Faamalamalamaina o le Lalolagi i Pale
Ua ou iloa o le auauna atu e aumaia ai le olioli e le mafaamatalaina, ma o faatinoga laiti e mafai ona tuputupu a’e ai tagata taitoatasi i ni auala ofoofogia.
Ata na tusia e Ellen Marello
Faatasi ai ma ē leai ni aiga i magaala ma tagata sulufai o loo momoe i paka o Pale, Farani, o le manaomia o se fesoasoani o loo i ai i aso uma i luma o tatou mata, e oo lava i le vaitau o le Kerisimasi. Sa matou filifili ma ni uo se toalua e faatu se vaega i le lotoifale e ta’u o le Lotogatasi e Galulue Faatasi e fesoasoani atu i le mea matou te mafai ona faia.
Faatasi ai ma le lagolago a le toatele o tagata volenitia i le lotoifale faapea foi ma Au Paia o Aso e Gata Ai mai siteki e tolu i Pale, na matou faatulagaina ai ni gaoioiga o le Faamalamalama le Lalolagi e fesoasoani ai i o matou uso ma tuafafine o e le tagolima.
Mo le tolu tausaga sosoo, ua matou faatulaga ai se faatasiga faaiu-tausaga o le Faamalamalama le Lalolagi lea e o mai ai tagata tusiata, volenitia, ma malo mai lotu eseese ma faalapotopotoga i Pale, e faatino ma foai atu sapalai ia i latou e manaomia le fesoasoani. E tele masina e faaalu i tapenapenaga, ae na i ai i tagata volenitia ma tagata faafiafia se aafiaga loloto o le olioli tele i le auai ai i lea faatasiga. E leai se tasi o i latou e manao e misia. Mo la matou faatasiga lona tolu o le Faamalamalama le Lalolagi, e 82 tagata auai na o mai e ui lava i se tetee a auala o femalagaaiga!
A o loma le faamoemoe, sa matou saunia ma faaputuina ni ato faafafa na tumu i oloa mo le tausiga o le tumama e tufatufa atu i tagata sulufai ma i latou e leai ni mea e nonofo ai i Pale. Sa matou aoina foi palanikeke, ie afu, aluga, mea taalo, seevae tosotoso, e oo lava i se uila vilivae, ia na tuuina atu i tagata sulufai.
O le tausaga na te’a nei sa matou faatautaia ai foi se faaaliga la’ei i le taimi o le faamoemoe. O se tagata fai teuga e 22 tausaga le matua o lē sa auai na fai mai, o le lagolago na ia maua na tuuina atu ai ia te ia le malosi e talitonu ai i ona tomai. A o ma talanoa, sa faamanatu mai ia te au e manaomia e tagata uma le lagona o le manaomia ma o i tatou uma lava e i ai lava vaega tatou te le tagolima ai.
Ua matou tulimata’i atu i le tausaga a sau. Ua matou faamoemoeina e toatele atu tagata auai ma gaoioiga. O nisi foi ua ofoina mai faleteuoloa ma taavale pusa aisa e fesoasoani ia i matou a o matou galulue faatasi ai ma faalapotopotoga o le alalafaga ma faipaaga ma se kamupani tele e tapenaina meaai faavaomalo e tuuina atu ni meaai paleni mo i latou e le tagolima. Ua matou faatulagaina foi se auala e tuuina atu ai ni lesona e fai fua o le gagana Farani mo i latou o loo aoaoina le faaFarani o se gagana lona lua.
Ua ou iloa o le auauna atu i se mafuaaga mamalu e aumaia ai le olioli e le mafaamatalaina. O faatinoga laiti e mafai ona tuputupu a’e ai tagata taitoatasi i ni auala ofoofogia. O foliga ’ata’ata ma le agaga faafetai ua matou maua ua faaosofia ai i matou ia faia nisi mea.