuukilal” (2 Nefi 19:6).

  • Kʼaʼru nakakʼoxla ut nakaweekʼa laaʼat naq nakakʼoxla li kʼaʼru taakʼulmanq saʼ li xkabʼ xkʼulunik li Qaawaʼ?

Chan ru taqanaw naq ak xnachʼok li xkabʼ xkʼulunik li Kolonel?

Naq kiyoʼla li Kristo, yal kaʼchʼin xkʼihalebʼ li keʼnawok re nak ak xkʼulun laj Kolol re li ruchichʼochʼ. Naq taakʼulunq xkaʼ wa, maakʼaʼaq ani inkʼaʼ taanawoq re ani Aʼan. Maajun nanawok re joʼqʼe tzʼaqal taakʼulunq li Kolonel. “Chirix li kutan aʼan malaj lix honalil, maaʼani nanawok joʼqʼe, chi moko ebʼ li anjel saʼ choxa chi moko li Kʼajolbʼej, kaʼajwiʼ li Yuwaʼbʼej” (Mateo 24:36; chiʼiilmanq ajwiʼ Tz. ut S. 49:7).

Li Qaawaʼ kixkʼe jun li jaljookil ru aatin re xkʼeebʼal junaq qanaʼlebʼ chirix lix hoonalil lix kʼulunik:

“Rikʼin lix cheʼel li higo chetzolaq li jaljookil ru aatin aʼin. Naq ak naqʼunqʼutk li ruqʼ ut yoo chi yoʼlaak lix xaq, aran nekenaw naq xnachʼok chaq li saqʼehil.

“Joʼkan ajwiʼ laaʼex, naq teeril naq talajkʼulmanq aʼin, chenawaq naq ak nachʼ wan chaq li Kʼajolbʼej; ak wank chire li kabʼl” (Markos 13:28–29).

Li Qaawaʼ xkʼe chaq qe li eetalil re taqanaw naq akaq xnachʼok lix kʼulunik. Chirix xkʼutbʼal kʼaʼruhebʼ li eetalil, Aʼan kixye:

“Chexyoʼleq bʼiʼ, xbʼaan naq inkʼaʼ nekenaw kʼaʼru kutankil tolʼelq lee Qaawaʼ. …

“… Laaʼex ajwiʼ yoʼoon wanqex, xbʼaan naq maakʼaʼaq saʼ eechʼool naq tolʼelq li Kʼajolbʼej” (Mateo 24:42–44).

Re xtawbʼal chik li naʼlebʼ chirix chan ru taqanaw naq akaq xnachʼok li xkabʼ xkʼulunik li Jesus, chiʼilmanq li chʼol 43 saʼ li hu aʼin.

Chan ru naru toowanq chi kawresinbʼil naq taakʼulunq li Kolonel?

Li jun chi naʼlebʼ qʼaxal chaabʼil li naru wiʼ taqakawresi qibʼ choqʼ re li xkabʼ xkʼulunik li Kolonel, aʼan xkʼulubʼankil li kʼaʼru kʼutbʼil saʼ li evangelio, ut xpaabʼankil saʼ li qayuʼam. Tento taqayal qaqʼe chi wank saʼ chaabʼilal wulaj wulaj saʼ li qayuʼam, joʼ chanru kixkʼut li Jesus naq kiwan saʼ li ruchichʼochʼ. Naru taqakʼul li profeet joʼ aj kʼamol bʼe chiqu, ut taqabʼaanu li kʼaʼru naxye. Naru toowanq chi kʼulubʼej re naq li Santil Musiqʼej tixkʼam li qabʼe. Rikʼin aʼin, yooqo chiroybʼeninkil lix kʼulunik li Kolonel rikʼin sahil chʼoolejil, moko rikʼin ta li xiw. Li Qaawaʼ kixye: “Mexxuwak, ex chʼina teep inkarneer, eere li awaʼbʼejihom, toj reetal naq tinkʼulunq. Kʼehomaq reetal, tinkʼulunq chi seebʼ. Chi joʼkan. Amen” (Tz. ut S. 35:27).

  • Kʼaʼut naq qʼaxal wiʼchik aajel ru naq taqakʼoxla xkawresinkil qibʼ, chiru naq taqakʼoxla joʼqʼe tzʼaqal taawanq li xkabʼ xkʼulunik li Qaawaʼ?

Ebʼ li loqʼlaj hu