“Sidney ao Phebe Rigdon,” Karaki man Reirei ao Berita aika Tabu (2024)
“Sidney ao Phebe Rigdon,” Karaki man Reirei ao Berita aika Tabu
Okitobwa–Nobembwa 1830
Sidney ao Phebe Rigdon
A bita maiuia ni butimwaea te euangkerio
Parley Pratt ao tabeman a na nako n tibwa te euangkerio ma ake bon kaain te aba n Amerika. Inanon kawaia, e tangiria Parley bwa a na motirawa ao ni kawara raoraona ae Sidney Rigdon. Bon te minita Sidney are e a tia n reireina Parley taekan Iesu Kristo man te Baibara. Ngkai e tangiria Parley bwa e na reireina Sidney taekan Iesu man Ana Boki Moomon.
Reirei ao Berita aika Tabu 32; Saints, 1:99
Parley e tuanga Sidney taekan Ana Boki Moomon ao ni kaoa bwa e na warekia. E aki koaua iai Sidney, ma ibukina bwa Parley bon raoraona, e berita bwa e na warekia.
Saints, 1:100
Ngke e wareka Ana Boki Moomon Sidney, e ataia ae e bon roko mai iroun te Atua. E tibwaa ana namakin ma kainabana, ae Phebe.
Saints, 1:101
Ma e aki ataia Sidney bwa tera ae e na karaoia imwina. Ngkana e bwabetitoaki, e na bua ana mwakuri ae te minita n ana ekaretia. E na kanga ni kamaiuia Phebe ao natina aika onoman? A na tera aia namakin aomata ake n ana ekaretia? E tataro nakon Tamana are i Karawa ibukin buokana, ao e reke irouna te namakin ae rau.
Saints, 1:101; Reirei ao Berita aika Tabu 19:23
Sidney e tuanga Phebe ngkana e tauraoi n anga aroia ni maiuraoi ao ni kaaina te ekaretia ae boou ma ngaia. “Bon anne nanou bwa N na karaoa nanon te Atua,” e taku, “bwa te maiu ke te mate.” A rineia bwa a na bwabetitoaki.
Saints, 1:101
Imwiina, e kaitibo Sidney ma te Burabeti ae Iotebwa Timiti. Te Uea e angan Sidney te rongorongo rinanon Iotebwa. E taku bwa E a tia n norii bwaai aika a tamaroa ae karaoi Sidney ao E ongo ana tataro. E tuanga Sidney te Uea bwa iai te mwakuri ae korakora ibukina ae e na karaoia. E na karaoi bwaai aika korakora Sidney.