Chʼol 36
Lix Teepal Sion
Febrero–junio re 1834
Sa’ li hoonal ke’mine’ wi’ ru laj Santil Paab’anel sa’ Missouri chi elk chaq sa’ rochocheb’, laj Jose Smith kiwan sa’ Kirtland, Ohio, 1,600 kiloom xnajtil rik’ineb’. A’an kitijok re xnawb’al chanru tixtenq’aheb’ laj Santil Paab’anel sa’ Missouri.
Sa’ jun k’utb’esinb’il na’leb’, li Jesus kixye re laj Jose naq junjunq reheb’ li winq sa’ li Iglees tento te’xik Missouri re xtenq’ankileb’ laj Santil Paab’anel. Laj Jose Smith taajolominq reheb’. Li Qaawa’ kiraj naq oob’ cient li winq te’xik.
Laj Jose ki’ab’in chiru li Qaawa’. A’an kixye reheb’ laj Santil Paab’anel naq oob’ cient li winq tento te’xik sa’ li ch’och’ re Sion sa’ Missouri. A’ut chirix xnumik junjunq xamaan, ka’ajwi’ jun cient xk’ehom rib’ sa’ aatin naq te’xik.
Li jun cient li winq ke’el chaq Kirtland ut ke’xtikib’ li najtil b’eek toj Missouri. Li ch’uut a’in lix Teepal Sion kiyeeman re. Chi kok’ aj xsa’ ke’b’eek li winq 55 kiloom chiru jun kutan us ta q’axal ketz’okaak, ke’chaqik re, ut xtikwal li kutan ke’reek’a. Chiru q’ojyin ke’hilan sa’ komonil.
Sa’ li b’e, jun cient chik li winq ke’xjunaji rib’ rik’ineb’. A’ut toj maji’ tz’aqal rajlankileb’ jo’ kiraj li Qaawa’.
Lix komon li teep ke’b’eek 1,600 kiloom. Junjunq reheb’ ke’xye naq q’axal ch’a’aj li b’eek. Ke’wech’ok ut ke’pleetik. Ke’xwech’ rix laj Jose Smith xb’aan naq moko tz’aqal ta xtzakemqeb’. Ke’xye naq a’an moko chaab’il ta najolomink. Laj Jose kixye reheb’ li winq a’in naq tento te’xjal xk’a’uxl, malaj te’yajerq ut te’kamq.
Tiikeb’ xch’ool naab’al reheb’ li winq sa’ li teep. Ke’xtenq’a laj Jose ut ke’ab’in chiruheb’ lix chaq’rab’ li Dios.
Sa’ roso’jik nach’ kiwulak lix Teepal Sion rik’in li Condado Jackson, Missouri. Ke’hilan chire jun li nima’.
Chi muqmu eb’ lix komon li ch’uut chi aj rahob’tesinel ke’xk’e reetal li teep ut ke’xnaw b’ar wan chaq. Chiru q’ojyin ke’nach’o li ch’uut chi aj rahob’tesinel rik’in li teep ut okeb’ re chixpleetinkil.
Li Dios kixkol rix lix Teepal Sion rik’in xtaqlankil jun kaq-sut-iq’. Li iq’ kirapusi li che’ toj reetal ke’tane’. Li ninqi saqb’ach ke’tanje’ sa’ choxa, ut lix repom li raq’ kaaq kixketeb’ li che’. Kib’ut’un li nima’ chiru ch’och’. Jun reheb’ li winq sa’ li ch’uut chi aj rahob’tesinel kikamsiik xb’aan lix repom li raq’ kaaq, ut jalaneb’ chik li winq ke’rahob’tesiik xb’aan li kaq-sut-iq’. Maajun aamej sa’ lix Teepal Sion kirahob’tesiik.
Ke’xuwak li winq sa’ li ch’uut chi aj rahob’tesinel ut ke’eelelik chaq. Maajun re lix Teepal Sion kirahob’tesiik xb’aaneb’.
Oxib’ kutan chirix li kaq-sut-iq’, li Qaawa’ kixk’e jun k’utb’esinb’il na’leb’ re laj Jose Smith. Kixye naq eb’ laj Santil Paab’anel tento te’oyb’eninq chiru jarub’aq kutan re te’xkab’la li tenamit Sion. Toj ki’ajman naq tiikaqeb’ chi paab’ank, chaab’ilaqeb’ xch’ool chi wotzok, ut junajinb’ilaqeb’ xch’ool. Tento ajwi’ te’xtzol xkomon chik chirix li teneb’anbil sa’ xb’eeneb’ xb’aan li Qaawa’.
Li Qaawa’ kixye ajwi’ reheb’ li winq re lix Teepal Sion naq me’xpleetiheb’ li ch’uut chi aj rahob’tesinel sa’ Missouri. Junjunq reheb’ li winq’ ke’po’ rik’in a’in. Ke’reek’a sa’ xch’ool naq maak’a’ reek’ li b’eek a’in wi ink’a’ te’pleetiq re xtenq’ankileb’ laj Santil Paab’anel sa’ Missouri.
Chirix xnumik junjunq kutan, ke’yajer naab’al reheb’ li winq sa’ lix Teepal Sion. Kaalaju reheb’ ke’kam. Li Profeet kixye reheb’ li winq naq taa’elq chaq li yajel sa’ xyanqeb’ wi te’xtuulanob’resi rib’ ut te’xjal xk’a’uxl chirixeb’ xmaak. Li aatin a’in kitz’aqlo ru.
Sa’ xraqik lix Teepal Sion, laj Jose Smith kixch’utub’ rib’ rik’ineb’ laj Santil Paab’anel sa’ Missouri ut kixsik’eb’ ru junjunq li winq choq’ re li taqenaqil ch’utam. Chirix junjunq kutan, kixchap xb’e a’an rochb’eeneb’ naab’al reheb’ lix Teepal Sion chi sutq’iik Kirtland.
Us ta eb’ li winq re lix Teepal Sion ink’a’ ke’xtenq’aheb’ laj Santil Paab’anel sa’ Missouri, toj nim xwankil li rajb’al li teep. Kikawresiik laj Brigham Young ut xkomoneb’ chik re te’jolominq sa’ li Iglees. Ke’ru chixk’utb’al ma te’ab’inq chiru li Qaawa’ ut te’mayejaq choq’ re lix k’anjel. Chirix xnumik junjunq po, naab’al reheb’ li tiikeb’ chi paab’ank ke’b’oqe’ choq’ laj jolominel sa’ li Iglees.