iKalawa 10: Tomana na noda dui vola tiko na noda itovo, ni gauna eda cala kina, meda na vakadinadinataka sara vakatotolo.

iVakavuvuli Bibi: Vakatulewa Vakataki Koya ena Veisiga

Na ikalawa 10 ena vukei keda meda toso ena noda ivakarau vou, na vakasama vakayalo ni bula. E baleta na noda dau tarogi keda ena veisiga ena noda vakadidike yadua, ciqoma na veika eda sa kunea, ka veivutuni sara vakatotolo. Eda sa sega ni uasivi sara ka da na tomana tikoga na noda caka cala ena noda bula ka vakakina ena noda vuetaki tiko. Eso vei keda era na leqataka beka ni da na sega ni toso rawa ni da bula tiko vakavo kevaka eda vakacavara vakavinaka na ikalawa yadua se bula sega ni cala. Na ikalawa 10 e taqomaki keda mai na veivakasaurarataki meda bula uasivi sara. Eda sa vakananumi tiko ni da gadreva tikoga na Turaga ni da toso tikoga ki liu ena noda bulabula mai.

Ena iVola i Momani, e vakavulica kina o Alama ni veisau levu ni yalo e taura na vakabauta na Veivueti kei na Tucaketale i Karisito (raica na Alama 5:14–15). Ena nona vakayagataka o Alama na ituvaki ni Siga ni Lewa kei na kena vakarautaki e vuqa na ivakaraitaki ni taro eda rawa ni tarogi keda kina, a vakabibitaka na itavi bibi ni vakadikevi keda vakai keda ena noda dolava na kaukauwa ni veivueti i Karisito. Eda rawa ni vakayacora oqo ena noda taroga na mataqali taro eso ni vakasaqaqara ka a kaya o Alama me baleta na ka eda vakila, vakanananutaka, na vei inaki eso, kei na itovo. Na noda dui dikevi keda tiko ena veisiga kei na veivuke ni nona veivueti na Turaga ena rawa ni tarovi keda mai na noda sikalutu ki na cakitaki, yalo wele rarawa, kei na lesu tale ki na noda ca.

Na iwalewale vakasakiti ni veivueti sai koya na noda vakatara na Turaga me veisautaka na noda vakasama, veika eda vakila, kei na yaloda. Ena yaco kina me veisau na noda itovo. O ira era sa liu yani vei keda era a vakayaloqaqataki keda meda qarauna na dokadoka ena kena ivakarau kecega ka kauta na noda malumalumu vua na Tamada Vakalomalagi ena yalomalumalumu. Na noda vakatulewa vakataki keda ena veisiga ena vukei keda meda kila na gauna eda gadreva kina na veivuke ka tarovi keda mai na noda lesu tale ki na itovo makawa.

Sa itovo ni bula me da vakasama ca ka yalo vakatani. Ni da lomaleqa se lomalomani keda, nuiqawaqawa, yaloca, gagadre ca, se rere, eda na rawa ni vuki vakatotolo vua na Tamada ka kerea Vua me vakalougatataki keda ena vakacegu kei na rai. Eda na rairai kunea rawa tale ga nida se taura tiko ga na vakabauta ca. E rawa ni da kerea na Tamada Vakalomalagi me vukei keda ena sasaga dodonu meda veisau. Ena ika 10 ni ikalawa ni cakacaka, eda sa sega tale ni vakila ni dodonu meda vakadonui keda, vakaiulubaletaka, se beitaki. Na noda takete me da dolava tikoga na yaloda ka vakanamata na noda vakasama ki na iVakabula kei na Nona loloma soliwale.

Eda cakacaka ena ika 10 ni ikalawa ena noda dui vola tiko na noda itovo ena veisiga. Ni da tuvanaka na noda gauna, eda na dikeva ena masumasu na noda ivalavala kei na inaki e rawa ni yaco: Eda sa cakava tiko beka e levu na ka se vakalailai ga? Eda sa qarauna tiko beka na ka eda gadreva taumada e yaloda, lomada kei na yagoda? Eda sa qaravi ira tiko beka na tamata? E tiko beka e dua na ituvaki ena noda gauna e dredre se lomaocaoca? Eda gadreva beka na veivuke mai vei ira na tamata mera walia kina na veika dredre oqo? Eda raica beka e dua na itovo makawa se ivakarau ni vakasama? Na mataqali taro vakaoqo ena vukei keda meda bula vakainaki, vaqaqacotaki na noda bula vueti, ka tosoi keda voleka yani vei Jisu Karisito.

E rawa ni da dikevi keda ena dua ga na gauna sa rawa ena noda taura na gauna meda vakasamataka, vakanananu vakatitobu, ka bulataka na veikalawa eda sa vulica. Ni da sa kunei keda ena dua na gauna ni leqa, sa rawa meda tarogi keda kei na Kalou, “Na malumalumu cava ni itovo ni bula vei au e vakavuna tiko? Na cava au sa bau cakava meu cau kina ki na leqa oqo? E tiko beka e dua na ka au rawa ni kaya se vakayacora, ka sega ni vakailasu, ka na veimuataki kina dua na iwali e veidokai vei au kei na dua tale na tamata? E rawa ni da vakavotuya vei keda, “Sa tu vua na Turaga na kaukauwa kecega. Au na solia Vua na ka oqo ka vakararavi Vua.“

Ena gauna ga eda raica kina ni da cakava e dua na ka ca vua e dua tale na tamata, sa rawa meda veisautaka vakatotolo sara. Sa ka bibi meda biuta tani na noda dokadoka ka nanuma tiko ni noda kaya oqo “Au a cala” e vakavuqa ni dau tautauvata na kena bibi ena maroroi ni dua na veiwekani ena nomu kaya vakaoqo “Au lomani iko.”

Ni sa cava na siga, eda na dikeva na veika e yaco tiko. A vakacava na noda qarava? Eda se gadreva tiko beka ga meda vakasalataki mai vua na Turaga me baleta na itovo ca, vakasama ca, se yaloca? Sa rawa talega ni da vosa vua e dua na lewe ni matavuvale, itokani, dauveiqaravi, se daunivakasala nuitaki me vukei keda meda raica vakamatata cake na veika eso.

Io, eda na tomana tiko ga na noda caka cala dina ga ni noda sasaga vinaka duadua. Ia na vakatulewa vakataki koya e veisiga sa dua na yalayala me ciqomi na itavi ni cala oqo. Ni da dikeva na noda vakasama kei na ivalavala ena veisiga, walia, ka veivutuni mai vua na iVakabula, ena seyavu yani na vakanananu kei na vakanananu ca.

E sega na ka e veisereki cake, vakaturaga cake, se bibi cake ki na noda torocake yadudua me vakataka na raicimatua tiko e veisiga ni veivutuni. Na veivutuni e sega ni caka ga vakadua; e tomani tikoga. Sai koya na idola ki na marau kei na vakacegu ni vakasama. Ni umanaki vata kei na vakabauta, na veivutuni ena tadolava vei keda na kaukauwa ni Veisorovaki i Jisu Karisito [raica na 2 Nifai 9:23]” (Russell M. Nelson, “We Can Do Better and Be Better,” Liaona, Me 2019, 67).

Na vakatulewa vakataki keda ena veisiga, se veivutuni e veisiga, ena vukei keda meda sotava na reki kei na bula galala e solia vei keda na iVakabula. Sa sega tale ni da bula tawasei keda tiko mai vua na Turaga se ira tale eso. Eda na rawata na kaukauwa kei na vakabauta ni da sotava na veika dredre ka valuti ira rawa. Sa rawa meda reki ena noda tubu tiko ka nuitaka ni cakacaka kei na vosota ena vakadeitaka na tomani tiko ni veivueti.

Cakacakataki ni iKalawa

Oqo na parokaramu ni ‘cakacaka. Na noda toso ena vakatau ena noda dau vakayagataka wasoma na veikalawa ena noda bula e veisiga. Sa kilai tu oqo me “kalawa me cakacakataki“ Na cakacaka oqo ena vukei keda meda lako mai vei Karisito ka ciqoma na veidusimaki kei na kaukauwa e gadrevi me da taura kina na ikalawa e tarava ena noda vuetaki.

Vakavakarau vakayalo ni veisiga yadua

E dua na tiki bibi ni vakatulewa vakataki keda ena veisiga o ya me da tuvanaka na noda gauna, vakamuria na noda ituvatuva, ka qai railesuva na veika e yaco ni cava na siga. Nida nakita meda cakava oqo, eda na taqomaki mai na noda kuitaki lesu kina itovo makawa.

E vakasalataki keda o Elder David A. Bednar meda vakarautaka na noda siga vata kei na Turaga ena mataka: “Na masu e vakaibalebaletaki ena mataka sa dua na tiki bibi ni kena buli vakayalo na veisiga yadua—ka ni bera na veibuli vakayago se na kena vakayacori ena dua na siga“ (“Masu Tikoga,“ Liaona, Nove. 2008, 41).

Ni da toso tikoga ena noda siga, eda dau masu tikoga e yaloda me baleta na veivuke kei na veidusimaki me tomani tiko. Ena so na gauna e sega ni dau yaco na veika eda sa tuvanaka, ka sa gadrevi meda dau yalo rawarawa ka vakasaqara tikoga na veivuke nei Tamada Vakalomalagi.

E vakatavulica tale o Elder Bednar: “Ni mai cava e dua na noda siga, eda tekiduru tale ka tukutuku lesu vei Tamada. Eda na railesuva na veika a yaco ena siga o ya“ (“Pray Always,“ 42). Ni da talemuria vata kei na Turaga ka railesuva na noda siga, sa rawa ni da marautaka na noda rawa-ka ka kila na vanua eda a luluqa kina. Eda na vakasalataki mai vua na Turaga me baleta na veika e dodonu me da cakava me da veivutuni kina se veivakavinakataki kei na sala e rawa ni da cakava vakavinaka cake kina ena dua tale na gauna.

Veivutuni e veisiga

“Dua na siga ena dua na gauna“ e dua na malanivosa kilai levu ka kena ibalebale na bula ena dua ga na gauna. Ni da tomana tiko noda vakatulewataka tiko na noda vakasama, lomada, kei na itovo, sa noda na madigi meda veivutuni ka toro voleka yani vua na Tamada Vakalomalagi. Ni da veivutuni, eda na raica na dina ni veivutuni e sega ni dua na ituvaki dredre rarawa, veivakataotaki ia e dua ga na gauna ni veisereki eda sa vakanamata kina meda ciqoma.

Ni da veivutuni e veisiga, eda na rawa ni kunea eso tale na ikuri ni malumalumu se nanuma na ivalavala sa oti e gadrevi kina na vakasama ka, ena so na gauna, na veivakavinakataki. Ena rawa ni yaco me tiki ni noda veivutuni e veisiga me da vakanamata tale ki na veikalawa taumada ka caka me kauta laivi na noda malumalumu se veivakavinakataki. Ni da railesuva vata kei ira na noda dauveiqaravi na veika eda sa vulica mai na noda sasaga meda veivutuni e veisiga ena rawa ni vakamatatataka na veika tale eso eda na gadreva meda cakava meda veivutuni kina. Eda na gadreva talega meda vakatusa kivei ira na vakailesilesi ni lewa dodonu ni matabete.

E vakauqeti keda o Peresitedi Russell M. Nelson meda “sotava na kaukauwa veivaqaqacotaki ni veivutuni e veisiga—ni da cakava ka vinaka cake vakalailai ena veisiga“ (“E Rawa ni da Caka Vinaka Cake ka Vinaka Cake,“ Liaona, Me 2019, 67). Ni da vakayalomalumalumutaki keda ka segata na yalodina ena veisiga, eda na toro voleka yani vua na iVakabula. A vakasalataka na iVakabula vei ira na Nona tisaipeli, “Kevaka e dua sa via muri au, me kakua ni muria na lomana, ia me colata na nona kauveilatai, ka muri au” (Luke 9:23). Na veivutuni ka colata na noda kauveilatai me da muria na iVakabula ena veisiga ena vakarautaki keda ki na ikalawa 11.

Vuli kei na Kilamatata

Na ivolanikalou kei na itukutuku oqo mai vei ira na iliuliu ni Lotu ena rawa ni vukei keda ena noda vueti tiko. Eda rawa ni vakayagataka meda vakasama vakatitobu kina, vuli, ka volavola. Meda nanuma tiko meda dau dina ka vakabibi me matata na noda volavola meda rawata kina na ka e yaga vakalevu duadua.

Meda qarauna na noda vakanananu, vosa, kei na cakacaka.

“Kevaka ko ni sa sega ni qarauni kemuni vinaka, kei na nomuni vakanananu, kei na nomuni vosa, kei na nomuni cakacaka, ka muria tiko na ivunau ni Kalou, ka tiko ga ena vakabauta ni veika ko ni sa rogoca me baleta na nona lako mai na noda Turaga, me yacova sara nai tinitini ni nomuni bula, ko ni na rusa vakaidina. Oi kemuni na tamata, mo ni dau nanuma, mo ni kakua kina ni rusa” (Mosaia 4:30).

E rawa ni rerevaki sara se veivakarusai talega kevaka eda sega ni qarauna na veika eda cakava tiko ni da draiva voli ena motoka. Vola na veika me baleta noda dui qarauni keda.

• E vukei iko vakacava na nomu dikevi iko vakai iko mo levea kina na lesuvi tale ni nomu itovo veivakatotogani (ka rusa)?

Na yalo malumalumu kei na dui lewai keda vinaka.

“O koya era sa kalougata kina ko ira era sa vakayalomalumalumutaki ira ga ka sega ni ra vakasaurarataki mera yalomalumalumu”(Alama 32:16).

Na yalorawarawa meda biuta tani kina na veivakanananu ca ni bera ni ra yaco mera vakatubu leqa sa dua na sala ni noda vakamalumalumutaki keda ka sega ni vakasaurarataki kina. Vola me baleta na nomu yalorawarawa mo vakayalomalumalumutaki iko. Vakatovotovotaka me dua na siga na noda kauta laivi na veivakasama ca.

• Na veivakalougatataki cava e yaco mai vei au?

Bula ena gauna oqo.

“Na levu ga ni rarama e tu vua e dua na tamata, na levu tale ga ni nona vakasaqara na isolisoli ni veivutuni, ka na dau tovolea vagumatua me sereki koya mai na ivalavala ca ena veigauna kece e dau sega ni yacova kina na lewa vakalou. … E vakamuria ni nodra ivalavala ca na rerevaka na Kalou kei ira na yalododonu sa dau vosoti tu ga baleta ni ra sa veivutuni ka vakasaqara vou na Turaga ena veisiga kei na veiauwa” (Bruce R. McConkie, Doctrinal New Testament Commentary [1973], 3:342–43).

E dua na revurevu yaga vakalevu—ki na vakasama, lomada, ka vakayalo—na bulataki ni ivakavuvuli eso ka vakamacalataki tiko ena vei ikalawa oqo sai koya na noda vulica meda bula mada ga e liu ena siga ni kua.

• E vukei au vakacava nai ka 10 ni kalawa meu qarava ga na bula ni dua na auwa ena dua na gauna ni sa gadrevi vakakina?

• E vukei au vakacava meu kila ni sa dodonu meu bulataka na vei ivakavuvuli oqo ena dua na siga ena dua na gauna?

Tomani tiko ni veivutuni kei na veivosoti

“Ia era na vosoti ena veigauna kece ga era sa veivutuni kina, ena yalodina” (Moronai 6:8

Na noda kila ni Turaga sa tu vakarau me vosoti keda ena veigauna kece ni da veivutuni ena yalodina ena solia vei keda na yaloqaqa meda tovolea tiko ena veigauna eda yaco koso kina.

• Na cava na kena ibalebale vei au meu vakasaqara na veivosoti ena yalodina?

Mo dauvosota

“Ia oqo au gadreva mo dou yalomalumalumu, moni talairawarawa ka yalomalua; mo dou vakamasuti vakarawarawa; sinai ena yalodei kei na vosota vakadede; ka matau ena ka kecega” (Alama 7:23).

O koya ga a cavuta mai liu na ivosavosa makawa “Na vakatovotovo e basika kina na taucoko” a sega ni tukuna na levu ni vosota e gadrevi me vakatovotovo tikoga kina. Ni da vosota tiko ka tomana tiko na veivakavinakataki ena veisiga ka vakaivolataka noda bula e veisiga, eda na toso ki liu ena noda sala ki na veivueti.

• E vakadeitaka vakacava na noqu raici au vakai au kei na veivakavinakataki ena veisiga niu na tomana tikoga na noqu yalomalumalumu kei na noqu vakatorocaketaki vakayalo?

• Ena vukei au vakacava na noqu vola tiko na noqu itovo ni sa cava e dua na siga meu valuta rawa kina na noqu dau cudru se mosi tale eso ni lomaqu?

Vakatorocaketaki ni bula taucoko

“Au vakila ni tiko na gagadre meu vakauqeti ira na Yalododonu Edaidai ena kena gadrevi me bulataki sara vagumatua na ivakavuvuli ni Kosipeli ena noda bula, ena noda ivalavala kei na vosa kei na veika kece sara eda cakava; ia e gadrevi kina na tamata taucoko, na taucoko ni bula meu yalodina tiko ki na toro cake me rawa ni da lako mai ki na kila ka dina me vaka sa tiko vei Jisu Karisito” (Discourses of Brigham Young, sel. John A. Widtsoe [1954], 11).

Na tauri ni veikalawa oqo sa rawa saraga ni vakamacalataki me “bulataki vagumatua” na ivakavuvuli ni kosipeli.

• E veivuke vakacava beka na noqu tu vakarau meu vakadikeva vakai au ena veisiga ena veitagede kece (ivalavala, vosa, vakanananu, veika vakilai, kei na vakabauta) me vukei au meu soli au taucoko ki na vakatorocaketaki ni bula ena gauna taucoko?