Chʼol 40
Eb’ li k’utb’esink sa’ li Santil Ochoch re Kirtland
Abril re 1836
Toja’ naq laj Jose Smith ut laj Oliver Cowdery ke’risi rib’ rik’in li jun ch’ol chik sa’ jun junesaal na’ajej sa’ li santil ochoch, b’ar ke’wiq’la ut ke’tijok. Chirix naq ke’tijok, ke’xk’ul jun chaq’al ru k’utb’esinb’il na’leb’. Ke’ril li Qaawa’ Jesukristo. Ke’lemtz’un lix naq’ ru, chanchan raq’ xam. Saq li rismal xjolom chanchan li tz’aqal saqb’ach, ut q’axal wi’chik kilemtz’un li rilob’aal chiru xlemtz’unkil li saq’e.
Tzolʼlebʼ ut Sumwank 110, xtiklajik li tasal
Li Jesus kixye k’iila na’leb’ chaq’aleb’ ru re laj Jose ut laj Oliver. Kixye reheb’ naq che’saho’q sa’ xch’ool xb’aan naq kuyb’ileb’ xmaak. Sa xch’ool rik’in li santil ochoch ut kixye naq eb’ laj Santil Paab’anel li ke’kab’lank re che’saho’q sa’ xch’ool. A’an kixk’ulub’a li santil ochoch choq’ re lix loq’laj ochoch. Li Jesus kixye naq rajlal taak’ulunq sa’ li santil ochoch. A’ut wi te’xtz’ajni li santil ochoch, ink’a’ taak’ulunq.
Chirix a’an laj Jose ut laj Oliver ke’ril laj Moises sa’ li santil ochoch. Laj Moises a’an jun profeet sa’ najter q’e kutan. A’an kisutq’i sa’ ruchich’och’ re xk’ojob’ankil wi’chik li xnimal ru xwankil li tijonelil re laj Jose ut laj Oliver. Li wankil a’in tixtenq’aheb’ li ralaj xk’ajol laj Israel re te’ch’utub’aaq sa’ li Iglees sa’ jar raqal re li ruchich’och’. Li wankil a’in naxk’e ajwi’ xliceens li profeet chixtaqlankileb’ laj k’amol aatin re xjultikankil li evangelio chiru chixjunil li ruchich’och’.
Chirix a’an, laj Jose ut laj Oliver ke’ril laj Eliyah. Laj Eliyah kixk’ojob’ wi’chik li xnimal ru xwankil li tijonelil li k’eeb’il re laj Abraham junxil. Laj Abraham, a’an ajwi’ jun profeet sa’ najter q’e kutan. Rik’in li wankil a’in, eb’ laj Santil Paab’anel te’ruuq te’xk’ul ajwi’ li xninqaleb’ ru osob’tesink yeechi’inb’il re laj Abraham xb’aan li Dios.
Chirix a’an laj Jose ut laj Oliver ke’ril laj Elias, jalan chik li profeet sa’ najter q’e kutan. Laj Elias kixk’ojob’ wi’chik reheb’ li xnimal ru xwankil li tijonelil re xtenq’ankileb’ li junkab’al tiikeb’ xch’ool. Li wankil a’in naxk’e xwankil li junkab’al chi te’tz’ape’q sa’ junajil sa’ li santil ochoch re naq te’ruuq te’wanq sa’ junajil chi junelik q’e kutan.