Tianuare–Turai 1837

E Bubuti Kabwaraan Ana Bure Parley

Ana koaua raoraona e karikirakea ana onimaki

Ngke e a boo aia tai Thankful ao Parley Pratt ni bung, a okira mweengaia man aia mition i Canada. A karekea natiia ae marurung te mwaane n ai aron are e a tia ni berita nakoia te Uea.

Saints, 1:270

Te kananokawaki, e mate Thankful tabeua te aoa imwiin bungiakin natina. E ataia Parley bwa e na bon aki kona n tararua te teei ngkai akea ngaia. E bubutia te aine i Kirtland bwa e na tabeakina te teei ngkai e oki nako Canada ni kabanea ana mition.

Saints, 1:270

I Kirtland, Iotebwa Timiti e waakina te bangke ni karikirakea te mwane ibukin ana mwakuri te Atua. E tuangiia aomata bwa ana kariaia te bangke bwa e na kabongana aia mwane bwa aonga n tangoia tabeman. Ma, ni bukina aika a mwaiti, te bangke e aki tau ana mwane ngaia are e a kainaki. Bangke ake tabeua n te United States a kabwaka naba.

Saints, 1:260–61, 264–68

E a moanna ni matoatoa te maiu irouia Aika Itiaki. Tabeman a bua aia mwakuri ao ngkai e aki tau aia mwane ni kabooi kanaia kee aia kunnikai. Tabeman aomata a rang un iroun Iotebwa, riki tabeman raoraona ni kaan. A taku bwa Iotebwa bon tiaki te burabeti ni koaua ibukina bwa e kabwaka te bangke.

Saints, 1:264–68, 272–275

Ngke e riki aio, Parley e okira mweengana man ana mition. Te kangaanga ma te bangke e karika te kangaanga naba nakon maiun Parley. E aki tau ana mwane ni kabooa ana auti, ao akea naba ana tabo ae e na maeka iai.

Saints, 1:270–71

Ngkai Parley e a un naba iroun Iotebwa. E korea ana reta nakon Iotebwa. E tuanga Iotebwa bwa e teimatoa ni kakoauaa ana Boki Moomon. Ma e taekini naba bwaai aika aki iraorao ibukin te burabeti. E tuanga Iotebwa bwa e kairua ngkai e waakina te bangke n te moan tai.

Saints, 1:271

Imwiina, tabeman raoraon Parley mai Canada a roko i Kirtland. E reireiniia Parley te euangkerio, ao a rang kukurei ni manga nooria.

Saints, 1:279–80

Ma a mimi naba bwa Parley ao a mwaiti riki ake tabeman ake a kabua aia onimaki ae Iotebwa Timiti bon te burabeti.

Saints, 1:279–80

Temanna raoraon Parley are mai Canada bon John Taylor. Ngke e nooria Parley, e tuanga John aron unna iroun Iotebwa Timiti. E tuanga John bwa e na aki manga iriira Iotebwa.

Saints, 1:280

John e kauringa Parley bwa ngke a mena i Canada, e a tia ni kaota ana koaua Parley are Iotebwa Timiti bon te burabeti ni koaua. “Ngkai I karekea naba te koaua anne,” e taku John. “Ngkana e koaua te mwakuri onoua te namwakaina n nako, e bon koaua naba n te bong aei. Ngkana Iotebwa Timiti te burabeti ngkekei, bon ngaia te burabeti n te tai aei.”

Saints, 1:280

E ataia Parley bwa e bon eti raoraona are John. E namakina te raraoma ibukin ana reta n un nakon Iotebwa. E ataia bwa Iotebwa e karaoa ana kabanea n tamaroa ni karaoa ana mwakuri te Uea. Te kangaanga n te bangke tiaki nanona bwa Iotebwa tiaki ana burabeti ni koaua Iesu Kristo.

Saints, 1:283

E nako Parley nakon ana auti Iotebwa. E kabwara ana bure nakon Iotebwa ibukin ana taeka aika aki iraorao ake e a tia n taekini. Iotebwa e kabwara ana bure Parley, e tataro ibukina, ao e kakabwaia. E beku Parley n ana mition aika a mwaiti riki ao e tuangiia aomata ni kabuta te aonaaba bwa Iotebwa Timiti bon ana burabeti te Uea.

Reirei ao Berita aika Tabu 64:7–11; Saints, 1:283