Lēsoni 27: Ko Hono Teuteuʻi ʻo e Māmaní ki he Hāʻele ʻAngaua Mai ʻa Sīsū Kalaisí
Lēsoni 27
Ko Hono Teuteuʻi ʻo e Māmaní ki he Hāʻele ʻAngaua Mai ʻa Sīsū Kalaisí
Talateú
ʻE hāʻele mai ʻa e Fakamoʻuí ʻi ha ʻaho ʻi he mālohi mo e nāunau lahi. ʻI he teuteu ki he ʻaho lahi ko iá, ʻoku akoʻi e Kāingalotú ke nau ako e ngaahi fakaʻilonga ʻo ʻEne hāʻele maí mo teuteu ki ai ʻaki e tuʻu ʻi he ngaahi potu toputapú mo “maʻu e Laumālie Māʻoniʻoní ke hoko ko honau fakahinohino” (T&F 45:57). Naʻe fakahā ʻe he ʻEikí ki he kāingalotu ʻo e Siasí ʻoku ʻi ai honau fatongia ki hono teuteuʻi ʻo e māmaní ki he Hāʻele ʻAngaua Mai ʻa e Fakamoʻuí.
Ko e ngaahi fakaʻilonga kimuʻa ʻi he Hāʻele ʻAngauá.
Fai ki he kau akó ʻa e fehuʻi ko ʻení:
Te ke lava fēfē ʻo tala e taimi ʻoku ʻamanaki ke ʻuha aí?
Fakamatalaʻi ange ʻoku hangē ʻoku ʻi ai ʻa e ngaahi fakaʻilonga ke tokoni ke tau ʻiloʻi e taimi ʻe ʻuha aí, ʻoku ʻi ai foki ʻa e ngaahi fakahinohino, pe ngaahi fakaʻilonga, ke tokoni ke tau ʻiloʻi e taimi ʻe hoko ai e Hāʻele ʻAngaua Mai ʻa Sīsū Kalaisí. Talaange ki he kau akó ʻoku hangē ko e meʻa ne lekooti ʻi he Mātiu 24, naʻe feʻiloaki e Fakamoʻuí mo ʻEne kau ākongá ʻi he Moʻunga ʻo e ʻŌlivé ʻi ha kiʻi taimi nounou kimuʻa Heʻene pekiá mo fakamatalaʻi e ngaahi fakaʻilonga ʻo ʻEne Hāʻele ʻAngauá. Naʻá Ne toe ʻomi e ngaahi ʻakonaki ko ʻení kia Siosefa Sāmita ʻi hotau kuongá, hangē ko hono lekooti he ʻi he Tokāteline mo e Ngaahi Fuakava 45. Fakamamafaʻi ki he kau akó ko ha kaveinga mahuʻinga ʻi hono kotoa ʻo e Tokāteline mo e Ngaahi Fuakavá ʻa e teuteu ki he Hāʻele ʻAngaua Mai ʻa Sīsū Kalaisí. Fakaafeʻi e kau akó ke tuku ha taimi lolotonga ʻenau ako e Tokāteline mo e Ngaahi Fuakavá ke fakatokangaʻi e ngaahi akonaki kau ki he Hāʻele ʻAngauá mo fakalaulauloto ki he founga te nau lava ʻo teuteu ai ki aí.
Ko e hā e meʻa ne ʻeke ʻe he kau ākongá kia Sīsuú?
Ko e hā ʻEne talí?
Ke tokoni ke ʻiloʻi ʻe he kau akó ʻa e ngaahi fakaʻilonga ʻe hoko kimuʻa ʻi He Hāʻele ʻAngauá, tohi e ngaahi fakamoʻoni fakafolofola ko ʻení ʻi he palakipoé :
Vahevahe ʻa e kau akó ke nau tauhoa, pea vahe ki he hoa takitaha ha taha ʻo e ngaahi potufolofolá ʻi he palakipoé Kole ange ke nau lau fakataha ʻa e ngaahi veesi ko ʻení, ʻo kumi ʻa e ngaahi fakaʻilonga naʻe hā ʻi he ngaahi veesi koiá. Fakamahino ange kuo ʻosi fakahoko pe ʻoku ofi ke fakahoko ha niʻihi ʻo e ngaahi fakaʻilongá. Mahalo te ke loto ke vahevahe e fakamatala ko ʻeni ʻoku fekauʻaki mo e veesi 30: “ʻOku ui e taimi naʻe fuofua maʻu ai ʻe he kau Senitailé e ongoongoleleí ko e ngaahi kuonga ʻo e kau Senitailé. Naʻe maʻu ai ʻe he kakai naʻe ʻikai ko ha kau Siú … ha faingamālie ke tali e ongoongoleleí mo maʻu e fakamoʻuí kimuʻa pea toki ʻomi e totonu ko iá, ʻi ha toe faʻahinga tuʻunga lahi ange, tautefito ki he kau Siú” (Bruce R. McConkie, Mormon Doctrine, 2nd ed. [1966], 721–22).
Hili ha taimi feʻunga kole ki he hoa takitaha ke lipooti ʻa e meʻa ne nau maʻú ki he kalasí. Mahalo te ke fie fokotuʻu ange ki he kau akó ke nau fakaʻilongaʻi ʻa e moʻoni ko ʻení ʻi heʻenau folofolá.
ʻOkú ke ongoʻi faingataʻaʻia nai ʻi hoʻo lau pe fanongo ki he ngaahi meʻa pe fakaʻilonga ʻe hoko kimuʻa he Hāʻele ʻAngauá? Ko e hā hono ʻuhingá?
Ko e hā ha ngaahi founga ʻe lava ai ʻe hono ʻilo e ngaahi fakaʻilonga ʻo e Hāʻele ʻAngauá ʻo tokoniʻi ke tau ikunaʻi e ilifiá mo e hohaʻá ʻi heʻetau moʻuí?
Fakaafeʻi e kau akó ke lau fakalongolongo ʻa e Tokāteline mo e Ngaahi Fuakava 45:35–38 ke ʻilo e ʻuhinga naʻe ʻomi ai ʻe he Fakamoʻuí e ngaahi fakaʻilonga ʻe hoko kimuʻa Heʻene Hāʻele ʻAngauá.
Ko e hā ʻoku mahuʻinga ai ke ʻiloʻi ʻa e taimi ʻoku fakahoko ai e ngaahi fakaʻilonga ʻo e hāʻele mai ʻa e Fakamoʻuí?
Kole ki ha tokotaha ako ke kumi e ngaahi founga ke teuteu ai ki he Hāʻele ʻAngaua Mai ʻa Kalaisí ʻi heʻenau lau e Tokāteline mo e Ngaahi Fuakava 45:32, 39, 56-57 . Pea aleaʻi leva e ngaahi fehuʻi koʻení:
Ko e hā ʻokú ke ako mei he ngaahi veesi ni fekauʻaki mo e founga ke teuteu ai ki he Hāʻele ʻAngauá? (ʻI hono vahevahe ʻe he kau akó ʻenau ngaahi fakakaukaú, fakamamafaʻi e tefitoʻi moʻoni ko ʻení: ʻOku mahuʻinga ʻi heʻetau teuteu ki he Hāʻele ʻAngaua Mai ʻa Sīsū Kalaisí ke tuʻu ʻi he ngaahi potu toputapú mo hoko e Laumālie Māʻoniʻoní ko hotau tatakí.)
Ko e hā kuo pau ke tau fai ke hoko ai e Laumālie Māʻoniʻoní ko hotau tatakí?
ʻOkú ke pehē ʻe lava fēfē ha taha ʻoku muimui ʻia Sīsū Kalaisi ʻo “tuʻu ʻi he ngaahi potu toputapú”? (ʻOku kau ʻi he ngaahi potu toputapú ʻa e temipalé, falelotú, mo e ngaahi ʻapí. ʻE lava ke ngaohi ha ʻapi ke toputapu ʻi he lotu fakatāutaha maʻu pē mo e lotu fakafāmilí, ako folofolá, ngāue tokoní, mo e efiafi fakafāmili ʻi ʻapí. ʻOku toe kau foki he tuʻu ʻi he ngaahi potu toputapú ʻa e founga ʻetau moʻuí. Kapau te tau moʻui taau ke maʻu e takaua ʻo e Laumālie Māʻoniʻoní ʻoku tau tuʻu leva ʻi ha potu toputapu. Fakakaukau ke fokotuʻu ki he kau akó ke hiki e ngaahi fakakaukaú ni ʻi he tafaʻaki ʻo ʻenau folofolá hoko ki he Tokāteline mo e Ngaahi Fuakava 45:32.)
Kuó ke lava fēfē ʻo tuʻu ʻi he ngaahi potu toputapú neongo e nofo ʻi ha māmaní faiangahá?
Ko e hā ha niʻihi ʻo e ngaahi ʻuhinga ʻokú ke fakatuʻamelie ai ki he Hāʻele ʻAngaua Mai ʻa e Fakamoʻuí? Ko e hā ʻokú ke houngaʻia ai ki ha toe hāʻele mai ʻa e Fakamoʻuí?
Fakamanatu ki he kau akó ko e hingoa ʻo e lēsoni ko ʻení ko e Ngaahi Fakavaʻe ki Hono Fakafoki Mai ʻo e Ongoongoleleí. Fehuʻi ki he kau akó:
Ko e hā ha faʻahinga fehokotaki pe fekāingaʻaki ʻokú ke fakatokangaʻi ʻi Hono Fakafoki Mai ʻo e Ongoongoleleí pea mo e Hāʻele ʻAnga Ua Mai ʻa Sīsū Kalaisí?
Hiki e ngaahi fakamoʻoni folofola ko ʻení ʻi he palakipoé. Kole ki he kau akó ke nau ako kinautolu mo kumi e kaveinga ʻoku nau faitatau aí:
Hili ha taimi feʻunga, kole ki he kau akó ke nau tafoki ki he tokotaha ʻoku tangutu hono tafaʻakí ʻo aleaʻi e meʻa ʻoku faitatau ai e ngaahi potufolofola ko ʻení. Kole ki ha niʻihi ʻo e kau akó ke nau fakamatalaʻi fakanounou e pōpoaki ʻi he ngaahi folofola ko ʻení. (ʻI hono vahevahe ʻe he kau akó ʻenau ngaahi fakakaukaú, tokoni ke nau ʻiloʻi mo mahino e tefitoʻi moʻoni ko ʻení: ʻI heʻetau malangaʻi e ongoongoleleí ki he niʻihi kehé, ʻoku tau tokoni ai ki hono teuteuʻi ʻo e māmaní ki he Hāʻele ʻAngaua Mai ʻa Sīsū Kalaisí.)
Kole ki he kau akó ke nau toe vakaiʻi ʻa e vahe 29, 34, mo e 39 ʻi he Tokāteline mo e Ngaahi Fuakavá mo fakatokangaʻi e ngaahi ʻaho naʻe ʻomi ai e ngaahi fakahaá. Fehuʻi ange:
Ko e hā hono fuoloa hili hono fokotuʻu ʻo e Siasí pea kamata leva hono akoʻi ʻe he ʻEikí e tefitoʻi moʻoni ne toki ʻiloʻí?
Fakaafeʻi ha tokotaha ako ke lau e lea ko ʻeni ʻa ʻEletā Nila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá:
ʻĪmisi
Elder Neil L. Andersen
“Talu mei he ngaahi fuofua ʻaho ʻo hono toe Fakafoki mai ʻo e ongoongoleleí, mo e fakamātoato moʻoni ʻa hono fakahoko ʻe he kau tangatá ʻa honau fatongia ke malanga ʻaki e ongoongoleleí. ʻI he 1837, hili pē ia ha taʻu ʻe fitu mei hono fokotuʻu ʻo e Siasí, ʻi ha taimi ʻo e masivesivá mo e fakatangá, ne ʻoatu ha kau faifekau ki ʻIngilani ke nau malanga ʻaki e ongoongoleleí. ʻI he ngaahi taʻu ne hokó, ne malanga e kau faifekaú ʻi he ngaahi feituʻu kehekehe ʻo hangē ko ʻAositulia, Tahiti, ʻInitia, Pāpeitosi, Silei mo Siaina.
“Kuo faitāpuekina ʻe he ʻEikí e ngāué ni pea kuo fokotuʻu e Siasí ʻi he funga ʻo e māmaní. … ʻOku ʻikai pē tūkua hono fakamoʻoniʻi ʻe ha kau faifekau angatonu ʻa e Fakamoʻuí he funga māmaní. Fakakaukau angé ki he mālohinga fakalaumālie ʻo ha kau faifekau ʻe toko 52,000, kuo fakakoloaʻi ʻaki e Laumālie ʻo e ʻEikí, ʻo nau fakahaaʻi loto toʻa “ʻe ʻikai tuku mai mo ha toe hingoa kehe pe hala pe founga ʻa ia ʻe lava ʻo hoko ai ʻa e fakamoʻuí … , kae fou pea ngata pē ʻi he huafa ʻo Kalaisí’ [Mosaia 3:17]. … ʻOku teuteuʻi e māmaní ki he Hāʻele ʻAngaua mai ʻa e Fakamoʻuí, ʻi ha founga lahi koeʻuhí ko e ngāue ko ia ʻa e ʻEikí ʻo fakafou ʻi Heʻene kau faifekaú” (“Ko Hono Teuteuʻi ʻo e Māmaní ki he Hāʻele ʻAngauá,” Ensign pe Liahona, Mē 2011, 51).
Aleaʻi ʻa e ngaahi meʻa ko ʻení:
ʻOku teuteuʻi fēfē ʻe he pōpoaki ʻoku akoʻi ʻe he kau faifekaú e kakaí ki he Hāʻele ʻAngaua Mai ʻa Sīsū Kalaisí?
Ko e hā ʻoku mahuʻinga ai hono Fakafoki mai ʻo e ongoongoleleí kimuʻa pea toe hāʻele mai e Fakamoʻuí ki he māmaní?
Fakaʻaliʻali ʻa e lea ko ʻeni ʻa Palesiteni Siosefa F. Sāmita (1838-1918), pea kole ki ha tokotaha ako ke lau leʻolahi ia:
ʻĪmisi
Palesiteni Joseph F. Smith
“Ka ʻoku akoʻi ʻe he ongoongoleleí ʻa e tangatá ke nau loto-fakatōkilalo, faivelenga, faitotonu mo anga māʻoniʻoni ʻi he ʻao ʻo e ʻEikí pea ʻiate kinautolu pē, pea kapau te nau fai ki hono ngaahi tefitoʻi moʻoní, ʻe tupu ʻo lahi pea fokotuʻu ʻi he funga ʻo māmaní ʻa e melinó mo e anga māʻoniʻoní, pea ʻe ngata leva ʻa e fai angahalá, fekeʻikeʻí, lingi totó mo e ngaahi faʻahinga kovi kotoa pē ʻoku fakatupu ʻauhá, pea ʻe fakamaʻa ʻa e māmaní mo ngaohi ke hoko ko ha feituʻu feʻunga ke nofo ai ʻa e kakai fakalangí, pea ke hāʻele mai ʻa e ʻEiki ko hotau ʻOtuá ʻo nofo ai, pea ko e meʻa ia te ne fai lolotonga ʻa e Nofotuʻí” ( Ngaahi Akonaki ʻa e Kau Palesiteni ʻo e Siasí: Siosefa F. Sāmita [1998], 461–62).
“ʻOku lau ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní … ko e konga ia ʻo hono misioná ke teuteuʻi ʻa e hala ki he hāʻele totonu mo nāunauʻia mai ʻa e ʻAlo ʻo e ʻOtuá ki he māmaní, ke Ne pule mo nofo fakataha ai mo Hono kakaí” (Ngaahi Akonaki ’a e Kau Palesiteni ’o e Siasí: Siosefa F. Sāmita,462).
Fai ange ʻa e fehuʻi ko ʻení:
Lolotonga hono fakahoko e lēsoni ko ʻení, ko e hā haʻo ngaahi fakakaukau pe ueʻi fakalaumālie kau ki he fatongia ʻo e Siasí mo hono kāingalotú ki hono teuteuʻi ʻo e māmaní ki he Hāʻele ʻAngauá?
ʻOkú ke pehē ʻe tokoniʻi fēfē koe ke ke mateuteu ʻi hoʻo tokoni ke teuteuʻi e niʻihi kehé ki he Hāʻele ʻAngauá?
Ke fakaʻosi e lēsoní, fakaafeʻi e kau akó ke vahevahe ʻa e meʻa kuo nau fai ke vahevahe ai e pōpoaki hono Fakafoki mai ʻo e ongoongoleleí kiate kinautolu ʻoku ʻikai kau ki heʻetau tui fakalotú.