Chʼol 33
Jun k’utb’esinb’il na’leb’ chirix li Jesukristo
Mayo re 1833
Sa’ jun reheb’ li k’utb’esinb’il na’leb’ kixk’ul laj Jose, li Jesus ki’aatinak chirix a’an xjunes rib’. Kixye naq li ani naxpaab’ lix taqlahom ut natijok, a’an taaril li rilob’aal ut tixnaw ru.
Li Jesus kixye naq a’an li Saqen re li Ruchich’och’. A’an naxk’ut chanru tz’aqal na’ajman naq toowanq sa’ li qayu’am.
Li Jesus kiwan rik’in li qaChoxahil Yuwa’ rub’elaj naq yiib’anb’il li ruchich’och’. Li Jesus kixyo’ob’tesi li ruchich’och’ ut chixjunil li k’a’aq re ru wan sa’ xb’een.
Li Jesus moko chanchan ta li qaChoxahil Yuwa’ sa’ xtiklajik. Ink’a’ kixnaw chixjunil nawb’il xb’aan lix Yuwa’, ut maak’a’ xtz’aqalil li wankilal ut loq’alil li wan re lix Yuwa’. Li Jesus kixyal xq’e chi wank jo’ chanru lix Yuwa’. Timil timil kixk’ul li wankilal ut loq’alil re lix Yuwa’.
Li Jesus kixye naq tento too’ab’inq chiruheb’ lix taqlahom li Dios. Naq noko’ab’in, naru taqak’ul qanawom chirix chixjunil li k’a’aq re ru. Naru ajwi’ too’ok jo’ chanru li Dios ut taqak’ul xtz’aqalil li osob’tesink choq’ qe.
Li Jesus kixye naq laj Satanas ink’a’ naraj naq taqanaw li yaal ut too’ok jo’ chanru li Dios. Li Jesus kixye re laj Jose naq chixk’ut li yaal chiru lix junkab’al.
Li Jesus kixye ajwi’ re laj Frederick G. Williams ut laj Sidney Rigdon naq che’xk’ut chiruheb’ xjunkab’al li yaal ut li ab’ink chiruheb’ li taqlahom. Chi jo’kan, maak’a’aq xwankil laj Satanas sa’ xb’eeneb’.