1828–1829

Te Uea e Kanakoa Oliver Cowdery

Reiakinna bwa e kanga te Atua n taetae nakoira

A waakinako n raira Ana Boki Moomon Iotebwa ao Emma. Te mwakuri e bon matoa, ao iai naba aia mwakuri i aon aia tabo ni man. E tataro Iotebwa bwa Tamana are i Karawa e na kanakomaia temanna ni buokiia n raira Ana Boki Moomon.

Aika Itiaki, 1:56, 58

N te tabo ae raroa i New York, Oliver Cowder, te tia reirei ae kairake, e maeka ma ana karo Iotebwa Timiti. E reireiniia tarin ao mwanen Iotebwa aika a uarereke Oliver.

Aika Itiaki, 1:58–59

E ongo taekan Iotebwa Oliver ao taian bwaatua koora. E rangi ni kan ataia. E marooro ma ana karo Iotebwa Timiti. A tuanga Oliver bwa Iotebwa e bon karaoi ana mwakuri te Atua.

Aika Itiaki, 1:59

Ngkai e a bon taonaki riki n te kan atatai Oliver. Ana karo Iotebwa a tuanga Oliver bwa e riai n tataro ao ni kakaea i bon irouna ngkana bon ana mwakuri te Atua. Ngaia are n te tairiki teuana, e tataro ma nanona ni kabane Oliver. E anganna raun nanona te Atua. E namakinna bwa Iotebwa Timiti bon ana tabonibai te Atua. E namakinna bwa e riai ni buoka Iotebwa.

Aika Itiaki, 1:60

Ngke e a motirawa te reirei n tokin te ririki, e nako Oliver ni kaitibo ma Iotebwa ao Emma. A tiku i mwiin te tai Iotebwa ao Oliver ni maroroakina taekan taian bwaatua koora ao ana mwakuri te Atua.

Aika Itiaki, 1:60

E taku Oliver bwa e na koroboki ngkai e rairairi Iotebwa. E tangira te bwai are e reiakinna iaon taekan Iesu. Iai naba ana titiraki ao e tangira kamatoan ana onimaki.

Aika Itiaki, 1:61

Rinanon te Burabeti Iotebwa Timiti, e anga te rongorongo te Uea nakon Oliver. E tuanga Oliver bwa e na uringa te tairiki are e a tia n tataro iai. E a tia n anganna te rau te Atua. Bon tii te Atua ae e ataa taekan te tataro aei. E a rikirake ni matoatoa ana onimaki Oliver. E waaki nako ni buoka Iotebwa, ao te Uea e reireinna bwaai aika a mwaiti bwa e kanga n taetae te Atua nakoira.

Reirei ao Berita aika Tabu 6:14–24; 8:1–3; 9:7–9; Aika Itiaki, 1:62–64