Chʼol 31
Li Aaatin re Chaab’il Na’leb’
Febrero re 1833
Ki’uxman li tzoleb’aal sa’ jun na’ajej sa’ lix k’ayib’aal laj Newel Whitney sa’ Kirtland, Ohio. Sa’ li tzoleb’aal a’in, laj Jose ut li jun ch’ol chik aj jolominel re li Iglees ke’xtzol rib’ chirix li tijonelil, li loq’laj hu, ut xkomon chik li na’leb’. Li rajb’al li tzoleb’aal a’an xkawresinkileb’ li winq choq’ re li jolomink ut li k’anjelak choq’ aj k’amol aatin sa’ li Iglees.
Naab’al reheb’ li winq ke’mayib’k, rli kixk’e chi nujob’resiik li na’ajej rik’in sib’. Junjunq reheb’ li winq ke’roski li may ut ke’chuub’ak chiru xtz’akil li na’ajej, ut kitz’ajno’ ru xb’aan.
Li xEmma Smith, li rixaqil laj Jose, kixmesu li na’ajej chirix xraqik li junjunq chi ch’utam. A’an ut laj Jose ke’ok chi k’oxlak chirix chanru li winq yookeb’ chiroksinkil li may. Laj Jose kiraj xnawb’al ma us li mayib’k ut roksinkil li may.
Laj Jose kitijok re xnawb’al k’a’ru li us. Li Jesus kixk’e re jun k’utb’esinb’il na’leb’ nawb’il ru jo’ li Aatin re Chaab’il Na’leb’. Li Jesus kixye naq wankeb’ li ani neke’raj naq li jun ch’ol chik neke’xb’aanu li k’a’ru moko us ta choq’ reheb’ xtib’el. Sa’ li Aatin re Chaab’il Na’leb’, li Jesus ki’aatinak rik’ineb’ laj Santil Paab’anel chirix li k’a’ru ink’a’ us choq’ re xtib’eleb’. Ki’aatinak ajwi’ chirix li k’a’ru us choq’ re xtib’eleb’.
Li Jesus kixye naq li uka’ li nakaltesin moko us ta choq’ qe. Ink’a’ us rukb’al li uka’ li nakaltesin. Wan jalan chik na’oksiman wi’ li uka’ li nakaltesin, a’b’an moko re ta li tib’elej.
Li Jesus kixye naq li may moko us ta choq’ qe. Ink’a’ us xmayinkil li may, chi moko li puro. Ink’a’ us xk’uxb’al li may.
Li Jesus kixye naq eb’ laj Santil Paab’anel me’ruk’a li tiqwal uk’a jo’ li te ut li kape. Eb’ li uk’a a’in moko us ta choq’ re li tib’elej.
Li Jesus kixye naq k’iila paay chi q’een ut xul useb’ choq’ qe. Tento taqab’antioxi re li qaChoxahil Yuwa’ li sahil tzakemq.
Li Jesus kixye naq tento naq moko naab’al ta li tib’ taqak’ux.
Li Qaawa’ kixye naq li jar paay chi iyaj useb’ choq’ re li tib’elej. Reheb’ li iyaj a’in wan li trigo, li arros, li ixim, ut li avena. Li ki’il q’een ut li k’a’ru re che’ nak’uxman useb’ ajwi’ choq’ re li tib’elej.
Li Jesus kixyeechi’i li ninqi osob’tesink reheb’ li neke’xpaab’ li Aatin re Chaab’il Na’leb’. Kawaqeb’ rib’ ut kawaqeb’ li roq ruq’ rik’in xpaab’ankil wi’chik chiru ink’a’ xpaab’ankil. Seeb’ob’resinb’ilaq chik ajwi’ lix k’a’uxleb’, ut te’xk’ul xchaab’ilal li na’leb’ ut li ninqi b’ihomal re nawom.