Ch’ol 5
Laj Jose Smith ut laj Oliver Cowdery
Febrero–abril re 1829
Li rochoch laj Jose ut li xEmma Smith kiwan sa’ jun ch’ina’ raqal chi ch’och’ nach’ rik’in Harmony, Pennsylvania. Lix yuwa’ laj Jose kiwulak re rula’aninkileb’. Ke’saho’ xch’ool chirilb’al. Lix yuwa’ laj Jose a’an jun winq chaab’il xch’ool.
Li Jesus kixk’e jun k’utb’esinb’il na’leb’ re laj Jose choq’ re lix yuwa’. Li k’utb’esinb’il na’leb’ kixye chanru naq anihaq tixtenq’a li Jesus. Tento tixra li Jesus. Tento taak’anjelaq chi anchal xch’ool chixjultikankil li evangelio. Tento tixraheb’ ut tixtenq’aheb’ li jun ch’ol chik.
Li ani naraj xtenq’ankil li Jesus tento ajwi’ taatijok ut taawanq xpaab’aal. Li Jesus kixye naq li ani taatenq’anq re taa’osob’tesiiq.
Lix yuwa’ laj Jose kisutq’i sa’ rochoch ut kixyal xq’e chixb’aanunkil li k’a’ru kiyehe’ re xb’aan li Jesus naq tixb’aanu. Kixwotz li evangelio rik’in naab’aleb’ xkomon lix junkab’al.
Laj Jose tento taak’anjelaq sa’ xch’och’. Tento ajwi’ tixjaltesi ruheb’ li perel ch’iich’ oor. Numtajenaq li k’anjel choq’ re a’an xjunes rib’, jo’kan naq kitijok ut kixpatz’ re li qaChoxahil Yuwa’ naq tixxtenq’a.
Li qaChoxahil Yuwa’ kixsume lix tij laj Jose. Kixtaqla rik’in laj Jose jun winq, laj Oliver Cowdery xk’ab’a’. Laj Oliver kiraj xtawb’al xna’leb’ chirixeb’ li perel ch’iich’ oor. Laj Jose kixye re resil li anjel Moroni, eb’ li perel ch’iich’, ut lix Hu laj Mormon.
Laj Oliver kixpaab’ laj Jose ut kixye naq tixtenq’a rik’in xjaltesinkil ruheb’ li perel ch’iich’ oor. Naq laj Jose kirileb’ ru li aatin chi kaw xyaab’ xkux, laj Oliver kixtz’iib’aheb’ sa’ hu. Kaw ke’k’anjelak laj Jose ut laj Oliver.
Li Jesus kixk’ut k’iila na’leb’ chiru laj Jose ut laj Oliver. A’an kixye naq che’xsik’ xchaab’ilal xna’leb’eb’ ut li yu’am maak’a’ roso’jik, ut naq me’sik’ li b’ihomal. A’an kixye ajwi’ naq che’tzoloq chirix li Dios ut che’xtenq’a li kristiaan chixtzolb’al li evangelio. Tento te’paab’anq ut te’xb’aanu li k’a’ru us. Wi te’xb’aanu a’in, te’wanq rik’in li qaChoxahil Yuwa’ chi junelik q’e kutan.
Li Jesus kixye naq laj Oliver tento junelik taakanaaq jo’ ramiiw laj Jose ut tixtenq’a sa’ xq’ehil li ch’a’ajkilal. Li Jesus kixye ajwi’ naq laj Oliver taaruuq taatzol li jaltesink-u chanchan laj Jose. Li Santil Musiq’ej tixtenq’a laj Oliver chi jaltesink-u wi tz’aqal xpaab’aal laj Oliver.
Laj Oliver kixyal li jaltesink-u. Sa’ xch’ool naq moko ch’a’ajaq ta, a’ut ink’a’ kiru chixb’aanunkil.
Li Jesus kixye naq laj Oliver ink’a’ kixpatz’ xtenq’ankil rik’in li Dios jo’ tento xb’aanunkil. Li Jesus kixye re laj Jose Smith chanru naq laj Oliver ut yalaq ani taaruuq chixtawb’al xtenq’ankil rik’in li Dios.
Naq junaq naraj xtenq’ankil, tento taak’oxlaq chi ajaq ru chirix k’a’ru tixb’aanu. Tento naq taak’ulub’a xch’ool chirix li k’a’ru naxk’oxla naq us xb’aanunkil.
Toja’ naq tixpatz’ re li Dios ma us a’an. Wi us, sa taareek’a sa’ raam. Tixnaw naq us a’an.
Wi b’an moko us ta, ink’a’ sa li taareek’a sa’ raam.
Laj Oliver ink’a’ chik kixyal xjaltesink ru lix Hu laj Mormon. Kixtz’iib’aheb’ b’an li aatin naq laj Jose kixjaltesiheb’ ru. Li Jesus kixye naq rik’in naq yoo chixtenq’ankil laj Jose, taa’osob’tesiiq laj Oliver .