iKalawa 5: Eda tusanaka vei keda ga, vua na Tamada Vakalomalagi ena yaca i Jisu Karisito, kivei ira era taura tu na lewa dodonu ni matabete, ki vua tale e dua na ituvaki dina ni noda cala.

iVakavuvuli Bibi: Vakatutusa

Ena noda vakatotogani, e vuqa vei keda eda vakila ni da tu duadua se galili. Ena veigauna mada ga era vakila kina eso tale ni ra semati, eda vakila ni vaka me da sega ni veimaliwai vinaka. E vuqa vei keimami a vakila ni keimami sa rarawa ka nanuma ni na sega ni dua e ciqomi keimami se lomani keimami, vakabibi kevaka era kila na neimami vakatotogani. Ni da lako mai ki na soqoni ni veivueti, keimami sa tekivu me lako tani mai na neimami tawasei keimami tu vakayalo, mai na vanua sara ga ka dau susugi kina na veivakatotogani. Taumada, e vuqa vei keimami a dabe tu ga ka vakarorogo, ia e muri keimami sa qai vakila na yalo doudou me wasea na veika keimami sotava voli. Ia, keimami a maroroya tikoga vei keimami e vuqa sara na ka—na veika lolovira, na ka e veivakamaduataki, na veika vakamosiyalo, kei na veika e vakavuna me keimami rawai vakarawarawa.

Na cakacakataki ni ika 4 ni ikalawa ena rawa ni kauta lesu mai na madua kei na yalo rere oqo, ka da vakatura kina me cakacakataki na ikalawa 5 ni oti ga na ikalawa 4. Na kena lokuyarataki, ena tautauvata kei na kena kauwaitaki tiko edua na mavoa ia qai sega ni vakasavasavataki. Na vakadinadinataki ni noda caka cala e rairai veirawai dina, ia ni kerei o Jisu Karisito me veivuke, e solia mai vei keda o Koya na qaqa kei na kaukauwa.

Na noda wasea na noda volaitovo vei ira na noda dauveiqaravi ka qai vakatusa vei ira na noda bisopi e vaka me ka dredre duadua eda se qai bau cakava. Ia o ira era a liu vei keda era vukei keda me da kila na bibi ni ikalawa oqo. Ni da vola na noda itovo e vukei keda me da kila vakavinaka sara na noda cala, malumalumu, kei na ivalavala ca. Ia a sega ni rauta na noda kilai ira. Na veivakatotogani ena bula ni vunitaki tiko. Nida cakacakataka na ika 5 ni ikalawa, eda voroka na ka vuni oya. E vakavulica o Sisita Carole M. Stephens, “Na inuinui kei na veivakabulai e sega ni kunei ena qara butobuto ni ka vunitaki ia ena rarama kei na loloma ni noda iVakabula, o Jisu Karisito” (“Na iVakabula Levu,” Liaona, Nove. 2016, 11). Na yalodina taucoko ena vakarautaki keda ki na ikalawa e tarava ka vakatara vei Jisu Karisito me vakabulai keda vakataucoko cake.

E vakavulica o Peresitedi Spencer W. Kimball: “Ena sega ni yaco rawa na veivutuni me yacova ni sa biuta na yalona e dua ka vakatusa na nona ivalavala ka sega na nona iulubale se vakasama vakatani. Ira na tamata era digitaka me tu ka qarava na leqa ka veisautaka na nodra bula, era na kunea ni veivutuni e gaunisala dredre toka me vakayacori taumada, ia era na qai kunea ni oqo na sala uasivi vakaoti nira tovolea na vuana” (“The Gospel of Repentance,” Ensign,Okot. 1982, 4).

Keirau nuitaka na Kalou ka qai yaloqaqa, keirau mani nanuma me keirau cakacaka ena ika 5 ni ikalawa. Keirau a sega ni vakadeitaka ni rawa me keirau vorata rawa na yalo ni madua kei na rerevaka na sega ni ciqomi. Eso vei keimami sa tekivu wasea se vakatusa ia keimami rere ka tovolea tale. Keirau masu ka kerea vua na Kalou me vukei keirau me tu vei keirau na kaukauwa keirau gadreva. E dua na ka kaukauwa na neirau wasea ka vakatusa na neirau cala. Ni keirau cakava vakakina, keirau vakila na loloma i Jisu Karisito me baleti keirau, ka solia vei keirau na inuinui ni na vinaka.

Dina ga ni a vukei keirau na neitou dauveiqaravi ena volai ni neitou itovo, ia e gadrevi me keitou wasea vata kei ira se dua tale na tamata nuitaki na neitou volaitovo. Era raica na veika mai na duatani na rai ka vukei keirau me keirau raica na ivakarau keirau sega ni rawata. Era vukei keirau me keirau kila vakavinaka cake na noda dau vakasamataka na veika ca kei na yalo (me vaka na nanumi koya ga, rere, dokadoka, lomani koya, vuvu, buladodonu vakai keirau, cudru, yaloca, gagadre ca, kei na so tale). Na vakasama kei na yalo oqo e vakaraitaka na ituvaki ni neitou cala ka sa vua ni neitou cala. Ia era raica rawa na veika vinaka e tu vei keda na noda dauveitokoni qai vukei keda meda raica na veika vinaka e tu vei keda.

Keitou a vakatusa vei ira na neitou bisopi se peresitedi ni tabana e dua na ka e vakatabui se ka na tarovi keitou mai na kena tiko e dua na ivolatara ni valetabu. Kevaka e tiko na neitou vakatitiqataka na veika me keitou vakatusa, keitou a tarogi ira na neitou iliuliu ni matabete. Na noda vakatutusa e okati kina na noda vakasaqara na veivosoti mai vei Jisu Karisito ena masu kei na lewa dodonu ni matabete. Vei keda e vuqa, na ka oqo e veivakabulabulataki. Keitou sa biuta laivi na neitou icolacola bibi ka biuta ena yavana na iVakabula. Keirau vakila na vakacegu, reki, kei na loloma. Na veika oqo e ka tabu ka kamica.

iKalawa e Cakacakataki

Oqo na parokaramu ni cakacaka Na noda toso ena vakatau ena noda dau vakayagataka wasoma na veikalawa ena noda bula e veisiga. Sa kilai tu oqo me “ikalawa me cakacakataki.” Na cakacaka oqo ena vukei keda meda lako mai vei Karisito ka ciqoma na veidusimaki kei na kaukauwa e gadrevi me da taura kina na ikalawa e tarava ena noda vakabulai.

Wasea na noda volaitovo mai na ika 4 ni ikalawa vata kei ira na noda dauveiqaravi ka vakatusa na noda ivalavala ca vua na Kalou kei ira na vakaitutu dodonu ni matabete kevaka e gadrevi vakakina

A vakasalataki luvena tagane o Korianitoni, o Alama me ”vakadinadinataka [na nona] butucala kei na [nona] cala [a] cakava” (Alama 39:13). Na ivakasala oqo e rawa ni idusidusi ka veivakauqeti ki na cakacakataki na ika 5 ni ikalawa. Na ikalawa oqo e oka kina na noda wasea na noda digidigi mai na ika 4 ni ikalawa kei na dua tale na tamata, e kena ivakarau me dua na dauveiqaravi, ka sa sotava tiko na kena cakacakataki ka rawa ni vukei keda meda wasea ena yalodina kei na sala taucoko. Kevaka e sega ni tiko e dua na dauveiqaravi, digitaka ena masumasu e dua tale na tamata nuitaki, e vinaka cake e dua e vakayavutaki vinaka tu ena veivueti. Kakua ni digitaka e dua o kilakasamitaka ni na veidusimaki cala, vakamacalataka na itukutuku cala, se dredre me maroroya na itukutuku taqomaki. Keitou vakatura talega na qaqarauni ena kena wasei na neitou ivolaitovo vei ira na lewe ni matavuvale voleka. Sa ka bibi meda veitalanoa kei ira na noda bisopi se dauveiqaravi vakavuniwai me ra vakatulewataka na gauna meda vakatakila kina na noda itovo vei watida me kakua kina ni ra mavoa tale.

E vakavulica o Jisu Karisito ni vakatutusa sa tiki bibi ni cakacaka ni veivutuni: ”Ena ka oqo dou na kila kina na tamata sa veivutunitaka vakaidina na nona ivalavala ca—raica ena tusanaka” (Vunau kei na Veiyalayalati 58:43). O koya gona, eda vakatusa na noda ivalavala ca vua na Tamada Vakalomalagi ena yaca i Jisu Karisito ka vakasaqara na Nona veivosoti. Me kena ikuri, e dodonu meda vakatusa na noda ivalavala ca bibi cake vua e dua na bisopi se peresitedi ni tabana. Ke o sega ni kila na ka mo vakatusa, vakarorogo ki na nomu lewaeloma ka mo nanuma tiko na ivalavala ca ni veiyacovi se so tale na itovo dukadukali. Ni da vakatitiqa, nanuma na veisureti mo ”dou mada mai, me tou veivosaki vata” (Aisea 1:18) ka veivosakitaka na nomu taro kei nomu iliuliu ni matabete.

“E dina ga ni rawa vua na Turaga me vosota na ivalavala ca, o ira na iliuliu ni matabete oqo era sa vakaitavi bibi sara ena iwalewale ni veivutuni. Era na dau taqomaka na nomu vakatutusa ka vukei iko ena gauna taucoko ni cakacakataki ni veivutuni. Mo tukutuku sara vakadodonu vei ira. Kevaka o vakatutusa vakatikina ga, ena nomu talaucaka ga na vei cala lalai, ko na sega ni walia rawa na vei cala bibi ka ra se bera ni tusanaki mai. Na totolo ga ni nomu cakacakataka oqo, na totolo cake ni nomu kunea na vakacegu kei na reki e yaco vata mai na cakamana ni veivosoti“ (True to the Faith: A Gospel Reference [2004], 134).

Me da solia na vakacegu ki na noda bula

Na veivutuni kei na vakatutusa ena kauta mai na vakacegu ki na noda bula. E vakamacalataka o Elder Quentin L. Cook na vakacegu oqo ena nona kaya: “Ni sa yaco e dua na talaidredre levu, sa gadrevi na vakatutusa me kauta mai na vakacegu. Ena sega beka ni dua na ka e tauvata kaya na vakacegu ena yaco mai ni dua sa luvata vua na Turaga na nona ivalavala ca ka ciqoma mai na veivakalougatataki ni Veisorovaki.” (“Personal Peace: The Reward of Righteousness,” Liaona, Me 2013, 32).

Ena so na gauna era dau vakatovotovotaka tiko ga na nodra ivalavala ca kei na malumalumu o ira era tiko ena soqoni ni veivueti se ena so tale na ituvaki. Dina nira dau vakatusa na nodra cala, ia era sega ni kunea na vakacegu. Kakua ni kilasevata nai ka 5 ni kalawa vata kei na dua na gagadre vakasivia me tikoga na vakanananu ena yasana ca ni veika kece. E veibasai sara ga oqori kei na inaki ni i ka 5 ni kalawa. Eda cakacakataka na ika 5 ni ikalawa me da kakua ni taura matua na veika eda vakatusa ia me da laiva me ra lako.

Ena gauna keimami sa vakacavara kina ena yalodina ka vakavinaka nai ka 5 ni kalawa, sa sega tale na ka me qai vunitaki. Keimami a vakaraitaka e taudaku na neimami gagadre me “veivutunitaka na [neimami] ivalavala ca kecega” (Alama 22: 18.) me rawa ni ciqoma e dua na kila-ka cecere me baleta na loloma ni Kalou kei na loloma kei na veitokoni ni vuqa na tamata vinaka era wavoliti keda tu.

Vuli kei na Kilamatata

Na ivolanikalou kei na itukutuku oqo mai vei ira na iliuliu ni Lotu ena rawa ni vukei keda ena noda vueti mai na vakatotogani. Eda rawa ni vakayagataka meda na vakasama kina vakatitobu, vuli, kei na volaitovo. Meda nanuma tiko meda dau dina ka vakabibi ena noda volavola meda rawata kina na ka e yaga vakalevu duadua.

Vakatutusa vua na Kalou

“Koi Au, na Turaga, au sa vosota na nodra ivalavala ca ko ira era sa vakatusa vei au na nodra ivalavala ca ka kerea me ra vosoti” (Vunau kei na Veiyalayalati 64:7).

• E rawa vakacava me vukei au na noqu vakatusa na noqu ivalavala ca vua na Kalou meu vakayacora na veisau dina ena noqu bula? E solia vakacava vei au na yaloqaqa kei na kaukauwa meu vakatusa vua e dua tale na tamata?

Vakanamata ki na ivakarau ni nona raici keda na Kalou

“Me kakua ni dua e vakaraitaka na nona yalododonu; ia me vakatusa ga na nona ivalavala ca, ka na qai vosoti, ka na vua vakalevu cake” (Joseph Smith, in History, 1838–1856 [Manuscript History of the Church], ivola C-1 Addenda, 46, josephsmithpapers.org).

• E dua na veivakaogai levu vei ira na tacori ena veivakatotogani oya na nodra gagadre kaukauwa mera rairai dodonu tu vei ira na tani. Ena tarovi iko vakacava na gagadre oqo mo vakatorocaketaki ka kauta mai e “levu sara na vuana” se cakacaka vinaka?

• Ena veisau vakacava na noqu itovo keu kauwaitaka vakalevu na sala e raici au kina na Kalou?

Mo dina

“Ia ko koya yadua sa talaidredre vei au, mo lewai koya ena cala sa kitaka; ia kevaka sa vakatusa na nona ivalavala ca vei iko vata kei au, ka veivutunitaka vakaidina sara e lomana, mo qai vosoti koya, ka’u na vosoti koya talega” (Mosaia 26:29

Ena gauna o tusanaka kina na nomui ivalavala ca, sa dodonu mo yalodina.

• Mo vakananuma mada na sala e rawa ni vakalailaitaka kina na noqu yalodina ena noqu sasaga, na noqu vunitaka eso na ka e dodonu meu vakatusa. Na tiki cava ni noqu ivolaitovo, ke tiko, au sa temaki beka meu vunitaka?

• Na cava ena kena yaga vei au meu vunitaka na tiki ni noqu itovo oqo? Na cava soti beka au na vakayalia?

• Ena vakalougatataka vakacava na noqu bula o Jisu Karisito kevaka au vakatusa taumada na veika dredre duadua ka solia Vua?

Vakatusa na noda ivalavala ca ena kena gauna totolo o kilai ira kina

“O koya era a kila kina ni ra sa cala ka ra vakatusa sara na nodra cala ena yabaki tiko ga ko ya” (3 Nifai 1:25

• Na tikina oqo e dua na ivakaraitaki ni tamata era sega ni lokuyarataka na vakatusa na nodra cala ena gauna ga era kila kina. Na cava na yaga ni noqu vakatusa na noqu ivalavala ca niu sa kila oti?

• Na cava beka ena rawa ni vakaleqai au keu lokuyarataka na noqu vakatusa na noqu ivalavala ca?

Vakaceguya na lomaocaoca ka kune vakacegu

“Au na sega ni taleva tiko na nomu cala me cukiraki kina na yalomu, kevaka mo na sega ni vinaka cake kina” (Alama 39:7

Eso era na rairai kaya ni ikalawa 4 kei na 5 era vakanamata vakalevu ki na veika ca ra qai vakabibitaka ga na lomaocaoca ni veivueti. Eda vulica ena tikina oqo ni noda kila na noda malumalumu kei na noda sotava na noda cala ena vukei keda meda bula vinaka.

• Na veisala cava soti ena vakamamadataka kina na lomaocaoca ka kauta mai kina vakalevu cake na vakacegu nai ka 4 kei nai ka 5 ni kalawa?

Biuta laivi na ivalavala ca

“Raica oqo ga na sala dou na kila kina na tamata sa veivutuni vakaidina—ena tusanaka na nona ivalavala ca, ka biuta laivi sara vakadua” (Vunau kei na Veiyalayalati 58:43

• Mo biuta tani e dua na ka e kena ibalebale mo vakanadakuya se solia tani vakadua. E vakaraitaka vakacava na noqu gagadre meu biuta laivi na noqu ivalavala makawa na vakatusa na noqu ivalavala ca?