Chʼol 10

Li xb’een sachb’a-ch’oolej sa’ li Iglees

Abril re 1830

Li ch’utam jun chik re li Iglees kik’ulman sa’ domingo, li 11 xb’e li po abril re 1830. Ke’oken li komon sa’ li Iglees sa’ li ch’utam, jo’kan ajwi’ naab’aleb’ chik li maji’ komoneb’.

Laj Oliver Cowdery kixk’ut lix evangelio li Jesukristo. Ke’wan li ke’xpaab’ li raatin laj Oliver ut ke’raj ok sa’ li Iglees. Naq kiraqe’ li ch’utam, ke’kub’e xha’.

Laj Satanas ink’a’ kiraj naq te’ok sa’ li Iglees, jo’kan naq kixyal xq’e chixrahob’tesinkileb’. Jun winq li kixk’ul a’in, a’an laj Newel Knight xk’ab’a’.

Laj Jose kixpatz’ re laj Newel naq taatijoq sa’ jun ch’utam, ut laj Newel kixye naq tixb’aanu.

A’b’anan laj Satanas ink’a’ kiraj naq laj Newel taatijoq. Naq laj Newel xko’o sa’ li ch’utam, kixye naq kixuwak chi tijok chi kaw xyaab’ xkux.

Sa’ li eq’la jun, laj Newel Knight xko’o sa’ k’iche’ re naq taaruuq chi tijok junes. Laj Newel kixyal tijok, a’b’anan wi’chik laj Satanas ink’a’ kiraj naq taatijoq, ut ink’a’ kiru chi aatinak. Kiyajer ut kixuwak, ut kisutq’i sa’ kab’l.

Li rixaqil laj Newel yoo xk’a’uxl chirix ut kixpatz’ re laj Jose Smith naq tixtenq’a. Laj Jose kiroksi li tijonelil re rosob’tesinkil laj Newel ut risinkil laj Satanas. Chirix li osob’tesink, ki’usa laj Newel. Moqon kikub’e xha’.