1829

A Kaoka te Nakoanibonga Anera

Te mwaaka ni karaoa ana mwakuri te Atua

Ngke a rairii taian bwaatua koora Iotebwa ao Oliver a reiakinna bwa Iesu e tangiriia aomata ni kabane bwa ana bwabetitoaki. E anganiia naba aomata te mwaaka ni bwabetitoiia tabeman. E tuai bwabetitoaki Iotebwa. E tangiria ni kan ataa riki taekan te bwabetito.

Iotebwa Timiti—Rongorongo 1:68; Aika Itiaki, 1:65–66

A kan ataia Iotebwa ao Oliver bwa antai ae iai te mwaaka irouna ni bwabetitoiia aomata ngkai. A baireia bwa na butiia te Atua. A nakon te buakonikai ao a katorobubua n tataro.

Iotebwa Timiti—Rongorongo 1:68; Aika Itiaki, 1:66

Ngke a tabe n tataro, e kaoti te anera. E taku bon ngaia Ioane are te Tia Bwabetito, are e bwabetitoa Iesu Kristo n taai ake ngkoa. E anganiia Iotebwa ao Oliver te Nakoanibonga ae te Aaron. Te nakoanibonga bon mwaakan te Atua. E bon kabonganaaki ni kakabwaiaiia natin te Atua.

Reirei ao Berita aika Tabu 13; Iotebwa Timiti—Rongorongo 1:69, 72; Aika Itiaki, 1:66–67

E taku Ioane te Tia Bwabetito bwa te aomata are iai irouna te Nakoanibonga ae te Aaron e kona n reireiniia aomata n rairinanoia ao ni bwabetitoiia. Ioane te Tia Bwabetito e tuangiia Iotebwa ao Oliver bwa a na bwabetitoaki. A ruo inanon te karaanga ao a bwabetitoiia ngaiia i bon irouia. Ngke a aerake man te ran, a kaonaki ma te Tamnei ae Raoiroi. A bon rangi n kukurei!

Iotebwa Timiti—Rongorongon 1:70–73

I mwiina, a roko anera tabeman. Ana Reirei Iesu ake teniman—Betero, Iakobo, ao Ioane—a angan Iotebwa ao Oliver Cowdery te Nakoanibonga ae te Merekitereka. A kona ngkai Iotebwa ao Oliver n anga te bwaintituaraoi ae te Tamnei ae Raoiroi. A riki Iotebwa ao Oliver bwa Ana Reirei naba. A kona ni kaira te Ekaretia ao n riki bwa taan kakoaua aika onoti iroun Iesu Kristo.

Reirei ao Berita aika Tabu 27:12; Aika Itiaki, 1:84