Sau, Mulimuli Mai ia te A’u: Tusi a Mamona
E mafai faapefea ona ou sailia meaalofa faaleagaga?
(14-20 Tesema)
O meaalofa faaleagaga e tuuina mai e le Atua e ala mai i le Agaga Paia mo lo tatou manuia (tagai i le Moronae 10:8). Ua faamanuiaina i tatou taitoatasi i meaalofa faaleagaga mai le Atua, ma e tele meaalofa e mafai ona tatou maua.
O nisi meaalofa faaleagaga ua faailoaina mai i tusitusiga paia (tagai i le Moronae 10:9–16; Mataupu Faavae ma Feagaiga 46:13–25); ae o le tele e le o i ai. E mafai faapefea ona e faailoa ma atiina ae meaalofa faaleagaga ua tuuina atu ia te oe e le Atua? E mafai faapefea ona e atiina ae isi meaalofa? O nai manatu nei e fesoasoani ai ia te oe:
Ole atu
Tatalo ma ole atu i le Atua po o a meaalofa faaleagaga ua Ia faamanuiaina ai oe ae po o le fea foi e tatau ona e galue agai i ai. O le a Ia fesoasoani ia te oe. O lou faamanuiaga faapeteriaka e ono faaalia ai foi au meaalofa faaleagaga. Afai e te lei mauaina lou faamanuiaga faapeteriaka, mafaufau e talanoa i lou epikopo po o le peresitene o le paranesi e uiga i le mauaina [o lou faamanuiaga faapeteriaka].
Suesue
O meaalofa faaleagaga e manaomia ai le taumafaiga ia maua ai. A o taumafai ai mo se meaalofa patino, ia mafaufau e aoao atili e uiga i ai mai tusitusiga paia, lou faamanuiaga faapeteriaka, po o lauga o konafesi aoao. E mafai foi ona e fesili i isi e uiga i o latou aafiaga.
Galue
O le aoao e uiga i meaalofa faaleagaga e aoga tele, ae e tatau ona faaaogaina lena malamalama. Pe a e faatinoina le faatuatua ia Iesu Keriso, salamo, ma tausia au feagaiga, ua e agavaa e maua meaalofa faaleagaga. Ma le isi, ia saili ni tulaga e mafai ai ona faaaoga au meaalofa faaleagaga. Ia manatua o nei meaalofa e le gata ina e manuia ai, ae e mafai foi ona faamanuiaina ai isi (tagai i le Mataupu Faavae ma Feagaiga 46:26). E mafai faapefea ona e faaaogaina au meaalofa faaleagaga e fesoasoani atu ai i isi?