Faia o Ala o Faasalalauga Faaagafesootai o se Nofoaga Lelei

Ata

person holding a smartphone sending text messages

I le lima tausaga talu ai, sa ma filifili ai ma lo’u toalua e amata se alaata o le YouTube, lea sa amata ai ona ma faasoa moni atu le ala o loo matou ola ai o ni tagata o le Ekalesia a Iesu Keriso. O lo ma manatu o le talanoa lea e uiga i o tatou talitonuga e ala i tulaga o loo ma ola ai.

Sa maoae se faamanuiaga o le mauaina o savali musuia mai nisi o e na mulimulitai ia i ma’ua e ta’u mai ai e uiga i le o atu i le lotu mo le taimi muamua pe o le papatisoina foi! O nei savali ua faatumulia ai i ma’ua i le olioli tele.

Ma te matua faafetai tele mo aafiaga faamauoaina lea ua ofoina mai e ala o fesootaiga faaagafesootai ia i ma’ua e faasalalauina atu ai savali o le talalelei toefuataiina i le faasoaina atu lea o o ma olaga. Ae e ui na mafai e ala o faasalalauga faaagafesootai ona faatupuina ni aafiaga maoae, fesoasoani ia i tatou e atiina a’e ni sootaga anoa, ma faatagaina i tatou e faasoa atu a tatou molimau o le talalelei, e mafai foi ona tatou maua ai aafiaga e faavaivaia ai i tatou faaleagaga, taitai atu ai i tatou e faamasino isi i auala le amiotonu, ma faagaloina ai po o ai moni i tatou.

O le vaega a le autalavou matutua o le masina lenei o le a talanoaina ai na autu ma isi mea. E faigofie lava ona faatusatusa i tatou lava po o o tatou olaga i mea tatou te vaaia i ala o faasalalauga faaagafesootai, ae e mafai ona tatou aoao e faaaoga ala o faasalalauga faaagafesootai e fatu ai se avanoa lelei lea tatou te tetee atu ai le faamasinoina o i tatou lava po o isi, maua le talitonuga i o tatou natura paia, ma le mea e pito i sili ona taua, o le faasoa atu i isi, e ala i a tatou faataitaiga, le fiafia lea e aumaia e le talalelei a Iesu Keriso.

Bárbara Rodríguez

Mai taitai o le Ekalesia

“A tatou vaai ma le manino atili i o tatou lava lē atoatoa, o le a itiiti lo tatou lilifa atu e vaavaai atu i isi “e ala i se fā’ata nenefu.” Tatou te mananao e faaaoga le malamalama o le talalelei e vaai atu ai i isi e pei ona silasila i ai le Faaola —i le agaalofa, faamoemoe, ma le alofa mama. O le a oo mai le aso o le a tatou maua ai se malamalama atoatoa o loto o isi ma o le a loto faafetai i le ofo mai ia i tatou o le alofa mutimutivale —e pei lava ona tatou ofo atu mafaufauga ma upu o le alofa moni i isi i lenei olaga. …”

“Ua i ai i upu se mana e ofo ai, e faafiafia ai ma faalotovaivaia ai foi. Atonu tatou te manatuaina uma lava ni upu lē lelei na faalotovaivaia ai i tatou ma isi upu na tautalagia i le alofa na matua faagaeetia ai o tatou agaga. O le filifili e fai atu na o upu e lelei e uiga i isi —ma i —isi e siitia ma faamalosia ai i latou o siomiaina i tatou ma fesoasoani ai i isi ia mulimuli i le ala a le Faaola.”

Peresitene Jean B. Bingham, Peresitene Aoao o le Aualofa, “O Le A Ou Aumaia le Malamalama o le Talalelei i totonu o Lo’u Aiga,” Liahona, Nov. 2016, 6, 7.