iKalawa 7: Kerea na Tamada Vakalomalagi ena yalomalumalumu me kauta laivi na noda malumalumu.

iVakavuvuli Bibi: Yalomalumalumu

Na veikalawa kece sa oti era sa vakarautaki keda ki na ikalawa oqo. Na ikalawa 1 e vukei keda meda yalomalumalumu ka vakatusa ni sega vei keda na kaukauwa meda valuta rawa na noda vakatotogani. Na ikalawa 2 kei na 3 e vukei keda me veirauti na noda vakabauta kei na yalodei vua na Turaga meda kerea Vua na veivuke. Na noda ivolanitovo mai na ika 4 ni ikalawa e vukei keda meda raica vakamatata cake na noda ivakarau kei na itovo. Na cakacakataki ni ika 5 ni ikalawa e vakaraitaka meda yaloqaqa meda dina vua na Kalou, kivei keda vakaikeda, kei na dua tale na tamata. Na ikalawa 6 e vukei keda meda vakarau ka lomada meda biuta laivi na noda malumalumu ni itovo ni bula. Eda sa vakarau tu oqo me da taura na ika 7 ni ikalawa. Eda vakanamata ki na “SALA“ ni kena cakacakataki na ikalawa yadua: o ya meda yalomalumalumu, dolava na noda vakasama, kei na lomasoli.

Na veikalawa kece e gadrevi kina na yalomalumalumu, ia nai ka 7 ni ikalawa sa gadrevi vakalevu sara kina: “Kerea na Tamada Vakalomalagi ena yalomalumalumu me kauta laivi na noda malumalumu.” Ni da cakacakataka tiko yani na imatai ni vica na ikalawa ni veivueti, eda vulica ni veitalia ga na levu ni noda sasaga vakataki keda, eda na sega ni rawa ni veisautaka se kunea na veivueti ke sega na veivuke ni Turaga. Na ikalawa oqo e sega ni duatani. Na Tudei ena Vakabauta e vakamacalataka na yalomalumalumu vakaoqo: “Na yalomalumalumu sai koya na nomu kila vinaka ena marau ni o sa vakararavi ga vua na Turaga—ena nomu kila vinaka ni ko sa na gadreva tikoga na Nona veitokoni” (Tudei ena Vakabauta: E Dua na iVakavuvuli ni Kosipeli [2004], 86).

Eso vei keda sa tekivu me da lesu tale ki na noda sala makawa ka tovolea me da veisautaki keda ga. Ia ni da sa kila na vuqa ni noda cala kei na malumalumu, eda vulica ni dodonu me da vakararavi ga vua na Turaga me vukei keda meda veisau. Ena kena cakacakataki nai ka 7 ni ikalawa, eda sega ni vagalalataki mai na cakacaka me da na cakava. Sa gadrevi tikoga meda dau vosota ka “toso ki liu ka tudei vei Karisito” (2 Nifai 31: 20) Eda sa gadreva na veivakananumi tudei meda gole vua na Kalou ka kerea na Nona veivuke.

Eda vakataroga se na yaco vakacava vei keda na cakamana oqo. Sa duidui oqo vei keda yadua, ia e tiko eso na vanua eda tautauvata kina. E sega ni dau yaco vakasauri na nodra veisau cecere na tamata ki na nodra itovo ni bula; na iwalewale ni toso ena ikalawa 6 kei na 7 e dau yaco mai me vaka e vakamacalataka o Elder David A. Bednar:

“Me vaka ni da lewe ni Lotu ena so na gauna eda sa rui dau vakabibitaka vakasivia na veivakatakilai vakayalo vakasakiti eso e dau laurai votu ka da calata kina meda vakavinavinakataka ka so na gauna eda guilecava sara mada ga meda raica na ivakarau matau e dau qarava kina na Yalo Tabu na Nona cakacaka, … [ni sa curuma yani] ena kena ciqomi vakalalai na veivakauqeti vakayalo” (“The Spirit of Revelation,” Liaona, Me 2011, 88).

Ni da digitaka meda soli keda vua na Kalou ka vakaduavatataka na lomada Vua, sa sinai tu ena noda veisiga na veigauna lailai ka sureti keda o Koya meda cegu mada ena noda isaunitaro makawa, ka maqosa ia meda qai vakararavi ga ki na Nona kaukauwa me veivuke, laveta cake, ka loloma. E vakavulica o Sisita Rebecca L. Craven: “Mo kakua ni yalolailai. Na veisau sa dua na iwalewale vakacakacaka ni noda bula taucoko. Ena noda sasaga ni veisau, sa vosoti keda tiko na Turaga“ (“Maroroya na Veisau,“ Liaona, Nove. 2020, 59).

Se na noda veivakatotogani ena alakaolo, waigaga, veimauilavo, veiyacovi ca, ivakarau ni kana veivakarusai, vakayagataki ilavo vakaveitalia, se na itovo veivakatotogani tale eso se na veika eda sa vakayagataka me sotava kina na lomaocaoca ena bula oqo, ena “vukei [keda] na [iVakabula] me vaka na [noda] malumalumu“ (Alama 7:12). Ni da sa tu vakarau meda veisau ena noda lako mai vei Jisu Karisito, eda na sotava na Nona kaukauwa ni veivakabulai.

Ni da cakacaka tiko ena ikalawa oqo, e levu vei keda era raica ni dodonu meda valuta laivi na yalo madua. Ni da raica na noda malumalumu e kauta mai na yalo e takiveiyaga se ni da sa baci luluqa tale. Ia ni da cakacakataka tikoga na veikalawa ka lako tikoga yani vei Karisito ena solia vei keda e dua na sala vou meda raici keda kina. Eda sa vakila vei keda na loloma ni Kalou ni da sa Luvena tagane kei na yalewa lomani. Na loloma oqo e vukei keda meda valuta laivi na yalo madua kei na lomalomani keda.

Eda sa tekivu raica na noda lecaika kei na malumalumu me sa madigi meda kerea na veivuke ni Kalou ena yalomalumalumu meda toso ki liu ena noda ilakolako ni veivueti.

iKalawa me Cakacakataki

Oqo na parokaramu me cakacakataki. Na noda toso ena vakatau ena noda dau vakayagataka wasoma na veikalawa ena noda bula e veisiga. Sa kilai tu oqo me “ikalawa me cakacakataki.“ Na cakacaka oqo ena vukei keda meda lako mai vei Karisito ka ciqoma na veidusimaki kei na kaukauwa e gadrevi me da taura kina na ikalawa e tarava ena noda vueti.

Kerea vua na Kalou me cakava na ka eda sega ni rawa ni cakava vakai keda

Eda na bulataka vakacava nai ka 7 ni ikalawa ena veisiga? Eda cegu mada ena siga ena lesu tale mai kina na lomada se ni da raica na noda malumalumu. Ena gauna vakaoqo, eda sa soro ka vakarorogo. Eda nanuma tiko ni sa sega na noda kaukauwa me da veisautaki keda vakaikeda ka sega ni vukei, ka da nuitaka ni rawa ni veisautaki keda na Turaga. Oti eda sa qai toso ki liu ka vakararavi Vua. Eda biuta laivi na veika eda sega ni rawa ni cakava, ka da kerea vua na Kalou me vukei keda.

Oqo e gadrevi kina na vuki vua na Kalou ena masu. “E tu vei keda yadua na leqa eda na sega ni walia rawa kei na malumalumu eda na sega ni rawa ni ravuta kevaka eda dolele yani ena masu ki na dua na ivurevure cecere cake ni kaukauwa“ (James E. Faust, “The Lifeline of Prayer,“ Ensign, Me 2002, 59).

Ni da masu e vakaibalebale ka vakainaki cake, eda na rawata sara na loloma ni Kalou. Ni da vakatara vei keda e dua na gauna kei na vanua vakacegu meda semati kina ki na veika vakalou, eda na rawa ni tara cake ka vaqaqacotaka na noda veiwekani kei na Kalou. Ena noda maroroya tiko e dua na masu rawarawa e yaloda, me vaka, “Turaga, a cava ko ni sa vinakata meu kitaka?“ (Cakacaka 9:6) se “Me yaco ga na lomamuni“ (Vunau kei na Veiyalayalati 109:44), eda na nanuma tikoga na noda vakararavi taucoko vua na Turaga. Na noda lomana na Kalou kei na Nona lomani keda ena vukei keda meda tauyavutaka e dua na isema ka rawa ni da soli keda taucoko kina.

Vulica na masu ni sakaramede

Na masu ni sakaramede sa ivakaraitaki totoka ni yalomalumalumu kei na inaki ena daku ni ikalawa 7. Sa noda na madigi meda vakaivotavota ena sakaramede ena veimacawa ka vakananuma vakatitobu na vosa ni masu ni sakaramede.

Sa vakaturi meda wilika na Moronai 4:3; 5:2 ka bulataka ena yalomalumalumu na veivosa tabu oqo ena domomu me vakaoqo: “Oi kemuni na Kalou na Tamada Tawamudu, [au] kerei kemuni ena yaca ni Luvemuni, ko Jisu Karisito, meu vakalougatataka ka vakatabuya na madrai oqo ki [yaloqu] niu sa vakaivotavota kina; meu kania kina [meu vakananuma kina na yago ni Luvemuni, ka vakadinadinataka vei kemuni, na Kalou na Tamada Tawamudu, niu sa lomaqu meu taura [vei au] na yaca ni Luvemuni, ka nanumi koya tikoga, ka muria na nona ivakaro sa solia vei au ko koya, me tiko ga kei au [au] na Yalona“ (Moronai 4:3).

Ni da vakasamataka na masu ni sakaramede ena sala oqo, sa rawa meda torova vakatamata na iVakabula ena yalo raramusumusu kei na yalo bibivoro. Ni da vakasamataka na noda malumalumu se dua na cala eda a cakava, sa na qai rawa ni da vagolea na yaloda Vua. E rawa ni da kerei Koya me vukei keda meda veivutuni, vinaka cake, ka kauta laivi na malumalumu oqo.

Vuli kei na Kilamatata

Na ivolanikalou kei na itukutuku oqo mai vei ira na iliuliu ni Lotu ena rawa ni vukei keda ena noda vueti bula. Eda rawa ni vakayagataka meda vakasama vakatitobu kina, vuli, ka volavola. Meda nanuma tiko meda dau dina ka vakabibi ena noda volavola meda rawata kina na ka e yaga vakalevu duadua.

Sa rauti keda na Nona loloma soliwale.

“Ka kevaka era na lako mai vei au ko ira na tamata au na vakaraitaka vei ira na nodra malumalumu. Au sa solia vei ira na tamata na malumalumu mera vakayalomalumalumutaki ira kina; ia sa rauti ira vinaka na tamata kece ga era sa vakamalumalumutaki ira vei au na noqu loloma soli wale; ni kevaka era sa vakayalomalumalumutaki ira vei au, ka vakabauti au, au na qai vakayacora me vu ni nodra kaukauwa na veika malumalumu” (Ica 12:27).

Ena vuku nida sa tamata ga ka sega ni taucoko sara, eda sa rawai kece ena malumalumu e vuqa. Ena tikina oqo, e vakamacalataka kina na Turaga na Nona inaki ka vakatara kina vei keda meda sotava na bula vakayago ka sota kaya na vei malumalumu oqori me vukei keda me da yalomalumalumu. Meda kila ni da sa digitaka meda vakayalomalumalumutaki keda.

• Na cava na ibalebale ni malanivosa “sa rauti ira na tamata kecega na noqu loloma“ kivei au?

• Au vakabauta beka ni sa rauti au na loloma soliwale ni Turaga?

• Na cava na kena ibalebale me da yalomalumalumu ena mata ni Turaga?

• Vola eso na nomu itovo malumalumu. E yasadra, vola na kaukauwa era na rawa ni yaco ni ko lako mai vei Karisito.

Digitaka mo Yalomalua

“Ia oqo, me vaka au sa kaya vei kemuni, me baleta ni ko ni sa vakasaurarataki mo ni vakayalomalumalumutaki kemuni ko ni na kalougata kina, ko ni sa sega li ni nanuma ni ra na kalougata vakalevu cake ko ira era sa vakayalomalumalumutaki ira vakataki ira ena vuku ni vosa?” (Alama 32:14).

E vuqa vei keda a yaco mai kina soqoni ni veivuetii ena lomaleqa, ka vakavu mai na itotogi irevurevu ni neimami vakatotogani. Eda sa vakasaurarataki meda yalomalumalumu. Ia, na yalomalumalumu e vakamacalataki ena ikalawa oqo e sa vakatau ga. Sai koya na vua ni noda digidigi meda vakayalomalumalumutaki keda.

• Sa veisau vakacava na noqu nanuma ni yalomalumalumu, me tekivu mai na gauna ni veivueti?

Vakasinaiti ena reki

“Ka ra sa raici ira vakaira ena kedra ituvaki vakayago, ni ra sa lailai sobu mai na kuvu-ni-soso. Era sa tagi vata vakadomoilevu ka kaya: Mo ni yalololoma ka vakayagataka na dra ni veisorovaki i Karisito me keimami vosoti kina ena neimami ivalavala ca, ka me vakasavasavataki kina na yaloi keimami; ni keimami sa vakabauti Jisu Karisito, na Luve ni Kalou, o koya ka a bulia na lomalagi kei na vuravura, kei na veika kecega; o koya ka na lako sobu mai ena kedra maliwa na luve ni tamata.

“Ka sa yaco ni ra sa vosataka oti na vei vosa oqo, sa sobuti ira na Yalo ni Turaga, ka ra sa vakasinaiti ena marau, ka sa bokoci na nodra ivalavala ca, ka sa vakacegu na nodra vakasama, ena vuku ni vakabauta levu sa tu vei ira me baleti Jisu Karisito o koya ka na lako mai” (Mosaia 4:2–3).

Era a cabora na tamata i Tui Penijamini na mataqali masu keimami a cabora ena neimami cakacakataka na ika 7 ni ikalawa. Era a vakila na vakacegu kei na reki ni sa sobuti ira na Yalo ni Turaga ka solia vei ira na vakabokoci ni nodra ivalavala ca.

• Na cava soti au sa sotava niu vakila na vakacegu kei na reki?

• Ena vakacava na noqu vakila na vakacegu kei na reki ena noqu bula ena veisiga?

Talairawarawa ki na ivunau.

“Dou tu vei au, kau na tu vei kemudou. Me vaka sa sega ni vua rawa na tabana vakai koya, kevaka sa sega ni tu vata kei na vaini; ena vaka talega kina koi kemudou, kevaka dou sa sega ni tu vei au.

“Oi au na vaini, koi kemudou na tabaqu: ko koya sa tu vei au, koi au talega vei koya, sa vua vakalevu: ke dou sa tawase tani vei au, dou na sega ni rawata e dua na ka.

“Kevaka dou sa talairawarawa ki na noqu vunau, dou na tiko ga ena noqu loloma; me vaka kau sa talairawarawa ki na vunau nei Tamaqu, ka tiko ga e na nona loloma.

“Au sa vosataka na veika oqo vei kemudou, meu sa marau tikoga ena vukumudou, ka me sinai na nomudou marau” (Joni 15:4-5, 10-11).

• Na cava na kena ibalebale vei au ni kevaka au muria na ivakaro ni iVakabula, “[Au] na tiko ga ena [Nona] loloma?“ (tikina e 10).

• Me vaka e tukuni ena veitikina oqo, na cava eso na veivakalougatataki yalataki ni noda tiko Vata kei Koya?

• Na cava au vakila nikua me baleta na kena muri tiko na ivakaro ni iVakabula?

• Sa vakaraitaka vakacava na noqu loloma vua na Kalou na talairawarawa tiko ki na ivakaro?

na loloma ni Kalou

“Nida vakaliuca na Kalou, na veika kece era na tuvalaki vakadodonu se era na kau tani mai na noda bula. Na noda lomana na Kalou ena taqomaka na vinakati ni noda gagadre, na kovuti ni noda gauna, na veika talei eda sasagataka, kei na ituvatuva ni veika eda vakaliuca” (Ezra Taft Benson, “The Great Commandment—Love the Lord,” Ensign, Me 1988, 4).

Ena kena sa mai kilai na loloma veivueti kei na nona vinaka na Kalou, o sa rairai tekivu mo vakila na loloma ni Kalou—mo lomani Koya ka mo lomani mai Vua.

• Au sa bau vakila beka na levu ni loloma niu cakacaka tiko ena veikalawa? Ke vakakina, na cava na vuna?

• Sa vukei au vakacava na noqu cakacakataka nai ka 7 ni ikalawa meu vakaduavatataka na veika au vakaliuca ka biuta e liu na Kalou ena noqu bula?

Taura kivei keda na yaca i Jisu Karisito.

“Ia oqo, ena vuku ni veiyalayalati ko ni sa vakayacora ko ni sa vakatokai kina mo ni luvei Karisito; na luvena tagane, ka luvena yalewa;

“O koya au sa gadreva kina mo dou taura matua ga na yaca i Karisito, koi kemudou kece sa veiyalayalati kei na Kalou mo dou talairawarawa me yacova na icavacava ni nomuni bula.

“Ia ena qai yaco ni ko koya yadua sa vakayacora vakaoqo ena kunei mai na liga imatau ni Kalou, ni na kila ko koya na yaca sa kacivi kina, ni na kacivi ena yacai Karisito” (Mosaia 5:9

• Na cava na ibalebale ni noda vakatokai ena yaca i Karisito ka matataki Koya?

• Na cava ena gadrevi meu cakava meu kunei ena liga imatau ni Kalou?

• Na cava au sa yalataka meu vakayacora ena noqu papitaiso kei na noqu vakaivotavota ena sakaramede? (Raica na Mosaia 5:7–9; 18:8–10, 13; Vunau kei na Veiyalayalati 20:77, 79.)

• Na cava au vakila niu vakasamataka na nona lomasoli na iVakabula me solia vei au na Yacana me isau ni kena vakayacori e dua na veiyalayalati kei Koya meu talairawarawa ka qaravi Koya, ka oka kina na noqu biuta laivi na noqu malumalumu?

Solia na noda malumalumu

“Na lotu ka sega ni gadreva na solibulataki ni veika kecega sa sega kina na kaukauwa me rawa ni vakavurea na vakabauta e veiganiti kaya na bula kei na veivakabulai” (Lectures on Faith [1985], 69).

• Eso na tamata era wilika na vosa oqo ka nanuma “na veika kecega” e vakaibalebaletaki ki na ka kece e taukeni. Sa vakalevutaka vakacava na noqu cabora na noqu malumalumu kecega vua na Turaga, meu kilamatata sara na ibalebale ni solibulataka na veika kecega?