Chʼol 4
Laj Martin Harris ut eb’ li perel sachenaqeb’
1827–1828
Sa’ Pennsylvania, laj Jose ki’ok chixjaltesinkil ru li k’a’ru tz’iib’anb’il chiruheb’ li perel ch’iich’ oor. A’an ink’a’ kixtaw ru lix yaalalil li tz’iib’anb’il aatin, a’b’an naq kiroksi li Urim ut Tumim, li Dios kixtenq’a chixtawb’al ru li aatin.
Laj Martin Harris xko’o Pennsylvania ut kixtenq’a laj Jose sa’ li jaltesink-u. Naq laj Jose yoo chixjaltesinkil ru li aatin tz’iib’anb’il chiruheb’ li perel ch’iich’ oor, laj Martin kixtz’iib’aheb’ chiru hu. Laj Jose ut laj Martin ke’xjaltesi ru 116 perel re lix Hu laj Mormon.
Laj Martin Harris kiraj xk’amb’al li 116 perel sa’ rochoch re naq lix junkab’al te’rileb’. Laj Jose kixpatz’ re li Qaawa’ ma naru tixk’ameb’ li perel laj Martin, a’ut li Qaawa’ kixye naq ink’a’ naru. Laj Jose kixpatz’ wi’chik, a’b’an li Qaawa’ kixye wi’chik naq ink’a’ naru.
Laj Martin toj kiraj xk’amb’aleb’ li perel sa’ rochoch. Kirelaji ru laj Jose naq tixpatz’ re li Qaawa’ jun sut chik. Sa’ li hoonal a’in li Qaawa’ kixye naq laj Martin naru tixk’ameb’ li hu wi taa’ok sa’ aatin naq ka’ajwi’ tixk’uteb’ li perel chiru li rixaqil ut junjunqeb’ chik xkomon lix junkab’al.
Laj Martin kixye naq taa’ab’inq chiru li Qaawa’. Kixk’ameb’ li perel sa’ rochoch ut kixk’uteb’ chiru lix junkab’al. A’ut chirix a’an, kixq’et lix yeechi’ihom ut kixk’uteb’ li perel chiru junjunqeb’ chik.
Moqon xko’o laj Martin re xk’amb’aleb’ li perel. Kixsik’ yalaq b’ar a’b’an ink’a’ kiru chixtawb’aleb’. Sachenaqeb’ li perel.
Chirix xnumik junjunq xamaan, naq laj Martin Harris maji’ nasutq’iik rik’ineb’ li perel, kika’ch’ino’ xch’ool laj Jose. Xko’o Nueva York re xtawb’al laj Maritn Harris, li kixye re naq ke’sache’ li perel. Q’axal ke’raho’ sa’ xch’ool laj Jose ut laj Martin.
Laj Jose kisutq’i Pennsylvania, b’ar kitijok re xk’ulb’al xkuyb’al lix maak. Laj Moroni kixk’ut rib’ chiru ut kixchapeb’ li perel ch’iich’ oor.
Sa’ jun k’utb’esinb’il na’leb’, li Qaawa’ kixye re laj Jose naq taarame’q chiru li jaltesink-u chiru jun k’amok xb’aan naq ink’a’ ki’ab’in. Li Qaawa’ kixk’ojob’ ajwi’ xch’ool laj Jose, chixyeeb’al naq lix k’anjel taaxik chi uub’ej ut naq toj sik’b’il ru laj Jose re xb’aanunkil li k’anjel wi tixjal xk’a’uxl.
Li Jesus kixye re laj Jose naq laj Satanas kireek’asi xch’ooleb’ junjunqeb’ li winq aj maak re te’xmaq’eb’ li 116 perel. Eb’ li winq a’in te’xjal li k’a’ru tz’iib’anb’il re naq li jun ch’ol chik ink’a’ te’xpaab’ lix Hu laj Mormon. Li Jesus kixye naq laj Satanas ut eb’ li winq aj maak ink’a’ ke’ru chixramb’al lix k’anjel li Dios.
Tzolʼlebʼ ut Sumwank 10, xtiklajik li tasal
Kixjal xk’a’uxl laj Jose. Tikto laj Moroni kixq’ajsiheb’ li perel ch’iich’ oor, ut li Qaawa’ kixkuy xmaak laj Jose ut kixk’e wi’chik re li maatan re jaltesink-u. Li Jesus kixye re laj Jose naq mich’inan xch’ool chirixeb’ li perel sachenaqeb’ xb’aan naq tz’iib’anb’ileb’ ajwi’ li esilal a’an sa’ jalan chik xraqal li perel ch’iich’ oor. Li Jesus kixye naq laj Jose tento tixjaltesi ru li raqal a’an re li perel ch’iich’. Li Jesus kixye ajwi’ naq naab’aleb’ te’ril ru lix Hu laj Mormon ut te’xtaw xna’leb’ chirix lix evangelio.