Turai 1831–Turai 1833

Kangaanga i Missouri

Kateimatoan korakoran te onimaki n taai ni kangaanga

A mwaiti Aika Itiaki ake a roko ni maeka i Independence, Missouri. E tangiriia te Uea bwa a na katea te kaawa ae Tion ikekei. Ma Aika Itiaki ao aomata ake a kaman maeka i Independence aki iraorao. A mwaiti bwaai aika aki nanoraoi iai. Tabeman aomata n te kaawa a un ao a tangiriia Aika Itiaki bwa a na kiitana ikekei.

Reirei ao Berita aika Tabu 57:1–3; Saints, 1:171–74

Edward Partridge bon te bitiobi i Independence. E roko nakon te boowi ma taan kairiiri n te kaawa. A taku bwa a riai Aika Itiaki ni kiitana Independence. E ataia Bitiobi Partridge bwa te Atua e tangiriia Aika Itiaki bwa a na katea Tion i Independence. E taku bwa aki kona n nako Aika Itiaki.

Saints, 1:176

Mwaane aika a un a waaki n urui mweenga ao kateitei ake a kateaki irouia Aika Itiaki.

Saints, 1:177–78, 182

E katikaki Bitiobi Partridge ao te mwaane temanna ae arana Charles Allen irouia mwaane man mweengaia. A katikitikiia mwaane aika uoman nako nuukan te kaawa.

Saints, 1:179

E taku Bitiobi Partridge, “Ngkana N na korakai ibukin au aro, akea okorona ma naake ake e a tia n riki nakoia imwaaiu.” A kabwakaaki Bitiobi Partridge ao Charles irouia mwaane nako aontano. A kaonrakei rabwataia n te korota ae kabuebue ao buraeniman.

Saints, 1:179–80

William McLellin, kain te Ekaretia i Independence, e ongo te bwai are a karaoia aomata ake a un. E maaku ao e biri nakon te buakonikai ni karabaa.

Saints, 1:182

E iango William bwa tera ae e na riki ngkana e reke irouia mwaane ake a un. E na kona naba n taekinna bwa e koaua Ana Boki Moomon, e ngae ngkana a kataia n tiringnga ibukina?

Saints, 1:182–83

Raoraon William aika Oliver Cowdery ao David Whitmer a kunea n te buakonikai. E ataia William bwa Oliver ao David a kakoaua ana Boki Moomon. E a tia te anera ni kaotia nakoia bwaatua aika koora. “Tuangai,” e titirakiniia William, “bon te koaua ae koaua ana Boki Moomon anne?”

Saints, 1:183

Oliver ao David a tuanga William bwa e bon koaua ana Boki Moomon. A taku bwa e ngae ngkana mwaane ake a un a kataia n tiringiia, a na bon aki toki n tibwa aia koaua nakoia aomata. “I kakoauai ngkami,” e taku William.

Reirei ao Berita aika Tabu 17:3–6; Saints, 1:183