iKalawa 9: Ena veigauna e rawa kina, vakavinakataki iko sara ga vakadodonu vua o cala kina.

iVakavuvuli Bibi: Vakavinakataka na Veika Kece

Ni da toso ki nai ka 9 ni kalawa, eda sa tu vakarau meda kere veivosoti. Me vakataki iratou na luvei Mosaia eratou sa veivutuni, eratou sa lako voli ka “segata vagumatua sara me ratou vakavinakataka na veileqa kece era sa vakayacora” (Mosaia 27:35, eda sa gadreva meda caka vinaka. Ia, ni da yacova nai ka 9 ni ikalawa, eda kila ni da sega ni rawa ni vakayacora na noda gagadre vakavo ga ke sa vakalougatataki keda na Kalou ena nona Yalotabu. Eda sa gadreva meda yaloqaqa, vakatulewa vakamatau, veikauwaitaki, vuku, kei na gauna donu. E levu vei keda eda sega ni taukena na itovo oqo ena gauna oya. Eda vakila ni i ka 9 ni ikalawa ena vakatovolea tale vakalevu na lomada meda vakayalomalumalumutaki keda ka vakasaqara na veivuke kei na loloma soliwale ni Turaga.

Ena vuku ni veika eda sa sotava ena cakacaka veibolei dredre oqo, sa soli kina oqo e vica na vakatutu. Sa ka bibi sara me da kakua ni vakariri se vakawaletaka ni da tovolea me da vakavinakataka na cala. Sa tautauvata na kena bibi o ya meda kakua ni lokuyara. E vuqa na tamata ena veivueti oqo era sa lesu tale ki na veika ca o ya ni ra sa vakatara nodra rere me sega kina ni ra veivakavinakataki. Eda gadreva me da masulaka na veidusimaki ni Turaga me baleta na gauna kei na sala me da veivakavinakataki kina. Me kena ikuri, ena veivuke sara meda veivosaki kei ira na noda dauveiqaravi, iliuliu ni Lotu, se so tale eda nuitaka.

Ena so na gauna eda na rawa ni temaki meda levea noda sota kei ira eda sa volai ira tiko ena noda lisi. Ia, sa vakaturi tiko meda na vorata na veitemaki oqo, vakavo ga, ni dina sara, ke o tarovi vakalawa mo sota vata kei na dua. Ni da yalomalumalumu ka yalodina ka sasagataka vakavinaka meda sota e matanavotu, eda na rawa ni vakavinakataka na veimaliwai a vakacacani. Eda sa vakatakila vei ira na tamata ni da sa torovi ira tiko yani meda veivakavinakataki. Eda sa rokova na nodra gagadre kevaka era vakaraitaka ni ra sega ni via veivosakitaka na ka oqori. Kevaka era solia vei keda na madigi meda kere veivosoti, me na lekaleka ka matata na veika eda cakava. Meda na qarauna meda kakua ni vakaiulubale se vakasaurarataki ira na tamata eda na laki sotava. Na inaki ni veivakavinakataki e sega walega me na vakadonui kina na noda itovo se vakalewai ira kina na tamata; na kena inaki me da vakadinadinataka kina na noda caka cala, kere veivosoti, ka vakavinakataka na veika kece ena veigauna e rawa kina. Meda na kakua ni veiba kei ira na tamata, kevaka mada ga ni veika era kaya lesu mai e sega ni veidonui se ciqomi rawa. Eda na laki sota ena yalomalumalumu kei ira na tamata yadua ka dolea yani noda veivakameautaki, sega meda vakadonui kina.

Ena rairai veibolei sara tiko ga meda na kere veivosoti ena vuku ni noda itovo eso. Me vakataka na gauna meda na via walia kina na veika eso ena rawa me kovuti tiko ena liga ni lawa, me vaka na butako se veivakacacani. Eda na rawa ni temaki meda boletaki keda ga, vakaiulubale, se levea kina na veivakavinakataki. Eda sa na vakasaqara ena yalomasumasu na ivakasala vakalotu se vaka kenadau ni bera ni vakayacori e dua na cakacaka ena veikisi dredre vaqori.

Ena so tale na kisi, eda na sega beka ni rawa ni veivakavinakataki ga e kea. A rairai mate beka na tamata o ya, se da sega beka ni kila na vanua e vakaitikotiko kina. Ena kisi vakaoqori, eda se rawa tikoga ni da veivakavinakataki ena dua tale na sala. Eda rawa ni vola e dua na ivola ka vakaraitaka kina na noda sa veivutuni kei na gagadre meda veivakameautaki, ka dina mada ga ni sega ni rawa ni laki solia e ligada na ivola. E rawa ni da kunea e dua e vakavotuya vei keda na tamata o ya ka cakava e dua na ka me vukei koya, se e rawa ni da cakava e dua na ka tawakilai me vukei koya e dua na lewe ni matavuvale ni tamata o ya.

Ena so na gauna, eda rawa ni vakamavoataka na yalo eda sega ni vakavinakataka rawa. A vakatavulica o Elder Neil L. Andersen:

“E vuqa na cala e sega ni rawa ni vakadodonutaki mai vua e vakararawataki se vakacudrui, ka tiko na mosi kei na rarawa ka na sega ni rawa ni vakavinakataki vakataucoko. Ia kakua ni vakadaroya na veivakameautaki ena yalovinaka eda rawa ni cakava, na rarawa o rawa ni vakaceguya, dina ga ni loloma, savasava, ivalavala dodonu, veivakabauti, kei na veidokai e sega ni rawa me caka ke sega na veivuke na Turaga. … Ena so na ivalavala ca, na sala duadua ga me da veivakavinakataki kina ena rawa ni yaco mai ena noda vakalougatataka na nodra bula eso ka yaco meda iyaya ni cakacaka ena liga ni Turaga me kauta mai na nona vinaka kei na loloma soli wale vei ira tale eso” (The Divine Gift of Forgiveness [2019], 218, 221).

Mai na gauna eda digitaka kina meda taurivaka na vei ivakavuvuli dina oqo me noda ivakarau vou ni bula, eda sa tekivu veivakavinakataki. Eda veisautaka na ivakarau ni noda bula, ni da sa bula vuetaki tiko, ena vakalougatataki ira kece era tu wavoliti keda.

Ena so na gauna ena rawa ni da laki sotava e dua meda laki veivakavinakataki ena rawa me ka mosi toka vua na tamata oya se na vakamavoataka na yalona. Kevaka o nanuma ni na yaco vakakina, veivosakitaka na ituvaki oqo vata kei na dua na nomu dauniveiqaravi se daunivakasala nuitaki. Na ikalawa ni veivueti oqo e sega ni dodonu me vakavuna vakalevu tale na veivakamavoataki se lomaocaoca vei ira tale eso.

Ni oti na noda veivakavinakataki ena vuqa na noda cala sa sivi, ena rawa ni tiko e dua se rua tale na tamata eda nanuma eda na sega ni veirai rawa e matanavotu. E vuqa vei keda sa sotava dina na veika vata oqori. Sa vakaturi mo ni gole yani vua na Turaga ena masu ena yalodina. Kevaka e se tikoga na taqaya ni o se cudruva tiko edua, ena dodonu beka mo tosoya na veisotari kei koya. E rawa ni da vorata na yalo ca ena noda masulaka na loloma cecere me da raica na tamata oqo me vaka e raici koya na Turaga. Ena rawa meda raica na vuna vinaka ena veivuke kina na veivakavinakataki kei na veivakameautaki. Kevaka eda vakayacora na veika oqo ka vosota tiko, na Turaga ena rawa—ena Nona sala ga kei na Nona gauna—me solia vei keda na veimadigi veivakurabuitaki eso meda vakasaqara na veivosoti maivei ira kece era tiko ena noda lisi.

Ena so na kisi, ena sega ni vosoti keda se sega ni rawa ni vosoti keda. Eso tale era na vosoti keda ia era na sega ni via veivakameautaki se veiwekani kei keda. E dina ni na rairai veivakayalolailaitaki se mosimosi vei keda oqo, sa ka bibi meda doka na lomadra ka rokova na nodra galala ni digidigi. Na ikalawa 9 e baleta na noda cakava na noda itavi me da veivakavinakataki kina. Na ikalawa oqo e sega ni gadrevi kina vei koya na tamata o ya me vosoti keda se veivakameautaki vata kei keda. Ni da cakava na noda itavi ena noda sasaga dodonu me da veivakavinakataki, eda sa cakacakataka na ikalawa 9 ka toso ki liu ena noda ilakolako ni veivueti.

Cakacakataki ni iKalawa

Oqo na parokaramu ni cakacaka. Na noda toso ena vakatau ena noda dau vakayagataka tikoga na veikalawa ena noda bula e veisiga. Sa kilai tu oqo me “cakacakataki ni ikalawa.” Na cakacaka oqo ena vukei keda meda lako mai vei Karisito ka ciqoma na veidusimaki kei na kaukauwa e gadrevi me da taura kina na ikalawa e tarava ena noda vueti tiko.

Golevi ira yani na tamata

Ena ika 8 ni ikalawa, eda sa vola kina na lisi ka vakasamataka ena masumasu na gauna kei na sala me da torovi ira kina na tamata ena noda lisi. Eda sa veivosakitaka na noda ituvatuva vata kei ira na noda dauveiqaravi se daunivakasala nuitaki, ka da sa qai vakarau tu ki na ikalawa 9—o ya meda veitaratara kei ira na tamata ena noda lisi (kevaka e rawa ka veiganiti). Nida veitaratara kei ira na tamata meda veivakavinakataki, e sega ni dodonu meda vakamacalataka vakamatailalai na noda veivakatotogani. Ia e dodonu meda wasea na veika matailalai me vukei ira me ra kila vakavinaka cake na vuna e dodonu kina meda veivosaki kei ira.

Eda vakadinadinataka na noda cala ka taroga na cava eda rawa ni cakava me vakadodonutaki kina na veika eso. Se ra vosoti keda se sega, sa vakatau ga vei ira. O ira na tamata eda sa na veivosaki vata ena tiko beka na nodra taro e ganiti keda meda sauma. Nanuma mo sauma na nodra taro ena kena iwalewale ka na sega ni vakacacana na noda veimaliwai. Kevaka e tiko eso na nomu vakatitiqa, tukuna ga vei ira ni o na vinakata mo vakasamataka vakalevu cake na ka oqo ka na lesu tale mai vei ira. Oti mo qai veivosakitaka kei na nomu dauveiqaravi se daunivakasala nuitaki na sala kei na gauna mo sauma kina na veitaro oqo.

Eda na rairai yaloluluvu beka ena so na gauna ni kena vakayacori tiko oqo. Eda masu ka kerea na veivuke ni Turaga me da yalomalua tikoga ka vakanamata ki na inaki ni noda veisiko. Eda na temaki beka meda vakadonui se vakamacalataka na noda ivalavala ena noda kauta cake mai se vakanamata ki na ka a cakava e dua tale, ia e dodonu meda vorata na veitemaki oqo. E dodonu meda vakanamata tikoga ki na veivakavinakataki ni noda ivalavala.

Eda veivosakitaka na ka eda rawa ni cakava meda vakavinakataka lesu kina vua na tamata eda caka cala kina. Me vakataka, ke da gadreva meda veivakavinakataki ena noda sauma lesu na ilavo, sa rawa vei koya me vosota mai na dinau, kerea na ilavo taucoko, se kerea me saumi na kena tubu. Eda na sega beka ni gadreva me da sotava na veika era namaka; ia, e bibi me da kila na veika e nanuma na tamata o ya e dodonu me da cakava me da veivakavinakataki kina, ka dodonu meda vakasamataka ena masumasu.

Ni oti na veivakavinakataki, eda na vakacavara na iotioti ni rua na kolomu ena ivolakabi eda a bulia ena ikalawa 4 (raica na ikuri me baleta e dua na ivakaraitaki ni dua na ivolakabi). Eda na vakacuruma na tikinisiga ni veitaratara yadua, na veisau eda cakava, kei na kena macala. Eda na qai veivosakitaka vata kei ira na noda dauveiqaravi na kena macala. Eda kila sara ni da sasagataka tiko me da cakava na veika kece eda rawata me da duavata kina kei ira na tamata ena noda lisi. Eda sa cakava na noda vinaka taucoko me da vakadodonutaka na veika eso, ka rawa ni da nuitaka na Turaga me vakabula na veika eda sega ni rawa ni vakabula. Na vakacegu e lako mai ena noda veimaliwai kei na Turaga. Eso tale e tu vei ira na nodra galala ni digidigi me ra sauma ena nodra gagadre ga.

Kila na veivakalougatataki ni veivueti

Ni da sa yaloqaqataki keda meda cakava na veisau eso, e veivakayaloqaqataki me da vola na veivakalougatataki eda sa ciqoma ena noda cakacakataka na veikalawa ki na gauna oqo. Eda sa tekivu kila ni veivakalougatataki ni veivueti e sivia sara na ka eda sa namaka. Eda sa vakatura meda tekivuna e dua na lisi ni veisau ena nomuni bula. Oqo eso na veisau eda raica vakai keda ni da yaco yani ki na tikina oqo ena noda sa vueti bula tiko:

• Eda vakila na loloma uasivi duadua ni Kalou me baleti keda.

• Eda vakila na reki vou, marau, kei na galala ena noda bula.

• Eda kilai ira na tamata, veimaliwai, kei na ituvaki eda sotava ena rai titobu ka sa levu cake na noda dau veikauwaitaki vei ira na tamata.

• E tiko vei keda na veidusimaki vou kei na inaki ni noda bula.

• Eda vakila na titobu ni noda ciqomi keda kei na loloma me baleti keda kei ira na tani.

• Eda sega ni dau vakasamataki keda vakalevu ka vakanamata vakalevu cake ena noda qaravi ira na tamata era gadreva na noda veivuke.

• Eda vakila vakalevu cake ka vakatamata yadua na Veisorovaki tawavakaiyalayala i Jisu Karisito.

• Sa levu cake na noda inuinui kei na vakabauta me baleta na noda veisiga ni mataka tawamudu.

• Eda sega ni rerevaka na bula kei na ituvaki vakailavo.

• Eda vakila nida sa vosoti, ka rawa ni da vosoti ira vakalevu cake na tamata.

• Eda nuitaka ni kaukauwa ni Kalou, eda na rawa ni cakava na veika eda sega ni rawa ni cakava vakataki keda.

Vuli kei na Kilamatata

Na ivolanikalou kei na itukutuku oqo mai vei ira na iliuliu ni Lotu ena rawa ni vukei keda ena noda vuetaki. Eda rawa ni vakayagataka meda vakasama vakatitobu kina, vuli, ka volavola. Meda nanuma tiko meda dau dina ka vakabibi ena noda volavola meda rawata kina na ka e yaga vakalevu duadua.

Vakauqeti ira na tamata ki na veika vinaka

“Ia oqo a sa kaya vei au na Yalo ni Turaga: Mo vakaroti ira na luvemu me ra ivalavala vinaka, de ra na vagolea tani na yalodra na tamata me ra rusa kina; o koya, au sa vakaroti kemuni kina na luvequ, ena rerevaka na Kalou, mo ni kakua sara ni kitaka na ivalavala ca;

“Ia mo saumaki vua na Turaga ena nomu vakasama taucoko, na nomu igu taucoko kei na nomu kaukauwa kecega; io mo kakua tale ni vagolea vakatani na yalodra na tamata me ra kitaka na ivakarau ca; ia mo lako yani ka tusanaka vei ira na nomu cala kei na veika ca ko a cakava” (Alama 39:12–13).

E dua na revurevu rerevaki ni noda itovo ni veivakatotogani oya ni da a rawa ni vakauqeti ira na tamata me ra vakatorocaketaka vakai ira ga na nodra veivakatotogani.

• O cei ena noqu bula au sa vakauqeta ena sala oqo?

• Me vaka na ivakavuvuli nei Alama ena veitikina oqo, evei na vanua meu na kunea kina na yaloqaqa meu veisautaka na veika oqo vei ira na tamata oqo?

Mo vakauqeti, sega ni vakasaurarataki

“Ko cei ga e lako mai ia me lako mai ka mai gunu ena wai ni bula ena yalo galala; ia ko cei ga ena sega ni lako mai ena sega ni vakasaurarataki me lako mai; ia ena siga mai muri ena vakalesui tale vei koya me vaka na nona ivalavala” (Alama 42:27

Ni tu e vuqa sara na vuna kaukauwa mo taura kina nai ka 9 ni ikalawa, ia sa dodonu meda kakua ni coriti ena vakaiulubale se lasutaka ni sa sega tale na noda digidigi. Na Parokaramu ni Veivueti mai na Veivakatotogani sa parokaramu ni veivakauqeti, sega ni veivakasaurarataki.

• Au sa dau vakauqeti se vakasaurarataki beka meu veisautaka na ka?

• Me vaka e tukuni ena tikina oqo, na cava eso na vuna au rawa ni vakauqeti kina?

Vakarau mo sotava na Kalou.

“Au gadreva mo ni lako mai ka kakua ni vakaukauwataka tiko na lomamuni; ia raica, oqo na kena gauna kei na siga ni nomuni vakabulai; o koya, kevaka ko ni veivutuni, ka sega ni vakaukauwataka na lomamuni, ena kau yani vakatotolo vei kemuni na ituvatuva cecere ni veisereki.

“Ia raica, na bula oqo sai koya na gauna me vakarautaki koya kina na tamata me sota kei na Kalou; io, raica na veisiga ena bula oqo me vakayacora kina na tamata na nona cakacaka kecega” (Alama 34:31–32).

• Na cava au na rawata niu vakamalumalumutaka na yaloqu ka veisautaka na noqu bula?

• E vakalevutaki vakacava na nomu yalo rawarawa mo veivakameautaki, ni o kila ni o sa vakavakarau tale tikoga mo sota kei na Kalou?

iTaviqaravi ena Lotu

“[O Alama Lailai kei ira na luve i Mosaia] era sa lako yani ena na vanua taucoko … eratou sa segata vagumatua sara meratou vakavinakataka na veileqa kece era sa vakayacora ki na lotu, era sa tusanaka na nodra ivalavala ca, ka tukuna na veika era sa raica, ka vakamacalataka na parofisai kei na ivolanikalou kivei ira kece sa via rogoca”(Mosaia 27:35

Ena vuku ni itovo veivakatotogani, e vuqa na tamata era sa sega ni dau lako i Lotu. Eso na tamata era vakayagataka na nodra cala eso mera vakadonui kina na vakaiyalayala ni nodra vakaitavi ena Lotu.

• Na cava beka na veika au sa sotava ena itaviqaravi ena Lotu i Jisu Karisito ni Yalododonu Edaidai.

• Sa vukei au vakacava na noqu toro voleka vua na iVakabula ena noqu sa vueti meu vakila noqu vakaduavatataki tale kei na Nona Lotu?

• E veivuke vakacava na noqu bulabula tiko ena Lotu meu veivakavinakataki kina ka vuetaki mai vakataucoko?

Lomasoli ena veivakameautaki

“E dodonu mo vakavinakataka ena kena levu ga e rawa na veika kece sara sa butakoci, vakacacani, se vakadukadukalitaki. Na veivakavinakataki ena lomadina sa ivakadinadina kaukauwa vua na Turaga ko sa yalataka mo cakava na veika kece o rawata mo veivutuni” (Richard G. Scott, “Finding Forgiveness,” Ensign, Me 1995, 76).

• Sa yaco vakacava na veivakadodonutaki me ivakadinadina sega walega vua na Turaga ia vei au talega kei ira tale eso niu sa yalataki iko ki na dua na bula ni yalomalumalumu kei na yalodina?

Na inaki ni lomada

“Ia, ko koya sa veivutuni ka muria na vunau ni Turaga ena vosoti” (Vunau kei na Veiyalayalati 1:32).

Ni da veivakavinakataki tiko, eda na rairai sotava eso na tamata era na sega ni vosoti keda. E rairai ni se ca tiko beka ga na lomadra vei iko, se ra sega ni nuidei sara ena noda inakinaki.

• E vukei au vakacava meu kila ni Turaga e kila deivaki tu na i naki dina ni lomaqu ka na ciqoma o Koya na noqu lomasoli meu veivutuni ka vakavinakataka na cala, veitalia mada ga nira sega ni ciqoma na tamata tale eso?

Na cava e rawa ni cakava vei keda na iVakabula

“O ira na tamata era na sega ni rawa ni vosota ga vakataki ira na nodra ivalavala ca; era na sega ni rawa ni vakasavasavataki ira mai nai sau ni nodra ivalavala ca. Na tamata e rawa ni muduka na nona caka ca ka vakayacora na veika vinaka ena gauna mai muri, ni yacovi oya, na nodra i valavala sa vakadonui e mata ni Turaga ka sa kilikili me na daunanumi tiko. Io, o cei me na vakavinakataka na cala era sa vakayacora oti ki vei ira vakai ira, kei ira tale na so, ka na rairai dredre mera vakavinakataka vakataki ira? Mai na veisorovaki i Jisu Karisito, na nona ivalavala ca o koya sa veivutuni e na bokoci laivi; ke sa damuvakula ena vaka na vutika ni sipi. Sai koya oqo na vosa ni yalayala e soli vei iko” (Joseph F. Smith, Gospel Doctrine,5th ed. [1939], 98–99).

Ni o sa lako yani mo ia na veivakameautaki, kua ni yalolailai ena vakasama vaka oqo “Na ka oqo ena sega ni rawa! E sega ni tiko edua na sala meu na vakavinakataka kina vakavinaka cake sara na cala au sa cakava vua na tamata oqo! ” E dina ga ni rawa ni dina oya, mo nanuma na kaukauwa i Jisu Karisito me vakavinakataka na ka o sega ni rawata. E dodonu meda nuitaka ni na cakava o Jisu Karisito na ka eda sega ni rawa ni cakava.

• Meu na vakaraitaka vakacava vua na Turaga niu sa nuitaki Koya? Meu na vakalevutaka cake vakacava na veivakabauti oqori?