iKalawa 8: Meda vola na yacadra kece na tamata eda sa vakamavotaka na yalodra ka sa lomada sara meda vakavinakataki keda vei ira.

iVakavuvuli Bibi: Vakavakarau mo Vakavinakataka

Ni bera na neimami vakalesui mai, na neimami veitovo ni bula ni veivakatotogani e vaka e dua na covulaca kaukauwa veivakarusai ka lako curuma na isema ni neimami veimaliwai, ka biuta tu mai na mawe ni vakacaca levu sara. Ni da cakacaka tiko ena ika 7 ni ikalawa, eda vakila na kaukauwa veivakabulai ni loloma veivueti ni iVakabula, ka da vakila na gagadre me da vakavinakataka na veimaliwai sa kavoro. Na ikalawa 8 sa dua na madigi me da vola kina e dua na lisi ni tamata kei na isoqosoqo eda a vakamavoataka ka qai tuvanaka me samaka ka tara tale na noda veimaliwai.

Ni a cakacakataki na ikalawa ni veivakabulai, e laurai ni dua vei ira na veika veivakauqeti me baleta na 12 na ikalawa sai koya na ituvatuva era volai kina. E dau tiko e dua na ikalawa ni vakavakarau ka dau yaco mai ni bera na ikalawa ka gadrevi kina na yaloqaqa cecere. Na ikalawa 8, vata kei na veikalawa kece sara e liu, sa noda vakavakarau ki na ikalawa 9, ka gadrevi kina na yaloqaqa ka sega ni noda.

Keitou vulica mai vei ira na tamata era sa cakacakataka oti na ikalawa 8 ni kena vakusakusataki me vakavinakataka ena yalo e sega ni vakavakarau e rawa ni vaka ga ni sega ni dua na veivakavinakataki e caka. Eda sa mani taura na gauna me da masu; vakasaqara na ivakasala mai vei ira na tamata eda nuitaka, me vakataki ira na noda dauveitokoni se iliuliu ni Lotu; ka cakava e dua na ituvatuva. Na vakavakarau oqo ena ikalawa 8 e tarova na noda vakacacana tale na noda veimaliwai ena gauna eda sa tekivu veitaratara kina kei ira na tamata ena ikalawa 9.

Vola e dua na lisi

Ni bera ni da tara tale na veimaliwai, e gadrevi me da raica ka vola na veimaliwai oqori eda a vakacacana. Eda sa vakayagataka na noda ivolaniitovo mai na ika 4 ni ikalawa me vakarautaki kina na noda lisi. Ni da railesuva ena masumasu na noda ivolaniitovo, sa vukei keda na Yalotabu me kilai rawa na veiwekani eda sa vakamavoataka. O keda a cakava e dua na ivolakabi ni da cakacakataka na ika 4 ni kalawa e rawarawa cake me da kilai ira na tamata kei na isoqosoqo oqo (raica na ikuri ni ivakaraitaki ni dua na ivolakabi).

Eda raica ni veivuke na idusidusi oqo ni da cakava na noda lisi. Eda tarogi keda kina, “E dua beka na tamata e tiko ena noqu bula, mailiu se ena gauna oqo, au vakila niu yalo luluqa kina, sega ni logaloga vinaka, se madua meu voleka vua?” Eda vola na yacadra, ka vorata na veitemaki ka vakadonuya kina na veika eda vakila se meda vakaiulubaletaka na caka cala kivei ira. Eda okati ira na tamata eda nakita me da vakararawataki ira kei ira eda sega ni via vakamavoataka. Eda okati ira na tamata era sa takali yani kei ira na tamata eda sega ni kila na sala me da veitaratara kina. Eda sa vakanamata ena kisi talei oqo ni da cakacakataka na ika 9 ni ikalawa. Ni da cakacakataka na ika 8 ni ikalawa, eda sa vakanamata ena noda yaloqaqa ena noda yalodina.

Eda sa qai saga meda kakua ni biuta laivi na veika lalai. Eda sa qai vakasamataka vakadodonu na leqa eda sa cakava vei ira na tamata ni da vakaogai ena noda veivakatotogani, kevaka sara mada ga eda a sega ni ivalavala kaukauwa vei ira. Eda a volai ira na noda daulomani kei na itokani eda a vakamavoataka ena noda cudru, sega ni kauwai kina, vakamosi yalo, bibi, sega ni dau vosota, lawaki, ka beci. Kevaka eda vakuria ki na nona icolacola e dua tale na tamata ena dua ga na sala, eda na okati ira na tamata oqo ena noda lisi. Eda a tovolea meda vola o ira kece era a tarai ena lasu keitou a tukuna, yalayala keitou a voroka, kei na sala eda vakayagataka se vakayagataki ira kina. Eda vakasamataki ira na tamata eda sega ni vosoti ira, ka da vakuria talega ki na noda lisi.

Ni da sa vola oti na tamata kece eda sa vakamavoataka, eda sa qai vakuria e dua tale na yaca ki na lisi—na noda. Ni da a vakaogai keda ena noda vakatotogani, eda sa vakamavotaki keda ka vakakina ko ira na tani. Na sala vinaka duadua eda rawa ni vakavinakataki keda kina o ya meda bula vuetaki tiko mai na veivakatotogani. E rawa ni vukei keda na Kalou meda vosoti keda ka vakavinakataka na ka eda cakava. Ni da vakila na loloma kei na veivosoti ni Kalou, sa vakaisosomitaki na yaloda madua ena lomasoli meda vakavinakataka na veika kece.

Me sa lomada dina

Ni da sa cakava oti na noda lisi, sa gadrevi me da tu vakarau meda vakavinakataka na veika kece. E vuqa vei keda eda raica ni sega ni rawa meda vola na tamata kei na isoqosoqo eda a vakaleqai ira ka da sega ni vagolei tani mai na noda yaloca vei ira era a vakamavoataka talega na yaloda. Oi keda na tamata eda sa dau coriti ena viko rerevaki ni veimaliwai veicacati vakai keda yadua. Ni gadrevi me voroki na viko ni veicacati oqo, sa gadrevi e dua me na veivosoti.

Ni da vakatusa dina na veika ca eda vakila, e vukei keda na Kalou me da voroka na viko ni yaloca. E vakaraitaka vei keda ni dodonu meda vosoti ira na tamata me vaka ga na Nona vosoti keda. Ena vosa vakatautauvata ni tamata ka a vosoti ena nona dinau kecega ia a sega ni vinakata me vosoti ira na tani, a kaya vua na nona turaga, “Au sa vosota na nomu dinau kecega, ni ko sa masuti au: Me kakua talega ni tiko beka vei iko, mo lomani ira na kai nomu, me vaka kau sa lomani iko?“ Maciu 18:32–33).

Ni da sasagataka me da vosoti ira na tamata era vakamosia na yaloda, eda a kerea na loloma soliwale i Karisito me vukei keda me da dodoka yani vei ira na loloma cecere vata ga e solia vei keda o Koya. Eda sa taura na ivakasala ni iVakabula me da masulaka na nodra tiko vinaka ka kerea me ra ciqoma na veivakalougatataki kece sara eda na vinakata me baleti keda (raica na Maciu 5:44).

Ni da cakacakataka na ika 8 ni ikalawa, eda sa tovolea me da nanuma tiko ni ikalawa oqo e sega ni cakacaka ni noda vakamaduataka e dua—o keda se o ira tale eso. Sa vakaraitaka vei keda na veika eda sa sotava ni iVakabula e laveta cake na icolacola ni cala kei na madua ni da raica vakadodonu na noda veimaliwai dredre kei na noda itavi ena veika oqo. Ena ika 8 ni ikalawa, eda sa tekivu veimaliwai kei keda, o ira tale eso, kei na bula ena dua na yalo vou. Eda sa tekivu vakila na vakacegu ena noda bula ka sega ni veileti kei na veivakacalai.

Eda sa tu vakarau meda muduka na noda vakalewai ira na tamata vakatawadodonu ka vakavola tiko na nodra bula kei na nodra cala. Eda sa tu vakarau meda kakua ni vakalailaitaka na noda itovo ca se vakaiulubaletaki ira. Ni o sa tu vakarau mo vakayacora na veivakameautaki, eda sa vakila na vakacegu ni kila ni Tamada Vakalomalagi e marautaka na noda sasaga kece. Na ikalawa oqo ena vukei keda meda cakava na cakacaka me rawa kina vua na iVakabula me sereki keda mai na noda caka cala e liu. Na noda tu vakarau me da cakava na vakavinakataki keda sa na vakarautaki keda meda cakacakataka yani nai ka 9 ni ikalawa.

iTuvatuva ni Cakacaka

Oqo na parokaramu ni cakacaka Na noda toso ena vakatau ena noda dau vakayagataka wasoma na veikalawa ena noda bula e veisiga. Sa kilai tu oqo me “ikalawa me cakacakataki“ Na cakacaka oqo ena vukei keda meda lako mai vei Karisito ka ciqoma na veidusimaki kei na kaukauwa e gadrevi me da taura kina na ikalawa e tarava ena noda vueti.

Vola e dua na lisi ni tamata eda a rairai vakacudruya se vakamavoataki ira

Era dusimaki keda na noda dauveiqaravi ni da vakarautaka na noda lisi, ka da raica ni sa yaga sara vakalevu na ivola. E vuqa vei keda eda vakayagataka na ituvatuva oqo me vukea me ka rawarawa ia me kaukauwa.

Kena imatai, ni da vakayagataka na noda ivolaniitovo mai na ika 4 ni ikalawa, eda vola kina na tamata se isoqosoqo eda gadreva me da veitaratara kaya.

Ena yasa ni yaca yadua, eda na vola kina e dua na inaki lekaleka me vakavinakataki kina.

Ni oti oya, me vaka na veidusimaki ni Yalotabu, eda na tuvanaka meda veitaratara kei ira na tamata ena noda lisi, e matanavotu, ena talevoni, se ena ivola se imeli. Eda sa railesuva na noda ituvatuva vata kei ira na noda dauveiqaravi se daunivakasala nuitaki.

iOtioti, eda okata kina e dua na tikinisiga me taketetaki. Eda sa biuta e dua na vanua galala me ripotetaki kina na tikinisiga eda a veitaratara kina kei koya kei na kena macala. (Na ivolakabi ena ikuri e dua na iyaya veivukei.)

Veivosoti

E dredre meda kere veivosoti mai vei ira na tamata era sa vakamavoataki keda. Kevaka o sotava tiko na dredre oqo, o na raica beka ni veivuke mo vola taumada e dua na lisi ni tamata o gadreva mo vosoti ira; qai vola e dua na lisi ni tamata o gadreva me kere veivosoti vei iko. O na rairai kurabui ni raica ni so na yaca e basika ena lisi ruarua.

E dodonu meda dau vosota vakai keda ni da cakacakataka ena masumasu na noda vosoti ira na tamata eda vola. E kaya o Peresitedi James E. Faust: “E vuqa vei keda eda gadreva na gauna meda cakacakataka kina na mosi kei na lusi. Eda rawa ni vakaraica na inaki kece sara me lokuyarataki kina na veivosoti. E dua vei ira na vuna oya na nodra waraki na dau caka cala mera veivutuni [ka vakavinakataki ira vei keda] ni bera ni da vosoti ira. Ia na lokuyara vaka oqo ena vakavuna meda vakayalia na vakacegu kei na marau e rawa ni noda. Na lialia ni vakasevi ni mosi sa oti e sega ni kauta mai na marau. … Kevaka eda rawa ni kunea na veivosoti e yaloda ena vukudra era sa vakavuna na noda mosi kei na mavoa, eda na tubu cake ki na dua na ivakatagedegede cecere cake ni noda yalodei kei na tiko vinaka“ (“Na Kaukauwa Veivakabulai ni Veivosoti,“ Liaona, Me 2007, 68).

Na noda vosota e dua e sega ni kena ibalebale ni da sega ni vakadonuya na nona digidigi cala se vakatara me vakacacani keda. Ia na veivosoti e rawa nida toso ki liu vakayalo, vakasama, kei na yagoda. Me vakataki ira ga era sa vakamavoataki keda era sa vakabobulataki tu, na noda sega ni via vosoti ira ena rawa ni vesuki keda. Ni da veivosoti, eda sa biuta tu mai na veika eda vakila ka tu kina na kaukauwa me da “vakacacani, dauvakacaca, ka vakarusa sara“ (Thomas S. Monson, “Hidden Wedges,“ Ensign, Me 2002, 20). Na veivosoti ena vukei keda talega meda rawata vakalevu cake na Yalotabu ka tomana tikoga na salatu ni bula vakatisaipeli. Me vaka a vakananuma vei keda o Peresitedi Dieter F. Uchtdorf, ena gauna oya ni Mataveiliutaki Taumada, “Sa vakasinaiti na lomalagi vei ira era vakakina: Era sa vosoti. Era sa veivosoti“ (“O Ira Era Dauloloma Era na Lomani,“ Liaona, Me 2012, 75.

Masulaka na loloma

E dina ga ni o sa rere beka me vaka ga ni da via vakavinakataki keda, eda sa vakadinadinataka ni ena veivuke ni iVakabula, sa rawa mo tu vakarau mo sotavi ira na tamata ena nomu lisi ni sa basika mai na kena madigi. Eda sa vakavakarau me da cakava na veivakavinakataki ena noda masulaka meda yaloqaqa me da bula ena vakabauta na Kalou, ka sega ena rerevaka na veika era na cakava se tukuna na tamata. Ka da tovolea me da muria na ivakavuvuli ni kosipeli ka sega ni madua se rere. E dua vei ira na ivakavuvuli kaukauwa ka vukei keda o ya na loloma cecere, “na loloma savasava i Karisito” (Moronai 7:47).

Ni bera ni da cakacaka ena ika 8 ni ikalawa, e vuqa vei keda eda kurabui ni da vakila na loloma i Jisu Karisito dina ga ni da sega ni taucoko. Na loloma mai Vua oqo a vakavuna me da vakila na loloma cecere ki Vua ka solia vei keda e dua na gagadre me da muri Koya. Ni da tovolea na noda vinaka taucoko me da muri Koya, eda sa vakasinaiti ena Nona lomani keda kei ira tale eso. Eda sa masulaka na loloma cecere, ka sa toso na gauna eda sa tu vakarau me da vosoti ira na tamata ka vakavinakataka na ka. Eda sa kunea tale ga e dua na ivakarau levu cake ni loloma kei na veivosoti vei keda mada ga. Eda sa kerea vua na Kalou me vakamalumalumutaka na yalodra na tamata ena noda lisi ena loloma cecere kivei keda, ka meda masulaka na kaukauwa me da ciqoma na veika kecega ena yaco.

Ni da masulaka tiko na loloma cecere, e vuqa vei keda e raica ni veivuke me digitaki e dua na tamata mai na noda lisi ka nakita me tekiduru ka masulaki koya ena veisiga me rua na macawa. Na noda lisi ni veivakavinakataki ena vukei keda me vakamatatataki ena noda masu vua na Tamada Vakalomalagi me baleta na noda vakanananu sega ni wali. Ni da sa masu—kevaka sara mada ga e sega ni dina ena imatai ni gauna—eda sa vakalougatataki ena yalololoma veivakurabuitaki. Ena ituvaki dredre mada ga, sa vakalougatataki ira na tamata na Kalou era masulaka na loloma cecere mera vosota ka veisautaka na ka.

Vuli kei na Kilamatata

Na ivolanikalou kei na itukutuku oqo mai vei ira na iliuliu ni Lotu ena rawa ni vukei keda ena noda vueti. Eda rawa ni vakayagataka meda vakasama vakatitobu kina, vuli, kei na volavola. Meda nanuma tiko meda dau dina ka vakabibi ena noda volavola meda rawata kina na ka e yaga vakalevu duadua.

Dauvakamumuri vakarokoroko nei Karisito

“O koya au sa vosa kina vei kemudou na isoqosoqo lewe ni lotu, koi kemudou sa daumuria na Karisito ena vakarokoroko, ka dou sa rawata na inuinui e rauta me rawa kina ni dou curu ki na ivakavakacegu ni Turaga mai na gauna oqo ka lako yani me yacova ni dou sa vakacegu vata kei koya mai lomalagi.

“Ia oqo oi kemudou na wekaqu, au sa vakadeitaka oti mai vei kemudou na veika oqo ena vuku ni nomudou lako ena vakarokoroko kei ira na luve ni tamata” (Moronai 7:3–4).

Ena imatai ni vitu nai kalawa, eda tekivutaka kina e dua na iwalewale ni muri Karisito ena vakarokoroko. Ni da sa tiko vakacegu vata kei na Turaga, eda sa vakavakarau vakavinaka cake mo tiko vakacegu vata kei ira na tamata.

• Ena vukei au vakacava na noqu cakacakataka na veikalawa ni veivueti me rawa niu yaco meu dua na imuri vakarokoroko i Karisito?

• Na ikalawa cava tale au gadreva meu taura, meu tiko vakacegu vata kina kei ira na tamata ena noqu bula?

Na loloma uasivi duadua ni Kalou

“Sa sega ni tu vata na rere kei na loloma; ia sa biuta tani na rere na loloma levu sara: ni sa tiko vata kei na yaluma na rere. Ia ko koya sa rere sa sega ni levu sara na nona loloma.

“Eda sa lomani Koya [na Kalou] ena vuku ni sa taumada na nona loloma vei keda” (1 Joni 4:18–19).

• Meu na nuitaka vakacava na loloma uasivi ni Kalou me baleti au kei koya au vakasaqara mai vua na veivosoti?

• Ena vaqaqacotaka vakacava na noqu vakadeitaka meu sauma lesu na ka au kila ni lomani au kei ira kece na Luvena na Kalou ena veigauna kece e rawa?

Dolele Yani vei Ira na Tamata

“Ia dou kakua ni dau lelewa, dou na qai sega ni na lewai: dou kakua ni dauveibeitaki, dou na qai sega ni beitaki: dou kakua ni daucudruva na tamata, dou na qai sega ni cudruvi:

“Mo dou dau soli ka, ena soli vei kemudou; na ivakarau vinaka, ka tabaki sobu, ka kuretaki vata, ka vuabale, era na solia na tamata ki na lomaseremudou. Ia na ivakarau dou sa vakarautaka, ena vakarautaki tale vei kemudou” (Luke 6:37–38).

E dina ga ni rawa ni da ririkotaka ni so na tamata era na biliga na noda via tiko vakacegu vata kei ira, meda kakua ni vakatara na ririko oqo meda kua kina ni volai ira ena noda lisi ka vakarautaki keda kei ira. Na veivakalougatataki eda na ciqoma ena levu cake sara mai na mosi.

“Na voleka ni noda toro yani vua na Tamada Vakalomalagi, na levu ni noda gadreva meda raici ira ena mataloloma o ira ka sa rusa tiko - eda na vinakata saraga meda colati ira ki tabada, ka biuta ki dakuda na nodra ivalavala ca. … Kevaka o gadreva me lomani iko na Kalou, mo ni veilomani vakai kemuni sara” (Joseph Smith, ena History, 1838–1856 [Manuscript History of the Church], ivola C-1 Addenda, 74, josephsmithpapers.org).

• Eda sa yalo tawadodonu kece ka gadreva tu na loloma veivueti i Jisu Karisito. E veivuke vakacava niu kila ni cakacaka ena ikalawa 8, au sa dolava tiko na katuba meu ciqoma kina na loloma veivueti kei na loloma soliwale i Jisu Karisito?

Veivosoti ka kerea na veivosoti

“Sa qai lako mai vua ko Pita ka kaya, Noqu Turaga, me ivalavala ca vakavica mada vei au na wekaqu, kau kakua ga ni cudruva? Me vakavitu?

“Sa kaya vua ko Jisu, Au sa sega ni kaya vei iko, Me vakavitu walega, Me vakavitusagavulu na vitu.” (Maciu 18:21–22).

E rawarawa cake na veivosoti ka kerea na veivosoti me baleta e dua ga na cala mai na veivosoti se kere veivosoti me baleta e dua na ituvaki balavu e sinai tu ena cala e vuqa. Vakasamataka na veimaliwai sa oti se na kena ena gauna oqo kei na cala sa tu balavu mai o gadreva mo vosota se kerea kina na veivosoti.

• Au na rawata vakacava na kaukauwa meu veivosoti ka kerea meu vosoti?

• Na sala cava, e ivakaraitaki cecere duadua kina o Jisu Karisito ni rawa ni vosoti ira na tamata? Ena vukei au vakacava na Nona ivakaraitaki meu vosoti ira kina na tamata?

“O koya, au sa kaya kina vei kemudou, ni sa dodonu mo dou veivosoti vakataki kemudou; ni na tu me cudruvi mai vua na Turaga, ko koya sa sega ni vosota na nona caka cala na wekana, ni sa tu ga vei koya na ivalavala ca e levu cake.

“Ia koi au na Turaga au na vosoti ira ga kau sa lewa, ia koi kemudou sa kilikili mo dou vosota na tamata kecega” (Vunau kei na Veiyalayalati 64:9–10

E vakavulica o Jisu ni ivalavala ca levu cake na sega ni vosoti ira na tani mai na cala taumada.

• E rawa vakacava na nomu sega ni via vosoti iko vakai iko se dua tani tale me ivakatautauvata ni cakitaki ni Veisorovaki ni iVakabula?

• E rawa vakacava me vakacacani au vakayago, vakayalo, kei na lomaqu na veicacati kei na loma ca?

Voroki na viko ni yaloca kei na cudru

E vakamacalataka na Parofita o Josefa Simici na sala e veituberi kina na yalovinaka ki na veivutuni kei na veivosoti.

“E sega ni dua na ka e gadrevi vakalevu cake ena nodra tuberi na tamata mera biuta nai valavala ca, mai na noda tubera na ligadra, ka vatawai ira ena yalo malua. Ni ra vakaraitaka na tamata na yalovinaka kei na loloma kivei au ena kena lailai duadua, Isa sa qai dua na kaukauwa sa curuma na noqu vakasama, ia na kena sala veibasai sa dau bucina cake na yalo ca ka lomaocaocataka na vakasama ni tamata” (Joseph Smith, in History, 1838–1856 [Manuscript of the Church], volume C-1 Addenda, 74, josephsmithpapers.org).

• Sa lomaqu beka meu dua ena voroka na viko ni yalo ca kei na cudru?

• Era sa vakauqeti se vakayaloqaqataki vakacava na tamata era sa vakaraitaka vei au na yalovinaka kei na loloma me duidui kina na noqu ivalavala?

• Ena sala cava ena veisau kina na veimaliwai dredre ena noqu bula niu veimaliwai kei ira na tamata ena loloma kei na yalovinaka?