iVakavuvuli Bibi: Mo tuvakarau me kauta tani vei iko na Kalou na malumalumu kecega ni nomu itovo ni bula.

iVakavuvuli Bibi: Veisau ni Yalo

E vuqa vei keda eda kunea na rawaka kei na veivakabulai ena ika 5 ni ikalawa. Eda kurabui ka vakavinavinakataka na veisau e lomada. E vuqa vei keda a raica nida sega ni temaki vakaukauwa sara mai na noda vakatotogani ka sega talega ni vakawasoma. Eso vei keda era sa tekivu raica na veivakalougatataki ni veivueti. Eda vakila kece ni da voleka sara vua na Tamada Vakalomalagi ka rawata vakalevu cake na vakacegu ena noda bula. Ena veisau lelevu vakaoqori, eso vei keda eda vakataroga se oqo walega na ka meda cakava. Ia eda se gadreva tiko ga me da vakabulai ka tomani tikoga me dei tiko kina na noda vueti.

Eda raica ni noda vakuai keda e rawa ni laurai kina na noda itovo ni bula malumalumu. Baleta ni da sega tale ni vakayagataka na veivakatotogani meda dro kina, eda na raica vakamatata cake na noda leqa. Eda tovolea meda lewa na noda vakanananu ca kei na nanuma, ia era a basika tikoga mai, me vakarerea se vakacacana na noda bula vou ni vueti. Eda a temaki me da vakayagataka na noda itovo ni vakatotogani kei na lomada ka tovolea me da lewa na noda malumalumu ka sotava na lomaocaoca me vaka na noda gauna sa oti.

O ira era sa taura dei na yaga vakayalo ni vakalesui mai era uqeti keda me kila, ni dina ga ni totoka tu na veisau ni bula e taudaku, e vinakata me vakalougatataki keda vakalevu sara o Jisu Karisito. Era vukei keda na itokani me raica ni kevaka eda vinakata me kua ni levei walega na noda vakatotogani ia me vakayali sara na gagadre me lesuvi tale, e dodonu me sotavi e dua na veisau ni yalo. Na gagadre oqo me veisau na yalo sa inaki ni ika 6 ni ikalawa.

O na rairai vaqaqa se o na rawata vakacava na veisau vaka oya. Nai ka 6 ni kalawa, me vaka na ikalawa eso sa oti yani, ena vakilai beka me dua na bolebole e veiluvuci. Kakua ni yalolailai ena itovo ni yalo vakaoqo. Ena mosi beka, ka o na vakatusa, me vaka keimami sa cakava, ni kena kilai ka vakatusai na malumalumu ni noda itovo ni bula e nai ka 4 kei nai ka 5 ni kalawa, e sega ni kena ibalebale ni o sa vakarau tu mo biuti ira tani. Eda na rairai ququmi tiko ga ena noda sala makawa nida saga meda walia na lomaocaoca.

Na ka yalomalumalumu duadua me da vakadinadinataka sai koya ni da tovolea tiko meda veisautaki keda ka sega na veivuke ni Kalou. Nai ka 6 ni kalawa e gadrevi kina mo solia vua na Kalou na ivovo kece ni dokadoka kei na murimuri-lomamu. Me vaka nai ka 1 kei nai ka 2 ni kalawa, na kena i ka 6 ni kalawa e gadrevi iko mo na vakayalomalumalumutaki iko ka tusanaka na nomu gadreva na kaukauwa ni veivueti kei na veivakavoui i Karisito. Ko sa raica, ni nona isoro ni veisorovaki sa rawa kina vei iko mo vakacavara kina na veikalawa yadua me yacova mai oqo. E sega ni vakuwai kina nai ka 6 ni ikalawa.

Ni o sa lako mai vei Jisu Karisito ka kerea na veivuke ena ikalawa oqo, eda na sega ni rarawa. Kevaka mo vakararavi Vua ka vosota tiko na cakacaka oqo, ko na raica na dokadoka ni sa na vakaisosomitaki mai vakamalua ena yalomalumalumu. Ena waraki keda ena vosota o Koya meda oca ena noda sasaga meda veisau vakataki keda ka sega ni vukei keda. Ni da sa gole vua, eda na vakadinadinataka tale na Nona loloma kei na kaukauwa. Eda na sega ni kabita na ivakarau makawa ni itovo, sa rawa ni da dolava na vakasama me vaka e vakatura vakamalua na Yalotabu e dua na ivakarau vinaka cake ni bula. Na noda rerevaka na veisau ena seyavu ni da sa kila ni o Jisu Karisito sa kila vinaka tiko na mosi kei na cakacaka kaukauwa e gadrevi kina. Vakadua tale, ena yaco oqo ni toso tiko na gauna ka duidui vei keda yadua. Oqo e dua na cakacaka ni noda solia tikoga na noda lewa vua na Turaga. Oqo e dua na cakacaka e toso tikoga, e sega ni ka ga ni dua na gauna.

Me vaka ni cakacaka ni gole vei Karisito sa umanaki ki na yaloda, na noda vakabauta lasulasu a gutaka tiko na noda vakanananu cala kei na lomada ena sosomitaki ena dina. Eda na tubu ena kaukauwa ni da tomana tikoga na noda vulica ka bulataka na vosa ni Kalou. Mai na nodra ivakadinadina na tani, na Turaga ena vukei keda meda vulica ni da sega ni yawa mai na Nona kaukauwa ni veivakabulai. Na gagadre meda beitaki ira na tani se vakacala na noda sala mai na cakacaka ni bolebole oqo ena vakaisosomitaki ena gagadre me da saumitaro Vua ka soli keda ki na Nona lewa. Ena gusu i Isikeli na parofita, a kaya kina na Turaga, “Au na solia talega vei kemudou na yalo vou … kau na vakacuruma ki na lomamudou na yalo vou: au na kauta tani talega maivei kemudou na yalo vatu ” (Isikeli 36:26).

E vinakata na iVakabula me vakalougatataki keda ka veisautaka na keda ituvaki. Ni da vakatara Vua me vakayacora vakakina, ena yaco me da duavata vakalevu cake kei Koya, me vaka ga na Nona duavata tiko kei na Tamada Vakalomalagi. E vinakata na iVakabula me solia vei keda na vakacegu mai na tu duadua kei na rere ka vakavuna na noda vakatotogani. E vinakata o Koya me vakalougatataki keda ena Nona loloma soliwale kei na kaukauwa sa vakarautaki tu vei keda ena Nona isoro ni veisorovaki.

Ni da soli keda ki na veivakauqeti ni Yalotabu ka rai vua na Kalou me baleta na veivakabulai sega walega mai na veivakatotogani ia mai na malumalumu ni itovo ni bula, ena veisautaka o Koya na noda ivakarau kei na itovo kevaka eda lomasoli. Na gagadre ni lomada me vakatabui mai vua na Kalou ena vakarautaki keda ki na dua sara ga na veisau ni noda bula. E vakamacalataka vakaoqo o Peresitedi Ezra Taft Benson na veisau oqo:

“Na Turaga e dau cakacaka mai loma ki tuba. Na vuravura e dau cakacaka mai tuba ki loma. Na vuravura ena kauta tani na tamata mai na vanua vakasisila. O Karisito e kauta tani na vakasisila mai vei ira na tamata, ka ra qai kauti ira tani mai na vanua vakasisila. Na vuravura ena moici ira [na tamata] ena veisautaki ni vanua era vakaitikotiko kina. O Karisito e veisautaki ira [na tamata], ka yaco mera qai veisautaka na vanua era vakaitikotiko kina. Na vuravura ena veisautaka na itovo ni tamata, ia o Karisito ena veisautaka na yalo ni tamata. …

“Me da sa qai vakadeitaka ni o Jisu na Karisito, eda sa digitaka meda muri Koya, meda veisau ena Vukuna, liutaki mai Vua, ka cokonaki Vua, ka sucu tale” (“Born of God,” Ensign, Nov. 1985, 6–7).

iKalawa me Cakacakataki

Oqo na parokaramu ni cakacaka. Na noda toso ena vakatau ena noda dau vakayagataka wasoma na veikalawa ena noda bula e veisiga. Sa kilai tu oqo me “ikalawa me cakacakataki.” Na cakacaka oqo ena vukei keda meda lako mai vei Karisito ka ciqoma na veidusimaki kei na kaukauwa e gadrevi me da taura kina na ikalawa e tarava ena noda vueti.

Meda yalorawarawa meda veisau ena kaukauwa ni Kalou

Ni da sa kila taumada na ika 6 ni ikalawa, eso vei keda era kaya, ”E dina sara au sa tu vakarau me kauta laivi na Kalou na noqu malumalumu!” Eda vakila ni da vakadrukai ena vuqa na noda sasaga meda valuta rawa kina vakai keda ga na noda malumalumu. Ia, ni da vakasamataka vakatitobu ka ciqoma na nodra vakasama na noda dauveiqaravi, eda qai kila ni da sega ni via biuta na noda malumalumu mai na noda nanuma.

A vukei keda na Yalo Tabu kei ira tale eso me da raica ni da dau vakayagataka vakawasoma na noda malumalumu me iwalewale ni veitaqomaki se me sala me da vakaukauwataka kina na noda nanumi keda. Kena ivakaraitaki, eso vei keda eda dau yaloca qai vakacerecerei keda cake nida vakila nida vakarerei. Eda taleitaka na dina, dina ga ni da dau cala vakalevu.

Eso vei keda eda vakalolovirataki keda ka vakalailaitaka na noda ituvaki vakalou me tarovi ira na tani mai na nodra vakararawataki keda. Eda nanuma ni kevaka me da vosa vakacacataki keda vakai keda, ka yaco me dua tale e vakalolovirataki keda eda sa yaco ki na lewa vata ga sa yaco tiko.

Ia na isau ni bolebole ca oqo e vu mai na noda malumalumu ni itovo ni bula, sega ni noda kaukauwa. Eda rerevaka ni kevaka eda biuta laivi na noda malumalumu, eda na malumalumu vakalevu cake. Ia nida vakatara na Kalou me kauta laivi na noda malumalumu qai cakacaka vata kei ira na noda dauveiqaravi, eda raica na levu ni ka e kauaitaki keda kina na Kalou.

Keitou sureti kemuni mo ni yadra ki na nomuni yaga dina ka vakararavi ki na veikauwaitaki ni Kalou ka sega ena nomuni taqomaki kemuni.

Kunea na isema vei ira na tani era vueti tiko kei ira ena lotu

Ni da sa logavinaka cake vei ira na tamata era sa bula vueti vinaka tiko, eda sa tekivu raica ni ra a vakataki keda vakalevu cake mai na kena eda a nanuma. Ni da wasea na keda italanoa ka vakarorogo vei ira na tamata era wasea na nodra, sa tubu cake na noda yalololoma. Eda sa tekivu kila na kedra ituvaki raraba na luve ni Kalou ka vakila vakalevu cake na veimaliwai ni da tiko kaya. Era sureti keda na matavuvale, itokani, kei ira na iliuliu ni Lotu me da lesu tale mai ki lotu se me da vaqaqacotaka na noda yalayala ena gauna oqo. Keimami sega ni vorata se vakaiulubale, keimami mani nanuma me keimami lako i lotu. Keirau raica ni levu na ka keirau taleitaka me baleta na soqoni ni veivakabulai e tiki talega ni sokalou ena lotu.

Ena gauna eda a papitaiso kina, e vica wale sara vei keda a taura dei na cakacaka dina ni saumaki mai, ka kovuta na bula taucoko. Ia, o Peresitedi Marion G. Romney ena Mataveiliutaki Taumada a vakamacala vakamatata sara kina: “Ni dua e saumaki dina sara, na gagadre ni veika e veisaqasaqa kei na kosipeli i Jisu Karisito sa vakamatei dina sara. Ka sa vakaisosomitaki kina na loloma vua na Kalou, ena yalo tudei ka guta me muria na nona vunau” (ena Ripote ni Koniferedi, Koniferedi ni iWasewase e Guatemala 1977, 8).

Ni o sotava tiko na cakamana ni veivueti—taumada mai nai tovo veivakarusai ni veivakatotogani qai tarava yani na malumalumu ni itovo ni bula—eda na qai vakila na saumaki dina. Eda sa na yadra mai ka vakilai keda me vaka ga na gone cidroi sa ”kilai yalona tale” (Luke 15:17).

Vuli kei na Kilamatata

Na ivolanikalou kei na itukutuku oqo mai vei ira na iliuliu ni Lotu ena rawa ni vukea noda vueti bula. Eda rawa ni vakayagataka meda vakasama vakatitobu kina, vuli, ka volavola. Meda nanuma tiko meda dau dina ka vakabibi ena noda volavola meda rawata kina na ka e yaga vakalevu duadua.

Solia yani na nomu ivalavala ca kece

“Sa kaya na tui … io a cava me’u kitaka meu sucu kina vua na Kalou, me cavuraki kina na yalo ca mai na lomaserequ, ka ciqoma na Yalona, ka me’u vakasinaiti ena marau. … Au na solia yani na veika kece au sa taukena … me rawa ni’u ciqoma kina na marau levu oqo. …

“A sa tekiduru na tui ka cuva sobu vua na Turaga; io, a sa cuva vakatoboicu ki na qele, ka masu vagumatua, ka kaya:

“Oi kemuni na Kalou … ka’u na veivutunitaka na noqu ivalavala ca kecega me’u kilai kemuni, ka me’u vakaduri cake mai na mate, ka vakabulai ena siga mai muri” (Alama 22:15, 17–18

• Wilika tale vakavinaka na veitikina oqo. Na veivakataotaki cava, oka kina na ivakarau ni bula kei na veika au vakila, me tarovi au meu kakua ni biuta tani na ”noqu ivalavala ca kecega” ka ciqoma vakavinaka cake na Yalotabu?

Vakaitavi ena veitokani vata ena Lotu

”Ia oqo, ena vuku ni veiyalayalati ko ni sa vakayacora ko ni sa vakatokai kina mo ni luvei Karisito; na luvena tagane, ka luvena yalewa; ni raica, sa vakasucumi kemuni vakayalo ko koya ena siga oqo, ni ko ni sa kaya sa veisau na yalomuni ni ko ni sa vakabauta na yacana; o koya, sa vakasucumi kemuni kina mo ni luvena tagane ka luvena yalewa” (Mosaia 5:7).

Ni da taura vei keda na yaca i Karisito ka sa vakaukauwataki ena Yalona, eda na tekivu meda vakatakilakilataki vata kei ira na Yalododonu—tacimu kei na ganemu ka ra sa papitaiso oti ka curu ki na Nona matavuvale e vuravura.

• Niu sa mai kilai ira vakavinaka cake na noqu itokani Yalododonu, au sa tu vakarau vakacava meu vakaitavi ena veitokani ni Lotu?

Sotavi na Veisereki

“Ni sa meca ni Kalou na tamata vakavuravura, ka sa vakatu mai kina me tekivu sara mai na lutu i Atama, ka na vaka tu kina me sega ni mudu ka sega ni mudu, ka vakavo ke sa talairawarawa ki na veivakayarayarataki ni Yalo Tabu, ka biuta tani na tamata vakavuravura ka yaco me yalododonu ena vuku ni veisorovaki i Karisito na Turaga, ka yaco me vaka na gonelailai, me talairawarawa, yalomalua, yalomalumalumu, dauvosota, sinai ena loloma” (Mosaia 3:19)

E vuqa vei keda sa yaco meda Yalododonu ena yaca wale ga ena gauna ni papitaiso ka vakayagataka na kena vo ni noda gauna ena kena sagai me “biuta tani na tamata vakavuravura” ka vakatorocaketaka na vei itovo e volai tiko ena tikina oqo.

• Na sala cava sa vakarautaki au kina meu ciqoma na Veisorovaki i Karisito duaduaga—ena noqu yaco meu duabau vata kei Jisu Karisito kei na Tamada Vakalomalagi—ka rawa meu sotava kina na veivueti?

Dou lako mai vei Karisito

E vakavulica o Elder Richard G. Scott: “Veitalia na ivurevure ni dredre cava soti ka veitalia na sala o rawata mai kina na veivakacegui—se mai vua e dua na dauveiqaravi kenadau vakaivola, vuniwai, na iliuliu ni matabete, itokani, itubutubu kauwai, se na noda daulomani—se cava ga na ivakarau o tekivu kina, na vei iwali kece oqori ena sega ni vakarautaka nai sau kece ni taro. Na veivakabulai ena yaco mai ena vakabauti Jisu Karisito kei na Nona ivakavuvuli, ena yalo sa raramusumusu kei na yalo bibivoro kei na talairawarawa ki na Nona ivakaro” (“Me da Vakabulai,” Ensign, Me 1994, 9) .

E sega ni dua na iwiliwili ni veitokoni se veitokani—ena ilawalawa ni veivueti se ivavakoso mada ga ni Lotu—ena kauta mai na veivakabulai. Eso tale na tamata era na tokoni keda ka vakalougatataki keda ena noda ilakolako, ia e muri sa na dodonu ga meda lako mai vei Karisito.

• A tekivu vakacava na noqu ilakolako ni vuetaki?

• O cei a vakaitavi sara vakalevu ena noqu vukei meu lako ena salatu ni veivutuni kei na veivueti? E dusimaki au vakacava na nodra ivakaraitaki kivua na iVakabula?

• Na cava au sa vulica me baleta na iVakabula ka sa vukea se vakauqeta na noqu gagadre se na noqu igu meu veisautaka na noqu itovo?

Meda vosota na kena cakacakataki tiko

”Raica dou sa gonelalai ga ka sega ni kila na ka kecega; sa kilikili mo dou tubu cake ena loloma soli wale ka kila na ka dina.

“Dou kakua ni rere, koi kemudou na gone lalai, ni dou sa noqu, au sa vakamalumalumutaki vuravura, …

”Ka na sega ni dua vei ira sa solia vei au ko Tamaqu ena yali” (Vunau kei na Veiyalayalati 50:40–42).

Ena so na gauna eda yalototolo se yalolailai baleta ni veivueti oqo sa dua na iwalewale ena vakayacori tikoga. Na veitikina oqo e vakaraitaka na nodrau vosoti keda na iVakabula kei na Tamada Vakalomalagi ena noda itutu me vaka na “gone lailai.” Vakayagataka na veitikina oqo ki vei kemuni, ena nomuni volavola ki vei kemuni vakayadua.

• E rawa vakacava ki na veiyalayala ena veitiki ni ivolanikalou oqo me vaqaqacotaki au ena gauna au yalolailai kina?

Ciqoma na veivuke mai vei Jisu Karisito

“Ia oqo, oi kemudou na wekaqu lomani, ni dou sa tu ena sala qiqo ka rabailailai oqo, au na taroga mada se sa vakayacori na ka kece sara? Raica, au sa kaya vei kemudou, E segai; ni dou sa sega ni yaco rawa e keri kevaka me sega na vosa i Karisito kei na dei ni nomudou vakabauti Koya, ka vakararavi vakatabakidua sara ki na nona vinaka o Koya sa kaukauwa me veivakabulai.

“Ia, sa kilikili mo dou toso ki liu ka tudei vei Karisito, ena taucoko ni nomudou vakanuinui, ka mo dou lomana na Kalou kei ira na tamata kecega. O koya, kevaka dou sa toso ki liu, ka kana magiti ena vosa i Karisito, ka vosota me yacova na ivakataotioti, raica, sa kaya vakaoqo na Tamada: Dou na rawata kina na bula tawamudu” (2 Nifai 31:19–20).

• E vukei au vakacava o Jisu Karisito ena sala qiqo ka rabailailai?

• E vukei au vakacava na tubu cake ni noqu loloma vua na Kalou kei ira na tani me kauti au tani mai na veivakatotogani, vukei au meu tomana tikoga na noqu vakuwai au mai kina, ka vakalesui au ki na inuinui ni bula tawamudu?