O Se Faamanuiaga o le Tu masani o le Kerisimasi
E alala le tusitala i Iuta, ISA.
Sa leai se mea faapitoa e uiga i le faaaluina o le Kerisimasi i se fale fou, ae o se faamanuiaga faaleperisitua se tasi na suia ai mea uma.
Ata na tusia e Tracy Walker
Sa 14 ou tausaga i le taimi na ou oo ai i la’u Kerisimasi muamua e leai se kiona. Na faatoa masii atu lou aiga mai atumauga o Iuta agai i Texas, ISA. Ia te au, o Texas sa pei ua laugatasi tele ma vevela. Sa faigata ona lagona le agaga o le Kerisimasi ona sa leai ni au uo i la’u aoga fou aemaise lava sa leai se kiona i le eleele. Sa ou lagona sa pei sa lei taliaina au i soo se mea, o lea sa tele ai ina ou lagonaina le tuuatoatasi ma le faanoanoa.
E ui i lou le fiafia, na o le toe tasi le vaiaso oo i le Kerisimasi, ma sa ou faalagolago i a matou tu masani o le Kerisimasi ia siitia ai lo’u agaga. O gaoioiga malie sa faia faatasi e lo matou aiga i tausaga ua mavae sa ou lagona ai le fiafia tele. O tu masani o se vaega tele lea o le ala matou te faamanatuina ai le Kerisimasi, o lea sa ou manatu ai e leai se mea ou te popole ai. Sa ta’ua i latou o ni tu masani mo se mafuaaga, o lea sa ou iloa ai e tatau ona tausisia pea.
Faatumauina o le Ola o le Agaga o le Kerisimasi
Sa fetolofi telegese mai aso e tau atu i le Kerisimasi. Matou te lei faia i lea taimi se mea e fai faatasi o se aiga e faamanatu ai, o lea sa ou lagonaina ai si faanoanoa. Ina ua oo i le aso e sosoo ma le Kerisimasi, sa ou faatalitali i le aso atoa mo se mea e tupu—soo se mea lava o le a faaali mai ai ia te au o le a mafai lava ona tausia a matou tu masani faapelepele a le aiga i lo matou fale fou. Ou te mautinoa na mafai ona ou amataina e au lava nei tu masani taua, ae sa ou le manao ai. I se isi itu, sa ou vaavaai mo se faailoga e faaali mai ai ia te au o loo ola pea le agaga o le Kerisimasi.
Na faasolosolo le ao ina po ma sa faateteleina ai lo’u le fiafia. Sa loimatā o’u mata a o faapotopoto faatasi lou aiga e faia a matou lotu afiafi. Sa lagona le malulu ma le gaogao o le matou fale atoa, e ui lava sa matou nonofo uma ai i totonu. Na faafuasei lava, ona talepe e lo’u tamā le filemu i se fesili se tasi.
“E i ai se tasi e fia maua se faamanuiaga faaleperisitua?”
Na tau pe lo’u fatu. Sa ou popole tele pe o le a matou tuuina i luga a matou moli o le Kerisimasi pe leai, pe taoina ni kuki o aso fiafia, o lea na galo ai ia te au se tasi o tu masani faapitoa sa matou faia i Po uma o le vaeluaga o le Kerisimasi—sa matou mauaina uma se faamanuiaga faaleperisitua. O le mauaina o se faamanuiaga mai lo’u tamā i taimi ua tuanai na aumaia ai le filemu ia te au, ae e le o tagata uma o lo’u aiga sa fiafia i le mauaina o se faamanuiaga. O nisi taimi e fai mai ai o’u tei ma lo’u tina latou te le o lagonaina le manaomia ai o se faamanuiaga. Ou te lei manao ia maualuga o’u faamoemoega pe afai o le a teena e isi tagata uma le mauaina o se faamanuiaga.
Ae o le taimi lenei sa ese. Sa tu i luga lo’u tina ma saofai i le nofoa na aumai e lo’u tamā mo i matou.
“Ou te manao i so’u faamanuiaga,” na ia fai atu lemu ai.
Sa faateia i matou uma, ae sa lei faatuai lo’u tamā. Sa tuu ona lima i luga o le ulu o lo’u tina ma amata ona tautala. Sa ou lagonaina le iloa lelei e lo’u tamā o lagona ma tauiviga patino o lo’u tina. Sa ia tautala atu i upu o le faamafanafanaga ma le filemu ia te ia i lenei taimi o suiga.
Sa faafuasei lava ona ou lagonaina se lagona mū i totonu o lo’u fatafata—e pei lava na tutu e se tasi se afitusi i totonu o a’u. Na ou iloa sa ou lagonaina le Agaga Paia, e ui lava o le mu i lou fatafata sa le o le ala lea sa masani ona ou lagonaina ai muamua le Agaga. Sa pei lava na fetalai tuusao mai le Tama Faalelagi ia te au, e ui sa le o lo’u faamanuiaga faaleperisitua lea!
Ina ua fai mai filemu lo’u tamā “amene” ma pupula o’u mata loimatā, sa ou iloa ai na fetagisi lou aiga atoa. Na matou lagona uma lava le fetalai mai o le Agaga ia i matou i se auala agalelei ma le alofa e faapea, o le a lelei mea uma. Sa feopoai lo’u tina ma lo’u tamā, ma sa ou lagonaina e pei o le ao o timuga lea sa faamalumalu mai i luga ae o lo’u ulu mo se taimi umi na iu lava ina tuu avanoa atu i le la susulu.
Sa matou mauaina uma faamanuiaga, e aofia ai ma au. I lo’u faamanuiaga, na faamautinoa mai ai e le Alii ia te au o loo Ia silafia pea au ma finagalo ia ou fiafia. Na aumaia ai ia te au lagona o le filemu ma le mafanafana lea sa ou le lagonaina talu ona ou masii atu i Texas.
E Moni le Mana o le Perisitua
Atonu matou te lei tausisia uma ia tu masani i lena tausaga, ae sa matou manatuaina pea lagona o le molimauina o le mana o le Atua e ala i le faamanuiaga faaleperisitua a lo’u tamā. O le a ou manatua pea le auala na suia ai ou lagona o le faanoanoa i le filemu ma le olioli. Sa ou aoaoina ai foi se lesona taua e uiga i le mana o le perisitua. Pe afai e foliga mai ua sese le itu ua agai i ai mea uma ua siomia ai oe, o se faamanuiaga faaleperisitua e mafai ona faamanatu atu ai ia te oe le i ai o le tausiga ma le alofa o le Alii i lou olaga.