Ai Vakamacala Taumada

Taumada ka bibi duadua, keimami vinakata mo ni kila ni tiko na inuinui me vueti mai na veivakatotogani. (“O keda” na tagane kei na yalewa eda sa sotava na revurevu rerevaki ni veivakatotogani eso ka da sa sotava oti e dua na veivueti balavu.) Keimami sa kila oti na rarawa levu, ia keimami sa raica talega na kaukauwa ni iVakabula me vukica na neimami vakadrukai vaka ca, ki na lagilagi ni qaqa vakayalo. Oi keimami ka a bula tu ena lomaocaoca e veisiga, nuiqawaqawa, rere, kei na cudru veivakarusai sa mai sotava tu oqo na reki kei na vakacegu. Keimami sa vakadinadinataka na cakacaka mana ena neimami bula kei na nodra bula na tani era a tacori ena itovo veivakatotogani.

Keimami sa sauma oti na isau e ca sara ena neimami vakararawataki keimami ena vuku ni neimami itovo veivakatotogani. Ia na veivakalougatataki sa sovaraki mai, ni keimami taura na veikalawa yadua ki na veivueti. Eda sa mai raici keda ni da luvena lomani na Kalou. Ni yaco mai na veivakayadrati vakayalo, keimami segata e veisiga me vakatorocaketaka na neimami veiwekani kei na Tamada Vakalomalagi kei na Luvena, o Jisu Karisito. Me vakalekalekataki, sa cakava vei keda na iVakabula na veika eda sega ni rawa ni cakava vakai keda.

Eso na tamata era raica na veivakatotogani me dua ga na itovo ca ka rawa ni valuti ena kaukauwa ga ni igueloma, ia e vuqa na tamata era sa soli ira taucoko kina dua nai tovo ni bula se ki na dua na ka ni veivakatotogani, ka ra sa sega ni rawa ni vakuai ira mai kina. Eda vakayalia na rai donu kei na vakilai ni veika eso e dodonu me vakaliuci ena noda bula. E sega tale ni dua na ka e bibi vakalevu cake mai na kena vakamamautaki na noda gagadre. Ni da tovolea me da vakuai keda, eda vakila na gagano kaukauwa ni yago, vakasama, kei na lomada. Ni da sa rawai ena noda gagadre kei na veivakatotogani, sa vakalailaitaki se vakatabui na noda rawa ni vakayagataka na noda galala ni digidigi. E vakavulica o Peresitedi Boyd K. Packer, “Na veivakatotogani e rawa ni tagutuva na lewa ni tamata ka vakawabokotaki na galala ni digidigi” (“Revelation in a Changing World,” Ensign, Nove. 1989, 14).

Eda tekivuna na iwalewale ni veivakabulai ena noda yalomalumalumu ka yalodina, ena noda masuta na Kalou kei ira tale eso me veivuke, kei na noda cakava na veika e tuvai tu ena idusidusi oqo. Na 12 na ikalawa ni bula e vakavulica vei keda na iwalewale ni kena vakayagataki na kosipeli i Jisu Karisito ki na noda bula. E kaya o Peresitedi Jeffrey R. Holland: “O sa vorata tiko beka e dua na timoni ni veivakatotogani—tavako se waigaga se veimauilavo, se iyaloyalo vakasisila? Se cava ga na ikalawa tale eso o na gadreva mo taura mo walia kina na lomaleqa oqo, lako taumada ki na kosipeli i Jisu Karisito” (“Veika Sa Kavoro me Vakavinakataki,” Liaona, Me 2006, 70

Na ikalawa 1–3 e vakavulica vei keda na sala meda cakacakataka kina na vakabauti Tamada Vakalomalagi kei Jisu Karisito. Na ikalawa 4–9 e kauti keda mai ena dua na iwalewale ni veivutuni taucoko. Na ikalawa 10–12 e vakayaloqaqataki keda meda saumitaro, meda vakasaqara na veidusimaki vakalou kei na kaukauwa meda tiko ga ena salatu ni veiyalayalati, meda wasea vei ira tale eso na cakamana sa yaco mai ki na noda bula, ka vosota me yacova na ivakataotioti.

E vuqa vei keda eda sa bula mai na veivueti eda se vakaitavi tiko ga ena Parokaramu ni Veivueti mai na Veivakatotogani. Eda na kunea na veitokoni levu ena noda gagadre me da galala mai na veivakatotogani. Ka da sa vakalougatataki ni da segata meda vukei ira na tani era bobula tiko ki na veivakatotogani. Keimami vakabauta vakaukauwa ni keimami sa veisautaki ena Veisorovaki i Jisu Karisito. Me vakataki ira na Anitai-Nifai-Liai ena iVola i Momani (raica na Alama 24:17–19), eda sa sotava na veivakabulai kei na veisau ena noda ituvaki ena loloma soliwale kei na kaukauwa i Jisu Karisito. Eda sega ni vinakata me da vakayalia na isolisoli o ya, o koya eda digitaka kina ena veisiga meda nanuma tiko na noda vakararavi taucoko Vua. Ni da tomana tikoga na noda vakaitavi ena Parokaramu ni Veivueti mai na Veivakatotogani, eda na nanuma tiko ni kaukauwa sara na veivakatotogani ka da na rawa ni lesu tale kina ka sega vua na Kalou kevaka eda sega ni raica rawa na dina oqo. Na noda gagadre o ya meda maroroya na ka e solia vakailoloma vei keda na Kalou.

Kevaka o vakila ni o sa veivakatotoganitaki ka sa tiko vei iko na gagadre lailai sara mada ga mo sereki ka sa tu vakarau mo “vakatovolea” na vosa ni Kalou (Alama 32:27), keitou sureti iko mo tomani keimami ena vulici kei na bulataki ni ivakavuvuli ni kosipeli i Jisu Karisito me vaka e vakavulici ena idusidusi oqo. Keimami vakadeitaka vei iko ni kevaka o na muria na salatu oqo ena yalodina, ko na kunea na kaukauwa o gadreva mo vagalalataki kina mai na veivakatotogani. Oqo e vakatokai me kaukauwa ni loloma soli wale. ”Na loloma soliwale ni Kalou ena vukei keda ena veisiga. E vaqaqacotaki keda meda cakava na cakacaka vinaka eda sega ni rawa ni cakava vakataki keda” (Ulutaga kei na Taro, “Grace,” Gospel Library). Ni o bulataka vakayadua sara na ivakavuvuli e tinikarua oqo ena yalodina, ena vaqaqacotaki iko na iVakabula ka ko na qai “kila na dina, ia na ka dina ena sereki kemudou” (Joni 8:32).

Keimami kila mai na veika keimami dui sotava ni o rawa ni sereki mai na ivesu ni veivakatotogani. Se mani vakacava na nomu vakila ni o lako sese ka sega na nomu inuinui, o iko e dua na luve ni Tamada Vakalomalagi dauloloma. Kevaka o sa matavulotaki mai na dina oqo, na vei ivakavuvuli ka vakamacalataki ena idusidusi oqo ena vukei iko mo kunea tale ka vakotora ki na lomamu sara e loma. Na vei ivakavuvuli oqo ena rawa ni vukei iko mo lako mai vei Karisito ka vakatarai Koya me veisautaki iko. Ni ko sa bulataka na vei ikalawa oqo, o sa na vakayagataka na kaukauwa ni iVakabula ka na sereki iko o Koya mai na ivesu ni bobula.

Kivei keda sa vuetaki tiko keimami sureti kemuni ena taucoko ni neimami kauwai kei na loloma mo ni duavata kei keimami ena dua na bula lagilagi ni inuinui, galala, kei na reki, sa ovici tu ena loloma i Jisu Karisito, na noda Dauveivueti. Me vaka ga ni keimami sa vueti mai, sa na rawa talega vei iko mo vueti ka marautaka na veivakalougatataki kece ni kosipeli i Jisu Karisito.

iKalawa ni Cakacaka

Oqo na parokaramu ni cakacaka. Na noda toso ena vakatau ena noda dau vakayagataka wasoma na veikalawa ena noda bula e veisiga. Era kilai oqo me “cakacakataki na ikalawa.” Na cakacaka oqo ena vukei keda meda lako mai vei Karisito ka ciqoma na veidusimaki kei na kaukauwa e gadrevi me da tomana tikoga kina na noda vueti. Yalovinaka nanuma mo cakacaka vata kei na nomu dauveiqaravi.

Vakanamata ki na noda ivakatakilakila tawamudu

Ni tarogi o Peresitedi Russell M. Nelson me vukei ira era vakararawataki ena veivakatotogani, a sauma mai, “Vakavulica vei ira na kedra ivakatakilakila kei na nodra inaki” (ena Tad R. Callister, “Our Identity and Our Destiny” [Brigham Young University devotional, 14 ni Okos., 2012], speeches.byu.edu). O keda yadua eda luve ni Kalou sa dauloloma. Eda kila ni lomani keda o Koya ka dau qaravi keda vagumatua.

E dina ni da sega ni dau vakasama vakaoqo. Eso vei keda era sa vakadeitaka ni sega ni tiko e kea o Koya. Eso vei keda eda sega ni kauwaitaka sara ga. Eso vei keda eda vakabauta ni a tiko e kea o Koya ia sa rui cudru se rarawataka me vukei keda. Voleka ni o keda kece sara, na noda sega ni kila na noda veiwekani kei na Kalou a vakavuna na noda tarovi keda mai na noda gole Vua me da vukei. Ia, eda sa qai vuki ki na veika vakatotogani se itovo me vukei keda meda vorata yani na bolebole ni bula. Eda dau curuma na ivakarau ca. Eda dau cakava sara, ka vakavuna na yalo ni cala kei na madua, ka vakavuna meda cakacaka vakalevu cake me ubia na mosi ni yalo oqo. Na noda kila na keda ivakatakilakila kei na inaki ni da sa luve ni Kalou sa vakaukauwataki keda meda voroka na cowiri ni ivakarau oqo.

Eda sa vulica tale ga na duidui ni cala kei na madua. Na yalo ni cala sa ikoya na yalo ca me baleta e dua na ka eda sa cakava, ka madua me baleta na keda ituvaki. E vakamacalataka vakaoqo o Elder David A. Bednar na yavu ni yalo cala: “Na cala sa ikoya ki na yaloda na mosi ki na yagoda—na veivakaroti ni veika rerevaki kei na veitaqomaki mai na ikuri ni veivakacacani” (“Eda Vakabauta na Tiko Savasava,” Liaona, Me 2013, 44). Ni bera ni da vueti, e levu vei keda eda vakila na madua, oka kina nida nanuma nida sa kavoro vakadua ka sega ni kilikili me da lomani mai vua na Kalou se dua tale.

Ia, ni da sa mai raica na noda ituvaki vakalou ka vakadinadinataka na noda gadreva na veivuke meda vueti mai na veivakatotogani, eda sa tekivu raici keda me vaka e raici keda o Jisu Karisito: o ira na turaga kei na marama tauvimate vakayalo era tovolea tiko me ra vakabulai ena Nona loloma soli wale ka sega ni ra turaga ka marama ca era tovolea tiko me ra yaco me ra vinaka ka rawata na Nona loloma.

Keitou sureti kemuni mo ni vakatovotovotaka mo ni vakabauta ni o ni luve ni Kalou ka lomani kemuni o Koya se cava ga o sa cakava. E dina ni digidigi veivakaleqai e yalana na noda madigi, ia na keda yaga kilikili vua na Kalou ena sega ni veisau rawa. E lomani keda o Koya baleta ni da sa Luvena, sega ena vuku ni noda digidigi: “E dina ga ni da sega ni taucoko, e taucoko na Nona lomani keda na Kalou. E dina ni sega tu ni taucoko na noda vinaka, ia o Koya e taucoko na nona lomani keda. E dina ga ni da na vakila ni da sa yali ka sega na kabasi, na loloma ni Kalou e kovuti keda taucoko” (Dieter F. Uchtdorf, “Na Loloma ni Kalou,“ Liaona, Nove. 2009, 22).

Me sa lomamu sara mo lako tani mai kina.

Sa qai lomai keimami sara na gole tani mai kina ni sa yaco me levu cake na mosi ni leqa mai na mosi ni kena iwali. O sa yacova beka na vanua oya? Kevaka e se bera ka o tomana tikoga na nomu vakatotogani, o na yacova dina sara na vanua oya baleta na veivakatotogani e leqa ka dau tubu tikoga na kena ca. Oqo e dua na mate ca e kauta laivi na noda rawa ni cakacaka ena ivakarau vinaka.

Taumada, e vaka me veivakayalolailaitaki dina vei keda na tiko vinaka. Ia ni da tomana tikoga na noda rogoca mai vei ira na tani era kunea na vakacegu kei na yalomatua eda vakasaqara tiko, eda sa tekivu vakabauta ni rawa talega ni da bula vinaka.

Ni bera ni da tekivuna na iwalewale ni veivueti, eda na gadreva taumada na gagadre meda na vueti (raica na Alama 32:27). Na galala mai na veivakatotogani e tekivu ena dua na ivakarau lailai sara ni gagadre ni lomada. Kevaka e se lailai ka sega ni se dei vinaka na nomu gagadre nikua, kakua ni leqa. Ni ko tekivuna mo cakacakataka, ena tubu! Eda vulica ni dua na ka kaukauwa duadua eda rawa ni cakava oya meda masuta na Kalou ka kerea me vakalevutaka na noda gagadre meda kua ni vakayagataka.

Ke se bera ni o gadreva mo tekivu mo na vueti, o na rawa ni vakadinadinataka ni sega ni lomamu kei na isau ni nomu vakatotogani. Sa rawa mo vola na cava e bibi vei iko. Raica na nomu veimaliwai vakamatavuvale kei na itokani talega, nomu veiwekani kei na Kalou, nomu kaukauwa vakayalo, na nomu rawa ni vukei ira ka vakalougatataki ira eso, kei na nomu tiko bulabula. Qai vakaraica na veisaqasaqa e tiko ena maliwa ni veika o vakabauta ka vakanuinui kina, kei na nomu itovo. Vakasamataka na sala cava e vakacacana kina na veika o vakamareqeta, mai na nomu ivalavala. Masu vua na Kalou me na vukei iko mo raici iko kei na nomu bula me vaka na nona raici iko o Koya—ena nomu itutu vakalou—kei na veika o rawa ni vakayalia ni tomani tiko na nomu itovo veivakatotogani.

Na nomu kila na ka ko vakayalia ena vakayacori tiko ni nomu itovo veivakatotogani, ena rawa ni vukei iko mo kunea na gagadre mo tarovi iko mai kina. Kevaka o rawa ni raica sara mada ga edua na gagadre lailai, sa na tiko edua na tikina mo tekivu kina. Ia ni o ni toso ki liu ena ikalawa eso ni parokaramu oqo ka raica na veisau e yaco mai ki na nomu bula, ena tubu na nomu gagadre.

Me Kilai: Vakatau ena mataqali veivakatotogani cava, ena gadrevi beka mo qara na veiqaravi vakavuniwai ni bera ni o tekivuna nomu vueti. Yalovinaka mo vakasalataki mai vua e dua na kenadau ni veiqaravi vakavuniwai.

Vakasaqara na veitokoni

Na ilakolako ki na veivueti kei na veivakabulai e balavu ka dredre, ia e sega ni gadrevi me da cakava duadua. Na bula tiko ena gauna ni veivueti e gadrevi kina na dina e taucoko. Na caki, nomu vakaisini iko, kei na tiko duadua e vakadredretaka na kena rawati na toso tudei ni veivueti. Sa ka bibi sara vei keda meda kerea na nodra veitokoni na tani ena kena gauna totolo duadua. E levu era sa tu vakarau mera lako vata kei keda ka vukei keda. E vakavulica vakaoqo o Peresitedi Spencer W. Kimball: “E raici keda vinaka tiko na Kalou, ka sa dau qarauni keda. Ia e dau vakavuqa ni dau sotava na noda gagadre mai vua tale e dua” (Nodra iVakavuvuli na Peresitedi ni Lotu: Spencer W. Kimball [2011], 82).

Na vakasaqarai ni veivuke ni Kalou kei ira tale eso ena sega walega ni vakarautaka na veivakayaloqaqataki eda gadreva me da tomana tiko na ilakolako ia ena vukei keda talega meda nanuma tiko ni da kilikili kaya meda vukei. Ni ko kerea mo vukei, o na kurabui beka ena levu ni loloma kei na veiciqomi o na raica. Na levu ga ni nomu veitaratara kei ira na tani, na levu ni madigi ena tu vei iko mo ciqoma kina na loloma kei na veitokoni ena nomu kunea na veivakabulai dina kei na veivueti.

Vakasamataka mada na ivurevure duidui ni veitokoni sa vakarautaki tu vei iko kei na sala mo dolele yani kina mo vukei. Keitou vakatura me kunei ka cakacaka vata kei na dua na dauveiqaravi ka sa vakayagataka vakavinaka na 12 na ikalawa. E sega ni lesi e dua na dauveiqaravi. Keitou vakauqeti kemuni mo ni vakasamataka ena masumasu se o cei o na kerea me nomu dauveiqaravi ena kena gauna totolo duadua. E dua na vanua vinaka me kunei kina e dua na dauveiqaravi o ya ena dua na soqoni ni veivueti. Na soqoni ni veivueti mai sa vanua taqomaki vei keda me da wasea ka vulica kina na veivueti.

Na ivurevure bibi tale eso ni veitokoni e oka kina na lewe ni matavuvale, itokani, iliuliu ni Lotu, kei ira na vuniwai. Na ivurevure cecere duadua ni veitokoni na Tamada Vakalomalagi. Na noda lewa se o cei meda kerea kei na gauna eda kerea kina na veitokoni sa noda dui vakatulewa ga. Ena so na gauna, ena sega beka ni taqomaki se veivuke vei keda meda umanaki se kerea na veivuke mai vei ira eso na lewe ni matavuvale se itokani. Ia, e bibi meda tokoni ena levu ga na ivurevure e rawa. Me baleta na ikuri ni ivakamacala, yalovinaka railesuva na iwasewase “Veitokoni ena Vakalesui Mai” ka tiko ena ikuri ni idusidusi oqo.

Eda na rairai velavela se madua meda kerea na veitokoni mai vei ira tale eso. Eda na sega beka ni vinakata me dua tale e kila na noda leqa se cala. Eda na sega beka ni vinakata meda icolacola se da na sega beka ni nanuma ni da kilikili me da vukei. Ia eda sa raica ni ra sa vakalougatataki na tamata ni da kerea na nodra veivuke. Na ika 12 ni ikalawa e baleta na veiqaravi kei na nodra vukei na tani. Ni ra qaravi ira na tani o ira era sa vueti tiko, era na vaqaqacotaki ena nodra sa vueti tiko.

Vuli kei na Kilamatata

Na ivolanikalou kei na itukutuku mai vei ira na iliuliu ni Lotu ena vukei iko mo tekivutaka na nomu vueti. Vakayagataki ira ena vakanananu vakatitobu, vuli, kei na volavola. Nanuma mo dau dina ka matata ena nomu volavola.

Na kequ ivakatakilakila vakalou

“Rai ki muri, ni nanumi voli ni ko sa vakadeitaka na nomu bula kilikili ena nomu itutu taumada. Ko sa dua na luvena yaloqaqa ni Kalou, vata kei na Nona veivukei, sa rawa ni o qaqa ena ivalu ni vuravura lutu sobu oqo. O sa vakayacora oti, ka rawa ni o cakava tale.

“Rai ki liu. Era sa ka dina sara na nomu leqa kei na rarawa, ia era na sega ni tawamudu” (Neil L. Andersen, “Mavoa,” Liaona, Nove. 2018, 85; vakaikuritaki).

• Niu rai ki muri, na ivalu cava au sa vala oti kina ka qaqa?

• Na gauna cava au sa ciqoma kina na veivuke mai vua na Turaga ena noqu bula?

“Au rogoca e vuqa ena Lotu era sotava tiko na dredre oqo: ‘Au sega sara ni vinaka rawa.‘ “Au sa yaco koso sara vakalevu.” “Au na sega ni vinaka cake.”

“Me vaka ni da luve ni Kalou, e sega ni dodonu meda vakacacani se rulaki keda, vaka sara ga na noda mokulaki keda e rawa ni da yaco kina me vaka na tamata e vinakata na Kalou me da yaco me vakakina. Sega!” (Jeffrey R. Holland, “O Koya mo Dou Qai Vinaka Sara—Vakaoti,” Liaona, Nove. 2017, 40).

• Meu na vuli vakacava mai na noqu cala niu se nanuma tikoga na noqu yaga me vaka niu luve ni Kalou?

• Na cava na noqu nanuma me baleta na nona vakayagataka o Peresitedi Holland na vosa ena yaco mai ena ulutaga ni nona vosa?

Na noqu veimaliwai kei Jisu Karisito

“Ka ra sa raici ira vakaira ena kedra ituvaki vakayago, ni ra sa lailai sobu mai na kuvu-ni-soso. Era sa tagi vata vakadomoilevu ka kaya: Mo ni yalololoma ka vakayagataka na dra ni veisorovaki i Karisito me keimami vosoti kina ena neimami ivalavala ca, ka me vakasavasavataki kina na yaloi keimami; ni keimami sa vakabauti Jisu Karisito, na Luve ni Kalou, o koya ka a bulia na lomalagi kei na vuravura, kei na veika kecega; o koya ka na lako sobu mai ena kedra maliwa na luve ni tamata.” (Mosaia 4:2).

Ena yaco na iwalewale ni veivueti ena gauna eda vakanamata kina ki na iwali ka sega ena leqa. Ni da vaqaqacotaka na noda veimaliwai kei Jisu Karisito, ena solia vei keda o Koya na kaukauwa kei na vakacegu eda gadreva meda bula ni da vuetaki tiko.

• Na cava na noqu veiwekani kei Jisu Karisito? Au sa nuitaki Koya beka me vukei au?

• Niu sa kila na noqu malumalumu, sa tu beka vei au na yaloqaqa meu gole vua na noqu iVakabula me baleta na Nona kaukauwa ni veivakabulai? Cava na vuna se cava e sega kina? Ke sega, meu na tekivu vakacava?

“Na ivolanikalou e vakamacalataka na ivunau i Karisito o ya na kena cakacakataki na vakabauti Jisu Karisito kei na Nona Veisorovaki, veivutuni, papitaiso, na ciqomi ni isolisoli ni Yalo Tabu, kei na vosota me yacova na ivakataotioti. [raica na 2 Nifai 31].

“Na Veisorovaki i Karisito e vakavurea na ituvaki e so eda na rawa ni nuitaka kina na ‘cakacaka dodonu, kei na loloma cecere, kei na nona loloma soli wale na Mesaia Tabu,” [2 Nifai 2:8], ‘ka vakataucokotaki [vei Karisito]’ [Moronai 10:32], meda rawata na ka vinaka kecega, ka rawata na bula tawamudu.

“Na ivunau i Karisito ena yasana kadua sai koya na sala—na sala duadua ga—eda na rawata kina na veivakalougatataki kece sara e vakarautaki vei keda ena Veisorovaki i Jisu” (Brian K. Ashton, ”Na iVunau i Karisito,” Liaona, Nove. 2016, 106).

• Na 12 na ikalawa ni veivueti era dau vakatokai ena so na gauna me “ikalawa ni gone“ baleta ni ra sa ikalawa lailai sara ena iwalewale ni kena vakayagataki na ivunau i Jisu Karisito ki na leqa ni veivakatotogani. Ena vukei au vakacava na noqu taura na “ikalawa ni gone“ oqo meu ciqoma kina na veivakalougatataki ni Veisorovaki i Jisu Karisito?

Noqu gagadre meu kua ni vakatotogani

“Ni o vagoleya tani nomu vakasama mai na veivagolei tani kei vuravura, eso na ka e vaka me bibi tu vei iko ena gauna oqo sa na sega soti. Sa na gadrevi mo kaya sega ena so na ka, e dina ga ni ra sega ni ka ca. Ni bola na mua ka tomani na iwalewale ni bula taucoko oqo ena nomu vakatabuya nomu bula vua na Turaga, ena vakurabuitaki iko na nomu ivakarau ni rai, na veika o vakila, kei na igu vakayalo! (Russell M. Nelson, “iYau Vakayalo,“ Liaona, Nove. 2019, 77)

Na yalayala oqo, a vakayacora e dua na parofita ni Kalou, e tuvanaki kina na veisau veivakurabuitaki e rawa ni da vagolea na noda vakanamata vua na Turaga.

• Na ivalavala cava ena veisiga au na cakava meu vakanamata kina vei Jisu Karisito?

• Na veika vakatani cava vakavuravura au na kaya kina na sega, ka nuitaka ni ra na “sega tale ni vakaliuci”?

“A sa kaya vei [Alama] na Turaga: Kakua ni kurabui ni sa dodonu me sucu tale na tamata kecega; io, na tagane kei na yalewa, na veimatanitu kece, veimataqali, duivosavosa kei na tamata kecega; io, me ra sucu va-Kalou, ka saumaki mai na nodra ivalavala vakayago kei na nodra lutu, me ra ivalavala dodonu, ni sa sereki ira na Kalou, ka sa yaco ni ra sa luvena tagane ka luvena yalewa” (Mosaia 27:25).

• Na noqu lomasoli meu veisau sa idola ni noqu vueti mai na noqu “lutu.” E tiko beka vei au na gagadre meu kua ni vakatotogani? E sega beka ni lomaqu dina? Ke vakakina, baleta na cava?

• E yaco mai na gagadre ni lomaqu niu vakasamataka na ka e vakaleqai au kei ira tale eso ena noqu vakatotogani. Na cava na isau ni noqu vakatotogani?

• Na cava na isau ki na noqu tiko bulabula?

• Na cava na kena isau ki na noqu matavuvale? na noqu veimaliwai? na noqu rawa ni vukei ira na tani?

• Ena vakayaco-ka vakacava na noqu vakatotogani ki na noqu veimaliwai kei na Kalou?

Vakasaqara na veivuke

“Me vaka ni da sa dau muria na Karisito, eda sa sega ni vakuwai mai na bolebole kei na dredre eso ni noda bula. Sa dau gadrevi tu meda cakava na ka dredre eso, ia kevaka eda qarava duadua ga, ena veivakadrukai ka rawa me sega dina ni rawa. Ni da ciqoma na veisureti ni iVakabula me da ‘lako mai vei au‘ [Maciu 11:28], ena vakarautaka o Koya na veitokoni, vakacegu, kei na sautu e gadrevi“ (Joni A. McCune, “Lako Mai vei Karisito—Bula Vaka-Yalododonu Edaidai,“ Liaona, Me 2020, 36).

• Na iVakabula e vakarautaka na veitokoni, vakacegu, kei na sautu e gadrevi me caka kina na veika vakaitamera se dredre. Meu na kunea vakacava na veitokoni kei na vakacegu sa yalataka o Koya?

• E sa vakaitamera beka se na dredre na veivueti kevaka au tovolea duadua ga?

• E vukei au vakacava na noqu kila ni sega ni dua e vakabulai mai na veivakatovolei ena nodra bula ka da gadreva kece na veitokoni meu biuta laivi na noqu lomalomarua meu dodoliga yani vei ira na tani meu vukei?

• Au sa bau masulaka beka o cei me na noqu dauveiqaravi? E dua beka na yaca e basika mai noqu vakasama?

“Sa vakakina ena nona loloma soli wale na Turaga sa rawa kina ki na tamata yadua, ena vakabauta na Veisorovaki i Jisu Karisito kei na veivutunitaka na nodra ivalavala ca , mera ciqoma na kaukauwa kei na veivuke mera cakava na vei cakacaka vinaka ka ra sega beka ni rawa ni rawata kevaka era a cakava ena nodra dui sala ga. Na loloma soliwale oqo sa ikoya na kaukauwa ka rawa kina vua na tagane kei na yalewa mera rawata na bula tawamudu kei na bula vakacerecerei ni oti na nodra sa solia na nodra vinaka duadua“ (Bible Dictionary, “ Grace”).

• Eso na gauna au a rawa ni biuta kina na noqu veivakatotogani ena dua na gauna. Meu na galala tikoga vakacava mai na veivakatotogani, kevaka mada ga au lomaocaoca se yalolailai?