Eb’ li hu ut li tzolok
Chʼol 23: Li loqʼlaj waʼak

Chʼol 23

Li loqʼlaj waʼak

Jalam-uuch
Jesus Christ depicted preparing the sacrament for the Last Supper.

Li Kristo kixtikibʼ li loqʼlaj waʼak

  • Kʼaʼru li naʼlebʼ nekeʼxkʼut li eetalil re li loqʼlaj waʼak chirix lix tojbʼal rix li maak kixbʼaanu li Jesukristo?

Li qaKolonel naraj naq taajultikoʼq qe lix nimal ru mayej re xtojbʼal rix li maak, ut naq taqapaabʼebʼ lix taqlahom. Re taaruuq taqabʼaanu aʼin, Aʼan kixtaqla naq toochʼutlaaq chi kokʼ aj xsaʼ ut taqakʼul li loqʼlaj waʼak.

Li loqʼlaj waʼak aʼan jun li santil kʼojobʼanbʼil kʼanjel re li tijonelil li naxjultika qe lix tojbʼal rix li maak kixbʼaanu li Kolonel. Saʼ li loqʼlaj waʼak, naqakʼul li kaxlan wa ut li haʼ. Naqabʼaanu aʼin re xjultikankil lix tibʼel ut lix kikʼel, li kixkʼe joʼ jun mayej choqʼ qe. Naq naqakʼul li loqʼlaj waʼak, naqaʼakʼobʼresihebʼ li loqʼlaj sumwank rikʼin li qaChoxahil Yuwaʼ.

Kaʼchʼin chik naq majiʼ nakʼeheʼ chiru li krus, li Jesukristo kixchʼutubʼebʼ lix Apostol saʼ xkabʼ xkʼojaril jun li kabʼl. Ak kixnaw naq saʼ junpaat chik taakamq chiru li krus. Kaʼaj chik li jun sut aʼin taachʼutlaaq rikʼinebʼ li raarookil winq aʼin naq majiʼ nakam. Kiraj naq junelik taajultikoʼq Aʼan rehebʼ, re naq kawaqebʼ ut tiikaqebʼ chi paabʼank.

Re xtenqʼankilebʼ chixjultikankil, kixkʼe rehebʼ li loqʼlaj waʼak. Kixjachi li kaxlan wa ut kirosobʼtesi. Tojaʼ naq kixye: “Kʼulumaq, waʼomaq; aʼin re xjultikankil lin tibʼel li ninkʼe choqʼ xtojbʼal eerix” (Jaltesinbʼil Ru xbʼaan laj Jose Smith, Mateo 26:22). Chirix aʼan kixchap jun ukʼlebʼ sekʼ chi viin, kirosobʼtesi, kixkʼe rehebʼ lix Apostol re teʼrukʼ, ut kixye: “Aʼin re xjultikankil lin kikʼel … , li hoybʼil choqʼ re joʼ kʼihal li teʼpaabʼanq re lin kʼabʼaʼ, re risinkil lix maakebʼ” (Jaltesinbʼil Ru xbʼaan laj Jose Smith, Mateo 26:24; chiʼilmanq ajwiʼ Mateo 26:26–28; Markos 14:22–24; Lukas 22:15–20).

Chirix lix Waklijik chi Yoʼyo, kichal li Kolonel saʼ li chʼochʼ America, ut kixkʼut li kʼojobʼanbʼil kʼanjel ajwiʼ aʼin rehebʼ laj Nefita (chiʼilmanq 3 Nefi 18:1–11; 20:1–9). Chirix naq kikʼojobʼaman wiʼchik li Iglees saʼ rosoʼjikebʼ li kutan, li Jesus kixtaqlahebʼ wiʼchik lix tenamit chixkʼulbʼal li loqʼlaj waʼak re xjultikankil Aʼan, ut kixye: “Naʼajman ru naq li iglees taachʼutlaaq chi kokʼ aj xsaʼ re xkʼulbʼal li kaxlan wa ut li viin re xjultikankil li Qaawaʼ Jesus” (Tz. ut S. 20:75).

Chan ru nakʼanjelaman li loqʼlaj waʼak

Ebʼ li loqʼlaj hu nekeʼxkʼut chan ru tzʼaqal xkʼanjelankil li loqʼlaj waʼak. Ebʼ li komon saʼ li Iglees nekeʼchʼutla rajlal hilobʼaal kutan re loqʼonink ut re xkʼulbʼal li loqʼlaj waʼak (Tz. ut S. 20:75). Li loqʼlaj waʼak kʼanjelanbʼil xbʼaanebʼ li kʼeebʼilebʼ xwankil saʼ li tijonelil li naʼajman ru choqʼ re xbʼaanunkil. Jun aj tij, malaj jun li nakʼamok re li tijonelil re Melkisedek naxjachi li kaxlan wa, nawiqʼla, ut narosobʼtesi (chiʼilmanq Tz. ut S. 20:76). Jun aj tenqʼanel, malaj ani chik li nakʼamok re li tijonelil naxjekʼi li kaxlan wa re li loqʼlaj waʼak rehebʼ li ani chʼutubʼanbʼil. Tojaʼ naq laj tij malaj li ani nakʼamok re li tijonelil re Melkisedek narosobʼtesi li haʼ, ut najekʼiman ajwiʼ rehebʼ li komon. Li Jesus kixkʼe li viin rehebʼ lix tzolom naq kixkʼut xbʼeen wa li loqʼlaj waʼak. Aʼbʼanan saʼ jun kʼutbʼesinbʼil naʼlebʼ saʼ rosoʼjikebʼ li kutan, Aʼan kixye naq maakʼaʼ naxye kʼaʼru naqakʼux ut kʼaʼru naqukʼ saʼ li loqʼlaj waʼak wi naqabʼaanu re xjultikankil Aʼan (chiʼlmanq Tz. ut S. 27:2–3). Anajwan, ebʼ laj Santil Paabʼanel saʼ Rosoʼjikebʼ li Kutan nekeʼroksi li haʼ ruuchil li viin.

Li Jesus ak xkʼutbʼesi kʼaʼru tzʼaqal li aatin li taaʼoksimanq choqʼ re xkabʼichalebʼ li tij re li loqʼlaj waʼak. Aajel ru naq taqakʼe qachʼool chirabʼinkil chi us ebʼ li chaqʼal ru tij aʼin, ut chixtawbʼal ru kʼaʼru li yooko chixyeechiʼinkil ut kʼaʼru li yeechiʼinbʼil qe laaʼo. Aʼin li tij li nayeeman re rosobʼtesinkil li kaxlan wa:

“At Dios, li Junelik Yuwaʼbʼej, naqatzʼaama chawu saʼ lix kʼabʼaʼ laa Walal, li Jesukristo, naq chawosobʼtesi ut chasantobʼresi li kaxlan wa aʼin choqʼ re li raamebʼ chixjunil li teʼkʼuluq re, re naq teʼwaʼaq re xjultikankil lix tibʼel laa Walal, ut teʼxkʼut xyaalal chawu, at Dios, li Junelik Yuwaʼbʼej, naq wankebʼ xchʼool chixkʼulbʼal saʼ xbʼeenebʼ lix kʼabʼaʼ laa Walal, ut junelik chixjultikankil aʼan, ut chixpaabʼankil lix taqlahom li kixkʼe chaq rehebʼ; re taaruuq taawanq junelik lix Musiqʼ rikʼinebʼ. Amen” (Tz. ut S. 20:77).

Aʼin li tij li nayeeman re rosobʼtesinkil li haʼ:

“At Dios, li Junelik Yuwaʼbʼej, naqatzʼaama chawu saʼ lix kʼabʼaʼ laa Walal, li Jesukristo, naq chawosobʼtesi ut chasantobʼresi li viin aʼin choqʼ re li raamebʼ chixjunil li teʼukʼaq re, re naq teʼxbʼaanu re xjultikankil lix kikʼel laa Walal, li kihoyeʼ choqʼ rehebʼ; re naq teʼxkʼut xyaalal chawu, at Dios, li Junelik Yuwaʼbʼej, naq junelik taajultikoʼq aʼan rehebʼ, re naq taaruuq taawanq lix Musiqʼ rikʼinebʼ. Amen” (Tz. ut S. 20:79).

Li kʼojobʼanbʼil kʼanjel re li loqʼlaj waʼak nabʼaanuman chi tuqtu ut rikʼin oxloqʼink.

  • Il ut kʼoxla chi us li aatin saʼebʼ li tij re li loqʼlaj waʼak. Kʼoxla lix yaalalil li junjunq raqal chi aatin.

Ebʼ li sumwank li naqaʼakʼobʼresi saʼ li loqʼlaj waʼak

  • Kʼaʼruhebʼ li sumwank li ak xooʼok wiʼ li nekeʼakʼobʼresiik saʼ li loqʼlaj waʼak? Kʼaʼruhebʼ li osobʼtesink naxyeechiʼi li Qaawaʼ wi naqapaabʼebʼ li sumwank aʼan?

Rajlal sut naq naqakʼul li loqʼlaj waʼak, yooko chi akʼobʼresink sumwank rikʼin li Qaawaʼ. Jun sumwank aʼan jun loqʼlaj xaqabʼanbʼil aatin wan wiʼ li Qaawaʼ rikʼinebʼ li ralal xkʼajol. Ebʼ li sumwank li nokoʼok wiʼ yeebʼilebʼ chi chʼolchʼo ru saʼebʼ li tij re li loqʼlaj waʼak. Aajel ru naq taqanaw kʼaʼruhebʼ li sumwank aʼan, ut kʼaʼru xyaalalilebʼ.

Li sumwank nokoʼok wiʼ, aʼan naq wan qachʼool chixkʼulbʼal saʼ qabʼeen lix kʼabʼaʼ liJesukristo. Rikʼin aʼin, naqakʼut naq wan qachʼool naq nawbʼilaq qu joʼ aj paabʼanel re Aʼan ut joʼ komon saʼ lix Iglees. Naqaye naq tookʼanjelaq chiru Aʼan ut chiruhebʼ li qas qiitzʼin. Nokoʼok saʼ aatin naq maakʼaʼ taqabʼaanu li taawanq choqʼ xxutaan malaj choqʼ xsachbʼal xwankil li kʼabʼaʼej aʼan.

Nokoʼok saʼ sumwank naq junelik taajultikoʼq qe li Jesukristo. Chixjunil li kʼaʼru naqakʼoxla, naqeekʼa, ut naqabʼaanu taawanq chi eekʼasinbʼil xbʼaan li Kristo ut xbʼaan lix kʼanjel Aʼan.

Nokoʼok saʼ aatin naq taqapaabʼebʼ lix taqlahom.

Naqakʼul saʼ qabʼeen ebʼ li tenebʼaak aʼin naq nakubʼe li qahaʼ (chiʼilmanq Tz. ut S. 20:37; Mosiah 18:6–10). Chi joʼkan, naq naqakʼul li loqʼlaj waʼak, naqaʼakʼobʼresihebʼ li sumwank li xoʼok wiʼ naq xkubʼe li qahaʼ. Li Jesus kixkʼe qe li kʼutbʼil eetalil chirix xkʼulbʼal li loqʼlaj waʼak (chiʼilmanq 3 Nefi 18:1–12) ut kixye naq wi naqataaqe li kʼutbʼil eetalil aʼin, ut naqajal qakʼaʼuxl chirix li qamaak ut naqapaabʼ lix kʼabʼaʼ, taqakʼul risinkil li qamaak (chiʼilmanq li Jaltesinbʼil Ru xbʼaan laj Jose Smith, Mateo 26:24).

Li Qaawaʼ naxyeechiʼi naq wi laaʼo naqapaabʼ li qasumwank, junelik taawanq qikʼin lix Musiqʼ. Junaq li kʼambʼil xbʼe xbʼaan li Musiqʼej taawanq rikʼin aʼan li nawom, li paabʼaal, ut li tiikilal re tixkʼul li junelik yuʼam.

  • Kʼaʼru naru taqabʼaanu re taajultikoʼq qe li yeechiʼihom aʼin chiru li xamaan?

Chan ru li qachʼool naq naqakʼul li loqʼlaj waʼak

  • Chan ru naru taqakawresi qibʼ re xkʼulbʼal li loqʼlaj waʼak? Kʼaʼru naru taqakʼoxla naq yoo chi uxmank li loqʼlaj waʼak, re taajultikoʼq qe lix tojbʼal rix li maak kixbʼaanu li Kristo?

Naq majiʼ taqakʼul li loqʼlaj waʼak, tento taqakawresi qibʼ saʼ musiqʼejil. Li Qaawaʼ kixye naq maajun raj taakʼuluq re li loqʼlaj waʼak chi moko xkʼulubʼ ta. Aʼin naraj naxye naq tento taqajal qakʼaʼuxl chirix li qamaak naq toj majiʼ naqakʼul li loqʼlaj waʼak. Saʼebʼ li loqʼlaj hu, naxye: “Wi wan ani xbʼaanunk re li maak, mixkʼul toj reetal naq tixkʼam wiʼchik ribʼ saʼ usilal” (Tz. ut S. 46:4). Li Qaawaʼ kixye rehebʼ lix kabʼlaju chi tzolom aj Nefita: “Inkʼaʼ teekanabʼ anihaq chi tzʼaqonk chi naʼno saʼ lin tibʼel ut lin kikʼel chi moko kʼulubʼej ta, naq nekekʼanjela; Xbʼaan naq ani nawaʼok ut naʼukʼak re lin tibʼel ut lin kikʼel chi moko kʼulubʼej ta naxwaʼ ut narukʼ tojbʼa-maak choqʼ re li raam” (3 Nefi 18:28–29).

Naq yoo chi uxmank li kʼanjel re li loqʼlaj waʼak, tento taqatzʼeq chirix li qajolom chixjunil li ruchichʼochʼil naʼlebʼ. Tento toowanq chi tijok ut chi oxloqʼink. Tento taqakʼoxla lix tojbʼal rix li maak kixbʼaanu li Kolonel, ut taqabʼantioxi saʼ qachʼool. Tento taqatzʼil rix li qayuʼam, ut taqasikʼ chan ru xchaabʼilobʼresinkil qibʼ. Tento ajwiʼ taqakʼe qachʼool chi akʼil naq taqapaabʼebʼ li taqlahom.

Inkʼaʼ naʼajman ru naq tzʼaqalaq qe qu re taaruuq taqakʼul li loqʼlaj waʼak, aʼbʼanan saʼ li qachʼool tento taawanq li musiqʼej re jalbʼa-kʼaʼuxlej naq naqakʼul. Taqeekʼa lix wankiil li loqʼlaj waʼak aʼ yaal joʼ chanru li qachʼool naq naqakʼul. Wi naqakʼul li loqʼlaj waʼak chi saq ru li qachʼool, taqakʼulebʼ li osobʼtesink li yeechiʼinbʼil xbʼaan li Qaawaʼ.

  • Kʼaʼut nakakʼoxla naq xkʼulbʼal li loqʼlaj waʼak chi kʼulubʼej tixnimobʼresi li qamusiqʼejil metzʼew?

Ebʼ li loqʼlaj hu