Autalavou Matutua
Faamasinoina i le Faamasinoga Amiotonu (E oo lava i luga o Ala o Faasalalauga Faaagafesootai)
Faatasi ai ma le fesoasoani a le Faaola, e mafai ai ona tatou aoao e faamasino atu i auala e finagalo o Ia tatou te faia ai.
“Aua le faamasino atu.”
Ua tatou faalogo soo i lenei mea i le lalolagi i aso nei, faatasi ai ma savali e ta’u mai ai e le o sa tatou aiā le faamasino o isi. O le upu faamasino lava ia ua tele mea le lelei ua faapipiiina i ai. Ae i le avea ai o ni tagata o le Ekalesia a le Faaola, ua tatou iloa o le faamasinoina o se mea lea ua Ia fautuaina i tatou e fai—pe afai tatou te faia i Lana lava ala.
Ina ua faamalolo e Iesu se tagata i le Sapati, sa faamasinoina leaga o Ia ona sa faatuina e le tulafono a Mose ni tapulaa i mea e mafai ona e faia i le Sapati, ma sa lei manatu tagata na galue o Ia i totonu o na taiala. Ae na aoaiina i latou e le Faaola ona o le vave ona latou saili masei o isi. Ona Ia fautuaina lea o i latou e “aua le soona faamasino, a ia faamasino i le faamasinoga tonu” (Ioane 7:24; tagai foi Joseph Smith Translation, Matthew 7:1–2).
E faafia ona tatou faamasinoina isi, e pei o i latou na faamasinoina le Faaola, i auala le amiotonu? Atonu e sili atu nai lo le mea o loo tatou mafaufau i ai! Aua e ese le faigofie o le faamasinoina o isi, ae maise lava i tulaga o ala o faasalalauga faaagafesootai, atonu e manaomia ona tatou aoao i le auala e faaaoga ai le fautuaga a le Faaola e faamasino i le faamasinoga tonu i le lalolagi i aso nei.
Iloatinoina o Faamasinoga Amiotonu e faasaga i Faamasinoga Amioletonu
O le faamasinoina o se vaega o lo tatou faitalia. E tele mea e tatau ona tatou faaaogaina ai le faamasinoga i le olaga: o mea e pei o le filifilia o se matātā, filifili po o ai e faaalu i ai se taimi ma le auala e faaalu ai o tatou taimi, filifiliia o ala o faasalalauga e faaaoga, ma isi mea faapena. Ae e mafai faapefea ona tatou faia nei faamasinoga—ma mulimuli ane o faamasinoga uma—ma le amiotonu?
Sa tuuina mai e Peresitene Dallin H. Oaks, o le Fesoasoani Muamua i le Au Peresitene Sili, ni taiala se ono mo le ala sao e faamasino ai. E mafai ona tatou iloa e amiotonu a tatou faamasinoga pe afai:
-
Latou te “aloese mai le folafola atu e faapea, [ua] mautinoa le faaeaga o se tagata po o … ua noatia tumau mo seoli.”
-
E “taialaina i latou e le Agaga … , ae le o le ita, taui ma sui, loto leaga, po o le manuia o le tagata lava ia.”
-
O i ai “i totonu o o tatou tulaga faatausimea.”
-
O aofia ai “lava o le malamalama e uiga i mea moni.”
-
E le o faatatau i tagata ae e faatatau i tulaga.
-
Latou te “faaaogaina tulaga faatonuina amiotonu.”1
Na tuuina mai foi e le perofeta o Moronae se taiala mo le faamasino amiotonu: “O mea uma ua lelei e mai le Atua; ma o le mea ua leaga e mai le tiapolo; ona o le tiapolo … ua valaau ma faatosina tagata i le agasala, ma ia latou faia pea le mea leaga” (Moronae 7:12).
Pe a tagai faasolosolo ia ala o faasalalauga faaagafesootai, lauliliuina o faauooga, po o le filifili pe faapefea ona faaalu o tatou taimi, a o lei faia se faamasinoga, e mafai ona tatou fesili ifo ia i tatou lava, Pe o lenei tusiga/tagata/gaoioiga:
-
ou te maua ai ni lagona toafilemu ma lelei?
-
o valaauliaina au e fai le lelei?
-
o fesoasoani ia ou alofa ai i le Atua ma auauna atu ia te Ia?
A tatou iloa o mea lelei uma e mai le Atua, e mafai ona tatou faaaogaina o tatou faitalia e fai ai ni faamasinoga poto ma amiotonu e uiga i isi, e uiga ia i tatou lava, ma e uiga i mea tatou te faatumulia ai o tatou olaga.
O le Aluese mai Li’o o le Faamasinoga Amioletonu
O lenei la ua tatou mautinoa le uiga o le faamasinoga amiotonu, o le a se mea e mafai ona tatou faia pe a tatou iloa ua tatou mau i totonu o se taaviliga o faamasinoga le lelei? O ni nai manatu nei:
-
Fai se anapogi o ala o faasalalauga faaagafesootai. O lenei mea e mafai ona e maua ai se avanoa e faatelegese ai, toe faavasega, ma toe fesootai atu i isi i ni auala moni. Pe a tele ina e vaai i tagata i fafo atu o ala o faasalalauga faaagafesootai, o le a e iloa ai o i latou o ni tagata moni e i ai ni tauiviga moni, ma e faaitiitia ai lou lilifa atu e faamasino i latou.
-
Nai lo le tuuina i luga o ni tusiga e uiga ia te oe lava ia, tusi e uiga i se tasi e te alofa i ai o lē na musuia oe. Ta’u atu i isi le mafuaaga e te faamemelo ai i lenei tagata. O lenei faiga ua tuuina atu ai ia te oe se avanoa e te taulai atu ai i isi ma ia faamanuia nai lo o le faaviivii.
-
Filifili e tuu atu se tali faamaoni ma le loto i ai se tasi i aso taitasi i luga o ala o faasalalauga faaagafesootai, a le o se faamanuiaga o se aso fanau, o se faamalo, pe na o se savali agalelei foi.
-
O le a i ai lava i taimi uma i luga o ala o faasalalauga faaagafesootai ia tagata o ē e tele naua mea latou te faasoaina, ua na o a latou tafaoga mananaia e faasoa mai, ua foliga mai o ni aiga ua atoatoa, pe e masani foi ona fefinaua’i. Ae tatou te lei faamasino atu, e mafai ona tatou fesili ifo ia i tatou lava, “O le a se mea ua silafia e le Alii e uiga i lenei tagata, ma o le a se mea e mafai ona ou aoaoina e uiga ia i latou?” Tatalo mo se fesoasoani e vaai atu ai ia i latou e pei ona Ia faia. Ma afai o a latou tusiga e tuuina atu ai ia te oe i taimi uma ni lagona le lelei, e mafai lava ona e lē toe mulimuli ia i latou.
O le vaai atu i tagata uma i o latou tulaga moni—o fanau a ni matua faalelagi e suia ai o tatou lagona papa’u e uiga ia i latou i se vaaiga e faavavau. E i ai le mana i le iloaina o le faasinomaga moni ma le faamoemoega o tagata uma. E pei ona faamanatu mai ia i tatou e Sister Michelle Craig, Fesoasoani Muamua i le Au Peresitene Aoao o Tamaitai Talavou:
“O loo i ai sou natura paia ma se faamoemoega e tulaga ese ia te oe lava. …
“E faigofie ona faatusatusa i tatou lava i isi. O le a i ai lava se tasi e foliga mai ua i ai uma mea uma pe ua sili atu foi ona taua nai lo i tatou. Ae e masani ona galo ia i tatou o o latou faamoemoega e ese mai o tatou faamoemoega. Pe a tatou taumafai e ola moni i tagata tonu e i ai i tatou—pe a tatou malamalama ma talisapaia meaalofa ma taleni a le Atua ia e tulaga ese ia i tatou taitoatasi—ona mafai lea ona tatou lagonaina moni le olioli.”2
I le iuga, o le sola ese mai le li’o o le faamasino atu i luga o ala o faasalalauga faaagafesootai e manaomia ai le faatinoga i la tatou vaega. E manaomia ai le vaavaai i fafo atu o i tatou lava ia pa’i atu ai i le olaga o se isi tagata. E manaomia ai le siitiaina o isi ma le faasoaina atu o le Malamalama o Keriso. O le faia o lea mea, e le gata ina tatou auauna atu ai i isi, ae e mafai foi ona tatou maua ai ni lagona lelei ia i tatou lava.
Faatoilaloina o le Faamasinoina o le Tagata Lava Ia ma Faatusatusaga Oona
O se tasi o meafaigaluega malosi a Satani o le taumafai lea e taofia i tatou mai le mauaina o se malamalamaaga moni i lo tatou faasinomaga moni. A galo ia i tatou lo tatou faasinomaga moni, o manatu faamasino ma le faitio ia te oe lava e mafai ona suia ai lagona o le agaalofa ma le alofa mo oe lava ia. Tatou te motuese ma isi, i tatou lava, ma e oo lava i le Agaga Paia.
O le mea moni, o le faatusatusa e le o taimi uma e faatatau ai ia i latou o loo tatou faatusaina i ai i tatou lava; e masani lava ona faatatau ia i tatou ma o tatou lava le mautonu. O le faatusatusa e mafai ona avea o se faamasinoga amioletonu o i tatou lava.
Ma e ui o le faatusatusa atonu o le gaoi o le olioli,3 o le iloaina o lo tatou taua, o o tatou malosiaga ma taleni, ma le faamoemoega a le Tama Faalelagi mo i tatou ma ē mafai ona avea ai i tatou, o se ki lea i le olioli.
Na faaaluina e le Faaola Lona soifua i le faia o mea lelei (tagai Galuega 10:38). Sa soifua o Ia i Lona soifuaga mo isi, e aunoa ma se faaletonu e tasi. Ae peitai sa aoaiina ma faamasinoina lava o Ia. Ae ona sa Ia silafia o ai moni o Ia ma Lona faamoemoega, na mafai ai ona Ia taulimaina faamasinoga ma le faatamalii, e aunoa ma le faalavelaveina o le mea na tatau ona Ia faia.
A o tatou mulimuli i Lana faataitaiga, e mafai foi ona tatou faia faapea! Ua faafaigofie e le lalolagi ona faama’umau o tatou tagata i le faatusatusa ma le faamasino ma galo ai o ai i tatou, ae e mafai ona tatou aoao mai ia Sister Joy D. Jones, o le Peresitene Aoao o le Peraimeri, o lē na aoao mai: “Afai o le alofa tatou te lagonaina mo le Faaola ma mea na Ia faia mo i tatou ua sili atu nai lo le malosi tatou te tuuina atu i vaivaiga, le mautonu o le tagata lava ia, po o mausa leaga, o le a fesoasoani mai o Ia ia i tatou e faatoilalo mea na mafua ai mafatiaga i o tatou olaga. Na te laveaia i tatou mai ia i tatou lava.”4
E pei ona tatou iloa, “ua tele lava le taua o agaga i le silafaga a le Atua” (Mataupu Faavae ma Feagaiga 18:10). Ia sui laia o le upu agaga i lou lava igoa. Ia mafaufau i lena mea mo sina taimi. E silafia e le Tama Faalelagi lou igoa, Na te silafia lou taua, ma na maliu Lona Atalii e Toatasi na Fanaua mo oe ona e taua tele oe ia te Ia.
Ma pe a lagonaina le mamafa o le lalolagi ma oo mai ai lagona faatusatusa, faalatalata atu ia i Laua ma o le a e lagonaina le liusuavaia ese atu o le le mautonu ia te oe lava ma lou faamasinoina o oe lava, ae lagona ai le talitonuina moni lea e sau mai lou iloaina o lou taua lē mafaatauina.
Vaavaai Atu i le Faaola
E mafai ona tatou vaavaai atu i taimi uma i le Faaola mo le taitaiga i mea uma tatou te faia. O se vaega o mea Na te ofoina mai ia i tatou e ala i Lana Togiola o le mana gafatia lea e suia ma iloa ai le ala e faia ai mea uma ua Ia finagalo tatou te faia. Ma a tatou filifili e mulimuli ma faalatalata atu ia te Ia, e fesoasoani o Ia ia i tatou e aoao e lafoai ese faamasinoga le amiotonu ma vaai atu i isi—ma i tatou lava—e ala i Ona fofoga.