Eb’ li hu ut li tzolok
Chʼol 34: Xnimobʼresinkilebʼ li maatan kʼeebʼil qe

Chʼol 34

Xnimobʼresinkilebʼ li maatan kʼeebʼil qe

Jalam-uuch
A male art student painting as he looks away at a model or object that he is painting.

Chiqajunil wankebʼ li qamaatan ut qaseebʼal

Chiqajunil wankebʼ li maatan, li naʼlebʼ ut li seebʼal kʼeebʼil qe xbʼaan li qaChoxahil Yuwaʼ. Naq xoyoʼla, xqakʼam chaq ebʼ li maatan, li naʼlebʼ, ut li seebʼal aʼin qikʼin (chiʼilmanq li chʼol 2 saʼ li hu aʼin).

Li profeet aj Moises aʼan jun nimla aj jolominel, aʼut kiraj ru laj Aaron, li ras, re taatenqʼanq joʼ aj yehol aatin (chiʼilmanq Exodo 4:14–16). Wankebʼ saʼ qayanq li chaabʼil aj kʼamol bʼe joʼ laj Moises, ut li chaabʼilebʼ chi aatinak joʼ laj Aaron. Wankebʼ saʼ qayanq li nekeʼbʼichan chi us malaj li nekeʼwajbʼak. Wankebʼ li chaabʼilebʼ chi bʼatzʼunk, malaj nekeʼru chi kʼanjelak chi us rikʼinebʼ li ruqʼ. Junjunq chik li maatan naru nakʼeeman qe aʼanebʼ xtawbʼalebʼ ru li qas qiitzʼin, li najtil kuyuk, li seʼseʼ ruhil chʼoolej, ut li seebʼal chixtzolbʼalebʼ li qas qiitzʼin.

  • Chan ru naq xakʼul aatenqʼankil jun sutaq xbʼaan lix maatan li jalan?

Tento taqoksi ut taqachaabʼilobʼresi li qamaatan

  • Chan ru naru chiqu xnimobʼresinkilebʼ li qamaatan?

Tento saʼ qabʼeen xnimobʼresinkilebʼ li jar maatan li kʼeebʼilebʼ qe. Wan naq naqakʼoxla naq moko naabʼal ta li maatan xqakʼul, malaj naq qʼaxal wiʼchik lix seebʼalebʼ li jun chʼol chik chiqu laaʼo. Wan naq inkʼaʼ naqoksi li qamaatan xbʼaan naq naqakʼoxla naq inkʼaʼ tooʼelq chi us, malaj naq toohobʼeʼq xbʼaanebʼ li jun cʼhol chik. Tento naq inkʼaʼ taqamuq li qamaatan. Tento bʼan roksinkil. Chi joʼkan, ebʼ li jun chʼol chik teʼruuq chirilbʼal li qachaabʼil kʼanjel ut chixnimankil xloqʼal li qaChoxahil Yuwaʼ (chiʼlimanq Mateo 5:16).

Wan junjunq li kʼaʼru tento taqabʼaanu re xnimobʼresinkilebʼ li qamaatan. Xbʼeen wa, tento taqakʼe reetal kʼaʼruhebʼ li maatan xqakʼul. Us naq taqatzʼil qix re xkʼeebʼal reetal kʼaʼru li naʼlebʼ ut li seebʼal kʼeebʼil qe. Ebʼ li qajunkabʼal ut li qakomon nekeʼru chiqatenqʼankil chixbʼaanunkil aʼin. Tento ajwiʼ taqatzʼaama chiru li qaChoxahil Yuwaʼ re toxtenqʼa chixnawbʼal chirixebʼ li qamaatan.

Xkabʼ, tento taawanq qachʼool chixnumsinkil li kutan ut chixyalbʼal qaqʼe re xnimobʼresinkil li maatan li yooko chixsikʼbʼal.

Rox, tento taawanq qapaabʼaal naq li qaChoxahil Yuwaʼ toxtenqʼa, ut tento ajwiʼ taawanq qapaabʼaal naq nokoru chixbʼaanunkil.

Xkaa, tento taqatzol li naʼlebʼ naʼajman re xnimobʼresinkilebʼ li qamaatan. Naru taqabʼaanu aʼin rikʼin xkʼulbʼal jun tzolok saʼ tzolebʼaal, rikʼin xtzʼaamankil chiru junaq komon naq toxtenqʼa, malaj rikʼin rilbʼal ru li hu.

Roʼ, tento tookʼanjelaq rikʼin li maatan xqakʼul. Li junjunq paay chi maatan yalok qʼe ut li kʼanjelak naraj re xnimobʼilobʼresinkil. Kaʼajwiʼ rikʼin yalok qʼe natawman li qaseebʼal chirix jun li maatan.

Xwaq, tento taqatenqʼahebʼ li qas qiitzʼin rikʼin li qamaatan. Aʼ rikʼin roksinkil li qamaatan naq naniman chiqu (chiʼilmanq Mateo 25:29).

Chixjunil aʼin nakotz xchʼaʼajkil wi nokotijok ut naqatzʼaama qatenqʼankil rikʼin li Qaawaʼ. Aʼan naraj naq taqanimobʼresihebʼ li qamaatan, ut toxtenqʼa chixbʼaanunkil.

Naru taqanimobʼresihebʼ li qamaatan us ta wan xqʼunal qametzʼew

  • Chan ru naru taqanimobʼresihebʼ li qamaatan us ta wan xqʼunal qametzʼew?

Rikʼin naq tʼanenaqo ut wan li kamk saʼ qabʼeen, wan xqʼunal qametzʼew. Wi tenqʼanbʼilo xbʼaan li Qaawaʼ, naru taaqʼaxmanq ru li tʼaneʼk wanko wiʼ ut lix qʼunal qametzʼew (chiʼilmanq Eter 12:27, 37). Laj Beethoven toj chirix naq ak kitzʼapxikoʼ kixtzʼiibʼahebʼ lix bʼich li qʼaxal ninqebʼ ru. Laj Enok kinumta saʼ xbʼeen lix maakʼaʼil xseebʼal chi aatinak, ut kiʼok choqʼ xnimal ru aj tzolonel (chiʼilmanq Moises 6:26–47).

Wankebʼ li xninqal ru aj bʼatzʼunel li xeʼxqʼax ru junaq xchaʼajkilal xtibʼelebʼ xbʼeen wa chiru naq xeʼru chixchaabʼilobʼresinkil lix maatan. Jun rehebʼ aʼan li xShelly Mann. “Naq oobʼ chihabʼ wan re, kiyajer rikʼin jun yajel li naxsach xmetzʼew li oq. … Ebʼ lix naʼ xyuwaʼ keʼxkʼam wulaj wulaj saʼ jun haʼ re numxik, re naq teʼwaklesiiq li ruqʼ xbʼaan li haʼ naq yoo chixyalbʼal roksinkilebʼ. Naq kixtaqsi li ruqʼ chaq saʼ li haʼ xbʼeen wa rikʼin tzʼaqal xmetzʼew, kiyaabʼak rikʼin xsahil xchʼool. Chirix aʼan, kixkʼe xchʼool chi numxik chiru xkaʼchʼinal ru li kʼuulebʼaal haʼ, chirix aʼan lix nimal ru, chirix aʼan junjunq sut lix nimal ru. Wulaj wulaj yoo chaq chixyalbʼal xqʼe, chi numxik, chi kuyuk, toj reetal naq kixkʼul li xbʼeenil maatan saʼ li Bʼatzʼunlebʼaal Olimpico rikʼin jun li numxik qʼaxal chʼaʼaj” (Marvin J. Ashton, saʼ Conference Report, Abril 1975, perel 127, malaj Ensign, mayo 1975, perel 86).

Laj Heber J. Grant kinumta saʼ xbʼeen naabʼal lix qʼunal xmetzʼew, ut kixnumsi choqʼ seebʼal. Aʼan kixjultika saʼ xchʼool li aatin aʼin: “Li kʼaʼru nokokuyuk saʼ xbʼaanunkil nakotz xchʼaʼajkil chiqu, moko rikʼin ta naq xjalman li kʼaʼru yooko, rikʼin bʼan naq xniman li qawankil chixbʼaanunkil” (saʼ Enseñanzas de los Presidentes de la Iglesia: Heber J. Grant 2003, perel 36).

Li Qaawaʼ torosobʼtesi wi naqoksihebʼ li qamaatan rikʼin xchaabʼilal li naʼlebʼ

Li Awaʼbʼej Joseph F. Smith kixye: “Li junjunq chi ralal ut xrabʼin li Dios wan junaq maatan xkʼul, ut taapatzʼmanq resil chiru li junjunq chan ru naq xroksi choqʼ re li us malaj li inkʼaʼ us” (Doctrina del Evangelio, 1978, perel 364). Li maatan nakʼeeman qe, aʼan jun paay chi mertoomil (jun li qatenebʼankil saʼ lix awaʼbʼejihom li Dios). Li jaljookil ru aatin chirixebʼ li tumin naxye qe naq wi nokokʼanjelak chi chaabʼil saʼ li qamertoomil, taakʼeemanq chik li qatenebʼankil li nim wiʼchik. Wi inkʼaʼ nokokʼanjelak chi chaabʼil, saʼ jun kutan taaʼisimanq chaq chiqu li mertoomil xqakʼul. (Chiʼilmanq Mateo 25:14–30).

Yeebʼil ajwiʼ qe saʼebʼ li loqʼlaj hu naq taaraqmanq aatin chiqix aʼ yaal kʼaʼru li qakʼanjel (chiʼilmanq Mateo 16:27). Rikʼin xnimobʼresinkilebʼ ut roksinkilebʼ li qamaatan re xtenqʼankilebʼ li qas qiitzʼin, naqabʼaanu li chaabʼil kʼanjel.

Nasahoʼ saʼ xchʼool li Qaawaʼ wi naqoksihebʼ li maatan xqakʼul rikʼin xchaabʼilal li naʼlebʼ. Aʼan toorosobʼtesi wi naqoksihebʼ li qamaatan re xtenqʼankilebʼ li qas qiitzʼin ut re xwaklesinkil lix awaʼbʼejihom arin saʼ li ruchichʼochʼ. Junjunq li osobʼtesink naqakʼul aʼanebʼ li sahil chʼoolejil ut li rahok li nachal rikʼin kʼanjelak chiruhebʼ li qas qiitzʼin arin saʼ ruchichʼochʼ. Naqatzol ajwiʼ xrambʼal qibʼ. Chixjunil aʼin naʼajman ru re naq kʼulubʼejaqo chi wank wiʼchik rikʼin li qaChoxahil Yuwaʼ.

  • Ani junjunq li xeʼchaabʼilobʼresiik lix maatanebʼ rikʼin naq xeʼroksi rikʼin xchaabʼilal li naʼlebʼ? (Naru taakʼoxla ani nawbʼil ru aabʼaan, malaj ani li yeebʼil resil saʼebʼ li loqʼlaj hu, malaj saʼ li resilal li Iglees.)

Ebʼ li loqʼlaj hu