Turai 1830

Te Kaotioti ibukin Emma

Rineaki iroun te Uea ni karaoa Ana mwakuri

E baitii aron te bitaki nakon maiun Emma ao Iotebwa. E tuanga Iotebwa te Uea bwa e na katoka katuuan ana iango i aon te ununiki. Ni kaitarana, e riai Iotebwa ni kabanea ana tai n reireiniia aomata taekan Iesu Kristo ao ni buoka karikirakean Ana Ekaretia te Uea.

Reirei ao Berita aika Tabu 24:7–9; Saints, 1:96

E rawata ana titiraki Emma ni kaineti ma te bitaki aei. E aki ataia bwa tera ae e na karaoia ngkai e a beku Iotebwa ibukin te Uea. Tao e na buoka naba te Uea ao Ana Ekaretia?

Saints, 1:96

Te Uea e taetae nakon Emma rinanon te kaotioti are e anganaki Iotebwa. E weteia bwa “Emma Timiti, natiu te aine.” E tuanga Emma bwa E a tia n rineia ao ni weteia bwa e na karaoa Ana mwakuri. Bon te aine ae e okoro, ao a korakora bwaai ae E katauraoi ibukin Emma bwa e na karaoi.

Reirei ao Berita aika Tabu 25:1–3

E tuanga Emma te Uea bwa e na mwananga ma Iotebwa. E taku te Uea bwa e na kabwarabwarai koroboki aika tabu Emma ao n reireiniia kaain te Ekaretia. E tuanga Emma bwa e na Karimoaa moa inanon maiuna ao ni kawakin ana berita aika tabu. E berita nakon Emma bwa e na karekea Tamneina. E tangiria bwa e na reireiaki, rikirake, ao ni karekei Ana kakabwaia.

Reirei ao Berita aika Tabu 25:2, 6–10, 15

E tuanga naba Emma te Uea bwa E tatangiria n ongo n aia anene Natina. E taku bwa aia anene Aika Itiaki kanga aron te tataro Nakoina. E tuanga Emma bwa e na karaoa te boki n anene are a kona iai Aika Itiaki n anene mai iai. E kunei anene aika a tamaroa Emma iaon te Uea ao Ana euangkerio ao ni booti nakon te boki n anene.

Reirei ao Berita aika Tabu 25:11–12; Saints, 1:221–22

E reitinako ni bitaki maiuia Emma ao Iotebwa, ma e ataia Emma ae te Uea e tangiria ao iai te kantaninga ibukina. E beku ibukin te Uea ao aomata ake i rarikina. E buoka rikiraken Ana Ekaretia Iesu.

Reirei ao Berita aika Tabu 25:13–15; Saints, 1:221–23