Veitokoni ena Veivueti

Na Bibi ni Kena Kunei na Veitokoni

Sa ka bibi na veitokoni mai vei ira na tani me vukei keda meda kunea na veivueti kei na veivakabulai. Ni tiko e dua e rawa ni da goleva ena gauna ni malumalumu sa vakadinadinataki ni ka bibi. Na cati kei na sogoti iko sa ivakatakilakila ni itovo veivakasaurarataki ka veivakatotogani. E rawarawa na noda lesuva na itovo oqo ke sega na veitokoni kei na nodra rai na tani. Sa ka bibi vei keda meda tokoni ena gauna totolo duadua mai na noda sa vagalalataki.

Na noda veisemati kei ira na tani e sega walega ni vakarautaka na veivakayaloqaqataki eda na gadreva ia ena vukei keda talega meda nanuma tiko ni da sa kilikili kaya meda loloma vaka e dua na luve ni Kalou. Ni da dodoliga yani vei ira na tani me baleta na veitokoni, eda sa kalougata kei ira era tokoni keda era sa vakalougatataki talega. Ni da vakayagataka na 12 na ikalawa ka vakasaqara na veitokoni mai vei ira tale eso, ena yaga vei keda na ivurevure eso oqo ni veitokoni:

• Tamada Vakalomalagi, Jisu Karisito, kei na Yalo Tabu. Na Tamada Vakalomalagi, o Jisu Karisito, kei na Yalo Tabu sa noda ivurevure cecere duadua ni veitokoni. Na veisau e rawa mai vei Jisu Karisito kei na Nona Veisorovaki. Ena iVola i Momani, e vakamacalataka na parofita o Alama ni Karisito, “sa ciqoma ko koya na nodra malumalumu, me vakasinaiti na lomana ena loloma cecere, me vaka na veika vakayago, me rawa kina ni vakila me vaka na veika vakayago, na sala me vukei ira ira kina na nona tamata me vaka na nodra veimalumalumu” (Alama 7:12). Eda na vukei ka susugi cake ni da lako vua na Tamada Vakalomalagi kei na Luvena o Jisu Karisito ena yalomalumalumu.

  Sa ka bibi sara meda kakua ni raibaleta na veivuke ni iVakabula mai na Veisorovaki. E vakavulici keda o Koya, “Koi au na sala, kei na vu ni dina, kei na vu ni bula” (Joni 14:6). Na Yalo Tabu e rawa ni solia vei keda na vakacegu, sautu, kei na kaukauwa vakayalo meda toso tikoga ki liu.

• Lewe ni matavuvale. E rawa ni ra ivurevure ni veitokoni na lewe ni matavuvale ena nodra loloma ka veiciqomi. Era na rawa ni vakalevutaka cake na nodra rawa ni veitokoni ena nodra vakayagataka na ivakavuvuli ni kosipeli e vakavulici ena iDusidusi ni Veitokoni: Nodra Vukei na Veiwatini kei na Matavuvale era Vuetaki Tiko. E dina ga ni sega ni na tu vei ira na lewe taucoko ni matavuvale na yalo ni loloma me ra solia na veivakacegui, o ira e rawa era sa ivurevure kaukauwa duadua ni veitokoni.

• iTokani. O ira na itokani e rawa ni ra solia na loloma kei na veitokoni ni da veitalanoataka vata kei ira me baleta na noda dredre, se da vakadewataka vei ira na veika matailalai. Ni tiko vei ira na itokani na yaloqaqa me ra dusia na itovo e gadrevi me da muduka se ni ra vakayaloqaqataki keda me da vakasaqara na veivuke, e rawa ni da toso ki liu ena noda sasaga ni veivueti. Ni da sotava na loloma kei na veitokoni mai vei ira na itokani, e rawa ni vakananuma vei keda na keda yaga kei na ka eda rawa ni rawata.

• iLiuliu vakalotu. O ira na iliuliu vakalotu e rawa ni ra vakarautaka na veitokoni bibi ena iwalewale ni veisau. Sa rawa ni ra vukei keda na iliuliu oqo meda vakila na loloma ni iVakabula ka vakaitavi vakabibi ena noda vukei keda meda veivutuni ka yaco meda savasava vakayalo mai na itovo vakasaurara kei na veivakatotogani.

• Dauveiqaravi. O ira na dauveiqaravi sai ira era sa kunea na veivueti ena nodra cakacakataka yani na 12 na ikalawa. Ena vuku ni veika era sa sotava, era sa kila kina na sala me vukei keda meda cakacakataka ka bulataka na ikalawa eso. E rawa ni ra dau raica na lasu ka kila na veika dredre tale eso ena gauna sara mada ga eda sega tu ni kilai ira kina.

• Soqoni ni veivueti. Na soqoni ni veivueti sa dua na vanua taqomaki eda rawa ni kunea kina na veiciqomi, loloma, kei na veitokoni. Ena veisoqoni oqo eda wasea kina na veika eda sotava vakakina na noda vakabauta kei na inuinui ni veivueti mai vua na iVakabula o Jisu Karisito ka bulataka na 12 na ikalawa ena noda bula. Ni da wasea na veika eda sotava e rawa ni vukei keda me da cakacakataka yani na veisau e gadrevi ka kunea na inuinui e rawa ni yaco kina na veivagalalataki kei na veivakabulai.

• Bulabula ni vakasama kei ira na kenadau vakavuniwai. O ira na kenadau e rawa ni ra vakarautaka na veivakararamataki kei na kila matalia e ganita me vakalesui ka vakabulai mai na itovo vakasaurara ka veivakatotogani. Kevaka eda se sasaga dredre tiko ga ena itovo vakasaurara ka veivakatotogani ni da sa vakaitavi sara tiko mada ga ena Parokaramu ni Veivagalalataki mai na Veivakatotogani, sa dodonu me da vakasamataka me da vaqara na veivuke saumi mai na dua na ituvaki ni vakasama se kenadau vakavuniwai. Ni vakasaqarai na veivuke ni kenadau, sa dodonu vei ira na lewe ni Lotu me ra digitaka e dua e tokona tiko na ivakavuvuli ni kosipeli.

Digitaka na Tamata mera Tokoni Iko

Ena Parokaramu ni Veivagalalataki mai na Veivakatotogani ni Lotu, o sega ni lesi mo tokona se dua na ivakarau ni veitokoni. Na vakatulewataki ni gauna kei cei me kerea na veivuke e sa dua na vakatulewa ni tamata yadua. Vakasamataki ira era tu wavoliti iko ena masumasu o ira o dau logavinaka ni kere veivuke kina, se o cei ena veivuke vakalevu duadua vei iko. Vakararaba, na levu ni tamata e tiko vei iko me veitokoni, na vinaka cake ni nomu rawata mo vuetaki mai. Ni o sa kilai ira o na vinakata ena nomu ivakarau ni veitokoni, e rawa ni veivakamalumalumutaki ka veivakarerei mo kerea na nodra veivuke. Ia, ni o kitaka vakakina, o na kurabui beka ena levu ni loloma kei na veiciqomi o vakila. Na levu ga ni nomu sema vei ira na tani, na levu ni madigi o na ciqoma kina na loloma.

Raica mo digitaka na tamata nuitaki dina me tokoni iko. Eso vei ira na tamata mana sara me ra tokoni iko sai ira era sema tiko vei iko (me vakataka na itubutubu, watimu, matavuvale, iliuliu ni Lotu), era vinakata mo qaqa, era bulabula ka taucoko ena Lotu, ka kila se gadreva me ra kila vakavinaka na ituvaki donu ni bolebole o ni sotava tiko. E dua e sa vorata rawa na nona bolebole vakaikoya e vakavuqa ni dau levu cake na nona kila na bolebole era sotava na tani. O ira era sotava tiko na bolebole vata oqori e vakavuqa ni dau levu cake na nodra rawa ni kila na veika o sotava ena nomu sasaga.

Ni o tekivuna na iwalewale ni veisau, o na rawa ni vakararawataki vakayago, e lomamu, ka rawai rawarawa vakayalo. Qarauna mo kakua ni tara cake e dua na veimaliwai sega ni veiraurau kei na dua e tokoni iko.