Chʼol 7
Eb’ aj yehol nawom neke’rileb’ li perel ch’iich’ oor
1829–1830
Laj Jose Smith ut laj Oliver Cowdery ke’xchoy xjaltesinkil ru lix Hu laj Mormon. Li Jesus kiraj naq li tenamit te’ril li hu. A’an kiraj ajwi’ naq te’xnaw naq laj Jose kixye chaq li yaal chirixeb’ li perel ch’iich’ oor.
Li Jesus kixsik’ ru oxib’ chik chi winq re te’rileb’ li perel ch’iich’ oor ut te’wanq choq’ aj yehol nawom naq yaaleb’. Eb’ li winq a’in, a’aneb’ laj Martin Harris, laj Oliver Cowdery, ut laj David Whitmer.
Laj Jose kixk’ameb’ li oxib’ chi aj yehol nawom sa’ k’iche’, b’ar ke’tijok. Jun li anjel kichal ut kixk’uteb’ li perel ch’iich’ oor chiruheb’. Li Jesus kixye reheb’ li oxib’ chi aj yehol nawom naq te’xye re li tenamit li k’a’ru ke’ril.
Jwal sa xch’ool laj Jose Smith. Li oxib’ chi aj yehol nawom te’xye resileb’ li perel ch’iich’ oor reheb’ li tenamit, ut naab’aleb’ chik te’xpaab’ naq laj Jose kixye chaq li yaal.
Li Jesus kixye re laj Jose naq tixk’uteb’ li perel ch’iich’ chiru waqxaqib’ chik aj yehol nawom. Eb’ li waqxaqib’ li winq a’in ke’xchap sa’ ruq’eb’ li perel ch’iich’ oor ut ke’ril li k’a’ru tz’iib’anb’il chiruheb’ li perel ch’iich’.
Chixjunileb’ aj yehol nawom ke’tz’iib’ak chirixeb’ li perel ch’iich’ oor. Ke’xye naq ke’rileb’ chaq li perel ch’iich’, ut ke’xch’olob’ xyaalal naq tz’aqaleb’ yaal. Li raatineb’ wan sa’ lix Hu laj Mormon.
“Lix Ch’olob’ahomeb’ li Oxib’ chi aj Yehol Nawom” ut “Lix Ch’olob’ahomeb’ li Waqxaqib’ chi aj Yehol Nawom” (chi’ilmanq li perel sa’ xtiklajik lix Hu laj Mormon)
Chirix naq laj Jose Smith ak kixjaltesiheb’ ru li perel ch’iich’ ut ilb’ileb’ xb’aaneb’ aj yehol nawom, maak’a’ chik rajb’al naq te’kanaaq rik’in laj Jose. Kik’utun li anjel Moroni, ut laj Jose kixq’ajsiheb’ li perel ch’iich’ oor re.
Chirix naq laj Jose ak kixchoy xjaltesinkil ru lix Hu laj Mormon, kixk’am chaq rik’in jun laj k’uub’anel hu. Maak’a’ xtumin laj Jose re xtojb’al laj k’uub’anel hu. Tz’aqal xtumin laj Martin Harris, ut sa’ jun k’utb’esinb’il na’leb’ kipatz’e’ re naq tixwotz re xtojb’al laj k’uub’anel hu.
Laj Satanas ink’a’ kiraj naq taak’uub’anq lix Hu laj Mormon. Ink’a’ kiraj naq taa’ile’q ru xb’aan li tenamit. Eb’ li winq aj maak ke’xyal xq’e chixramb’al ru laj k’uub’anel hu.
Jun li winq xko’o sa’ li k’uub’leb’aal hu chiruheb’ li domingo ut kirelq’a junjunqeb’ li perel sa’ lix Hu laj Mormon. A’an kixk’uub’eb’ li perel sa’ jun li hu re noticias toj reetal naq jalaneb’ chik li winq ke’xmin ru chixkanab’ankil li elq’ak.
Eb’ li ani ke’xyal xq’e chixramb’al ru li k’uub’ank hu ink’a’ ke’ru xb’aan naq eb’ li ani aj maak ink’a’ neke’ru chixramb’al ru lix k’anjel li Jesus. Chirix xnumik k’iila po, tz’aqob’resinb’il ru lix xk’uub’lajik lix Hu laj Mormon.