Digitaka e dua me Dauveiqaravi

Na nomu cakacaka vata kei na dua me dauveiqaravi e rawa ni vakavinakataka cake nomu vuetaki. O koya na dauveiqaravi e rawa ni tokoni iko ena nomu tubu kei na gugumatua mo valuta rawa na veibolebole, vakararavi, se itovo ni veivakatotogani o sotava tiko. Ena nomu ilakolako ni vuetaki, o sega ni lako duadua; o dauveiqaravi sa dua e “lomasoli me … vakacegui ira era sa gadreva na veivakacegui, ka vakadinadinataka na Kalou” (Mosaia 18:9). Yalovinaka vakasamataka mo cakacaka vata kei na dua e dauveiqaravi ena gauna totolo duadua.

Na Cava e Dua na Dauveiqaravi?

Na dauveiqaravi sa dua e sa kunea na veivuetaki ena nona cakacakataka na 12 na ikalawa. E rawa ni ra kila vakamatata na veibolebole eso e semati ki na veivueti ena gauna mada ga o sega tu ni kilai ira kina. Na dauveiqaravi oqo e sega ni kena inaki me nomu itokani vinaka duadua se kenadau ni bula ni vakasama. Ia, na itavi nei dauveiqaravi oqo o ya me vukei iko mo cakacakataka na ikalawa kece ni vuetaki.

Kunei e dua na dauveiqaravi

Ena Parokaramu ni Veivueti ni Lotu mai na Veivakatotogani, ena sega ni lesi vakatabakidua vei iko e dua na dauveiqaravi. Sa rawa mo veivosaki baleti dauveiqaravi ena sala e veirauti kei na veika e sotava, gagadre, kei na nomu itovo ni bula. Na veiqaravi sa dua na vakatulewa cokovata mai vei iko, o koya na dauveiqaravi, kei na Turaga.

Na nomu kunea e dua me dauveiqaravi e rawa ni veivakayalolailaitaki, ia eso tale ena rawa ni vukei iko. Na sala vinaka duadua me kunei kina e dua me dauveiqaravi sai koya me da tiko ena soqoni ni veivueti. O ira era sotava tiko na bolebole vata oqori e vakavuqa ni dau levu cake na nodra rawa ni kila na veika o sotava ena nomu sasaga. Na vakasama eso oqo e rawa ni veivuke ena kena vakatulewataki e dua me dauveiqaravi dodonu ka vinaka:

1. Vakasaqara na veidusimaki vakayalo mai vua na Tamada Vakalomalagi ena masumasu kei na lolo me baleta o cei e rawa ni nomu dauveiqaravi.

2. Vakasamataka mo digitaka e dua sa vakayagataka vakalevu na gauna ena veivueti ka sa cakacakataka oti na 12 na ikalawa.

3. Vakarorogo ni ra wasea na tamata na veika era sotava ena veivueti ka vakasamataka o cei e rawa ni o sema kina.

4. O ira na iliuliu kei na dauveivakarautaki ni ilawalawa e rawa ni ra vakatakila vei iko o ira mo digitaka.

5. Taroga e dua o nanuma ni ganiti iko.

6. E dodonu mo digitaka e dua na dauveiqaravi e tagane se yalewa vakataki iko (vakavo ga ke wekamu o dauveiqaravi).

7. Ni o tekivuna na iwalewale ni veisau, o na rawa ni vakararawataki vakayago, e lomamu, ka rawai rawarawa vakayalo. Qarauna mo kakua ni tara cake e dua na veimaliwai ni vakararavi kei koya na dauveiqaravi.

8. E rawa ni o kerea e dua me nomu dauveiqaravi tu vakawawa. E rawa ni o veisautaki koya me dauveiqaravi ena dua ga na gauna sa rawa.

Mo dua na dauveiqaravi mana.

Na nomu yaco mo dua na dauveiqaravi yaga e dua na cakacaka cecere ni veiqaravi ni o wasea na veika o sa sotava, vakabauta, kei na inuinui o sa kunea ni o cakacakataka tiko na 12 na ikalawa ni veivueti kei na veivakabulai mai vua na iVakabula o Jisu Karisito. Era taroga na dauniveiqaravi na taro titobu, dusia na ivurevure eso, wasea na veivuke rawarawa ni kena cakacakataki na ikalawa, ka vakayaloqaqataki ira era cicivaka me ra tiko ena soqoni. Sa kila vakavinaka o koya e dauveiqaravi ni sa rawa vei ira eso tale mera vakaitavi ena nona vueti e dua na tamata ka na sega ni cudru kevaka e vakasaqara o koya e dauveiqaravi tiko kina na veitokoni mai vei ira tale eso se digia me sa veisau o koya e dauveiqaravi tiko. Sa koto e ra eso na ivakavuvuli mo dua kina na dau veiqaravi vinaka:

1. Vakaliuca na Kalou mai na veika kecega. Dau nanuma tikoga na Kalou ka vukei ira o dauveiqaravi kina me ra vakararavi Vua. Qarauna mo kakua ni vakatara me ra vakararavi vakasivia vei iko o ira o dauveiqaravi tiko kina. Sa nomu itavi vakadauveiqaravi mo vakayaloqaqataki ira na tamata mera gole vua na Tamada Vakalomalagi kei na iVakabula ena vuku ni veidusimaki kei na kaukauwa. Sa nomu itavi mo wasea na veika o sotava ena vakabauta kei na inuinui mo vukea na tamata o tokona me vakila ni lomani ka tokoni tiko mai vua na Kalou.

2. Mo dua na vakaitavi qaqaco ena veivueti. O koya me dauveiqaravi ena dodonu me tiko mada ena veivueti ena dua na gauna balavu ni bera ni laki dauveiqaravi vua e dua (me dau 12 na vula se sivia) ka vakaitavi vagumatua ena kena bulataki ka vulici na ivakavuvuli ni veivueti. O na vakila beka na ikuri ni icolacola ena nomu sasaga ni vuetaki o iko ni sa tekivu mo cicivaka na ka e baleta e dua tale. Qarauna mo kakua ni vakaleqa na nomu sasaga mo vuetaki o iko ena nomu laki dauveiqaravi ki vua e dua tale. O dauveiqaravi ena dau qarauni koya ka kerea me vukei se tokoni ni sa gadrevi vakakina.

3. Mo yalomalua. Ni ko sa dauveiqaravi, sa nomu itavi mo vakayagataka na nomu kaukauwa mo veitokoni ka veidusimaki kina.

4. Rokova na nodra galala ni digidigi na tamata ka mo dau vosota. Na dauveiqaravi mana e yaco mai “ena veivakauqeti, na vosota vakadede, na yalomalua, na yalomalumalumu, kei na loloma e sega ni veivakaisini; ena yalovinaka, kei na kila ka savasava” (Vunau kei na Veiyalayalati 121:41–42). Kakua ni saga mo via vakavinakataki ira eso tale ena sala cava ga. Vukei ira tale eso me ra vakasamataka na ivakavuvuli kei na ivakarau ka qai tokoni ira ni ra vakatulewa ga vakataki ira. Rokova na nodra galala ni digidigi ka nuitaka tiko ni na vukei ira na Turaga ni ra gole Vua. Na tamata o vukea tiko ena rairai se bera tiko ni vakarau me toso ki liu. E rawa vua me tokaruataka na itovo sega ni bulabula se berabera ni bulataka na ivakavuvuli kei na ivakarau ni veisau dina. O dauveiqaravi e dodonu me dau vosoti ira tiko na tamata ni ra curuma tiko na ilakolako ni veivueti.

5. Mo veiqarvi ena yaloveinanumi. Na veiqaravi ena yaloveinanumi ena gadrevi kina mo dausolisoli ka sega ni namaka e dua na ka mo saumi lesu mai kina. O koya na dauveiqaravi e dodonu me rabailevu sara na nona kila vinaka na ka kei na yalorawarawa me solia nona gauna kei na sasaga vei ira era dauveiqaravi kina. Kakua ni vakasaqara mo vakacaucautaki, qoroi, dinati, se so tale na qoroqoro mai vei ira o dauveiqaravi kina.

6. Rokova na nomu yalayala o cakava. Na nomu yaco mo dauveiqaravi e sega ni kena ibalebale o ira o dauveiqaravi kina me yalani na nodra gauna kei na ivurevure o solia vei ira. E rawa ni o biuta e dua na ivakaraitaki ni bibi ni iyalayala bulabula ena nomu rokova na nomu yalayala tale eso, oka kina na nomu matavuvale, na Lotu, nomu cakacaka, kei na nomu gauna vakai iko. Nanuma na ivakasala nei Tui Penijamini ena Mosaia 4:27: “Ka mo ni raica me ra vakayacori vakayalomatua ena kena ivakarau dodonu na veika kece oqo, ni sa sega ni kilikili vua na tamata me cici vakatotolo cake mai na kaukauwa sa tu vua.”

7. Mo daumasu. Ena veigauna kece o digitaka mo dauveiqaravi kina vua e dua, mo vakasaqara na veidusimaki ni Turaga mo kila na ivakavuvuli se ivakarau cava ena veivuke vakalevu duadua ki na gagadre ni tamata yadua ena gauna oqo. Mo dau masulaka ni ko vakasamataka na sala eso mo veiqaravi kina, ka segata tikoga mo tuberi mai vua na Yalo Tabu.

8. Vakadinadinataka na dina. O na vakauqeti beka mo wasea na veika o sotava me ra kila na tani ni rawa ni o tukutuku dina. Sa rawa talega mo vakadinadinataka na iVakabula kei na Nona kaukauwa ni veivakabulai. Na dina ni Kalou e sa Kalou ni cakamana sa idola bibi (raica na Moronai 7:29) Na nomu wasea na nomu ivakadinadina me baleta na Nona loloma veivueti kei na loloma soliwale sa na dua beka na cakaitavi bibi duadua eda rawa ni solia.

9. Maroroya na veika bibi e nuitaki vei iko mo maroroya. Ni ko sa dauveiqaravi, sa nomu itavi mo taqomaka na nodra veika maroroi na tamata. Na veika ni tamata yadua kei na taqomaki ni veika bibi maroroi era sa uto ni ivakavuvuli ena kena vaqaqacotaki na nomu rawa ni dauveiqaravi ka vukei ira na tamata.