iKalawa 2: Yaco meda vakabauta ni kaukauwa ni Kalou ena rawa me vakavoutaki keda ki na taucoko ni tiko bulabula vakayalo.

iVakavuvuli Bibi: iNuinui

Nida sa vakila na noda malumalumu mai na noda vakatotogani, e vuqa vei keda sa yali sara ga na nodra vakanuinui. Eda a saga meda sa soro ena vuqa na gauna. Eso vei keda eda a masu vakavica vata vua na Kalou. Eda a kere veivosoti ena vuku ni noda itovo ka yalataka nida na veisau. Ia ni oti na noda druka vakavica, eda sa tekivu nanuma ni sa rarawataki keda na Kalou ka sega ni via vukei keda. Kivei keda eda a tubu cake ka sega ni kila na Kalou, eda sa vakadeitaka ni sa oti kece sara na noda ivurevure yadua ni veivuke. Se cava ga, na ikalawa 2 e vakaraitaka vei keda e dua na isaunitaro nida sa biuta laivi se sega vakadua ni vakasamataka—me da kunea na inuinui vei Jisu Karisito kei na kaukauwa ni Nona Veisorovaki.

Ni da sa yalomalumalumu, eda sa qai kerea meda vukei. Ni oti na rarama lailai duadua ni inuinui, eda sa tekivu tiko ena soqoni ni veivakabulai ka cakacaka vata kei ira na dauveitokoni. Ni keimami a tiko ena soqoni taumada, keimami a vuabale ena vakatitiqa kei na rere. Keimami a rere ka vakatitiqa, ia keimami a lako ga mai.

Keimami a qai rogoci ira na tagane kei na yalewa nira vakamacalataka vakadodonu na veika a yaco e nodra bula, na cava a yaco me veisautaki ira, ka vakacava tu na bula mai na veivakatotogani. Keimami kunea ni vuqa vei ira na tamata keimami sotavi ira ena veisoqoni, era a vakila talega na bula ka sega kina na inunui me vakataki keimami. Ia ni keirau tomana tikoga na neirau tiko, keirau raica e vuqa vei ira na veidredrevaki dina, veivosaki, matadredre, kei na yalodei me baleta na veisiga ni mataka. Keitou raica e vuqa era sa sotava e dua na veisau kaukauwa ena nodra bula, e dua na veisau keitou gadreva talega.

Vakamalua sara, sa tekivu me cakacaka vei keimami na ivakavuvuli era wasea ka cakava. Ni keimami lesu tikoga yani, keimami sa tekivu vakila edua na ka keimami a se bera ni bau vakila ena vica vata na yabaki—keimami a vakila na inuinui. Kevaka e a tiko na inuinui vei ira na tani ka a lako tani mai na bati ni veivakarusai, e rairai a tiko talega na vakanuinui vei keimami! Keimami a vakavinavinaka vakalevu me rogoca ni kevaka keimami gole vei Jisu Karisito, sa na “sega ni tiko nai tovo ca, sega na veivakatotogani, sega na vakabebe, sega na ivalavala ca, sega ni vakuwai e dua na caka cala mai na veivosoti e taucoko” (Boyd K. Packer, “The Brilliant Morning of Forgiveness,“ Ensign, Nove. 1995, 19).

Ena draki ni bula oqo ni vakabauta kei na ivakadinadina, keimami a kunea na inuinui ka a tekivu me vakayadrati keimami ki na loloma veivueti kei na kaukauwa ni Kalou. Sa tekivu me keimami vakabauta ni o Koya e rawa ni sereki keimami mai na ivesu ni veivakatotogani. Keimami a vakamuria na nodra ivakaraitaki na neimami itokani ka ra sa vuetaki tiko . Keimami sa tekivu cakacakataka na veikalawa, ka tokoni mai vei ira na tani—oka kina o ira na noda dauveiqaravi—kei na tiko ena soqoni ni veivueti. Ni keitou masu, vakasamataka vakatitobu, ka vakayagataka na ivolanikalou, ni toso na gauna keitou sa tekivu vakavouya na neitou itaviqaravi ena Lotu. Sa tekivu me yaco na neitou cakamana, ka keitou kunei keitou ni keitou sa vakalougatataki ena loloma soli wale i Jisu Karisito me vukei keitou me keitou sereki tiko ena dua na siga ena dua na gauna.

Ni keimami a taura nai ka 2 ni kalawa, keimami a lomasoli me vakaisosomitaka na nuitaki keimami ga vata kei na neimami veivakatotogani ena vakabauta na loloma kei na kaukauwa i Jisu Karisito. Keitou a cakacakataka na ikalawa oqo ena neitou vakasama kei na yaloda ena nodra veitokoni na tani, ka keitou vulica ni yavu ni veivakabulai mai na veivakatotogani e dodonu me vakayalo. Ni da toso ki liu ka cakacakataka na veikalawa yadua e vakaturi tiko ena idusidusi oqo, a vakadeitaki vakawasoma vei keda na ituvaki vakayalo ni bula.

Na parokaramu oqo e vakayalo, ka sa dua na parokaramu ni cakacaka. Vei keda kei ira e vuqa tale, na cakacaka ni veivakabulai e yaga vakalevu sara ena sasaga kece sara. Ni da vakayagataka na ivakavuvuli oqo ka vakatara me cakacaka ena noda bula, eda sa vakalesui mai ki na vakasama vinaka ka taucoko na bulabula vakayalo. Eda na kunea e dua na isema dina kei keda, kei ira na tani, kei na iVakabula o Jisu Karisito.

Vei ira eso, e vaka me yaco vakatotolo mai na cakamana ni veivakabulai; vei ira tale eso, sa tubu cake sara na kena vakabulai. Se cava ga, na ka bibi oya ni da tomana tikoga na noda vakatovotovotaka na vakabauta ka nuitaka ni na cakava vei keda na Kalou na veika eda sega ni rawa ni cakava vakai keda. Ni toso na gauna eda sa qai rawa ni kaya ni mai na “tudei vei Karisito,” eda sa vakabulai mai na veivakatotogani ka marautaka e dua na ”inuinui sa uasivi sara” (2 Nifai 31:20).

Erau sa tiko vata kei keda na Tamada Vakalomalagi dauloloma kei na Luvena, o Jisu Karisito, ena ikalawa kecega ni sala. Era na veivuke ena kena susugi ka vakalevutaki na noda inuinui vei Karisito. A vakavulica o Peresitedi M. Russell Ballard:

”Koi kemuni ko ni sa mai rawai ena vakatotogani cava ga, sa tiko na inuinui baleta na Kalou e lomana na Luvena kecega, ka baleta na Veisorovaki ni Turaga o Jisu Karisito sa rawa kina na veika kecega.

”Au sa raica na veivakalougatataki lagilagi ni veivueti ka na rawa me sereki kina e dua mai na sinucodo ni vakatotogani. Sa noda iVakatawa na Turaga ka na sega na ka me yali vei keda ni da sa nuitaka tiko na kaukauwa ni [Nona] Veisorovaki. Au kila ni Turaga ena rawa ka na sereki ira na bobula mai na nodra bobula, me vaka a tukuna na iApositolo o Paula, ‘Au sa rawata na ka kecega ena vukui Karisito sa vakaukauwataki au‘ (Filipai 4:13)” (“Isa na iTuvatuva Qaseqase ni Vunica,” Liaona, Nove. 2010, 110).

Ke da sa qai lesu tale, eda na kunea ni yaga vakalevu na noda vuki vua na Kalou da qai veivosaki kei ira na noda dauveitokoni. Eda na rairai temaki meda biuta na inuinui kece. Ia na noda sa lesu tale e sega ni vakarusa na toso eda sa cakava, ka sega ni gadrevi me vakarusa na noda inuinui. Na noda lesu o ya sa ivakananumi kaukauwa ni noda gadreva meda tomana tiko ga na noda lako ki na soqoni ni veivueti, kunea na nodra veitokoni na dauveitokoni kei ira tale eso, soli keda vua na Kalou, ka cakacakataka na veikalawa oqo. Ni da toso tikoga ki liu, eda sa tekivu vakila na kaukauwa i Jisu Karisito ena noda bula. Eda sa rawa sara ni lako tani mai kina, ka tubu tale ga na noda inuinui.

E vakavulica o Elder David A. Beddnar: ”Eda na rairai nanuma cala ni yalololoma kei nai solisoli vakaoqori sa vakarautaki vei ira tale eso kara rairai yalododonu cake se ra veiqaravi tiko ena veikacivi e laurai vakalevu ena Lotu. Au vakadinadinataka ni sa vakarautaki tu kivei keda kece sara na yalo loloma ni Turaga ka sa nanamaki tu na Dauveivueti nei Isireli me tauca vei keda na veisolisoli oqori “ (”Na Loloma Qaqa ni Turaga,” Liaona, Me 2005, 101). Ena solia vei keda o Jisu Karisito e vuqa na loloma cecere ena noda ilakolako ki na veivueti, e dua vei ira na ka bibi duadua na inuinui ni rawa ni vakalesui keda mai na kaukauwa ni Kalou me da bulabula vinaka kina vakayalo.

iKalawa me Cakacakataki

Oqo na parokaramu me cakacakataki Na noda toso ena vakatau ena noda dau vakayagataka wasoma na veikalawa ena noda bula e veisiga. Sa kilai tu oqo me “cakacakataki na ikalawa“ Na cakacaka oqo ena vukei keda meda lako mai vei Karisito ka ciqoma na veidusimaki kei na kaukauwa e gadrevi me da taura kina na ikalawa e tarava ena noda vueti.

Vakatorocaketaka na kilai dodonu ni ivakarau ni Kalou

Na noda madua e dau yaco me vakataotaka vakawasoma na sala meda kila na ivakarau ni Kalou kei na loloma me baleti keda. Ni da mataboko ena noda mosi kei na veivakatotogani, eda dau raici Koya vakavuqa me dua e dau veisausaumi, rarawa, se cudruvi keda. Na inaki ni ikalawa ni cakacaka oqo oya me da biuta vakatikitiki na vakasama cala me baleta na Kalou ka tara cake e dua na ivakatagedegede ni Nona loloma, loloma veivueti, kei na gagadre me vakalougatataki keda.

iMatai, e bibi me da kila vinaka ni sa tiko e kea na Kalou kevaka mada ga eda sega ni vakila na Nona iserau. Noda yaco me kila ni Kalou e cakacakataki vakaukauwa ka gadrevi kina na vosota. E rawa ni dredre ni da sa matau ena vakacegui vakatotolo, ia ni toso na gauna eda sa rawa ni tekivu raica ka sotava na Nona ivakarau vakalou. Eda na kila vakavinaka cake na Kalou.

Sa rawa meda kerea vua na Tamada Vakalomalagi me vukei keda meda kila vinaka cake na ivakarau ni Nona bula. Sa rawa ni da vakasaqara na liga ni Kalou ena noda bula kei na levu ni ka e cakava vei keda o Koya. Sa rawa ni da vulica na ivolanikalou me baleta na loloma veivueti kei na loloma soliwale ni iVakabula ka qai veivosakitaka na ivolanikalou oqo vata kei ira na noda dauveiqaravi kei ira tale eso era tokoni keda.

Ni da sa tekivu rawata meda kila vakavinaka cake na loloma kei na loloma veivueti ni Kalou, eda sa tekivu vakila na yalodei kei na inuinui cecere cake ena kaukauwa ni Kalou me sereki keda. A vakadinadinataka o Peresitedi J. Reuben Clark Jr. na loloma veivueti ni Tamada Vakalomalagi ena nona kaya: “Au vakabauta ni vinakata na Tamada Vakalomalagi me vakabulai ira yadua na luvena. Au vakabauta ni nona lewa dodonu kei na loloma veivueti ena solia vei keda na isau levu duadua ni noda ivalavala, solia vei keda na veika kece e rawa ni solia, kei na kena veibasai, au vakabauta ni na vakatikora vei keda o koya na itotogi lailai duadua e rawa ni vakayacora“ (ena Conference Report, Okot. 1953, 84).

Masu ka Vulica na iVolanikalou

E kaya o Peresitedi M. Russell Ballard: “Kevaka e dua sa vakatotogani ka gadreva me vakabulai, sa qai tiko e dua na sala ki na bula galala vakayalo—na sala ni drotani mai na veivakatotogani—na sala sa vakadinadinataki oti. E tekivu ena masu—ena yalodina, gumatua, ka dau veitaratara tikoga kei koya sa Bulia na yaloda kei na yagoda, na Tamada Vakalomalagi” (“Oi na iTuvatuva Qaseqase ni Vunica,” Liaona, Nove. 2010, 110).

Ni da sa biuta laivi na viavialevu ka segata me da cakava na noda vinaka taucoko ena veisiga, eda gadreva me da masuta na veituberi kei na veidusimaki mai vua e dua na Tamada Vakalomalagi dauloloma. Eso vei keda eda se bera vakadua ni masu se vakasamataka vakatitobu na ivolanikalou. Eso vei keimami a temaki me keimami muduka na masu se vuli. Keitou nanuma cala ni sega ni cakacaka na sasaga oqo baleta ni keitou sega ni vakila ni keitou voleka vua na Kalou se baleta ni keitou se dredre tikoga ena veivakatotogani.

Keimami raica ni dua vei ira na idola ni rawaka oya me keimami tomana tiko ga na kena vakayagataki na iyaya ni cakacaka vakayalo oqo. Na masu e cake, masu ena vakavinavinaka rawarawa ena siga taucoko, kei na masulaki ira na tani era sa ivalavala vou kaukauwa vei keda e vuqa. E dua na sala meda vakalevutaka kina na kaukauwa ni masu oya na noda vakaraitaka ena yalodina na noda sasaga vua na Kalou. Ni da wasea vua na Tamada Vakalomalagi na noda sega ni tu vakarau me veisau, sa vaqaqacotaki na noda gagadre. Keimami a sotava vakavuqa, na malumu veivakauqeti lalai mai vua na Yalo Tabu. Keimami sa tekivu taroga na Kalou se ikalawa lalai cava e rawa ni keimami cakava ena veisiga yadua, ka sega ni kerei Koya walega me kauta laivi na noda bolebole kei na veivakatotogani.

Na gagadre mo veitaratara kei na Kalou ena muataki iko mo vulica na nodra vosa na parofita makawa kei na gauna oqo. Na vulici ni ivolanikalou ena masumasu, vakasaqara na isau ni noda taro, kei na katokatoni ni veivakauqeti ni Yalotabu ena rawa ni veivuke ena noda vakabauta ni rawa ka na vukei keda na Kalou.

Na vanua vinaka me tekivu kina na vulica na vosa ni Kalou sai koya ena qaqana ka tiko ena mua ni iwase yadua ena idusidusi oqo. A digitaki na veitiki ni ivolanikalou oqori me salavata na kena vakasamataki tiko na veivueti, ka tarogi na vei taro yadua ena vakanuinui ni na vukei keda meda bulataka na ivolanikalou kei na tikina oqo ena noda bula. Eda raica ni noda taura mada ga e vica na miniti ena veisiga me vakasaqarai na ka e gadreva na Kalou me tukuna vei keda ena solia vei keda na isau cecere. Eda solia noda ivakadinadina ki na dina oqo: “Io, eda sa raica ni ko koya yadua sa lomana, sa rawa me taura matua na vosa ni Kalou, na ka sa bula ka kaukauwa, ka na tawasea rua na ilawaki, na icori kei na vere kecega ni tevoro.” (Ilamani 3:29).

Vuli kei na Kilamatata

Na ivolanikalou kei na itukutuku oqo mai vei ira na iliuliu ni Lotu ena rawa ni vukei keda ena noda vueti mai na veivakatotogani. Eda rawa ni vakayagataka meda vakasama vakatitobu, vuli, kei na vola itukutuku. Meda nanuma tiko meda dau dina ka vakabibi ena noda volavola meda rawata kina na ka e yaga vakalevu duadua.

Vakabauta na Kalou

“Mo ni vakabauta na Kalou; mo ni vakabauta ni sa tiko o koya, ka a bulia na ka kecega, mai lomalagi kei vuravura; mo ni vakabauta ni sa nona kece na yalomatua, kei na kaukauwa kece, mai lomalagi kei vuravura; mo ni vakabauta ni na sega ni kila taucoko na tamata na veika kece sa kila na Turaga” (Mosaia 4:9

• E lewevuqa na dauivakadinadina mai lomalagi vakakina e vuravura era vakadinadinataka ni bula tiko na Kalou. Na ivakadinadina cava soti me baleta na Kalou kei na Nona loloma au sa bau sotava?

Vakalevutaka na vakabauti Jisu Karisito.

E vakavulica o Peresitedi Russell M. Nelson: ”Tekivu nikua mo vakalevutaka na nomu vakabauta. Mai na nomu vakabauta, ena vakalevutaka kina o Jisu Karisito na nomu rawa ni tosoya na veiulunivanua ena nomu bula” (“Sa Tucaketale o Karisito: Na Vakabauti Koya ena Tosoya na Ulunivanua,” Liaona, Me 2021, 101).

E vuqa vei keda a tovolea me lako tani mai na noda vakatotogani ena kaukauwa saraga ni lewa e loma se na nodra vakabauti na itokani se dua e kenadau ena veivakasalataki. Ena dua ga na gauna oqo, eda kunea ni neimami vakabauti keimami vakai keimami, se o ira na tani a sega ni rawata me keimami ra-wa vakataucoko kina na neimami vakatotogani. Na vakabauti Jisu Karisito kei na Nona rawa ni vakabulai keda sa yavu ni noda vakabulai.

• Na cava au vakila nikua me baleta na vuki vua na iVakabula ena noqu sasaga ni veivueti?

• Na cava e sa vukei au meu vakabauti Jisu Karisito?

• Na cava era vakatura na noqu dauveiqaravi, iliuliu ni Lotu, kei ira tale eso meu cakava me vukea na vakalevutaki ni noqu vakabauta?

Na kaukauwa kei na qaqaco ni inuinui

Ni da sa nuitaka tu na yaloda kei na noda vakasama, eda na vakanamata vakavinaka ki na noda ivalavala ena veisiga ni mataka. Na inuinui e kauta mai na kaukauwa tudei kei na yalodei ka sega ni yalodei vakawawa. Na inuinui e rawa talega ni ivurevure ni vakacegu, sautu, kei na tudei ni vakasama ni da toso tiko ena noda vakabulai mai na veivakatotogani.

Me baleta na ivakavuvuli oqo, a kaya kina o Peresitedi Russell M. Nelson, “Na inuinui e kaukauwa cake mai na gagadre wale. Na inuinui, ka vaqaqacotaki ena vakabauta kei na loloma cecere, e bulia e dua na igu e kaukauwa me vaka na sitila. Na inuinui sa yaco me iyaqa ki na yalo. … Kevaka eda na ququmi tiko ki na iyaqa ni inuinui, sa na yaco me noda itataqomaki me tawamudu” (“A More Excellent Hope” [Brigham Young University devotional, Janu. 8, 1995], 3, speeches.byu.edu).

• Na gauna cava au sa vakila kina na kaukauwa kei na yalodei ena vuku ni inuinui vei Karisito?

• Na ivalavala kei na ivalavala vakayalo cava e veisiga au a cakava tiko ena gauna o ya?

• E tara vakacava na noqu vakasama, yaloqu, kei na lomaqu na noqu vakanuinui? E tara vakacava na noqu takete kei na noqu ituvatuva ena veisiga ni mataka?

• E tara vakacava na noqu veiwekani kei na noqu veimaliwai kei ira era lomani au ka kauwaitaki au?

Lisi ni vakavinavinaka

E dua na sala meda raica kina na Kalou ena noda bula oya meda dau vakasamataka vakatitobu ka volaitukutukutaka wasoma na noda veivakalougatataki. E rawa ni da kila vakavinaka cake na loloma nei Tamada Vakalomalagi me baleti keda ena noda vakasaqara na ivakadinadina ni Nona loloma kei na kaukauwa ena noda bula.

• Na veika cava au vakavinavinakataka?

• Na veika vinaka cava sa yaco ena noqu bula?

• Au sa raica vakacava na liga ni Kalou ena noqu bula?

Taura matua na inuinui ena loma ni gauna ni lesu ki na ca.

E vakavulica o Elder Dale G. Renlund: “‘Na tamata yalododonu e tamata ivalavala ca sa dau tovolea tikoga.’ Na Kalou e kauwaitaka vakalevu sara se o cei o keda kei cei eda sa vakataka tiko mai na kena e baleta o cei eda a vakataka tu. E kauwaitaka o Koya meda tovolea tikoga” (“Yalododonu Edaidai e Tovolea Tikoga,” Liaona, Me 2015, 56). Eda dau vakila kece na yalo ni nuinui mate wale ena veigauna eso ni da segata me da vueti. E dina oqo kevaka se da sa lesu tale ki na ca. Ia na noda inuinui kei na noda vueti bula e yavutaki vakalevu cake ena toso ka sega ena noda vinaka sara. Na kena sa yaco tale na ca e sega ni bokoca laivi na noda sasaga taumada se na sasaga ni noda vuki vei Jisu Karisito. Eda rawa ni vulica meda nuitaki Karisito tiko ga ni da lesu tale ena ca.

• Na sala cava soti au tovolea tiko meu veisau, vinaka cake, ka toso?

• Na cava eso na qaqa se rawa-ka au sa bau rawata ena noqu bula ena dua na gauna lekaleka sa oti?

• Na cava era tukuna na noqu dauveiqaravi, iliuliu ni Lotu, lewe ni matavuvale, kei ira na itokani me baleta na noqu sasaga kei na toso?

Sa rawa Vua me sereki keda mai na veivakabobulataki

”Ia kevaka ko ni na vuki vua na Turaga ena lomamuni taucoko, ka vakararavi Vua, ka qaravi Koya ena nomuni vakasama taucoko, kevaka ko ni sa kitaka oqo, ena sereki kemuni ko Koya mai na veivakabobulataki me vaka na nona lewa kei na nona gagadre” (Mosaia 7:33).

• Na cava e vukei au meu vakabauta vakalevu cake na yalayala ni na sereki au o Jisu Karisito?

• Meu na gole vakacava vakavinaka cake vei Jisu Karisito, au sa nuitaki Koya ga, ka qaravi Koya ena gugumatua ni noqu vakasama? Na veika matata cava au rawa ni vakavinakataka?

• Na cava na kena ibalebale vei au meu waraki Jisu Karisito me vakabulai au “me vaka na nona lewa kei na nona gagadre?“