O le a se mea e mafai ona tatou aoaoina mai le Tusi a Moronae?

(30 Novema–6 Tesema)

What can we learn from the Book of Moroni?

Sa soifua Moronae i taimi faigata. Sa ia molimauina le faatafunaga mulimuli o sa Nifae, na maliu lona tamā i le taua (tagai i le Mamona 8:3), ma o sa Nifae o e na lē faafitia Iesu Keriso sa fasiotia (tagai i le Moronae 1:2). O Moronae foi sa na lē “faafitia le Keriso” (Moronae 1:3). Na sola o ia mo le saogalemu ma sa lafilafi o ia mo le tele o tausaga.

“Ou te tusia ai ni isi mea faaopoopo itiiti” (Moronae 1:4)

I le taimi lea, na manatu ai Moronae ua uma ana tusitusiga i luga o papatusi, ae o le finagalo o le Alii na ia “tusia ai ni isi mea faaopoopo itiiti, atonu o le a aoga i o’u uso … i se aso o i luma” (Moronae 1:4).

O le a mea sa ia tusia?

Na faaopoopo e Moronae le mataupu e 8 ma le 9 i le Tusi a Mamona, na faaaofia ai lana otootoga o le Tusi a Eteru, ma faaopoopo i ai lana lava tusi (o le Tusi a Moronae) i papatusi a Mamona.

O tusitusiga a Moronae o loo i ai mea e tele e taua mo i tatou. Sa ia tusia e uiga i le galuega a le Ekalesia (tagai i le Moronae 1–6), na faaaofia ai aoaoga mai lona tamā, o Mamona (tagai i le Moronae 7–9), ma tusia ai lana molimau mulimuli (tagai i le Moronae 10).

Aisea na ia tusia ai?

I le iloaina ai o faamoemoega paia o le Tusi a Mamona, na tatau ai ia Moronae ona filifili ma le faaeteete mea sa ia tusia. A uma ona faitau le Tusi a Moronae, mafaufau e fesili pe aisea na filifili ai Moronae e faamaumau mea sa ia tusia. O le a se mea sa ia lagona e taua? O faapefea ona faatosina e le molimau faaiu a Moronae ou lagona e uiga i le Tusi a Mamona?