Itulau i le lotoifale
Ta le Logo!
O le masani a Apuauro Fa’aofo o le fiafia lea i talafaasolopito o aiga. I le 2017, na siitia ai o ia ma si ona aiga laitiiti i le Uarota a Pesega 6 i le siteki a Pesega Samoa, lea na valaauina ai lona to’alua e avea ma Epikopo. Toeitiiti i le taimi lava lea, na maitauina ai e Apu e leai se polokalama o talafaasolopito o aiga o faatulagaina i totonu o lana uarota fou. Ma sa mana’omia ona ia faia i ai se faiga e uiga i lea mea.
Na naunau se tasi o uo lelei o le uarota e fesoasoani. O Foketi Manon Fuimaono-Malo na ia maua fo’i lona ia lava fiafia e faia talafaasolopito o aiga, o se lagona na maua mai lona tinā matua, o lē sa ia fesoasoani tele i ai i le tausailia lea o tagata o lona aiga. A’o talatalanoa Manon ma Apu i auala e faia ai, na la iloina ai, e na o le lua pe tolu ni aiga o le latou uarota e i ai komepiuta, o lona uiga o le to’atele o aiga e leai so latou silafia e uiga i le FamilySearch, o se a’upega malosi fa’aonaponei i luga o upega tafa’ilagi ua ofoina mai e Le Ekalesia a Iesu Keriso o le Au Pa’ia o Aso e Gata Ai, e faamaumauina ai talafaasolopito o aiga. O se lu’itau e tatau ona la fo’ia.
Faatasi ai ma le lagolago o le aufono faamaopopo a le uarota, na latou faatulagaina ai se komiti e vaaia talafaasolopito o aiga ma amata loa ona asiasi atu i aiga ta’itasi, ma fesoasoani ia i latou ina ia faamaumauina o latou tupuaga faale-aiga. “Na avea lo’u umukuka ma nofoaga ogatotonu o talafaasolopito o aiga,” o le tala ata lea a Apu. “E i ai le matou laupapa ma le lisi atoa o aiga o le uarota, ma e ta’i lua Aso Sa ma matou feiloa’i ma fono e ripoti mai a matou asiasiga.”
O nei taumafaiga na faatupuina ai se lagona faaosofia e uiga i gaoioiga o talafaasolopito o aiga i totonu o le uarota. E o mai le komiti ma aumai igoa o le aiga i le fale o Apu, ma faaaoga ai lana komepiuta ma lana feso’otaiga faa-initoneti e ta ai i totonu igoa i le polokalama o le FamilySearch.
“Pe tusa lena o Iulai ia Aokuso,” o le tala lea a Apu. “O le sini o le mafai lea ona ave e aiga ta’itasi ni igoa se lua i le malumalu ae le’i o’o ia Novema.”
E le’i umi, ae faigaluega tagata o le komiti o talafaasolopito o aiga i le fale o Apu, toeitiiti lava i aso uma, aemaise ai Manon ma lona to’alua, masani ona taunu’u atu i le taeao po se’ia o’o i le leva o le po. Na i’u lava ina latou mafaufau, e sili atu ona lelei pe a faatulaga se gaoioiga mo le uarota atoa: o se marafoni o talafaasolopito o aiga mo le 12 itula.
I le afiafi malu o se Aso Faraile ia Setema 2017, na faapotopoto ai le uarota a Pesega 6 i le fale taalo o le latou falesa, e tatalaina lenei gaoioiga i se faigalotu. Mo le latou gaoioiga muamua lenei, na tuuina atu i aiga taitasi ni pepa tetele ma faatonuina ina ia tusia e i latou a latou auga tupulaga e fa i le latou la’au o tupuaga faale-aiga. Ina ua faapipi’i uma pepa i luga o le puipui, na ofo le toatele o le uarota i le to’atele o tagata o le uarota e i ai feso’ota’iga ma isi. “Na latou vaaia igoa e masani ai ma vaaia ai le maligi o loimata ma feofoofoa’i ina ua latou iloa e aiga,” o le tala lea a Apu. “O le gaoioiga lenei na faata’atiaina ai se lagona ma se agaga matagofie na o matou mauaina e lena po atoa.”
Mai lena taimi, na faasolosolo ai aiga e galulue faatasi ma tagata o le komiti i le taina lea o igoa i totonu o le FamilySearch. Sa i ai se logo sa faapipi’i i le laupapa i le faletaalo, ma o taimi uma lava ua saunia ai se igoa mo sauniga o le malumalu, o le a tusia e se tagata le igoa lea i luga o le laupapa ona ta lea o le logo.
“I le taimi muamua, sa seāseā ona faalogoina le logo ua tatagi, masalo pe na o se faatasi pe faalua i le itula, ae peita’i, o taimi uma lava e faalogo ai le tatagi a le logo, e taofi uma tagata ma patipati ma fiafia,”o le tala lea a Apu. “A’o faaauau pea le afiafi, ma ua faalogoina ai le tatagi faalausoso’o o le logo—toetoe lava i 10 minute uma—ma e le’i umi, ae filogia le alalaga fiafia i loimata filemu o le olioli.”
E manatua lelei e Manon lenei a’afiaga ma le fiafia tele. “Sa matuā tele se fiafiaga mai tagata o le uarota, o ē na auauna ma le lelei. Na tatagi le logo i le po atoa a’o lagona e tagata uma le agaga matagofie o Elia i o latou loto.”
I se tasi taimi a’o latou galulue, o le uso o Manon o Gilderhenomal Sapini Fuimaono na la’a atu i fafo e aumai se mea mai le ta’avale. O le latou falesa e tu i se nofoaga e to’atele tagata e nonofo ai, ma sa faate’ia Sapini—aemaise ona o le leva o le po—i lona vaai atu i le toatele o tagata o le tuaoi o lo’o faapotopoto mai fafo o le faitoto’a o le pa o le falesa. Na valaau atu ia te ia ma le fia iloa, “O le a le mea o loo tupu i le tou falesa i lenei po?”
E tusa ai ma tala a nei tuaoi, latou te le’i vaai muamua lava i le falesa ua matuā tumutumu i le toatele o tagata, o e sa nofonofo solo ma femiomioa’i i le mea e paka ai taavale, e o’o lava i le mea o lo’o i ai le pa faataamilo o le falesa.
Sa lē mautonu Sapini ona o lana vaai e pogisa le mea o lo’o paka ai taavale, e gaogao e leai ni taavale, sei vagana ai ni nai taavale e le atoa se sefululua. Ae peita’i, na tumau lava le lagona o tagata o le tuaoi, na siomia le lotoa o le falesa i le anoanoai o tagata ma amata ona gasolosolo ese atu i le faagasologa o le po.
I faatalatalanoaga se tele, a Sapini, Manon, Apu ma isi mai le latou uarota na manatunatu faapea, masalo na mafai ona vaai atu tagata tuaoi nei e ati i le veli i lena afiafi. “Na matou lagona moni lava o tagata e ona igoa ia sa matou taumafai e saili, sa i ai iina e fesoasoani ina ia faataunu’uina lenei sini maoa’e,” o le tala lea a Manon.
E na’o ni nai mea maoa’e tutupu e tupu i taimi o gaoioiga faavavega o talafaasolopito o aiga, i le mea o lo’o saunia ai le afe ma afe o igoa mo sauniga o le malumalu.
“O lo’o i ai pea le alofa i lo’u loto pe a ou mafaufau i lena po matagofie,” o le tala lea a Manon. “Sa faatumulia a’u i le fiafia i le fesoasoani atu lea i tagata o la’u uarota o ē na galulue malosi e fesoasoani i ō latou augā tua’a ina ia faia o latou sauniga i le malumalu. Na matuā manifinifi le veli i lena po ma matou lagonaina le olioli o agaga o ē ua leva ona faatalitali mo ō latou igoa ina ia saunia mo le malumalu.”