Chʼol 49
Eb’ laj k’amol aatin sa’ jalaneb’ chik li ch’och’
Junio re 1837–octubre re 1841
Li Qaawa’ kiraj naq taak’utmanq li evangelio chiruheb’ li wankeb’ sa’ jalaneb’ ch’och’. Sa’ 1837, naq toj wankeb’ naab’aleb’ laj Santil Paab’anel sa’ Kirtland, li Qaawa’ kixye re laj Jose Smith naq li Elder Heber C. Kimball tento taaxik sa’ taqlanb’il k’anjel toj Inglaterra. Li Elder Kimball a’an jun reheb’ li Kab’laju chi Apostol sa’ li kutan a’an, ut rochb’eeneb’ waqib’ chik aj k’amol aatin kixq’ax li palaw sa’ jukub’ toj sa’ Inglaterra.
Eb’ laj k’amol aatin ke’xnaw ru jun laj jolominel re jalan chik iglees li kixkanab’eb’ chi jultikank aatin sa’ lix iglees. Naab’aleb’ aran ke’xpaab’eb’ laj k’amol aatin ut ke’raj kub’eek xha’. Laj jolominel kijosq’o’ ut kixye reheb’ laj k’amol aatin naq ink’a’ chik te’ruuq chi jultikank aatin sa’ lix iglees.
Eb’ laj k’amol aatin ke’julikan aatin sa’eb’ li rochoch li tenamit. Naab’al ke’xjunaji rib’ rik’in li Iglees.
Sa’ 1839, chirix naq eb’ laj Santil Paab’anel ak ke’xtikib’ xyiib’ankil li tenamit Nauvoo, li Kab’laju chi Apostol ke’b’oqe’ chi xik sa’ Inglaterra re xjultikankil li evangelio aran. Rub’elaj naq xkoheb’, laj Jose Smith kixch’utub’eb’ ut kixk’ut chiruheb’ li k’a’ru tento te’xk’ut.
Laj Jose kixye reheb’ laj k’amol aatin naq che’ab’inq chiruheb’ xchaq’rab’ li Dios. Ki’aatinak rik’ineb’ chirix li tijonelil. Kixye naq ka’ajwi’ sa’ lix tz’aqal Iglees li Jesukristo natawman li tijonelil.
Kawresinb’ileb’ chik li winq re xik sa’ taqlanb’il k’anjel. Ch’a’aj chiruheb’ xik xb’aan naq b’ayaq ajwi’ xtumineb’, yajeb’ naab’al reheb’, ut yajeb’ junjunq reheb’ li rixaqil ut li ralaj xk’ajol. A’b’an eb’ li winq ke’xpaab’ naq li qaChoxahil Yuwa’ tixtenq’aheb’ ut taarosob’tesiheb’ xjunkab’al.
Eb’ laj k’amol aatin xkoheb’ Inglaterra ut ke’jultikan aatin sa’ naab’aleb’ li k’aleb’aal. K’iila mil ke’xpaab’ li evangelio ut ke’xjunaji rib’ rik’in li Iglees. Naab’al reheb’ li ke’kub’e xha’ ke’wulak America ut ke’ok choq’ xnimal metz’ew choq’ re li Iglees.
Laj Orson Hyde a’an jun reheb’ li xb’een apostol. Laj Jose Smith kixye naq laj Orson wan xnimal ru k’anjel tixb’aanu choq’ re li tenamit aj Judio. Chirix junjunq po sa’ Inglaterra, li Elder Hyde xko’o sa’ li Santil Ch’och’, a’an li na’ajej kiwan wi’ li Jesus naq wan sa’ ruchich’och’. Sa’ li 24 xb’e li po octubre re 1841, li Elder Hyde kitijok re xk’ojob’ankil li Santil Ch’och’.
Sa’ lix tij, li Elder Hyde kixpatz’ re li Dios naq taarosob’tesi li ch’och’ choq’ re xch’utub’ankileb’ laj Judio. Kixye naq li Dios kixk’e li ch’och’ a’in choq’ re laj Abraham ut li ralal xk’ajol, naq jek’inb’ileb’ li alal k’ajolb’ej a’in, ut naq yookeb’ chixyo’oninkil lix tz’aqob’resinkil lix yeechi’ihom li Dios. Li Elder Hyde kirosob’tesi ajwi’ li ch’och’ re naq taawanq xha’ re naq taaruuchini li nak’uxman.
Chalen chaq naq kitijok li Elder Hyde, naab’aleb’ laj Judio ut xkomon chik lix xe’toonil laj Abraham yookeb’ chixch’utub’ankil rib’ sa’ li Santil Ch’och’. Sa’ 1979, li Awa’b’ej Spencer W. Kimball kitijok re xk’ojob’ankil jun li awimq aran. A’an li Jardin Conmemorativo Orson Hyde.