iKalawa 4: Vakaivolataka e dua na veiilovi sega ni rere baleta nai tovo ni nomu bula savasava.

iVakavuvuli Bibi: Na Dina

Na inaki ni ikalawa 4 o ya meda raica na noda gauna sa oti meda kila vakavinaka cake kina na noda malumalumu ka kila na veika e tarovi keda tiko mai na noda yaco meda vakataki koya na iVakabula ka qaravi ira na tani. Me kena ivakaraitaki na, rere, vakadonui koya, kei na caki e vakabuwawataki kina na rai me kua ni matata vei keda na veika eso. Ia eda na sega ni rawa ni veisautaka e dua na ka kevaka eda sega ni kila vakavinaka. Na noda ivolatukutuku e vukei keda meda kila na veika kece e sa vakataotaka tiko na noda cakacaka ni veivueti. Na noda volaitovo ena gadrevi kina meda dau dina tiko ga vei keda me baleti keda kei na vanua eda sa tiko kina me rawa ni da kerea na Kalou me vukei keda me da veisau, yaco me da vinaka cake, ka vakabulai.

Eda sa sotava kece na veika dredre sara. Sa kavoro na yaloda, ka vakamawe na mosi ni yaloda. E dau vuki ki na veika veivakatotogani kei na itovo e vakanunutaka na mosi, ka da qai digidigi me da tomana tikoga na vakasaqarai ni vakacegu lekaleka oqo. Na itovo oqo e vakavuna me levu cake na mosi, e vakavuna me levu cake na vuna meda vakayagataka kina na veivakatotogani me da vosota rawa. Na mosi ni bula kei na noda itovo ni veivakatotogani sa yaco me ulunivanua ni madua ka da tovolea me da vunitaka, guilecava, se cakitaka.

Na noda veivakatotogani, rere, kei na caki e vakaleqai keda ena noda rawa ni vakasamataka vakadodonu na noda bula. Eda cakitaka se sega ni kila vinaka na vakacaca kei na veilecayaki sa vakavuna na itovo veivakatotogani ki na noda veiwekani. Eda cakava kina na ka kece eda rawata me da guilecava, vakadonui keda, se lasutaki keda meda vosota kina na noda mosi. O koya gona, eda sega ni kila rawa e vuqa na noda cala se noda tovolea meda guilecava. Eda a lasu vagumatua vei keda ga ka yaco ni vuqa noda gauna sa oti sa sega ni da raica rawa. Era kerei keda na noda dauveitokoni kei ira tale eso ena ilawalawa ni veivueti meda cakava na cakacaka dredre da qai vakadinadinataka vei keda na veika eda a guilecava se sega ni vinakata meda raica. Eda na qai kila ga ni da gadreva na iVakabula me vakabulai keda.

Na kena rawa ni railesuvi na noda gauna sa oti ka qai vola sara e vaka me veivakadrukai ka so na gauna e sega ni rawati. E taura e levu na sasaga kei na cakacaka me caka rawa kina. E dodonu me da vakasaqaqara ena yaloda kei na vakasama me da nanuma kina na veika eda sa sotava oti, ka dredre vei keda meda vola. Na ka bibi oya me da dabe ka tekivu volavola. E vakasaurarataki keda oqo me da vakatovotovotaka na noda inuinui qaqaco vou vua na Kalou. Na noda vakanuinui ni rawa ni da vakabulai, vosoti, ka sereki mai na veivakabobulataki e solia vei keda na yaloqaqa meda tovolea. Eda sa kerea vua na Kalou me vukei keda me da valuta na noda rere. Eda sa kerei Koya me vukei keda me da nanuma ka sotava na noda cala kei na mosi ena yaloqaqa. A rogoci keda ka tiko e kea ena vukuda.

Era yaga na noda dauveiqaravi ena nodra vukei keda meda toso ki liu ena yaloqaqa ena ikalawa oqo. Baleta ni ra sa taura vakataki ira na ikalawa oqo, era a rawa ni vakayaloqaqataki keimami ka vukei keimami me keimami raica vakamatata na neimami gauna sa oti. Eda a sega ni cakava vakavinaka sara, ia eda a cakava na noda vinaka duadua. Ia ena kena itinitini, sa rauta vakavinaka. Ni da kila ka kunea na veika veivakarusai ena noda bula, eda sa taura e dua na ikalawa e gadrevi me vakadodonutaki kina. Eda raica talega ni veivuke me da kila na vinaka ena noda gauna sa oti ka okati ena noda iyaya na veika vinaka eda a cakava kei na kaukauwa eda a bulia. Na ikalawa 4 e vukei keda me da tukuna vua na Kalou e dua na itukutuku dina se o cei o keda, oka ruarua kina na noda malumalumu kei na noda kaukauwa.

Na lisi volai oqo ni noda yaloca, rere, veivakamavoataki, kei na kaukauwa sa yaco me dua na iyautaukeni bibi ena noda ilakolako ni veivueti. Nida sa toso tiko ki na ika 6 kei na 7 ni ikalawa, eda na vakayagataka na noda ivolatukutuku ni itovo meda railesuva kina na malumalumu e dau vakavuna meda tao tu ga ena ivakarau ni veivakarusai. Kena ivakaraitaki, na viavialevu kei na rere e tarovi keda mai na noda tukuna na noda cala, e vakavuna me da vakacacana na veimaliwai kei na veivakabauti. Ni da sa volekata na ika 8 kei na 9 ni ikalawa, o ira na tamata eda sa volaitukutukutaka sai ira sa noda na madigi meda vosoti ira ka vakaveimeautaki.

iKalawa me Cakacakataki

Oqo na parokaramu ni cakacaka. Na noda toso ena vakatau ena noda dau vakayagataka wasoma na veikalawa ena noda bula e veisiga. Sa kilai tu oqo me “ikalawa me cakacakataki“ Na cakacaka oqo ena vukei keda meda lako mai vei Karisito ka ciqoma na veidusimaki kei na kaukauwa e gadrevi me da taura kina na ikalawa e tarava ena noda vuetaki.

Vola e dua na ivola ni itovo ena nona veivuke e dua na dauveiqaravi

Na ikalawa oqo sa ikoya na vanua eda sa tekivu cakacakataka kina na noda vakabauta ena noda cakacaka (raica na Jemesa 2:17–18). E vuqa vei keda, oqo na ikalawa dredre duadua. Ena rairai veibolei, mosimosi, ka vakaitamera, ka da na nanuma beka ni dodonu meda saumitaro ena veika kece eda sa cakava oti. Ia, na volai ni noda itovo e sega ni dodonu me dua na cakacaka dredre. E rawa ni da dabe, masu, ka tekivu volavola, kevaka sara mada ga eda vola e dua ga na taro se ka sa yaco vakayadudua ena kena gauna.

Yalovinaka railesuva na ivakaraitaki kei na ivakavuvuli ena ikuri ni vakamacala sa volai tiko (me vaka beka oqo, na pepa ni cakacaka). E rawa ni da vakayagataka e dua vei ira na ivakaraitaki oqo me ivakaraitaki me vukei keda meda tekivu. Kevaka eda vakatovotovotaka vakasivia na iwalewale oqo, ena dredre sara vei keda meda tekivuna se toso. Nida vola na imatai ni noda itovo, ena vinaka cake me rawarawa toka ga. Eda na rawa ni lesu tale mai kina ni da tomana tikoga na cakacakataki ni veikalawa. Yalovinaka cakacaka vata kei nomu dauveiqaravi ni ko vola na nomu itovo. Ena vakalougatataki keda na Kalou ni da cakava na cakacaka oqo, ka da na sega vakadua ni veivutunitaka.

Vuli kei na Kilamatata

Na ivolanikalou kei na itukutuku oqo mai vei ira na iliuliu ni Lotu ena rawa ni veivuke ena noda vueti mai na veivakatotogani. Eda rawa ni vakayagataka meda vakasama vakatitobu kina, vuli, kei na ivolaitukutuku. Meda nanuma tiko meda dau dina ka me matata na noda volavola meda rawata kina na ka e yaga vakalevu duadua.

Na veivakatotogani e ivakatakilakila ca

“Ia me vaka na nanuma ni lomana, sa vakakina ko koya” (Vakaibalebale 23:7

E levu vei keda eda nanuma ni leqa vakayago na noda veivakatotogani. Keitou kurabui ni keitou kila ni neitou vakasama, veika keitou vakila, kei na vakabauta sa waka ni neitou itovo ni veivakatotogani. Na dredre ni kena cokoti vata na noda mona, yagoda, kei na noda ivakarau ni rai o ya sa vaka meda sa tao tu ga kina. Eda sa qai raica ni noda itovo ni veivakatotogani e sega ni noda leqa levu ia e iwali veivakaleqai ki na noda leqa dina.

• Ena vukei au vakacava na rai oqo me baleta na noqu itovo veivakatotogani meu toso ki liu ena noqu vola na noqu itovo?

Vola na kemu itukutuku

Ena ivolanikalou, eda raica kina e vuqa na veisureti meda raici keda vakavoleka, ka yalodina. E dua na ivakaraitaki totoka e kunei ena Alama 5:14. A taroga na parofita o Alama na veitaro oqo baleta na itovo: “Ko ni sa sucu li vakayalo vua na Kalou? Ko ni sa ucui koya tiko li ena kemu irairai? Ko ni sa vakila li na veisau levu oqo e lomamuni?” Keimami sa vakatura mo ni vulica na vosa ni Alama wase 5 me baleta eso tale na ivakaraitaki ni taro baleta na itovo eda rawa ni tarogi keda kina.

Na noda vola na vanua eda sa tiko kina ena gauna oqo ena rawa ni veivuke sara vakalevu. Me vaka oqo, e dua na bisinisi e sega ni dau dikeva wasoma na kena volai na nona iyautaukeni kei na kena veiqaravi ena dau sega ni gugumatua sara. Na kena volai oqo sa ikoya e dua na madigi vei ira na itaukei ni bisinisi me vakatulewataka na veika e yaga ka dodonu me maroroi kei na cava e vakaleqa tiko e dodonu me biu laivi. Kevaka era na curuma na itaukei ni bisinisi na dai ni lawaki ka vakaisini ira ena veika dina ni veika sa volai tu, era na sega ni rawa ni vakatulewa vakadodonu me baleta na yavuyaga ni nodra iyaya.

Sa vakakina, ni sa ka bibi talega meda raica vakadodonu na noda bula kei na noda itovo.

• Niu masu ka kerea vua na Kalou me vukei au meu yalodina, na cava e vakavulica vei au na Yalo Tabu me baleta na noqu dau cakitaka na dina ni noqu ituvaki kei na ka sa yaco?

• Au sa vakacalai au vakacava ena noqu malumalumu?

• Au sa sega vakacava ni raica na noqu yaga dina kei na noqu kaukauwa?

Sotava na noda gauna sa oti

“Ia ni’u sa gadreva me’u marau, sa vutugu na yaloqu ena vuku ni noqu ivalavala ca; ia, au sa kilai Koya ka’u sa vakararavi vua” (2 Nifai 4:19).

Ni da cakava tiko na noda volavola, a yaco eso na gauna me vutugu kina na yaloda ena vuku ni noda ivalavala ca kei na mosi eda sa rawa ni sotava.

• Ena vukei au vakacava na noqu nuitaka na Kalou niu vakacavara na noqu volaitovo tiko ka sotava na noqu ivalavala ca kei na mosi?

Nuitaka ni na vakabulai keda o Koya

“Mo vakararavi vei Jiova ena vu ni yalomu; ka mo kakua ni vakararavi ki na nomu yalomatua. Mo vakarogotaka vua na nomu sala kecega, ia ena vakadodonutaka na nomu ilakolako ko Koya” (Vakaibalebale 3:5–6).

Na itukutukuvolai ena rawa ni vukei keda meda raica taucoko na iyaloyalo. Ena vukei keda meda kila na noda vakasama, veika eda vakila, kei na ivalavala ka vakakina o cei e vakauqeta na noda digidigi. E rua na wa veisemati levu ena vuqa na noda ivolatukutuku o ya na rere kei na vakararavi vakasivia vei keda ga. Na yalayala eda a cakava ena ika 3 ni ikalawa oya meda nuitaka na Kalou kei na iwalewale ni veivueti oqo. Na noda ivolatukutuku sa ikalawa tarava ni veivueti bula ka na solia vei keda na vakasama taucoko me baleta na iwalewale ni kena tosoi.

• Ena duidui vakacava na noqu bula kei na digidigi kevaka au biuta laivi na viavialevu ka digitaka meu vakararavi ka nuitaka ga na Kalou?

• Na lomalomarua cava au vakila me baleta na toso ki liu ena noqu yalayala meu vagolea na noqu bula kei na lomaqu ki na veimaroroi ni Kalou?

• Niu a taroga na Kalou kevaka ena kauwaitaki au o Koya ena ikalawa yadua ni noqu bula, na cava na isaunitaro au ciqoma e yaloqu kei na noqu vakasama mai na Yalo Tabu? Nanuma tiko ni ivakarau ni nona qaravi keda na Kalou ena rairai duidui mai na veika eda na digitaka me baleti keda.

Tauvimate vakayalo

Ena so na gauna na tauvimate vakayalo dau vu mai na ivalavala ca se na mavoa vakayalo. Ena so na gauna dau yaco vakamalua mai na mavoa vakayalo ka da sega kina ni kila se cava sa yaco tiko. Me vaka na vatu veitaqataqai, na mosi vakayalo kei na yaluma, e rawa ni tarai cake tiko ni toso na gauna ka bika voli na yaloda me yacova ni da sa voleka ni sega ni taqeya rawa na kena bi. …

“Ia me vaka ni dina na veivakatovolei vakayalo e sega ni kena ibalebale ni ra na sega ni rawa ni wali.

“E rawa ni da vakabulai vakayalo.

“Na mavoa vakayalo titobu sara mada ga—io, o ira sara mada ga era na rairai sega ni taqomaki rawa—e rawa ni ra vakabulai” (Dieter F. Uchtdorf, “O Ira na Rarama Vakalomalagi,“ Liaona, Nove. 2017, 78).

Vakasamataka mada na tolu na ka ca bibi o sa cakava ena nomu bula. O a voleka beka vua na iVakabula kei na Nona Yalotabu ena gauna o a cakava kina na veika oqori? Kevaka o a vakataki keitou, o na sega ni dolavi iko vua na Yalona. E vuqa era sa vuetaki tiko era vakatoka na semati tani oqo me “tauvimate vakayalo.“

• Niu vakayacora na itovo ni veivakatotogani kei na itovo vakatani, au sa tauvimate vakayalo tiko beka? Cava na vuna se cava e sega kina?

Yaloca

E dua na tiki levu ni noda volaitovo oya me volai kina na noda yaloca. Oqo e oka kina na yaloca keimami sa taura tu me baleti ira na tamata, isoqosoqo, kei na veika tale eso keimami a vakila ni vakamavoataki keimami se caka cala vei keimami. E dua vei ira na kaukauwa gaga qai veivakaleqai o ya na noda maroroya tikoga na yaloca. E vakavuna meda saqati ira na tani ka vakavuna meda vakila nida vakadonui ena noda digidigi veivakaleqai se veivakamavoataki.

Eda kunea na veivuke vakalomalagi me da raici ira na tani ena dua na rarama vou ka loloma cecere ni da digitaka me da masulaki ira ka kerea vua na Kalou me vakalougatataki ira ena veivakalougatataki kece sara eda na vakasaqara me baleti keda. “Na veivosoti e rawa ni taura na yaloqaqa kei na yalomalua vakalevu sara. E rawa talega ni taura na gauna. E gadrevi kina me da biuta na noda vakabauta kei na vakanuinui vua na Turaga ni da vakatulewataka na ituvaki ni yaloda. E koto eke na bibi kei na kaukauwa ni noda galala ni digidigi“ (Amy A. Wright, “Christ Heals That Is Broken,“ Liaona, Me 2022, 82).

• E rawa beka niu digitaka meu raica e dua na rai vou me baleti ira au cati ira? E rawa beka ni ra tauvimate vakayalo me vakataki au ni ra tawase mai vua na Kalou ni ra caka cala vei au?

• Kevaka au sasagataka tiko oqo, au na veisautaka vakacava na noqu ivakarau ni masu me baleti ira na tamata oqo?