Chʼol 6
K’eeb’il li tijonelil re laj Jose ut laj Oliver
Mayo re 1829
Laj Jose ut laj Oliver ke’xk’ulub’a xch’ool naq te’xpatz’ re li Dios. Ke’wan xpaab’aaleb’ naq a’an tixtenq’aheb’ chixtzolb’al li yaal. Sa’ li 15 xb’e li po mayo re 1829 xkoheb’ sa’ li k’iche’ ut ke’tijok.
Jun choxahil aj k’amol esil kixk’ut rib’ chiru laj Jose ut laj Oliver. A’an laj Jwan aj Kub’sihom Ha’ li kixkub’si xha’ li Jesus junxil. Sutsu xb’aan jun lemtz’unkil saqen.
Laj Jwan aj Kub’sihom Ha’ kichal chaq re xk’eeb’al li Tijonelil re Aaron re laj Jose ut laj Oliver. Li tijonelil a’an lix wankil li Dios. Lix wankilal chi kub’sink ha’ nachal rik’in li Tijonelil re Aaron.
Laj Jwan aj Kub’sihom Ha’ kixye re laj Jose ut laj Oliver naq te’xkub’si xha’ li jun chik. Laj Jose kixkub’si xha’ laj Oliver, toja’ naq laj Oliver kixkub’si xha’ laj Jose. Sub’b’ileb’ rub’el li ha’ naq ke’kub’e xha’.
Junxil, laj Jwan aj Kub’ishom Ha’ kixkub’si xha’ li Jesus chi jo’kan. Li Jesus kisub’e’ rub’el ha’ naq kikub’e xha’.
Ke’nujob’resiik rik’in li Santil Musiq’ej laj Jose ut laj Oliver chirix naq kub’enaqeb’ xha’. Li Santil Musiq’ej kixye reheb’ naq tikto lix Iglees li Jesukristo tz’aqal yaal taatawmanq wi’chik sa’ ruchich’och’.
Laj Jose ut laj Oliver ke’xye reheb’ li ramiiw naq ke’kub’e xha’. Ke’xye ajwi’ reheb’ resil li tijonelil. A’ut laj Jose ut laj Oliver maji’ ke’xye resil a’in reheb’ jalaneb’. Ke’xnaw naq junjunqeb’ ink’a’ te’xpaab’eb’ ut te’xyoob’ li ch’a’ajkilal choq’ reheb’.
Moqon, ke’k’ulun oxib’ chik aj choxahil k’amol esil. A’aneb’ laj Pedro, laj Santiago, ut laj Jwan, oxib’ reheb’ lix apostol li Jesus. Laj Pedro, laj Santiago, ut laj Jwan ke’xk’e li Tijonelil re Melkisedek re laj Jose Smith ut laj Oliver Cowdery. A’an a’in ajwi’ li xnimal ru tijonelil nayeeman re.
Nak ak kik’ojob’aman wi’chik li tijonelil, taaruuq taak’eemanq reheb’ li winq tiikeb’ xch’ool li wankilal re xb’aanunkil lix k’anjel li Dios sa’ ruchich’och’. Eb’ li winq li wan rik’ineb’ li Tijonelil re Melkisedek neke’ru chi jolomink sa’ li Iglees. Neke’ru chixk’eeb’al li osob’tesink re jalaneb’. Neke’ru ajwi’ chixk’eeb’al li maatan re li Santil Musiq’ej reheb’. Lix k’ojlajik wi’chik li tijonelil a’an jun xnimal ru maatan.