Itulau i le lotoifale
O Le Mauaina o Lona Malamalama pe ‘Aisea’
Na mulimuli ona malamalama Amy o lona auai i le Ekalesia, e lē ona o ia.
Ina ua tu’itu’i tamaita’i faifeautala’i i lona faitoto’a mo le taimi muamua, sa le’i i ai Amy Karsten i lona fale. Ae na tali mai e lona tina faale-tulafono ma sa matuā maofa o ia i le agalelei o nei tamaitai faifeautala’i, o lea sa ia valaaulia ai i la’ua e toe fo’i atu mo se faiga ‘aiga. O iina na faato’a faalogo ai Amy i le savali o le talalelei a Le Ekalesia a Iesu Keriso o le Au Paia o Aso e Gata Ai.
A’o asiasi atu tamaita’i faifeautala’i i lena afiafi, na manatua e Amy, “Na amata ona ou lagona ni lagona filogia—lagona faaleagaga o le olioli ma le fiafia.” O ni lagona fou ia mo ia. Na ō latou aumaia ni lagona o le filemu i le taimi tonu o ni laasaga suia o lona olaga.
I le tausaga 2015 ma o le lua ai na o tausaga talu ona faaipoipo Amy. Sa siitia o ia ma lona to’alua i lo la fale muamua, i Flat Bush, i Aukilani, e na o le fa masina muamua ae valaaulia loa ona matua ma lona tuagane e latou te nonofo faatasi ma i la’ua.
Na avea faifeautalai ma ni tagata asiasi masani i lō latou aiga, e ui lava ina ua si’itia ese le uluai faifeautala’i mai le eria ae suitulaga atu i ai le isi soa. “Sa ou maitauina le tutusa lelei o le agaalofa ma lo latou alofa faamaoni,” sa faapea atu ai Amy i faifeautala’i. “E mafai ona ou lagonaina lo outou agaga fiafia ma le loto atoa e auauna ai.”
I totonu o le tausaga, ua i ai nisi o le aiga faale-tulafono o Amy ua auai i le Ekalesia.
“E le mafai ona ou faapea atu o a’u o se tagata su’esu’e atoatoa, ae sa ou auai i o latou papatisoga uma lava ma e masani lava ona ou tagi ai. Sa masani ona ou mafaufau, ‘O le a le mea lea e tupu ia te a’u?’” o le ata lea a Amy. Ae peitai, na te le’i su’esu’e atili atu i nā faalogona faaleagaga, ma sa amata ai ona alo’ese mai faifeautala’i i le nofonofo lea i le falealuga pe a asiasi atu faifeautala’i.
Ae peita’i, na feagai Amy ma lona to’alua ma ni faigata i lo la aiga. E le’i uma lava ona fai le mokesi o lo la fale, ae faamalolo loa Amy mai lana galueaga ma sa matua fetaia’i ma a’afiaga o le lē mautonu o tulaga tau tupe, a’o taumafai e saili se isi galuega. Ae i le amataga o le 2016, na iloa ai e mana’omia ona faia se asiasiga o lo la fale ma se tau taugata e ono faia ai ni galuega toe faaleleia i le lumana’i. Ae le gata i lea, o le ulugalii o lo’o i le lisi faatalitali i fesoasoani lautele a le IVF,” Na manatua e Amy. “Sa amata ona ou mafaufau, atonu e le o ia te a’u se faavae malosi faaleagaga e u’unaia au aga’i i luma.”
I se tasi aso, na vala’auina o ia ma lona to’alua i se Afiafi Faaleaiga i le uarota a ona matua faale-tulafono. O iina na toe lagona ai e Amy ni lagona ia sa masani ona ia lagonaina ua toe musumusu atu ia te ia, ae o le taimi lea ua o’o mai ma le faanatinati ina ia faatinoina loa ia lagona. “Sa ou mafufau, ua lelei. Ua uma ona ou faalogo i le savali o le talalelei ma o mea nei ou te filifili i ai. Pe ou te mana’o pea ou te lagonaina le leiloa, faanoanoa ma le leai o se faatuatua? Po o le uia o le isi auala, opo mai le talalelei ma aga’i i luma?”
O lana faai’uga sa matua manino atoatoa. Sa ia iloa e tatau ona papatisoina o ia . . . ae toe tasi lava le faafitauli e tatau ona fo’ia.
“Toe pau lava si o’u lagona taofiofi o lo’o i ai o lo’u lagonaina lea o lo’u le agava’a i le i ai o le talalelei i lo’u olaga.”O se lagona ogaoga le o’otia ma ina ua faamatala e Amy i faifeautala’i, sa fai atu i la’ua ina ia tatalo i ai, o lea na ia faia ai ma lona loto naunauta’i i ai.
I le aso na soso’o ai, ina ua manava galuega, na lagona e Amy se lagona e toto ifo i totonu e uiga i lona tuagane. “Sa ou lagona e i ai le mea e le o sa’o ma e tatau ona ou tusi ia te ia.” I lana feau tusitusia na uunaia o ia e fesili i ai po o lelei mea uma iā te ia ma lana uo teine. I ni nai minute, ae amata se talanoaga umi ma vavalata a Amy ma lona tuagane i luga o le telefoni e uiga i le la faigauo. Na avea lena, o se tagata na matua mana’omia lava ona talanoa i ai Amy i le taimi lava lena. E ala i ana fautuaga alofa na mafai ai e lona tuagane ona maua le to’afilemu ma le loto mautinoa e mana’omia e fo’ia ai ona faalavefau faale-tagata.
“Ina ua uma la ma’ua talanoaga, na ou iloa ai faafuase’i—e leai so’u masalosalo—le mafua’aga e tatau ai ona ou papatiso,” o le tala lea a Amy. “Sa ou iloa ai o Iesu Keriso sa avea ma o’u faataitaiga i le taimi atoa, i le auala na Ia faamanuia ai ma auauna atu ai i isi i taimi o lana galuega auauna i le lalolagi.”
Na i’u lava ina malamalama Amy o le auai i le Ekalesia e lē faatatau na o ia. Sa ia iloaina lena mea—e pei lava o faifeautala’i na a’aoa’oina o ia—ua valaauina fo’i o ia e alofa ma auauna atu ia i latou o lo’o si’omia o ia, “ma o le auauna atu ma le lelei, ou te mana’omia ai le soa faifai pea a le Agaga Paia,” o le tala lea a Amy, “o lena meaalofa na folafolaina i le papatisoga.”
Ua tusa nei o ni nai tausaga talu ona auai Amy i le Ekalesia, ma e tusa lava po o feagai pea ma faafitauli o le olaga, o lona mafai ona lagonaina le agaga paia ua faamalosia talu mai lona papatisoga, ma faamanuiaina lona olaga i ni auala se tele. Ua aumaia e le Agaga paia le filemu i lona loto a’o feagai pea ma ona lu’itau, ua avanoa ai o ia e auauna atu i isi ma le poto ma le lagona malamalama ma ua faalauteleina ai lona malamalama o le talalelei, aemaise lava lona vala’auga o se faiaoga o le Aoga Sa.
I le toe to-manatu i se lesona sa ia saunia mo lana vasega, fai mai Amy, “Ua e iloa, o le Papatisoga ua na o se amataga. O le tatou liua moni e sau mai lo tatou tumau se’ia o’o i le i’uga. Ai a se manaia pe a tatou ola faapei o tagata Aneti-Nifae-Liae i le Tusi a Mamona? Ina ua uma ona tu’u atu atoa i latou i le Atua, faatasi ai ma o latou faafitauli ma tofotofoga, na faapea mai, e latou te le’i pa’u’u ese ai lava.”